sugarcane harvesting - थोडक्यात घडामोडी - Marathi News - मराठी बातम्या - Latest Marathi News at thodkyaatghadamodi.in

लातूरमध्ये हार्वेस्टर मशीनमध्ये अडकून शेतकऱ्याचा दुर्दैवी मृत्यू, धोकादायक यंत्रे वापरताना घ्या आवश्यक काळजी

थोडक्यात घडामोडी टीम — Sat, 27 Dec 2025 10:36:55 +0000

लातूर : औसा तालुक्यातील आशिव येथे ऊसतोडीसाठी वापरण्यात येणाऱ्या हार्वेस्टर मशीनमध्ये अडकून शंकर प्रभाकर सावंत (वय ४०) या शेतकऱ्याचा दुर्दैवी मृत्यू झाला. बाजूला पडलेला ऊस मशीनमध्ये टाकताना त्यांचा तोल जाऊन ते मशीनमध्ये अडकले. सहकाऱ्यांनी मशीन बंद केले, मात्र तोपर्यंत उशीर झाला होता.

घटनेची माहिती मिळताच पोलिसांनी पंचनामा करून मृतदेह शवविच्छेदनासाठी पाठवला असून पुढील तपास सुरू आहे. मृत शेतकरी हा कुटुंबाचा कर्ता असल्याने पत्नी व दोन लहान मुलांवर उपजीविकेचा प्रश्न निर्माण झाला आहे.

दरम्यान, हार्वेस्टर वापरताना योग्य प्रशिक्षण व सुरक्षिततेच्या उपाययोजना राबवाव्यात, तसेच मृताच्या कुटुंबाला तातडीची आर्थिक मदत द्यावी, अशी मागणी ग्रामस्थांकडून करण्यात येत आहे.

या अपघातानंतर नागरिकांमध्ये संताप व्यक्त होत असून हार्वेस्टरसारखी धोकादायक यांत्रिक साधने वापरताना काळजी व प्रशिक्षण अत्यावश्यक असल्याचे स्पष्ट झाले आहे.

हार्वेस्टर वापरताना घ्यावयाची अत्यंत महत्त्वाची काळजी

हार्वेस्टर चालवणाऱ्या चालकास अधिकृत प्रशिक्षण असणे बंधनकारक
मशीन सुरू असताना कोणत्याही व्यक्तीने जवळ जाणे टाळावे
बाजूला पडलेला ऊस किंवा कचरा हाताने मशीनमध्ये टाकू नये
सैल कपडे, ओढणी, गमछा घालून मशीनजवळ काम करू नये
मशीनमध्ये अडथळा आल्यास पूर्णपणे बंद केल्याशिवाय दुरुस्ती करू नये
शेतकरी व मजुरांना यांत्रिक साधनांमुळे होणाऱ्या धोक्यांची पूर्वकल्पना देणे आवश्यक
कारखाने व कंत्राटदारांनी सुरक्षिततेचे नियम काटेकोरपणे लागू करावेत

शेतीमध्ये आधुनिक यांत्रिक साधनांचा वापर वाढत असताना मानवी जीव सर्वात मौल्यवान आहे. योग्य काळजी, प्रशिक्षण आणि नियमांची अंमलबजावणी झाल्यास असे दुर्दैवी अपघात टाळता येऊ शकतात.

The post लातूरमध्ये हार्वेस्टर मशीनमध्ये अडकून शेतकऱ्याचा दुर्दैवी मृत्यू, धोकादायक यंत्रे वापरताना घ्या आवश्यक काळजी appeared first on थोडक्यात घडामोडी.

ऊस तोडणीसाठी शेतकऱ्यांकडून पैशांची मागणी करणाऱ्यांवर होणार कारवाई – सहकार व पणन मंत्री बाळासाहेब पाटील

थोडक्यात घडामोडी टीम — Tue, 12 Oct 2021 05:01:28 +0000

मुंबई : ऊस उत्पादक शेतकऱ्यांकडून ऊस तोडणीकरिता पैशांची मागणी करून आर्थिक पिळवणूक होत असल्याच्या तक्रारी प्राप्त झाल्यास संबंधितांवर कारवाई करावी, असे आदेश सहकार व पणन मंत्री बाळासाहेब पाटील यांनी दिले आहे.

सहकार मंत्री बाळासाहेब पाटील म्हणाले, ऊस पीक चांगले नाही, ऊस खराब आहे, ऊस पडलेला आहे, ऊस क्षेत्र अडचणीचे आहे, तोडणी करणे परवडत नाही अशी विविध कारणे सांगून ऊस तोडणीसाठी शेतकऱ्यांकडून पैशांची मागणी करुन शेतकऱ्यांची आर्थिक पिळवणूक होत असल्यास ती रोखण्यासाठी सर्व कारखान्यांनी जाहीर प्रकटन करून अशा प्रकारच्या गैरव्यवहाराला आळा बसेल असे पाहावे. तसेच कारखान्याच्यावतीने शेतकऱ्यांना तक्रार करण्यासाठी मोबाईल फोन/व्हॉटसॲप क्रमांक जारी करावा व याबाबतची माहिती शेतकऱ्यांना द्यावी.

सर्व सहकारी साखर कारखान्यांचे कार्यकारी संचालक व खासगी साखर कारखान्यांचे व्यवस्थापक/मुख्य कार्यकारी अधिकारी यांनी अशा तक्रारीचे निराकरण करण्यासाठी कारखान्यांनी तक्रार निवारण अधिकारी म्हणून शेती विभागाच्या अधिकाऱ्यांची नेमणूक करावी. तक्रार निवारण अधिकारी यांचे नाव, संपर्क मोबाईल क्रमांक यांची माहिती कार्यक्षेत्रातील व कार्यक्षेत्राबाहेरील ऊस तोडणी होत असलेल्या गावांमध्ये दर्शनी ठिकाणी व ग्रामपंचायतीच्या सूचना फलकावर प्रसिद्ध करावी. तसेच प्रसिद्धीमाध्यमांद्वारे व्यापक स्वरूपात प्रसिद्ध करावी.

शेतकऱ्यांची लेखी स्वरूपात अशी तक्रार साखर कारखान्याच्या शेती अधिकाऱ्यांकडे आल्यानंतर त्यावर लगेच कार्यवाही करावी. तसेच तक्रार करण्यासाठी शेतकऱ्यांनी साखर आयुक्तालयाच्या shetkari.madat@gmail.com या ईमेलचा वापर करावा. तक्रारीमध्ये आर्थिक पिळवणूक करणाऱ्या व्यक्तीचे नाव व वाहन क्रमांक नमूद करावा. अशा तक्रारी प्राप्त झाल्यावर चौकशी करून तक्रारीचे वेळीच निराकरण करावे. तक्रारीमध्ये तथ्य आढळून आल्यास सदरची रक्कम संबंधित मुकादम / कंत्राटदार यांचे बिलातून वसूल करून संबंधित शेतकऱ्यास अदा करावी, याची जबाबदारी तक्रार निवारण अधिकारी यांच्यावर सोपविण्यात यावी, असे निर्देशही पाटील यांनी दिले.

अशा प्रकारची एकही तक्रार चालू गाळप हंगामात येणार नाही याची कार्यकारी संचालक व खासगी साखर कारखान्यांच्या व्यवस्थापक/ मुख्य कार्यकारी अधिकारी यांनी दक्षता घ्यावी. तसेच राज्यात चालू 2021-22 गाळप हंगामात उपलब्ध असलेला सर्व ऊस सर्वसाधारणपणे 145-150 दिवसांत गाळप होईल एवढी साखर कारखान्यांची स्थापित गाळप क्षमता असल्याने व इथेनॉल उत्पादनाकरिता साखर वळविली जाणार असल्याने शेतक–यांनी आपला ऊस गाळप होईल की नाही याबाबत घाबरुन जाऊ नये. प्रादेशिक सह संचालक (साखर) व साखर आयुक्त कार्यालयाचे स्तरावरही ऊस गाळपाचे संदर्भात नियमितपणे आढावा घेण्यात यावा, अशा सूचनाही पाटील यांनी यावेळी दिल्या आहेत.

The post ऊस तोडणीसाठी शेतकऱ्यांकडून पैशांची मागणी करणाऱ्यांवर होणार कारवाई – सहकार व पणन मंत्री बाळासाहेब पाटील appeared first on थोडक्यात घडामोडी.