हिंजवडी आयटी पार्क परिसरात पुन्हा एकदा बेफाम वेगाचा कहर पाहायला मिळाला. गर्दीच्या वेळी कंपनीची बस अचानक फुटपाथवर चढत दोन चिमुकल्यांचा जागीच मृत्यू झाला. या दुर्घटनेनंतर वाहतूक आणि रस्ते सुरक्षा व्यवस्थेबाबत गंभीर प्रश्न उपस्थित झाले आहेत.

हिंजवडी आयटी पार्कमधील वाढत्या अपघातांच्या मालिकेत सोमवारी आणखी एक भीषण घटना घडली. सायंकाळी साडेसहाच्या सुमारास पंचरत्न चौकाजवळ कंपनीच्या कर्मचाऱ्यांना नेणारी बस अचानक नियंत्रणाबाहेर गेली आणि ती थेट फुटपाथवर चढली. गर्दीच्या वेळी हा प्रकार घडल्याने पादचाऱ्यांना सुटण्याची संधीही मिळाली नाही.

या अपघातात अर्चना देवा प्रसाद (८) आणि तिचा भाऊ सूरज देवा प्रसाद (६) यांचा जागीच मृत्यू झाला. त्यांची बहिण प्रिया देवा प्रसाद (१८) गंभीर जखमी असून तिला उपचारासाठी रुग्णालयात दाखल करण्यात आले आहे. पादचारी अविनाश चव्हाण आणि बसमधील काही प्रवासीही जखमी झाल्याची माहिती पोलिसांनी दिली.

अपघात छत्रपती शिवाजी महाराज चौक ते वाकड या व्यस्त मार्गावर झाला. साक्षीदारांच्या मते, कंपनीची बस अतिवेगात होती आणि चालकाने ताबा गमावल्यानंतर वाहनाने थेट चालत जाणाऱ्या नागरिकांवर धडक दिली. धडक इतकी जोरदार होती की परिसरात काही क्षणांतच भीतीचे वातावरण पसरले.

घटनेची माहिती मिळताच हिंजवडी पोलीस आणि वाहतूक विभागाचे अधिकारी घटनास्थळी दाखल झाले. काही काळ तीव्र वाहतूक कोंडी निर्माण झाली होती, ती पोलिसांनी तात्काळ सुरळीत केली.

हिंजवडी परिसरातील वाढती वाहतूक कोंडी, अवजड वाहनांची गर्दी आणि वारंवार होणारे अपघात या मुद्द्यांवर नागरिक सातत्याने आवाज उठवत आहेत. या दुर्दैवी घटनेनंतर “बेफाम वेग थांबणार कधी?” असा तीव्र रोष नागरिकांनी व्यक्त केला. अधिक कडक सुरक्षा उपाय, वेगनियंत्रण व पादचारी संरक्षणाच्या मागण्या पुन्हा जोर धरू लागल्या आहेत.

सारांश : महत्त्वाच्या घडामोडी एकाच नजरेत

• हिंजवडी पंचरत्न चौकात कंपनी बसने फुटपाथवरील पादचाऱ्यांना दिली जोरदार धडक
• दोन चिमुकल्यांचा जागीच मृत्यू, एक जखमी मुलगी गंभीर
• काही पादचारी आणि बस प्रवासीही जखमी
• नागरिकांमध्ये संताप; वाहतूक व सुरक्षा व्यवस्थेवर प्रश्नचिन्ह
• पोलिसांनी वाहतूक कोंडी नियंत्रणात आणली; पुढील तपास सुरू

The post हिंजवडी आयटी पार्क हादरलं: भरधाव बस फुटपाथवर; बहीण–भावाचा जागीच मृत्यू, अनेक जखमी appeared first on थोडक्यात घडामोडी.

पुणे : वाहतूक व्यवस्था सुरळीत करण्यासाठी हिंजवडीसह चाकण परिसरात काढण्यात येणाऱ्या अतिक्रमणानंतर त्या भागात तातडीने रस्ते विकसित करणे गरजेचे आहे. त्या दृष्टीने संबंधित यंत्रणांनी समन्वयातून वाहतूक कोंडी टाळण्यासाठी अपेक्षित प्रमाणात रस्त्यांचे रुंदीकरण करून रस्ते विकसित करण्याच्या दृष्टीने तातडीने पावले उचलण्याचे निर्देश उपमुख्यमंत्री तथा पालकमंत्री अजित पवार यांनी दिले. पुणे महानगर प्रदेश विकास प्राधिकरणाच्या आकुर्डी येथील मुख्यालयात त्यांनी चाकण भागातील वाहतूक कोंडी दूर करण्याच्या अनुषंगााने पाहणी केल्यानंतर आढावा बैठक घेतली, यावेळी ते बोलत होते.

या बैठकीला विधानसभा उपाध्यक्ष अण्णा बनसोडे, आमदार शंकर मांडेकर, आमदार बाबाजी काळे, विभागीय आयुक्त डॉ. चंद्रकांत पुलकुंडवार, पीएमआरडीएचे महानगर आयुक्त डॉ. योगेश म्हसे, अतिरिक्त महानगर आयुक्त दीपक सिंगला, जिल्हाधिकारी जितेंद्र डुडी, जिल्हा परिषदेचे मुख्य कार्यकारी अधिकारी गजानन पाटील, पीएमआरडीएच्या मुख्य अभियंता रिनाज पठाण यांच्यासह सार्वजनिक बांधकाम विभाग, महाराष्ट्र औद्योगिक विकास महामंडळ यांच्यासह विविध विभागाचे वरिष्ठ अधिकारी उपस्थित होते.

चाकण एमआयडीसीसह परिसरातील खराब रस्ते आणि वाहतूक कोंडीमुळे व्यवसायिक, कामगार, वाहनधारकांना अनेक अडचणी येतात. या भागात अतिक्रमणधारकांची संख्या अधिक असल्याने वाहतूक कोंडीची समस्या कायम आहे. त्यामुळे अतिक्रमण हटाव मोहीम राबवत तातडीने अरुंद असलेले रस्ते रुंद करण्यासाठी तातडीने पावणे उचलणे अपेक्षित आहे. अतिक्रमण काढल्यानंतर त्या ठिकाणी जर रस्ते विकसित झाले नाही तर पुन्हा अतिक्रमण वाढते. त्यामुळे प्रशासकीय यंत्रणांनी समन्वयातून अतिक्रमण काढल्यानंतर तातडीने रस्ते विकसित करण्याच्या दृष्टीने पाठपुरावा करण्याचे निर्देश पालकमंत्र्यांनी बैठकीत दिले.

चाकणसह परिसरात येणाऱ्या अवजड वाहनांची संख्या अधिक असल्याने वाहतूक कोंडी होते. त्यामुळे अशा वाहनांवर ठराविक वेळेची बंधने घालत एमआयडीसी भागात ट्रॅक टर्मिनल सुरू करण्यावर भर देत वाहतूक व्यवस्था सुरळीत करण्यासाठी आरटीओ यांच्यासह पोलीस यंत्रणेने संयुक्तपणे नियोजन करणे अपेक्षित आहे. यासह कचऱ्याची समस्या निकाली काढत या भागातील अतिक्रमणे तातडीने काढावी. रस्ते विकसित करताना जर कोणी चुकीची भूमिका घेत असेल तर त्यांच्यावर नियमानुसार गुन्हे दाखल करण्याचे निर्देश उपमुख्यमंत्री तथा पालकमंत्री अजित पवार यांनी दिले. यावेळी पीएमआरडीएचे महानगर आयुक्त डॉ. योगेश म्हसे यांनी चाकण परिसरातील वाहतूक कोंडी कशी सोडवता येईल, यासंदर्भात उपाययोजनांची माहिती, त्याचे कालबद्ध टप्पे व मास्टर प्लॅनचे सादरीकरण केले.

उपाययोजनांची कामे समाधानकारक
गेल्या महिन्याभरापासून हिंजवडीसह परिसरातील वाहतूक कोंडी आणि नागरी समस्या निराकरणासाठी सर्वच प्रशासकीय यंत्रणा विविध उपायोजनांवर भर देत आहे. आजपर्यंत झालेली कामे समाधानकारक असल्याने ती नागरिकांना दिलासा देणारी आहे. त्यामुळे उर्वरित कामे याच गतीने पुढेही सुरू ठेवण्याचे निर्देश पालकमंत्र्यांनी बैठकीत दिले. चाकण भागात पण प्रशासकीय यंत्रणा अशाच पद्धतीने उपायोजनांवर भर देणार असल्याचे यावेळी स्पष्ट करण्यात आले.
चाकणसह एमआयडीसी भागात पाहणी

उपमुख्यमंत्री तथा पालकमंत्री अजित पवार यांनी चाकणसह एमआयडीसी भागातील नागरी समस्या व वाहतूक कोंडीच्या अनुषंगाने पाहणी केली. यादरम्यान त्यांनी संबंधित अधिकाऱ्यांकडून आवश्यक त्या उपाययोजनांबाबत माहिती जाणून घेतली. यात त्यांनी भारत माता चौक मोशी, समृद्धी पेट्रोल पंप सॅनी कंपनी नाणेकरवाडी, बंगला वस्ती मेदनकरवाडी – सासे फाटा, चाकण चौक, आंबेठाण चौक, चाकण चौक ते कडचीवाडी, हिंगणे चौक खराबवाडी, म्हाळुंगे पोलीस चौकी एमआयडीसी रस्ता आदी भागात पाहणी करून आवश्यक त्या उपाययोजना करण्याचे निर्देश दिले.

The post वाहतूक कोंडी टाळण्यासाठी अतिक्रमणे काढल्यानंतर त्या भागात तातडीने रस्ते करा, अजित पवार यांचे संबधित यंत्रणांना निर्देश appeared first on थोडक्यात घडामोडी.

पुणे : धायरी (नऱ्हे) येथील पारी चौक परिसरात दररोज होणाऱ्या भीषण वाहतूक कोंडीने नागरिकांचे जनजीवन विस्कळीत झाले असून, यावर तातडीने उपाययोजना करण्याची मागणी जोर धरू लागली आहे. या पार्श्वभूमीवर शिवसेना (उद्धव बाळासाहेब ठाकरे) पक्षाचे खडकवासला विधानसभा मतदारसंघाचे विभागप्रमुख महेश राजाराम पोकळे यांनी वाहतूक विभागाकडे अधिकृत निवेदन सादर केले आहे.

या निवेदनात त्यांनी स्पष्टपणे नमूद केले की, पारी चौकाजवळील MNGL कंपनीचा CNG पंप हे वाहतूक कोंडीचे मुख्य केंद्र बनले आहे. अरुंद रस्ता आणि पंपावर CNG भरण्यासाठी रांगेत लागणारी वाहने रस्त्यावर उभी राहत असल्याने, परिसरातील वाहतुकीवर मोठा ताण निर्माण होतो आहे. परिणामी, शालेय वाहने, ऑफिसकर्मी, व्यापारी व सर्वसामान्य नागरिकांना प्रचंड अडचणींना सामोरे जावे लागत आहे. या गोंधळामुळे अपघाताची शक्यता सुद्धा वाढली आहे.

महेश पोकळे यांनी याबाबत पुढाकार घेऊन वाहतूक विभागाला खालील उपाययोजनांची विनंती केली आहे:

• पंपाजवळील वाहतूक प्रवाहाची तपासणी आणि व्यवस्थापनासाठी स्वतंत्र यंत्रणा नेमणे
• वाहने रस्त्यावर उभी राहू नयेत यासाठी कठोर नियमावली आणि अंमलबजावणी
• पर्यायी मार्ग अथवा वाहनांच्या पार्किंगसाठी जागेची उपलब्धता शोधणे
• स्थानिक नागरिक व वाहतूक विभाग यांच्यात समन्वय बैठक आयोजित करणे

विशेष म्हणजे, या निवेदनासोबत नागरिकांच्या सह्यांचे समर्थनपत्र देखील जोडण्यात आले असून, यावर सिंहगड रोड वाहतूक विभागाचे ठाणे अंमलदार यांनी अधिकृत स्वाक्षरी करत निवेदन स्वीकारले आहे.

धायरी पारी कंपनी चौक येथील ट्राफिक प्रश्नाच्या संदर्भात सिंहगड रोड ट्राफिक विभागाचे पोलीस निरीक्षक श्री बर्डे साहेब यांना निवेदन देण्यात आले #प्रभाग_क्रमांक_33 #आमचे_लक्ष_असते #सदैव_तत्पर_सेवेसाठी #आपला_महेश #dhayari @PuneCityTraffic @PMCPune @sagarg14 @Vinodhanchate https://t.co/sjYMPiGXOq pic.twitter.com/Vwk9tjYMdY

— Mahesh Rajaram Pokale (@pokalemahesh) May 28, 2025

स्थानिक जनतेचा या मागणीला मोठा पाठिंबा असून, आता प्रशासनाने याकडे गांभीर्याने लक्ष देत ठोस पावले उचलावीत, अशी अपेक्षा आहे. येत्या काही दिवसांत वाहतूक सुधारण्यासाठी प्रशासन यादृष्टीने काय निर्णय घेते, याकडे संपूर्ण परिसराचे लक्ष लागले आहे.

The post पुणे : नऱ्हे येथील पारी चौकातील वाहतूक कोंडीच्या वाढत्या समस्येचा शिवसेना (उद्धव बाळासाहेब ठाकरे) पक्षाकडून पाठपुरावा, उपाययोजनांची अपेक्षा… appeared first on थोडक्यात घडामोडी.

पुणे : मुंबई-बंगळूर बाह्यवळण महामार्गावरील नऱ्हे भागातील स्वामी नारायण मंदिर ते रावेत या संपूर्ण परिसरात सातत्याने होणाऱ्या वाहतूक कोंडीवर कायमस्वरूपी तोडगा काढण्यासाठी केंद्रीय रस्ते व महामार्ग मंत्री नीतीन गडकरी यांनी एलिव्हेटेड हायवे बांधण्यासाठी ४ हजार कोटी रुपयांचा डीपीआर तयार केला आहे. यासोबतच कोथरूड ते मुळशी दरम्यान भुयारी मार्ग आणि पूल तसेच सेवा रस्त्यांचे काम लवकरच सुरू होत आहे, अशी माहिती खासदार सुप्रिया सुळे यांनी आज दिली.

या रस्त्यांबाबतच्या विविध अडचणींबाबत चर्चा करण्यासाठी सुळे यांनी आज एनएचएआयच्या अधिकाऱ्यांसोबत बैठक घेतली. या बैठकीत ही माहिती देण्यात आली. बाह्यवळण महामार्गावर स्वामीनारायण मंदिर ते नवले पूल ते वारजे व चांदनी चौक ते रावेत येथील वाहतूक कोंडीचा प्रश्न निकाली काढण्यासाठी सुप्रिया सुळे सातत्याने पाठपुरावा करत आहेत. याला सकारात्मक प्रतिसाद देत नितीन गडकरी यांनी एलिव्हेटेड हायवे बांधण्यासाठी ४ हजार कोटी रुपयांचा डीपीआर तयार केला आहे, असे यावेळी सांगण्यात आले.

यासोबतच कोथरुड ते मुळशी भुयारी मार्गाचे कामही लवकरच सुरु होत असून वडगाव येथील पुलासह वारजे येथील मुठा नदीवरील पुल आणि दोन्ही बाजूच्या सेवा रस्त्याचे काम करण्यासाठी ३६ कोटींचा निधी मंजूर करण्यात आला आहे. या सर्व कामासाठी खासदार सुप्रिया सुळे यांनी नितीन गडकरी यांचे आभार मानले असून ही सर्व कामे लवकरात लवकर पुर्ण होऊन या भागातील दळणवळण अधिक सुसह्य आणि सक्षम होणार असल्याचे त्यांनी सांगितले.

The post पुणेकरांना मोठा दिलासा! वाहतूक कोंडीवर तोडगा काढण्यासाठी चार हजार कोटींचा डीपीआर तयार appeared first on थोडक्यात घडामोडी.