जुन्या पेट्रोल स्कूटरचे रूपांतर करा इलेक्ट्रिक स्कूटरमध्ये, किती खर्च येईल? जाणून घ्या…

बंगळुरू : देशात इलेक्ट्रिक वाहनांशी संबंधित अनेक स्टार्टअप सुरू होत आहेत. त्याचबरोबर ई-वाहन विक्रीला प्रोत्साहन देण्यासाठी सरकारकडून डीलर आणि ग्राहक दोघांनाही सबसिडी दिली जात आहे. दरम्यान, बेंगळुरूस्थित काही स्टार्टअपने पेट्रोल स्कूटरचे इलेक्ट्रिक स्कूटरमध्ये रूपांतर करण्यास सुरुवात केली आहे. म्हणजेच, आता तुम्हाला नवीन ई-स्कूटर खरेदी करण्याची गरज नाही.

बंगळुरूमध्ये राईड-शेअरिंग स्टार्टअप कंपनी बाउन्सने अशीच योजना सुरू केली आहे. कंपनी कोणत्याही पेट्रोल इंजिन स्कूटरला इलेक्ट्रिक मोटर आणि बॅटरी बसवून इलेक्ट्रिक स्कूटरमध्ये रूपांतरित करते. यासाठी कंपनी फक्त 20 हजार रुपये घेते. बाउन्सने आतापर्यंत एक हजाराहून अधिक जुन्या स्कूटरचे इलेक्ट्रिक स्कूटरमध्ये रूपांतर केले आहे. कंपनी जुन्या स्कूटरमध्ये एक रेट्रोफिट किट ठेवते ज्यात इलेक्ट्रिक मोटर, बॅटरी समाविष्ट असते. स्कूटरमध्ये बसवलेली बॅटरी किट एका चार्जवर 65 किमी पर्यंत चालते. हे किट ऑटोमोटिव्ह रिसर्च असोसिएशन ऑफ इंडियाद्वारे प्रमाणित आहे.

बाऊन्सचे सह-संस्थापक विवेकानंद हल्लेकरे म्हणाले की, कंपनीने पायलट प्रोजेक्ट स्वरूपात जुन्या पारंपरिक स्कूटरला इलेक्ट्रिक स्कूटरमध्ये रूपांतरित करण्यास सुरुवात केली आहे. नंतर त्यांना समजले की पेट्रोल स्कूटरला इलेक्ट्रिकमध्ये रूपांतरित करण्यासाठी एक मोठी बाजारपेठ असू शकते. त्यांची कंपनी या स्कूटर मालकांसाठी सेवा केंद्रे देखील उघडत आहे. बाउन्स नंतर, आता इतर कंपन्यांनी देखील हे काम सुरू केले आहे, ज्यात एट्रियो (Etrio) आणि मेलाडाथ (Meladath) ऑटो कॉम्पोनेंट्सचा समावेश आहे.

मेलाडाथ अशी सोपी हायब्रिड किट बाजारात आणण्याची तयारी करत आहे, जी कोणत्याही जुन्या पेट्रोल स्कूटरला इलेक्ट्रिक हायब्रिड स्कूटरमध्ये सहज रूपांतरित करू शकते. म्हणजेच, जर गरज असेल तर ही स्कूटर पेट्रोल किंवा इलेक्ट्रिक कोणत्याही मोडमध्ये चालवली जाऊ शकते. मेलाडाथ यासाठी 40 हजार रुपयांपर्यंत शुल्क आकारेल.

अल्टीयस ऑटो सोल्युशन्स कंपनीचे संस्थापक राजीव अरोरा यांनी सांगितले की, इलेक्ट्रिक वाहनांमध्ये वापरल्या जाणाऱ्या लिथियम बॅटरीची किंमत 13 ते 15 हजार प्रति किलोवॅट आहे. त्याचबरोबर सरकार प्रति किलोवॅट 15,000 रुपयांपर्यंत अनुदान देत आहे. यामुळे उत्पादकांना प्रति किलोवॅट 2,000 रुपयांची बचत होते. अशा प्रकारे, वाहनात वापरल्या जाणाऱ्या इतर भागांची किंमत कमी होते.

राजीव यांनी सांगितले की ई-स्कूटर तयार करण्यासाठी सुमारे 30 ते 45 हजार रुपये खर्च येतो. हा फरक आहे कारण इलेक्ट्रिक दुचाकींमध्ये वेगवेगळ्या प्रकारच्या मोटर्सचा वापर केला जातो. स्कूटर बनवण्याचा सर्वात मोठा खर्च म्हणजे त्याची मोटर. सध्या दोन प्रकारच्या मोटर्स वापरल्या जात आहेत. मोटरच्या गुणवत्तेनुसार स्कूटरची किंमत बदलते.

हब मोटर : हे वाहनाच्या चाकाच्या आत वापरले जाते. त्याची किंमत 20 हजारांच्या जवळपास आहे.
मिड ड्राईव्ह मोटर : हे वाहनाच्या मध्यभागी स्थापित केले जाते. चेन किंवा बेल्टच्या मदतीने वाहन चालवते. ही मोटर थोडी महाग असते.