मुंबई : मुंबई–पुणे द्रुतगती मार्ग हा महाराष्ट्राच्या प्रगतीचा कणा मानला जातो. राज्यातील औद्योगिक, आर्थिक आणि सामाजिक घडामोडींना गती देणारा हा मार्ग आता ‘मिसिंग लिंक’ प्रकल्पामुळे नव्या उंचीवर पोहोचत आहे. केवळ वाहतूक सुलभ करण्यापुरता मर्यादित न राहता, हा प्रकल्प राज्याच्या व्यापक विकासाच्या दृष्टीने अत्यंत महत्त्वाचा ठरत आहे. राज्यातील सर्वाधिक वर्दळीचा हा महामार्ग दररोज हजारो वाहनांची वाहतूक सांभाळतो. मात्र, बोरघाट परिसरातील तीव्र वळणे, चढ-उतार, पावसाळ्यातील दरडी कोसळण्याचे प्रकार आणि त्यामुळे निर्माण होणारी वाहतूक कोंडी ही वर्षानुवर्षे मोठी समस्या राहिली. या अडचणींवर कायमस्वरूपी उपाय म्हणून ‘मिसिंग लिंक’ प्रकल्पाची संकल्पना पुढे आली आणि २९ ऑगस्ट २०१८ रोजी या महत्त्वाकांक्षी योजनेला शासनाची मंजुरी मिळाली. सुमारे ६६९५ कोटी रुपयांचा हा प्रकल्प भौतिकदृष्ट्या पूर्ण झाला आहे.

पार्श्वभूमी : समस्येतून उपायाकडे

अडोशी बोगदा ते खंडाळा एक्झिट हा मार्ग सध्या सहा पदरी असला तरी येथे दहा पदरी वाहतूक एकत्र येते. घाटातील अवघड भौगोलिक परिस्थितीमुळे अनेकदा वाहतुकीचा वेग मंदावतो. विशेषतः पावसाळ्यात दरडी कोसळण्याचा धोका वाढतो आणि काही लेन बंद कराव्या लागतात. यामुळे वेळेचा अपव्यय, अपघातांची शक्यता आणि आर्थिक नुकसान वाढते. या पार्श्वभूमीवर ‘मिसिंग लिंक’ प्रकल्प हा एक पर्यायी, अधिक सुरक्षित आणि सरळ मार्ग म्हणून उभारण्यात आला आहे.

प्रकल्पाचे स्वरूप : अंतर कमी, वेळ वाचणार

या प्रकल्पाअंतर्गत खोपोली ते कुसगाव दरम्यान नवीन सरळ मार्ग तयार करण्यात आला आहे. एकूण १९.८४ कि.मी. लांबीच्या या मार्गात ५.८६ कि.मी. अंतरावर जुन्या रस्त्याचे सहा पदरीवरून आठ पदरीकरण करण्यात आले आहे, तर उर्वरित १३.३ कि.मी. पूर्णपणे नवीन मार्ग आहे. या नव्या मार्गामुळे प्रवासाचे अंतर सुमारे ६ किमीने कमी होणार असून, २० ते ३० मिनिटांचा वेळ वाचणार आहे. यामुळे प्रवाशांचा अनुभव अधिक जलद आणि सुलभ होणार आहे.

अभियांत्रिकीचा अद्भुत नमुना

गिनिज बुक ऑफ वर्ल्ड रेकॉर्डमध्ये जगातील सर्वात रुंद बोगदा म्हणून नोंद

मिसिंग लिंकमुळे भारतातील पहिला एक्सप्रेस-वे आता अधिक वेगवान आणि सुरक्षित होत आहे. मिसिंग लिंकसह वेळ आणि इंधन वाचविणारा सुरक्षित आणि वेगवान प्रवासाचा अनुभव मिळणार आहे. मिसिंग लिंक जगातील सर्वात रुंद बोगदा (२३.५ मीटर) असून लोणावळा तलावाच्या १८० मीटर खालून खोदलेला बोगदा आहे. या ठिकाणी ६५० मीटर केबल-स्टेड ब्रिजसह भारतातील सर्वात उंच सत्यावरील पूल पायलॉन उंची (१८२मीटर) असून गिनिज बुक ऑफ वर्ल्ड रेकॉर्डमध्ये जगातील सर्वांत रुंद बोगदा म्हणून नोंद झालेली आहे.

हा ‘मिसिंग लिंक’ प्रकल्प मुंबई–पुणे द्रुतगती मार्गावरील वाहतूक कोंडी कमी करण्यासाठी आणि प्रवासाचा कालावधी लक्षणीयरित्या घटवण्यासाठी महत्त्वपूर्ण ठरणार आहे. अत्याधुनिक अभियांत्रिकी तंत्रज्ञानाचा वापर करून उभारण्यात आलेल्या या प्रकल्पामुळे सुरक्षिततेच्या दृष्टीनेही मोठी सुधारणा होणार आहे.

मिसिंग लिंक’ प्रकल्प हा आधुनिक अभियांत्रिकीचा उत्कृष्ट नमुना मानला जातो. या प्रकल्पात दोन समांतर बोगदे (१.६४ कि.मी. आणि ८.९२ कि.मी.), भव्य व्हायाडक्ट, यांचा समावेश असून, वाहनांचा वेग १२० कि.मी. / तास ठेवण्याची सुविधा या मार्गावर उपलब्ध आहे.सुरक्षिततेसाठी अत्याधुनिक तंत्रज्ञान

या प्रकल्पात प्रवाशांच्या सुरक्षिततेला सर्वोच्च प्राधान्य देण्यात आले आहे. बोगद्यांमध्ये वॉटर मिस्ट अग्निशमन प्रणाली, स्कॅडा आधारित नियंत्रण, एएनपीआर कॅमेरे, व्हाइस इव्हॅक्यूएशन सिस्टिम, आधुनिक वायुवीजन व्यवस्था आणि एसओएस सुविधा बसवण्यात आल्या आहेत. या सर्व प्रणालींमुळे अपघात किंवा आपत्कालीन परिस्थितीत त्वरित प्रतिसाद देणे शक्य होणार आहे.

मिसिंग लिंकची व्यापक उपयुक्तता

‘मिसिंग लिंक’ प्रकल्पामुळे अनेक महत्त्वपूर्ण लाभ अपेक्षित आहेत. प्रवासाचा वेळ सुमारे ३० मिनिटांनी कमी होणार असून, घाटातील धोकादायक वळणे टाळल्याने अपघातांचे प्रमाण घटेल. वाहतूक कोंडी कमी होऊन प्रवास अधिक सुरळीत होईल. इंधनाच्या वापरात घट होऊन दररोज सुमारे १ कोटी रुपयांची बचत होईल, अशी अपेक्षा आहे. एकूणच, हा प्रकल्प प्रवास अधिक सुरक्षित, जलद आणि किफायतशीर बनवणार आहे.

कठीण परिस्थितीतही यश

या प्रकल्पाच्या अंमलबजावणीत अनेक तांत्रिक आणि नैसर्गिक आव्हानांचा सामना करावा लागला. डोंगराळ भागात बोगदे खोदणे, घनदाट वनक्षेत्रात काम करणे, मुसळधार पावसामुळे होणारे अडथळे, तसेच बोगद्यांमध्ये ऑक्सिजन पुरवठा आणि सुरक्षा व्यवस्थापन ही मोठी आव्हाने होती. याशिवाय कोविड-१९ महामारीमुळे आणि काही तांत्रिक चाचण्यांसाठी परदेशी संस्थांवर अवलंबून राहावे लागले मात्र या सर्व अडचणींवर मात करत प्रकल्प यशयशस्वीरित्या पूर्ण करण्यात आला.

विकासाच्या दिशेने मोठे पाऊल

मुंबई–पुणे ‘मिसिंग लिंक’ प्रकल्प हा केवळ एक रस्ता नाही, तर आधुनिक तंत्रज्ञान, नियोजन आणि दृष्टीकोन यांचा संगम आहे. या प्रकल्पामुळे केवळ प्रवास सुलभ होणार नाही, तर राज्याच्या आर्थिक आणि औद्योगिक विकासालाही मोठी चालना मिळणार आहे. भविष्यात हा प्रकल्प महाराष्ट्राच्या पायाभूत सुविधांच्या प्रगतीतील एक महत्त्वाचा टप्पा ठरणार आहे. महामार्ग हे कोणत्याही राज्याच्या अर्थव्यवस्थेचे रक्तवाहिनीसारखे असतात. मुंबई आणि पुणे ही दोन प्रमुख आर्थिक केंद्रे जोडणारा हा मार्ग उद्योग, आयटी, उत्पादन क्षेत्र आणि सेवा क्षेत्रासाठी जीवनदायिनी भूमिका बजावतो. ‘मिसिंग लिंक’ प्रकल्पामुळे या दोन शहरांमधील प्रवास अधिक जलद, सुरक्षित आणि कार्यक्षम होणार असल्याने व्यापार आणि गुंतवणुकीला मोठी चालना मिळणार आहे.

दळणवळण सुविधांचा विस्तार

या प्रकल्पामुळे केवळ दोन शहरांमधील अंतर कमी होत नाही, तर संपूर्ण प्रदेशातील दळणवळण सुविधांचा दर्जा उंचावतो. खोपोली, लोणावळा, कुसगाव यांसारख्या परिसरांना अधिक चांगली जोडणी मिळणार आहे. त्यामुळे ग्रामीण आणि अर्धशहरी भागांपर्यंतही विकासाच्या संधी पोहोचतील. आरोग्य, शिक्षण आणि रोजगाराच्या सुविधा अधिक सहज उपलब्ध होतील.

पर्यटन आणि स्थानिक अर्थव्यवस्था

मुंबई–पुणे मार्ग हा पर्यटनासाठीही अत्यंत महत्त्वाचा आहे. लोणावळा, खंडाळा यांसारख्या पर्यटनस्थळांना या मार्गामुळे अधिक वेगाने पोहोचता येईल. परिणामी पर्यटन वाढून स्थानिक व्यवसाय, हॉटेल उद्योग आणि सेवा क्षेत्राला चालना मिळेल. स्थानिक रोजगारनिर्मितीतही वाढ होईल.

शाश्वत आणि संतुलित विकास

वाहतुकीचा प्रवाह सुरळीत झाल्यामुळे वाहनांची गर्दी कमी होईल आणि इंधनाचा वापरही घटेल. यामुळे पर्यावरणावर होणारा ताण कमी होण्यास मदत होईल. नियोजनबद्ध पायाभूत सुविधा विकासामुळे हा प्रकल्प शाश्वत विकासाच्या दिशेने एक महत्त्वाचे पाऊल ठरतो. मुंबई–पुणे ‘मिसिंग लिंक’ प्रकल्प हा केवळ प्रवास सुलभ करणारा रस्ता नसून, राज्याच्या सर्वांगीण विकासाला गती देणारा महामार्ग आहे. आर्थिक वाढ, दळणवळण सुधारणा, सुरक्षितता आणि पर्यावरणपूरक दृष्टिकोन या सर्व बाबींचा समतोल साधत हा प्रकल्प महाराष्ट्राच्या प्रगतीचा नवा अध्याय लिहिणार आहे.

The post मुंबई–पुणे द्रुतगती मार्ग ‘मिसिंग लिंक’ : वेग, सुरक्षितता आणि आधुनिक अभियांत्रिकीचा संगम appeared first on थोडक्यात घडामोडी.

मुंबई : रस्ते अपघातांमध्ये होणारी जीवितहानी कमी करण्यासाठी आणि नागरिकांमध्ये रस्ता सुरक्षेविषयी जनजागृती निर्माण करण्याच्या उद्देशाने राज्यभर 1 ते 31 जानेवारी 2026 या कालावधीत केंद्र सरकारच्या निर्देशानुसार राष्ट्रीय रस्ता सुरक्षा महिना हे अभियान साजरे करण्यात येणार आहे. यानिमित्ताने संपूर्ण राज्यात विविध जनजागृतीपर कार्यक्रमांचे आयोजन करण्यात येणार आहे.

या रस्ता सुरक्षा अभियानांतर्गत परिवहन विभाग, वाहतूक पोलीस विभाग, सार्वजनिक आरोग्य विभाग, शालेय शिक्षण विभाग तसेच इतर संबंधित संस्था व संघटनांच्या सहकार्याने रस्ता सुरक्षिततेसाठी प्रचार, जनजागृती व जनप्रबोधनात्मक उपक्रम राबविण्यात येणार आहेत. नागरिक, वाहनचालक, विद्यार्थी आणि सर्व संबंधित घटकांमध्ये रस्ता सुरक्षेबाबत जागरूकता वाढविणे हा या अभियानाचा मुख्य उद्देश आहे.

केंद्रीय रस्ते वाहतूक व महामार्ग मंत्रालय (एमओरटीएच) यांच्या मार्गदर्शनानुसार या कालावधीत प्रशिक्षण कार्यक्रम, कार्यशाळा, परिसंवाद, वाहनचालक व शालेय विद्यार्थ्यांसाठी जनजागृती सत्रे, नेत्र तपासणी शिबिर तसेच विविध प्रचारात्मक उपक्रम आयोजित करण्यात येणार आहेत.

यावर्षीच्या राष्ट्रीय रस्ता सुरक्षा महिन्याची संकल्पना ‘सडक सुरक्षा – जीवन रक्षा’ अशी असून रस्ता सुरक्षा ही प्रत्येकाच्या जीवनरक्षणाशी निगडित आहे, हा संदेश सर्वसामान्यांपर्यंत पोहोचविण्यावर भर देण्यात येणार आहे. राज्यभर राबविण्यात येणाऱ्या या अभियानामुळे रस्ता सुरक्षा नियमांचे पालन वाढेल आणि अपघातांचे प्रमाण कमी होण्यास मदत होईल, अशी अशा परिवहन आयुक्त, मुंबई यांनी व्यक्त केली आहे.

The post राज्यभर १ ते ३१ जानेवारी दरम्यान ‘रस्ता सुरक्षा अभियान’ appeared first on थोडक्यात घडामोडी.

मुंबई : भांडुप (पश्चिम) रेल्वे स्थानकाबाहेर सोमवारी रात्री उशिरा घडलेल्या भीषण अपघातात चार जणांचा मृत्यू झाला असून किमान १० जण जखमी झाले आहेत. २९ डिसेंबर रोजी रात्री सुमारे १०.०५ वाजता ही दुर्घटना घडली. या घटनेमुळे मुंबईतील गर्दीच्या उपनगरीय स्थानक परिसरातील रस्ते सुरक्षा आणि पादचाऱ्यांसाठी अपुऱ्या जागेचा प्रश्न पुन्हा ऐरणीवर आला आहे.

हा अपघात मार्ग A-606 वर धावणाऱ्या वातानुकूलित इलेक्ट्रिक बसचा (ओलेक्ट्रा मॉडेल) नियंत्रण सुटल्याने झाला. प्रत्यक्षदर्शींनी दिलेल्या माहितीनुसार, बसने काही पादचाऱ्यांना चिरडले आणि नंतर रस्त्यालगत असलेल्या खांबावर धडक दिली, ज्यामुळे परिसरात मोठी गोंधळाची स्थिती निर्माण झाली.

स्थानिक दुकानदार आणि प्रवाशांनी तत्काळ मदतकार्य सुरू केले. बसच्या चाकाखाली अडकलेल्या जखमींना बाहेर काढण्यासाठी नागरिकांनी बस हलवण्याचा प्रयत्न केला.

मृतांची ओळख
मुंबई पोलिसांनी मृतांची ओळख पटवली असून त्यामध्ये पुढील व्यक्तींचा समावेश आहे:

1. प्रणिता रसम (३१): शूटिंगवरून परतणारी मराठी अभिनेत्री. त्यांच्या सोबत असलेली त्यांची ९ वर्षांची मुलगी जखमी झाली आहे.
2. मानसी गुरव (४५): सायन रुग्णालयातील परिचारिका.
3. वर्षा सावंत (२५): स्थानिक रहिवासी.
4. प्रशांत शिंदे (५३): वाहतूक विभागातील कर्मचारी.

जखमींना मुलुंड येथील एम.टी. अग्रवाल रुग्णालयात तसेच घाटकोपरच्या राजावाडी रुग्णालयात दाखल करण्यात आले आहे. प्रशांत लाड नावाच्या एका जखमीची प्रकृती गंभीर असल्याचे डॉक्टरांनी सांगितले.

पोलिसांची कारवाई आणि तपास
भांडुप पोलिसांनी बसचालक संतोष रमेश सावंत (५२) आणि वाहक भगवान भाऊ घारे यांना ताब्यात घेतले आहे. प्राथमिक तपासानुसार अरुंद रस्त्यावरून जाताना चालकाकडून ब्रेकऐवजी अ‍ॅक्सिलरेटर दाबली गेली असावी, असा संशय व्यक्त करण्यात येत आहे.

“ही बस विक्रोळी डेपोची भाडेतत्त्वावर चालवली जात होती. ही घटना चालकाच्या गुन्हेगारी निष्काळजीपणामुळे घडली की इलेक्ट्रिक बसच्या यंत्रणेमध्ये काही तांत्रिक बिघाड होता, याचा सखोल तपास सुरू आहे,” असे एका वरिष्ठ पोलिस अधिकाऱ्याने सांगितले.

फूटपाथ अतिक्रमणावर प्रश्नचिन्ह
या दुर्घटनेमुळे स्टेशन परिसरातील कायमस्वरूपी गर्दीची समस्या अधोरेखित झाली आहे. स्थानिक रहिवासी आणि पोलिसांच्या मते, स्टेशन रोडवरील बहुतांश फूटपाथ फेरीवाल्यांनी व्यापल्यामुळे शेकडो प्रवाशांना मुख्य रस्त्यावरून चालावे लागते, ज्यामुळे अपघाताचा धोका वाढतो.

मुख्यमंत्री देवेंद्र फडणवीस यांची प्रतिक्रिया
मुख्यमंत्री देवेंद्र फडणवीस यांनी X (माजी ट्विटर) वर शोक व्यक्त करत ही घटना “अत्यंत दुर्दैवी” असल्याचे म्हटले आहे. त्यांनी मृतांच्या कुटुंबीयांना प्रत्येकी ₹५ लाखांची आर्थिक मदत जाहीर केली असून जखमींच्या उपचाराचा संपूर्ण खर्च राज्य सरकार उचलणार असल्याचे आश्वासन दिले आहे.

The post मुंबईत इलेक्ट्रिक बसच्या धडकेत ४ जणांचा मृत्यू, १० जण जखमी appeared first on थोडक्यात घडामोडी.

मुंबई : महाराष्ट्र राज्यात रस्ता सुरक्षेसाठी परिवहन विभागामार्फत सातत्याने राबविण्यात येणाऱ्या विविध उपाययोजनांचा सकारात्मक परिणाम दिसून येत असून, नोव्हेंबर २०२५ पर्यंतच्या आकडेवारीनुसार राज्यातील रस्ता अपघातांमधील मृत्यूदरात घट नोंदविण्यात आली आहे.

जानेवारी ते नोव्हेंबर २०२५ या कालावधीत राज्यात एकूण ३३,००२ अपघात झाले असून, त्यामध्ये १४,०६६ अपघाती मृत्यू झाले आहेत. मागील वर्षी याच कालावधीत ३२,७८४ अपघातांत १४,१८५ मृत्यू झाले होते. तुलनात्मक पाहता, अपघातांची संख्या २१८ ने (०.६६ टक्के) वाढली असली तरी अपघाती मृत्यूंची संख्या ११९ ने म्हणजेच ०.८३ टक्क्यांनी घटली आहे. मृत्युदरातील ही घट रस्ता सुरक्षा उपाययोजनांचे यश दाखवते.

दरम्यान, मुंबई–पुणे द्रुतगती मार्गावरही अपघाती मृत्यूंमध्ये मोठी घट नोंदविण्यात आली आहे. जानेवारी ते नोव्हेंबर २०२४ या कालावधीत या मार्गावर ८२ अपघाती मृत्यू झाले होते, तर २०२५ मध्ये ही संख्या ६१ वर आली आहे. म्हणजेच २१ मृत्यूंनी (२६ टक्के) घट झाली आहे. तसेच अपघातांची संख्या ६६ वरून ५४ इतकी कमी झाली असून, त्यामध्ये १८ टक्के घट नोंदविण्यात आली आहे.

रस्ता सुरक्षा उपायांमुळे काही जिल्ह्यांमध्ये मृत्यूंच्या संख्येत विशेष घट दिसून आली आहे. नागपूर शहरात २१ टक्के, पालघरमध्ये २० टक्के, अमरावतीत १७ टक्के, पुण्यात १५ टक्के, धुळ्यात १४ टक्के तर छत्रपती संभाजीनगरमध्ये १२ टक्क्यांनी अपघाती मृत्यू कमी झाले आहेत, असे परिवहन विभागाने कळविले आहे.

राज्यातील रस्ता अपघातांची संख्या सन २०३० पर्यंत ५० टक्क्यांनी कमी करण्याचे उद्दिष्ट परिवहन विभागाने निश्चित केले असून, त्यासाठी भविष्यात रस्ता सुरक्षा उपाययोजना अधिक प्रभावीपणे राबविण्यात येणार आहेत. याचबरोबर, राज्यातील सर्व वाहनचालक व पादचारी नागरिकांनी वाहतुकीचे नियम काटेकोरपणे पाळावेत, असे आवाहनही परिवहन विभागामार्फत करण्यात आले आहे.

The post राज्यात रस्ता अपघातांतील मृत्यूदरात घट; परिवहन विभागाच्या उपाययोजनांना यश appeared first on थोडक्यात घडामोडी.

हिंजवडी आयटी पार्क परिसरात पुन्हा एकदा बेफाम वेगाचा कहर पाहायला मिळाला. गर्दीच्या वेळी कंपनीची बस अचानक फुटपाथवर चढत दोन चिमुकल्यांचा जागीच मृत्यू झाला. या दुर्घटनेनंतर वाहतूक आणि रस्ते सुरक्षा व्यवस्थेबाबत गंभीर प्रश्न उपस्थित झाले आहेत.

हिंजवडी आयटी पार्कमधील वाढत्या अपघातांच्या मालिकेत सोमवारी आणखी एक भीषण घटना घडली. सायंकाळी साडेसहाच्या सुमारास पंचरत्न चौकाजवळ कंपनीच्या कर्मचाऱ्यांना नेणारी बस अचानक नियंत्रणाबाहेर गेली आणि ती थेट फुटपाथवर चढली. गर्दीच्या वेळी हा प्रकार घडल्याने पादचाऱ्यांना सुटण्याची संधीही मिळाली नाही.

या अपघातात अर्चना देवा प्रसाद (८) आणि तिचा भाऊ सूरज देवा प्रसाद (६) यांचा जागीच मृत्यू झाला. त्यांची बहिण प्रिया देवा प्रसाद (१८) गंभीर जखमी असून तिला उपचारासाठी रुग्णालयात दाखल करण्यात आले आहे. पादचारी अविनाश चव्हाण आणि बसमधील काही प्रवासीही जखमी झाल्याची माहिती पोलिसांनी दिली.

अपघात छत्रपती शिवाजी महाराज चौक ते वाकड या व्यस्त मार्गावर झाला. साक्षीदारांच्या मते, कंपनीची बस अतिवेगात होती आणि चालकाने ताबा गमावल्यानंतर वाहनाने थेट चालत जाणाऱ्या नागरिकांवर धडक दिली. धडक इतकी जोरदार होती की परिसरात काही क्षणांतच भीतीचे वातावरण पसरले.

घटनेची माहिती मिळताच हिंजवडी पोलीस आणि वाहतूक विभागाचे अधिकारी घटनास्थळी दाखल झाले. काही काळ तीव्र वाहतूक कोंडी निर्माण झाली होती, ती पोलिसांनी तात्काळ सुरळीत केली.

हिंजवडी परिसरातील वाढती वाहतूक कोंडी, अवजड वाहनांची गर्दी आणि वारंवार होणारे अपघात या मुद्द्यांवर नागरिक सातत्याने आवाज उठवत आहेत. या दुर्दैवी घटनेनंतर “बेफाम वेग थांबणार कधी?” असा तीव्र रोष नागरिकांनी व्यक्त केला. अधिक कडक सुरक्षा उपाय, वेगनियंत्रण व पादचारी संरक्षणाच्या मागण्या पुन्हा जोर धरू लागल्या आहेत.

सारांश : महत्त्वाच्या घडामोडी एकाच नजरेत

• हिंजवडी पंचरत्न चौकात कंपनी बसने फुटपाथवरील पादचाऱ्यांना दिली जोरदार धडक
• दोन चिमुकल्यांचा जागीच मृत्यू, एक जखमी मुलगी गंभीर
• काही पादचारी आणि बस प्रवासीही जखमी
• नागरिकांमध्ये संताप; वाहतूक व सुरक्षा व्यवस्थेवर प्रश्नचिन्ह
• पोलिसांनी वाहतूक कोंडी नियंत्रणात आणली; पुढील तपास सुरू

The post हिंजवडी आयटी पार्क हादरलं: भरधाव बस फुटपाथवर; बहीण–भावाचा जागीच मृत्यू, अनेक जखमी appeared first on थोडक्यात घडामोडी.

मुंबई : वाहन उद्योगात ह्युंदाई कंपनीचे मोठे नाव आहे. कंपनीने राज्यातही गुंतवणूक केली आहे. पुणे येथील प्रकल्पातून वाहन उत्पादनात वाढ होणार आहे. ह्युंदाई कंपनीने राज्यात वाहन उद्योगात अधिकाधिक गुंतवणूक करीत रोजगार निर्मितीमध्ये वाढ करावी, असे आवाहन मुख्यमंत्री देवेंद्र फडणवीस यांनी वर्षा निवासस्थानी ह्युंदाई कंपनीच्या शिष्टमंडळासोबत आयोजित बैठकीत केले.

ह्युंदाई कंपनीचे व्यवस्थापकीय संचालक उन्सू किम यांनी मुख्यमंत्री फडणवीस यांची भेट घेतली. बैठकीस मुख्यमंत्री यांचे अपर मुख्य सचिव अश्विनी भिडे, उद्योग सचिव डॉ. पी. अनबलगन, मुख्यमंत्री यांचे गुंतवणूक सल्लागार कौस्तुभ धवसे, कंपनीचे कार्यकारी संचालक जिओन्जीक ली, उपाध्यक्ष (वित्त) सारावनन टी, सहायक उपाध्यक्ष पुनीत आनंद, कार्तिक एल, वरिष्ठ व्यवस्थापक विनोद बनसोड आदी उपस्थित होते.

मुख्यमंत्री देवेंद्र फडणवीस म्हणाले, कंपनी राज्यात सामाजिक उत्तरदायित्वअंतर्गत विविध कामांसाठी ५६ कोटी रुपयांचा निधी देत आहे. ही बाब स्तुत्य असून या निधीतून राज्यात सुरू असलेली कामे पथदर्शी ठरतील. या निधीतून कंपनीने पर्यावरण संवर्धनासाठी काम करीत रस्ता सुरक्षा, चालक प्रशिक्षण आदींमध्ये काम करावे. राज्यात उद्योगस्नेही वातावरण तयार करून उद्योगांना सहकार्य करण्याची राज्य शासनाची भूमिका आहे, असेही मुख्यमंत्री फडणवीस यांनी यावेळी सांगितले.

बैठकीत कंपनीच्या अधिकाऱ्यांनी सादरीकरण करीत कंपनीच्या गुंतवणुकीसंदर्भातील माहिती दिली. पुणे येथील प्रकल्पाच्या कामाची माहिती यावेळी देण्यात आली. यावेळी कंपनीच्या सामाजिक उत्तरदायित्व निधीतून पुणे जिल्ह्यातील तळेगाव येथील वृक्षारोपण मोहीम, रस्ता सुरक्षा उपक्रम आदींचा शुभारंभ मुख्यमंत्री देवेंद्र फडणवीस यांच्या हस्ते करण्यात आला.

The post ह्युंदाई कंपनीने राज्यात अधिकाधिक गुंतवणूक करीत रोजगार निर्मिती वाढवावी – मुख्यमंत्री देवेंद्र फडणवीस appeared first on थोडक्यात घडामोडी.

पुणे : समृद्धी महामार्गावरील अपघात कमी करण्यासाठी मर्सिडीज कंपनीने घेतलेला पुढाकार हा अत्यंत स्तुत्य उपक्रम असून इतर संस्थांनी देखील त्यांचा आदर्श घ्यावा, असे प्रतिपादन परिवहन मंत्री प्रताप सरनाईक यांनी केले. ते आज चाकण येथे मर्सिडीज कंपनीच्या शिष्टमंडळाशी झालेल्या चर्चेनंतर बोलत होते.

मंत्री सरनाईक म्हणाले की, “रोड हिप्नोसिस” (रोड संमोहन) ही अवस्था अनेकदा अपघातास कारणीभूत ठरते. ही अवस्था टाळून अपघाताचे प्रमाण कमी करण्यासाठी मर्सिडीज कंपनीने समृद्धी महामार्ग पुढील तीन वर्षांसाठी दत्तक घेतला आहे. या उपक्रमांतर्गत चालकांना प्रशिक्षण देणे, अपघात प्रवण क्षेत्रांवर दिशादर्शक लावणे, अपघातग्रस्तांना तात्काळ मदत मिळण्यासाठी जवळपासच्या ट्रॉमा सेंटरची साखळी निर्माण करणे, तसेच चालकांना मार्गदर्शन करणे या उपाययोजना करण्यात येत आहेत. या माध्यमातून कंपनीने राज्याच्या रस्ता सुरक्षा अभियानात मोलाचे योगदान दिले आहे, असे त्यांनी नमूद केले.

यावेळी मंत्री सरनाईक यांनी मर्सिडीज कंपनीच्या प्रतिनिधींशी राज्याच्या ई-वाहन धोरणाबाबत चर्चा केली. भविष्यात कंपनीने ई-वाहन क्षेत्रामध्ये भरारी घ्यावी, अशा सदिच्छाही त्यांनी व्यक्त केल्या.

The post समृद्धी महामार्गावरील अपघात रोखण्यासाठी मर्सिडीज कंपनीचे योगदान मोलाचे – परिवहन मंत्री प्रताप सरनाईक appeared first on थोडक्यात घडामोडी.

पुणे : लोहेगाव येथील एअर फोर्स कॉलनीत दुपारी १२:३० वाजताच्या सुमारास दोन वर्षांचा विदार्थ विपिन मावी याचा दुर्दैवी मृत्यू झाला. विदार्थ आपल्या घराबाहेर खेळत असताना कॉलनीतील एका महिला रहिवाशीनं त्याला कारने धडक दिली.

विदार्थ घराबाहेर खेळत असताना कॉलनीतील एका महिलेच्या कारची त्याला धडक बसली. दरम्यान, त्याला तातडीने खाजगी रुग्णालयात नेले, पण डॉक्टरांनी त्याला मृत घोषित केले. याप्रकरणी, विदार्थचे वडिल विपिन राजसिंह मावी (वय ३४) यांनी विमानतळ पोलीस स्टेशनमध्ये तक्रार नोंदवली. विपिन हे भारतीय हवाई दलाचे अधिकारी आहेत.

पोलिसांनी माहिती दिली की, महिला चालकाविरुद्ध FIR नोंदवली गेली आहे. अपघाताची तातडीने चौकशी सुरू करण्यात आली आहे. पोलिसांनी कॉलनीतील रहिवाशांना शांती राखण्याचे आवाहन केले आहे आणि अपघाताचे कारण निश्चित करण्यासाठी तपास सुरु आहे. विदार्थच्या दुर्दैवी मृत्यूमुळे हळहळ व्यक्त केली जात आहे. पोलीस या प्रकरणातील सर्व घटनांचा तपशील घेत असून, योग्य कायदेशीर कारवाई केली जाईल असे त्यांनी सांगितले आहे.

The post पुणे : कारच्या धडकेत दोन वर्षांच्या मुलाचा दुर्दैवी मृत्यू; महिला चालकाविरुद्ध FIR दाखल appeared first on थोडक्यात घडामोडी.

मुंबई : मुंबई – गोवा महामार्गावरील हातखंबा येथील गॅस टँकर उलटण्याच्या दुर्घटनेत कोणतीही जीवितहानी नाही. वाहतूक पूर्ववत सुरू करण्यात आली आहे, असे सार्वजनिक बांधकाम विभाग (सार्वजनिक उपक्रम)च्या वतीने कळविण्यात आले आहे.

महामार्गावरील हातखंबा पुनर्रचना विभागात आज सकाळी 9.30 वाजता गॅस टँकर अतिवेगामुळे उलटला. या दुर्घटनेबाबत प्रसार माध्यमातून वृत्त प्रसिद्ध झाले होते. टँकरजवळ उभ्या असलेल्या लहान चहाच्या स्टॉलवर (टपरी) आणि तेथील 3-4 दुचाकींवर तो उलटला. या घटनेत कोणतीही जीवितहानी झालेली नाही. तेथील वाहतूक पुन्हा सुरू झाली आहे. कंत्राटदार कंपनी कडून पोलिस अधिकाऱ्यांशी समन्वय साधून आवश्यक ती सर्व यांत्रिक मदत पुरवली आहे आणि टँकर उचलण्याचे काम सुरू आहे.

The post मुंबई – गोवा महामार्गावर गॅस टँकर उलटला, सुदैवाने दुर्घटनेत जीवितहानी नाही appeared first on थोडक्यात घडामोडी.

पुणे : पुण्यातील रस्ते सुरक्षेबाबत गंभीर चिंता व्यक्त करणारी घटना सोमवारी सकाळी पिंपरी-चिंचवडमध्ये घडली. रामकृष्ण नाट्यगृहाजवळ एका डॉक्टरची कार उलटून झालेल्या अपघातात तीन जण जखमी झाले. या घटनेमुळे शहरातील वाहतूक व्यवस्थेवर तसेच रस्ते पायाभूत सुविधांवर प्रश्नचिन्ह उपस्थित झाले आहे.

मिळालेल्या माहितीनुसार, सकाळी साधारण ११ वाजताच्या सुमारास डॉक्टर आपल्या टाटा टियागो (MH 14 JA 0262) या कारने चिंचवड रेल्वे स्थानकावरून चाफेकर चौकाकडे जात होते. टाटा मोटर्सच्या गेटजवळ अचानक कार चालवत असलेल्या डॉक्टरचा गाडीवरील ताबा सुटला. भरधाव वेगात असलेल्या गाडीने प्रथम रस्त्यावरून जाणाऱ्या एका पादचाऱ्याला धडक दिली. त्यानंतर कार अनियंत्रित होऊन काही क्षणातच रस्त्यावर उलटली. या अपघाताचा आवाज इतका मोठा होता की परिसरातील नागरिक आणि दुकानदार धाव घेत घटनास्थळी आले.

या अपघातात डॉक्टर, त्यांची पत्नी आणि एक पादचारी गंभीर जखमी झाले. घटनेची माहिती मिळताच वाहतूक पोलीस आणि आपत्कालीन पथके तातडीने घटनास्थळी दाखल झाली. मदतकार्य सुरू करत सर्व जखमींना जवळील रुग्णालयात दाखल करण्यात आले. अधिकाऱ्यांनी दिलेल्या माहितीनुसार तिघांवरही उपचार सुरू असून जखमींची प्रकृती सध्या स्थिर आहे. सुदैवाने या अपघातात जीवितहानी झाली नाही.

अपघातामुळे या मुख्य रस्त्यावर वाहतूक पूर्णतः ठप्प झाली. कार उलटल्यामुळे मोठा अडथळा निर्माण झाला होता. वाहतूक पोलिसांनी तातडीने पर्यायी मार्ग सुरू केले. जवळपास तासभर वाहतूक कोंडी राहिली. क्रेनच्या मदतीने उलटलेली कार रस्त्यावरून हटवण्यात आली आणि त्यानंतर वाहतूक सुरळीत करण्यात आली.

अपघाताचे संभाव्य कारण आणि तपास
प्राथमिक माहितीनुसार गाडीवरील ताबा सुटणे हे अपघाताचे प्रमुख कारण मानले जात आहे. मात्र वाहनाची तांत्रिक तपासणी तसेच चालकाच्या आरोग्यविषयक स्थितीचीही चौकशी करण्यात येत आहे. सीसीटीव्ही फुटेज आणि प्रत्यक्षदर्शींचे जबाब पोलिसांकडून नोंदवले जात आहेत.

रहिवाशांचा संताप आणि मागण्या
अरुंद रस्ते, खराब सिग्नल यामुळे वारंवार अपघात घडत आहेत. रहिवाशांनी वाहतूक नियमांची काटेकोर अंमलबजावणी, रस्त्यांची दुरुस्ती आणि सिग्नल यंत्रणेचे आधुनिकीकरण करण्याची मागणी केली आहे.

पोलिसांचे आवाहन
वाहन चालकांनी वेगावर नियंत्रण ठेवावे आणि वाहतूक नियमांचे पालन करावे, असे आवाहन वाहतूक विभागाकडून करण्यात आले आहे. अपघाताचा सविस्तर तपास सुरू असून दोषी आढळल्यास कायदेशीर कारवाई केली जाईल, अशी माहिती वरिष्ठ पोलीस निरीक्षकांनी दिली.

The post डॉक्टरची कार उलटून अपघात, पादचाऱ्यासह तिघांना गंभीर दुखापत appeared first on थोडक्यात घडामोडी.