राजस्थान : राजस्थानमधील उदयपूर शहरात घडलेल्या सामूहिक बलात्कार प्रकरणाने केवळ शहरच नव्हे तर संपूर्ण देशाला हादरवून सोडले आहे. कारमध्ये बसवलेल्या डॅशकॅम फुटेजमुळे या प्रकरणातील धक्कादायक सत्य उघड झाले आहे. आयटी कंपनीत मॅनेजर पदावर कार्यरत असलेल्या तरुण महिलेवर कंपनीच्या सीईओसह तिघांनी सामूहिक अत्याचार केल्याचा गंभीर आरोप आहे.

ही घटना २० डिसेंबरच्या रात्री शोभागपुरा परिसरातील एका नामांकित हॉटेलमध्ये आयोजित पार्टीदरम्यान घडली. कंपनीच्या सीईओचा वाढदिवस आणि नवीन वर्षाच्या स्वागतासाठी ही पार्टी आयोजित करण्यात आली होती. विशेष म्हणजे या कार्यक्रमासाठी सर्व कर्मचाऱ्यांना नव्हे, तर निवडक वरिष्ठ अधिकारी आणि मोजके कर्मचारी यांनाच निमंत्रण देण्यात आले होते. पीडित महिला रात्री सुमारे ९ वाजता पार्टीत सहभागी झाली होती.

पार्टीदरम्यान मद्यपान, संगीत आणि जल्लोषाचे वातावरण होते. वेळ जसजसा पुढे सरकत गेला, तसतशी पार्टी अधिक उग्र होत गेली. रात्री १:३० वाजताच्या सुमारास पीडित महिला थकलेली आणि अस्वस्थ दिसत असताना एक महिला एक्झिक्युटिव्ह हेड शिल्पा तिच्याकडे आली, तिला “सुरक्षितपणे घरी सोडतो” असे आश्वासन देण्यात आले. सहकारी असल्याने तिने त्यावर विश्वास ठेवला.

त्यानंतर तिला एका कारमध्ये बसवण्यात आले. कारमध्ये आधीच कंपनीचा सीईओ जितेश, महिला एक्झिक्युटिव्ह हेडचा पती गौरव उपस्थित होते. पोलिसांच्या प्राथमिक तपासानुसार, वाटेत पीडित महिलेला नशा आणणाऱ्या पदार्थांच्या संपर्कात आणण्यात आले. काही वेळातच तिची प्रकृती खालावली आणि ती अर्धबेशुद्ध अवस्थेत गेली.

याच अवस्थेचा गैरफायदा घेत सीईओ, महिला एक्झिक्युटिव्ह आणि तिचा पती या तिघांनी मिळून कारमध्येच तिच्यावर आळीपाळीने सामूहिक बलात्कार केल्याचा आरोप आहे. पीडितेच्या म्हणण्यानुसार, तिने विरोध करण्याचा प्रयत्न केला, मात्र नशेमुळे ती असहाय्य झाली होती. ही अमानुष कृत्ये अनेक तास सुरू होती. अखेर पहाटे सुमारे ५ वाजता आरोपींनी तिला तिच्या घराशेजारी सोडून पलायन केले.

शुद्धीवर आल्यानंतर पीडितेच्या शरीरावर गंभीर जखमांच्या खुणा होत्या. एका कानातील दागिना व अंतर्वस्त्रे गायब असल्याचेही तिच्या लक्षात आले. तिने हिंमत एकवटून तात्काळ उदयपूर पोलिसांशी संपर्क साधला. दरम्यान, घटनेच्या वेळी वापरण्यात आलेल्या कारमध्ये डॅशकॅम बसवलेला असल्याचे पीडितेला आठवले. पोलिसांनी त्या डॅशकॅमचे ऑडिओ-व्हिडिओ फुटेज तपासले असता, घटनेदरम्यानचे आवाज आणि महत्त्वाचे क्षण त्यात रेकॉर्ड झाल्याचे निष्पन्न झाले. हाच पुरावा तपासातील टर्निंग पॉइंट ठरला.

पीडितेचा जबाब, वैद्यकीय तपासणी अहवाल आणि डॅशकॅम फुटेज या तिन्ही ठोस पुराव्यांच्या आधारे पोलिसांनी तपास वेगाने पुढे नेला. जिल्हा पोलीस अधीक्षक योगेश गोयल यांच्या मार्गदर्शनाखाली आणि एएसपी माधुरी वर्मा यांच्या नेतृत्वाखाली विशेष तपास पथक तयार करण्यात आले. वैद्यकीय अहवालात अत्याचाराच्या स्पष्ट खुणा आढळून आल्याने सामूहिक बलात्काराचा गुन्हा प्रथमदर्शनी सिद्ध झाल्याचे पोलिसांनी सांगितले. त्यानंतर मोठी कारवाई करत पोलिसांनी आयटी कंपनीचा सीईओ जितेश, गौरव आणि त्याची पत्नी शिल्पा यांना अटक केली आहे.

आरोपींवर भारतीय न्याय संहितेतील (BNS) गंभीर कलमांखाली गुन्हे दाखल करण्यात आले असून, त्यांना न्यायालयात हजर करून पोलीस कोठडी (रिमांड) मागितली जाणार आहे. तसेच पीडितेला नशा आणण्यासाठी कोणत्या प्रकारच्या अमली किंवा गुंगीकारक पदार्थांचा वापर करण्यात आला, याचाही सखोल तपास सुरू आहे.

या घटनेमुळे कॉर्पोरेट क्षेत्रातील महिला सुरक्षिततेचा मुद्दा पुन्हा एकदा ऐरणीवर आला आहे. कार्यस्थळी विश्वासाच्या नावाखाली महिलांच्या सुरक्षिततेशी तडजोड केली जाते का, असा गंभीर प्रश्न उपस्थित झाला आहे. पीडितेला जलद न्याय मिळावा, तसेच आरोपींना कडक शिक्षा व्हावी, अशी मागणी सामाजिक संघटना, महिला हक्क कार्यकर्ते आणि सर्वसामान्य नागरिकांकडून होत आहे.

The post आयटी मॅनेजर तरुणीवर कारमध्ये सामूहिक बलात्कार, डॅशकॅम फुटेजमुळे धक्कादायक सत्य उघड, कंपनीच्या सीईओसह तिघांना अटक appeared first on थोडक्यात घडामोडी.

मुंबई : एका महिलेने अभिनेता एजाज खानवर बलात्कार केल्याचा आरोप केला आहे. लग्नाचे आणि त्याच्या ‘हाऊस अरेस्ट’ या शोमध्ये भूमिका साकारण्याची संधी देण्याचे आमिष दाखवून बलात्कार केल्याचा महिलेचा आरोप आहे. मुंबईतील चारकोप पोलिस ठाण्यात याप्रकरणी एफआयआर दाखल करण्यात आली आहे. ‘हाऊस अरेस्ट’ या शोमध्ये अनुचित कंटेंट दाखवल्याबद्दल आधीच एफआयआर दाखल झालेल्या अभिनेत्याला हा दुसरा धक्का आहे. इंडिया टुडेच्या सूत्रांनुसार, ५ मे रोजी त्याच्याविरुद्ध वेगळा बलात्काराचा गुन्हा दाखल करण्यात आला.

चारकोप पोलिसांनी खानविरुद्ध बलात्काराचा गुन्हा दाखल केला आहे, तर पुढील चौकशी सुरू आहे. पीडित महिलेच्या म्हणण्यानुसार, खानने तिला त्याच्या ‘हाऊस अरेस्ट’ शोमध्ये सूत्रसंचालकाची भूमिका देण्यासाठी फोन केला होता. शूटिंगदरम्यान, त्याने प्रथम तिला प्रपोज केले आणि नंतर तिच्या घरी गेला, जिथे त्याने तिच्या इच्छेविरुद्ध तिच्यावर बलात्कार केल्याचा आरोप आहे.

या घटनेनंतर, तिने चारकोप पोलिस ठाण्यात औपचारिक तक्रार दाखल केली. पोलिसांनी भारतीय न्याय संहिता (बीएनएस) च्या कलम ६४, ६४(२एम), ६९ आणि ७४ अंतर्गत गुन्हा दाखल केला आहे. खानला आता पोलिस कधीही अटक करू शकतात.

यापूर्वी, एजाज खानवर २०१६ मध्ये एक महिला मॉडेलने अश्लील फोटो आणि संदेश पाठवण्याचा आरोप केला होता. मालवणी पोलिसांनी त्याला अटक केली होती, परंतु तो १०,००० रुपयांच्या जामिनावर सुटला.

२०२० मध्ये, फेसबुक लाइव्ह सेशनमध्ये भडकाऊ भाषण केल्याबद्दल त्याला खार पोलिसांनी अटक केली होती. त्याच्यावर IPC कलम १५३A (समूहांमधील शत्रुत्व वाढविणे) आणि इतर कलमांखाली गुन्हा दाखल करण्यात आला होता. बांद्रा मेट्रोपॉलिटन मजिस्ट्रेट कोर्टाने त्याची १ लाख रुपयांच्या जामिनावर सुटका केली होती.

त्याचबरोबर, नार्कोटिक्स कंट्रोल ब्युरो (NCB) ने त्याला प्रतिबंधित औषधांच्या तस्करी प्रकरणात अटक केली होती. त्याच्या घरात अल्प्राजोलाम टॅबलेट्स सापडल्या होत्या, ज्याबद्दल त्याने सांगितले की त्याच्या पत्नीला गर्भपात झाल्यामुळे ती डिप्रेशनमध्ये होती आणि त्या औषधांचा वापर करत होती.

The post अभिनेता एजाज खान पुन्हा अडचणीत, लग्नाचे आणि ‘हाऊस अरेस्ट’ शोमध्ये भूमिका देण्याचे आमिष दाखवून महिलेवर बलात्कार appeared first on थोडक्यात घडामोडी.

पुणे : स्वारगेट बस स्थानकामध्ये शिवशाही बसमध्ये २६ वर्षीय तरुणीवर झालेल्या अत्याचार प्रकरणातील आरोपी दत्तात्रय गाडे याला पुणे सत्र न्यायालयाने १२ मार्चपर्यंत पोलीस कोठडी सुनावली आहे. या प्रकरणात रोज नवनवीन खुलासे होत आहेत. दरम्यान, आरोपीच्या वकिलाने हा बलात्कार नसल्याचा दावा केला होता, हे सर्व एकमेकांच्या सहमतीने झाल्याचं त्यांनी सांगितलं होतं. मात्र, पोलीस तपासात अनेक गोष्टी स्पष्ट झाल्या आहेत. आता दत्तात्रय गाडेने तरुणीला ७५०० रुपये दिल्याचा दावा देखील खोटा असल्याचं समोर आलं आहे. त्यामुळे या प्रकरणाच्या पुढील तपासात आरोपीच्या विरोधात ठोस पुरावे सापडण्याची शक्यता आहे.

आरोपी दत्ता गाडेने तरुणीला जीवे मारण्याची धमकी दिल्याचं पोलिस तपासात समोर आलं आहे. जेव्हा तरुणीने शिवशाही बसमध्ये प्रतिकार केला तेव्हा नराधमाने आक्रमक होत तिचा गळा आवळला. तेव्हा तरुणी प्रचंड घाबरली. तिला कोलकाता बलात्कार प्रकरण आठवलं, त्यामुळे घाबरलेल्या तरुणीने त्याच्याकडे तिला न मारण्यासाठी गयावया केली. या घटनेने तिला मोठा धक्का बसला. पीडित तरुणीने संमतीने शरीर संबंध ठेवल्याचा दावा आरोपीच्या वकिलांनी केला. हे ऐकून पीडित तरुणी तणावाखाली असल्याची माहिती आता समोर आली आहे. तिला त्यासाठी दोन समुपदेशकांची मदत घ्यावी लागत आहे.

दरम्यान, आरोपीच्या पत्नीने सुद्धा उपस्थित केला होता कि, बलात्कार झाला तर मग तरुणीचे कपडे फाटले का नाहीत? तिच्या अंगावर काही ओरबाडलेलं दिसत आहे का? बसमध्ये चढताना आधी तरुणी पुढे गेली मग माझा नवरा गेला. त्यानंतर दोनच मिनिटात ते बाहेर आले, याला बलात्कार म्हणतात का?

आरोपीच्या वकिलाने आरोपी मार्फत सांगण्यात आल्याप्रमाणे दावा केला होता की आरोपी आणि पीडिता साधारणपणे एक महिन्यापासून एकमेकांना ओळखतात. त्यानुसार पुणे पोलिसांनी दत्तात्रय गाडे याला अटक केल्यानंतर त्याच्या आणि पीडितेच्या मोबाईलचे दोन वर्षांचे सीडीआर डिटेल्स तपासले आहेत. यामध्ये कुठेही संबंधित आरोपी आणि पीडिता हे एकमेकांच्या संपर्कात असल्याचे दिसून आलेले नाही.

आरोपीच्या परिचित वकिलाने दत्ता आणि पीडिता यांच्यामध्ये आर्थिक व्यवहार झाल्याचा खळबळजनक दावा केला होता. त्यानंतर आता पुणे पोलिसांनी या संदर्भात चौकशी केली असता पुणे पोलिसांच्या हाती महत्त्वाचा पुरावा लागला आहे. आता दत्ता गाडे याच्या बँक अकाऊंट संदर्भात एक मोठी माहिती पुणे पोलिसांच्या हाती लागली आहे. अत्याचार झाला त्यादरम्यान आरोपी दत्ता गाडे याच्या बँक खात्यात फक्त २४९ रुपये आढळून आले आहेत. मग आरोपीच्या वकिलाने दावा केलेले ते ७ हजार ५०० रुपये कुठून आले? नराधम दत्ता गाडे याला पोलिसांनी अटक केल्यानंतर त्याचे बँक खाते, ऑनलाईन पेमेंट या सगळ्याची चौकशी केली आहे. गाडे याच्या मोबाईलमधून कोणाकोणाला पैसे ट्रान्सफर करण्यात आले? संबंधित तरुणीला पैसे देण्यात आले का? या सगळ्याचा तपास पोलिसांनी केला. मात्र, पीडित तरुणी कधीच दत्ता गाडे याच्या संपर्कात नव्हती, हे स्पष्ट झाले आहे. तसेच दत्तात्रय गाडे तरुणीला ७५०० रुपये दिल्याचा जो दावा करत आहे, तो देखील खोटा असल्याचं स्पष्ट झालं आहे.

प्रकरणाचा तपास आता पुणे गुन्हे शाखेकडे
स्वारगेट बस डेपोतील बलात्कार प्रकरणाचा तपास आता पुणे गुन्हे शाखेकडे सोपविण्याचा निर्णय पोलिस आयुक्त अमितेश कुमार यांनी घेतला आहे. यामुळे तपासाची दिशा अधिक सुस्पष्ट होईल आणि अधिक सक्षम पद्धतीने या प्रकरणाचा तपास होईल, अशी अपेक्षा व्यक्त केली जात आहे.

बलात्कार प्रकरणातील आरोपी दत्तात्रय गाडे याची डीएनए चाचणी पूर्ण झाली आहे, आणि त्याचा अहवाल लवकरच पोलिसांना प्राप्त होईल. यासह, घटनास्थळी, म्हणजेच रिकाम्या बसमध्ये फॉरेन्सीक पथकाने तपासणी केली असून, त्यात आरोपीचे केस आणि इतर महत्त्वाच्या वस्तू सापडल्या आहेत. या वस्तूंची डीएनए चाचणी करून संबंधित पुरावे तपासले जातील.

दत्तात्रय गाडेच्या वकिलाने केलेल्या आर्थिक व्यवहाराच्या दाव्यावरही पोलिसांनी पुरावे सादर केल्यानंतर त्याचा दावा फोल ठरला. अखेर वकिलाने पत्रकार परिषदेत यू-टर्न घेतला आणि सांगितले की, “आम्ही असे काहीही बोललो नव्हतो.” याशिवाय, वकिलाने पोलिसांना संरक्षण देण्याची मागणी केली आहे.

The post ‘तो’ बलात्कारच! आरोपी दत्ता गाडेचे सर्व दावे ठरले खोटे, पोलीस तपासात नवनवीन खुलासे… appeared first on थोडक्यात घडामोडी.

मुंबईतील विशेष कोर्टाने लैंगिक अपराधांविषयी संरक्षण (POCSO) कायद्यांतर्गत एका 65 वर्षीय व्यक्तीला जन्मठेपेची शिक्षा सुनावली आहे. या व्यक्तीला त्याच्या मुलीवर आणि अल्पवयीन नातीवर बलात्कार केल्याप्रकरणी पॉक्सो कायद्यांतर्गत दोषी ठरविले आहे. पीडित महिलेने कोर्टासमोर केलेल्या निवेदनात म्हटले की ती 15 वर्षाची असल्यापासून तिचे वडील तिच्यावर बलात्कार करीत होते.

पीडित महिलेने सांगितले की लग्नानंतरही ती तिच्या आई-वडिलांबरोबर राहत होती. तिच्या वडिलांनी तिला धमकी दिली होती की तिने कुणाला याबाबत सांगितले तर तो तिच्या मुलांना इजा करेल. महिलेच्या म्हणण्यानुसार, ती आपल्या आईबरोबर घरकाम करायची. तर तिचे वडील, भाऊ आणि नवरा चित्रकार होते. या महिलेने कोर्टाला असेही सांगितले की तिने शेजारी राहणाऱ्या एका व्यक्तीला तिच्यावर झालेल्या लैंगिक अत्याचाराबद्दल सांगितले होते. त्या व्यक्तीचे नंतर निधन झाले. त्यानंतर तिने इतर कोणालाही याबद्दल सांगितले नाही.

या महिलेने कोर्टात सांगितले की 2017 मध्ये एक दिवस, दुसर्‍या वर्गात शिकणाऱ्या तिच्या मुलीने तिला सांगितले की रात्री आजोबा जेव्हा तिच्याबरोबर झोपतात तेव्हा ते तिच्याशी गैरवर्तन करतात. त्यानंतर मुलीने तिला सविस्तर सर्व काही सांगितलं. मुलीकडून हे सर्व ऐकल्यानंतर महिलेने तात्काळ पोलिस ठाण्यात धाव घेऊन तिच्या वडिलांविरुध्द गुन्हा दाखल केला.

सर्व पुरावे व युक्तिवादानंतर न्यायाधीश रेखा एन. पांढरे यांना आरोपी भादंवि कलम 376 (२) (बलात्कार) आणि पॉक्सो कायद्यांतर्गत दोषी आढळला. कोर्टाने या व्यक्तीला जन्मठेपेची शिक्षा आणि दंडही ठोठावला. आरोपीला मुलीला 5०,००० रुपये आणि नातीला 25,००० रुपये भरपाई देण्याचे आदेश देण्यात आले आहेत.

The post मुलीवर आणि अल्पवयीन नातीवर बलात्कार करणाऱ्या नराधमास जन्मठेपेची शिक्षा appeared first on थोडक्यात घडामोडी.