बीड : बीड तालुक्यातील लिंबारुई परिसरात ३१ डिसेंबर २०२५ रोजी घडलेल्या एका हृदयद्रावक घटनेने जिल्ह्यात खळबळ उडाली आहे. पतीकडून नवीन मोबाईल फोन न मिळाल्याच्या रागातून २४ वर्षीय महिलेने आपल्या साडेतीन वर्षांच्या मुलासह शेतातील विहिरीत उडी घेत आत्महत्या केल्याची धक्कादायक बाब समोर आली आहे.

मृत महिलेचे नाव प्राजक्ता उर्फ राधा रामेश्वर दराडे (वय २४) असून, तिच्या मुलाचे नाव वेदांत (वय ३ वर्षे ५ महिने) असे आहे. मिळालेल्या माहितीनुसार, प्राजक्ता गेल्या काही दिवसांपासून पती रामेश्वर बाबासाहेब दराडे यांच्याकडे नवीन मोबाईल फोनची मागणी करत होती. आर्थिक अडचणींमुळे पती मोबाईल देऊ न शकल्याने दोघांमध्ये वाद झाला.

या वादानंतर रागाच्या भरात प्राजक्ताने टोकाचा निर्णय घेत शेतातील विहिरीत मुलासह उडी मारल्याचे तपासात निष्पन्न झाले आहे. घटनेनंतर सुरुवातीला पोलिसांनी या प्रकरणाची नोंद अपघाती मृत्यू (ADR) म्हणून केली होती. मात्र, सखोल चौकशी व पतीच्या पुरवणी जबाबानंतर या घटनेमागील नेमकी पार्श्वभूमी स्पष्ट झाली.

यानंतर ३१ जानेवारी २०२६ रोजी या प्रकरणी सविस्तर एफआयआर दाखल करण्यात आली. कायदेशीर प्रक्रियेनुसार, मृत आई प्राजक्ता हिच्याविरुद्ध निष्पाप मुलगा वेदांत याला बुडवून मारल्याप्रकरणी खुनाचा गुन्हा नोंदवण्यात आला आहे.

या संपूर्ण प्रकरणाचा पुढील तपास ग्रामीण पोलीस ठाण्याचे पोलीस निरीक्षक अशोक मुदीराज करत आहेत. साध्या मोबाईल फोनच्या कारणावरून दोन जीव गेले, यामुळे संपूर्ण लिंबारुई परिसर शोकसागरात बुडाला आहे.

दरम्यान, समाजशास्त्रज्ञ व तज्ज्ञांचे मत आहे की वाढता मानसिक ताण, संवादाचा अभाव आणि क्षुल्लक कारणांवरून होणारा अनियंत्रित राग अशा दुर्दैवी घटनांना कारणीभूत ठरत आहे. अशा प्रसंगी समुपदेशन व कौटुंबिक संवाद अत्यंत महत्त्वाचा असल्याचे ते सांगतात.

The post बीड हादरलं! नवीन मोबाईल न दिल्याने महिलेची चिमुकल्यासह विहिरीत उडी… appeared first on थोडक्यात घडामोडी.

बीड : बीड जिल्ह्यातील शिरूर कासार तालुक्यात बुधवारी दुपारी एक अंगावर काटा आणणारी घटना घडली. कोळवाडी गावातील ४५ वर्षीय मनकर्णा शिवराम नेटके यांच्यावर शेतात काम करत असताना बिबट्याने अचानक हल्ला केला.

ही घटना रूपपूर शिवर परिसरात घडली. सकाळच्या सुमारास जवळच्या डोंगराळ भागातून बिबट्याची डरकाळी ऐकू आल्याचे स्थानिकांनी सांगितले. मात्र, शेतात काम करणाऱ्या मजुरांनी याकडे विशेष लक्ष दिले नाही. दुपारच्या सुमारास मनकर्णा शेतात एकट्याच काम करत असताना झुडपांमधून दबा धरून बसलेला बिबट्या अचानक त्यांच्यावर झडप घालून मानेवर हल्ला करण्याचा प्रयत्न करू लागला.

मात्र, मनकर्णा यांच्या गळ्यात बांधलेली जाड शाल त्या क्षणी त्यांच्यासाठी कवच ठरली. बिबट्याचे दात थेट मानेपर्यंत पोहोचण्याऐवजी शालमध्ये अडकले. त्यामुळे मोठी अनर्थ घटना टळली आणि तिचा जीव थोडक्यात वाचला.

महिलेच्या किंकाळ्या ऐकताच आजूबाजूच्या शेतांतील शेतकरी धावून आले. लोकांची हालचाल पाहून बिबट्याने घटनास्थळावरून पळ काढला. या हल्ल्यात मनकर्णा यांना बिबट्याच्या पंज्यांनी किरकोळ जखमा झाल्या असून त्यांची प्रकृती सध्या स्थिर असल्याचे डॉक्टरांनी सांगितले आहे.

जखमी महिलेला प्रथम जवळच्या प्राथमिक आरोग्य केंद्रात दाखल करण्यात आले. पुढील उपचार व निरीक्षणासाठी तिला बीड जिल्हा रुग्णालयात रेफर करण्यात आले आहे. डॉक्टरांच्या माहितीनुसार, ती सध्या धोक्याबाहेर आहे.

या घटनेनंतर वन विभाग सतर्क झाला असून परिसरात बिबट्याच्या हालचालींवर लक्ष ठेवण्यासाठी कॅमेरा ट्रॅप बसवण्याचा निर्णय घेण्यात आला आहे. रेंज फॉरेस्ट ऑफिसर अमोल घोडके यांनी सांगितले की, धोका कायम राहिल्यास वरिष्ठ अधिकाऱ्यांच्या परवानगीने बिबट्याला पकडण्यासाठी पिंजरा लावण्यात येईल. तसेच पीडित महिलेच्या कुटुंबाला शासन नियमांनुसार आर्थिक मदत दिली जाईल.

या घटनेमुळे शिरूर कासार तालुक्यातील ग्रामीण भागात भीतीचे वातावरण निर्माण झाले असून शेतकऱ्यांनी शेतात काम करताना विशेष खबरदारी घेण्याचे आवाहन प्रशासनाकडून करण्यात आले आहे.

The post बीडमध्ये शेतात काम करणाऱ्या महिलेवर बिबट्याची झडप, शालमुळे वाचला जीव appeared first on थोडक्यात घडामोडी.