पुणे : स्वातंत्र्यदिनाच्या निमित्ताने पुणे महानगरपालिकेच्या वतीने आयोजित विशेष सत्कार समारंभात व्यसनमुक्ती अभ्यासक व सामाजिक कार्यकर्ते डॉ. सोमनाथ वेणूताई निवृत्ती गिते यांचा मा. महापौर सौ. मंजुषा नागपुरे यांच्या हस्ते सन्मान करण्यात आला.

पुणे शहरातील विविध क्षेत्रांत उल्लेखनीय कार्य करणाऱ्या व्यक्तींच्या गौरवासाठी आयोजित या विशेष समारंभात डॉ. गिते यांच्या सामाजिक व व्यसनमुक्ती क्षेत्रातील दीर्घकालीन कार्याची दखल घेण्यात आली. गेल्या अनेक वर्षांपासून ते व्यसनमुक्ती जनजागृती, युवक प्रबोधन आणि सामाजिक कार्याच्या माध्यमातून समाजात व्यसनमुक्तीचा संदेश पोहोचविण्याचे कार्य करीत आहेत.

डॉ. गिते यांनी राज्यभरातील युवक, पालक आणि नागरिकांमध्ये व्यसनाच्या दुष्परिणामांबाबत जनजागृती करण्यासाठी विविध उपक्रम राबविले आहेत. शाळा, महाविद्यालये, सामाजिक संस्था तसेच विविध सार्वजनिक उपक्रमांच्या माध्यमातून त्यांनी व्यसनमुक्तीबाबत सातत्याने प्रबोधन केले आहे. व्यसनाधीन व्यक्ती तसेच त्यांच्या कुटुंबीयांना मार्गदर्शन आणि पुनर्वसनाच्या प्रक्रियेत मदत करण्याचे कार्यही त्यांनी केले आहे.

त्यांच्या या कार्याची दखल घेत महाराष्ट्र शासनाच्या सामाजिक न्याय व विशेष सहाय्य विभागामार्फत ‘राष्ट्रपिता महात्मा गांधी राज्यस्तरीय व्यसनमुक्ती सेवा पुरस्कार’ देऊन त्यांचा गौरव करण्यात आला आहे. हा राज्यस्तरीय पुरस्कार मा. संजय शिरसाट यांच्या हस्ते प्रदान करण्यात आला होता.

सामाजिक कार्यातील योगदानाबद्दल डॉ. गिते यांना डॉक्टरेट पदवी प्राप्त झाली असून, व्यसनमुक्ती व सामाजिक जनजागृतीच्या क्षेत्रातील त्यांच्या कार्याची विविध स्तरांवर दखल घेण्यात आली आहे. त्यांच्या सामाजिक कार्याशी संबंधित विविध जागतिक विक्रमांची नोंद त्यांच्या नावावर असून, राष्ट्रीय व आंतरराष्ट्रीय स्तरावरील विविध सन्मानांनीही त्यांना गौरविण्यात आले आहे.

डॉ. गिते यांच्या कार्याला विविध मान्यवर, सामाजिक संस्था आणि लोकप्रतिनिधींनीही वेळोवेळी पाठिंबा व कौतुकाची दाद दिली आहे. त्यांच्या कार्याची प्रशंसा करणारी प्रशंसापत्रे व शिफारसपत्रेही विविध स्तरांवरून प्राप्त झाली आहेत.

पुणे महानगरपालिकेच्या वतीने झालेला हा सन्मान त्यांच्या सामाजिक कार्याची महत्त्वपूर्ण दखल मानली जात असून, या सन्मानामुळे व्यसनमुक्तीच्या कार्याला आणखी व्यापक स्वरूप देण्याची प्रेरणा मिळाल्याची भावना डॉ. गिते यांनी व्यक्त केली.

“हा सन्मान केवळ माझा नसून, माझ्या या प्रवासात साथ देणाऱ्या कुटुंबीयांचा, सहकाऱ्यांचा, मित्रांचा आणि माझ्या कार्यावर विश्वास ठेवणाऱ्या प्रत्येकाचा आहे. समाजातील युवकांना व्यसनापासून दूर ठेवण्यासाठी आणि व्यसनमुक्त, सुसंस्कारित व सशक्त पिढी घडविण्यासाठी यापुढेही सातत्याने कार्य करत राहू,” असे डॉ. गिते यांनी सांगितले.

स्वातंत्र्यदिनाच्या निमित्ताने झालेल्या या सन्मानामुळे त्यांच्या सामाजिक कार्याला नवी ऊर्जा मिळाली असून, व्यसनमुक्त समाजाच्या निर्मितीसाठी सुरू असलेली त्यांची जनजागृतीची चळवळ अधिक व्यापक करण्याचा संकल्प त्यांनी व्यक्त केला.

The post स्वातंत्र्यदिनानिमित्त डॉ. सोमनाथ गिते यांचा महापौरांच्या हस्ते गौरव appeared first on थोडक्यात घडामोडी.

मुंबई : डॉ. बाबासाहेब आंबेडकर संशोधन व प्रशिक्षण संस्था (बार्टी) तर्फे राज्यातील अनुसूचित जाती प्रवर्गातील उमेदवारांसाठी आर्थिक सहाय्य योजना जाहीर करण्यात आली आहे. महाराष्ट्र लोकसेवा आयोगाची अभियांत्रिकी मुख्य परीक्षा २०२४ मध्ये उत्तीर्ण होऊन मुलाखतीस पात्र ठरलेल्या उमेदवारांना या योजनेअंतर्गत एकरकमी दहा हजार रुपये आर्थिक सहाय्य देण्यात येणार आहे. मुलाखतीसाठी पात्र झालेल्या उमेदवारांनी यांचा लाभ घेण्याचे आवाहन बार्टीचे महासंचालक सुनील वारे यांनी केले आहे.

या योजनेचा लाभ घेण्यासाठी उमेदवार महाराष्ट्रातील अनुसूचित जातीचा असावा. उमेदवार १३ नोव्हेंबर २०२५ रोजी जाहीर झालेल्या ०५४/२०२५ च्या महाराष्ट्र लोकसेवा आयोग अभियांत्रिकी मुख्य परीक्षा उत्तीर्ण असावा. अर्जाची संपूर्ण प्रक्रिया पूर्णपणे ऑनलाईन असून अर्ज करण्यासाठी बार्टीच्या https://forms.gle/nkVisRqmndp1qpAM9 या लिंकवर फॉर्म आणि आवश्यक माहिती उपलब्ध करुन देण्यात आली आहे. आवश्यक कागदपत्रांसह अर्ज २७ डिसेंबर २०२५ रोजी सायंकाळी पाच वाजेपर्यंत भरण्याची मुदत देण्यात आलेली आहे. एकाच विद्यार्थ्याने वेगवेगळी माहिती भरून एकापेक्षा जास्त वेळा अर्ज केल्यास संबंधित विद्यार्थ्याची उमेदवारी रद्द करण्यात येईल, अशी स्पष्ट सूचना देण्यात आली आहे.

उमेदवाराने ऑनलाईन अर्जा व्यतिरिक्त अर्जाची स्व-साक्षांकित प्रत बार्टी, पुणे कार्यालयास २७ डिसेंबर २०२५ रोजी सायंकाळी पाच वाजेपर्यंत सादर करावी. अर्ज पाठविण्यासाठीचा पत्ता, डॉ. बाबासाहेब आंबेडकर संशोधन व प्रशिक्षण संस्था, (बार्टी) 28/ कीन्स गार्डन, कॅम्प पुणे 411001 असून अधिक माहितीसाठी 020-26333330/26333339 येथे संपर्क करावा. अर्जाच्या लिफाफ्यावर ‘एम.पी.एस. सी अभियांत्रिकी 2025 मुलाखतीसाठी आर्थिक सहाय्य असे नमूद करण्याचे आवाहन बार्टी कार्यालयामार्फत करण्यात आलेले आहे.

The post ‘बार्टी’तर्फे एमपीएससी अभियांत्रिकी मुलाखत तयारीसाठी आर्थिक सहाय्य appeared first on थोडक्यात घडामोडी.

पुणे : शहरातील हवेची गुणवत्ता मागील काही दिवसांत झपाट्याने खालावली असून एअर क्वालिटी इंडेक्स (AQI) ‘खराब’ श्रेणीत पोहोचल्याने आरोग्यावर गंभीर परिणाम होण्याची शक्यता वाढली आहे. सकाळी व संध्याकाळी शहरावर धुक्यासारखा धूर पसरत असून श्वसनाचे त्रास वाढल्याची तक्रार अनेक नागरिकांकडून होत आहे.

तज्ञांच्या मते प्रदूषण वाढण्याची कारणे

• वाहतूक कोंडी आणि वाहनांचा वाढता उत्सर्जन
• बांधकाम प्रकल्पांमधून होणारी धूळ
• तापमानात झालेली घट व हवेची स्थिरता
• कचरा जाळण्याच्या घटना

ही कारणे मिळून हवेत प्रदूषकांचे प्रमाण वाढवत आहेत.

सर्वाधिक प्रभावित भाग
कात्रज, नगर रोड, हडपसर, वारजे, शिवाजीनगर या भागांत AQI सर्वाधिक वाढलेला आढळला. सकाळच्या व्यस्त वेळेत वाहनांची गर्दी आणि धूळकणांचे प्रमाण जास्त प्रमाणात नोंदले जात आहे.

आरोग्यावर परिणाम
आरोग्यतज्ञांनी इशारा दिला आहे की खराब हवेच्या गुणवत्तेमुळे खालील समस्या वाढू शकतात—

• खोकला, घशात खवखव
• डोळ्यांत जळजळ
• दम्याच्या रुग्णांना त्रास वाढणे
• हृदयविकारांच्या रुग्णांना धोका

नागरिकांनी घ्याव्यात ‘या’ आवश्यक काळजी

• सकाळी धावणे, चालणे, सायकलिंग यांसारख्या बाहेरील शारीरिक क्रिया टाळाव्यात
• मास्कचा (N95) वापर करावा
• भरपूर पाणी पिणे, घरी हवा शुद्ध करणारे उपकरण (Air Purifier) वापरणे
• लहान मुले, ज्येष्ठ नागरिक आणि श्वसन व हृदयाचे आजार असलेल्यांनी बाहेर जाणे कमीत कमी करावे
• वाहनांचा कमीत कमी वापर, सार्वजनिक वाहतूकीस प्राधान्य द्यावे

महापालिकेची कारवाई
शहरातील प्रदूषण नियंत्रणासाठी PMC व पर्यावरण विभागाने बांधकामस्थळांवर पाण्याचे फवारणी, रोड स्वीपिंग मशीन आणि कचरा जाळण्यावर नियंत्रणासाठी संयुक्त मोहीम सुरू करण्याचे संकेत दिले आहेत.

पुणेकरांनी आपले आरोग्य जपण्यासाठी पुढील काही दिवस विशेष काळजी घेणे अत्यावश्यक आहे. हवा सुधारणेपर्यंत शक्य तितका घराबाहेरील संपर्क कमी ठेवण्याचे आवाहन करण्यात आले आहे.

The post पुणेकरांनो घ्या विशेष काळजी! हवेची गुणवत्ता झपाट्याने खालावल्याने आरोग्यावर गंभीर परिणाम होण्याची शक्यता appeared first on थोडक्यात घडामोडी.

मुंबई : नगरपरिषदा आणि नगरपंचायतीच्या सार्वत्रिक निवडणुकांसाठी 2 डिसेंबर 2025 रोजी मतदान होत आहे. यापूर्वी मतदानाच्या दिवशीची जाहीर केलेली सुट्टी काही मतदारसंघात न्यायालयीन अपील दाखल झाल्यामुळे केवळ त्या मतदारसंघापुरती रद्द करण्यात आली आहे.

स्थानिक स्वराज्य संस्थेच्या निवडणुकीसाठी 2 डिसेंबर 2025 रोजी 16 जिल्ह्यांतील नगरपरिषद/नगरपंचायतीमध्ये सार्वजनिक सुट्टी रद्द करण्यात आली आहे. यात ठाणे जिल्ह्यातील अंबरनाथ, अहिल्यानगर (कोपरगाव, देवळाली प्रवरा, पाथर्डी, नेवासा), पुणे (बारामती, फुरसुंगी-उरुळी देवाची), सोलापूर (अनगर, मंगळवेढा), सातारा (महाबळेश्वर, फलटण), छत्रपती संभाजीनगर (फुलंब्री), नांदेड (मुखेड, धर्माबाद), लातूर (निलंगा, रेणापूर), हिंगोली (वसमत), अमरावती (अंजनगावसूर्जी), अकोला (बाळापूर), यवतमाळ (यवतमाळ), वाशिम (वाशिम), बुलढाणा (देऊळगावराजा), वर्धा (देवळी) आणि चंद्रपूर जिल्ह्यातील घुग्गुस यांचा समावेश आहे, असे सामान्य प्रशासन विभागाने कळविले आहे.

The post नगरपरिषद, नगरपंचायत निवडणुकीच्या काही मतदारसंघातील सार्वजनिक सुट्टी रद्द appeared first on थोडक्यात घडामोडी.

पुणे : पाणीपुरवठा विभागाने खडकवासला धरण आणि पर्वती जलशुद्धीकरण केंद्रादरम्यान मोठी नवीन पाईपलाईन जोडल्यामुळे २० नोव्हेंबर रोजी पुण्यात संपूर्ण दिवस पाणीकपात होणार आहे. २१ नोव्हेंबरला पाणीपुरवठा कमी दाबासह हळूहळू पूर्ववत होईल.

महापालिकेने खडकवासला ते पर्वती अशी ३,००० मिमीची मुख्य पाईपलाईन टाकण्याचे काम पूर्ण केले आहे. गुरुवारी अभियंते या लाईनला १,४०० मिमीच्या दोन पाईपलाईन जोडतील आणि नवीन फ्लो मीटर बसवतील. या कामाच्या सुरक्षिततेसाठी शहराच्या मोठ्या भागांमध्ये संपूर्ण दिवस पाणीपुरवठा बंद राहणार आहे. मात्र, भामा-आसखेड धरणातून नगर रोड पट्ट्याला होणारा पाणीपुरवठा कोणत्याही व्यत्ययाशिवाय सुरू राहील.

प्रभावित क्षेत्र:

• पार्वती एमएलआर, एचएलआर, एलएलआर टँक झोन
• वडगाव जलशुद्धीकरण केंद्र
• राजीव गांधी पंपिंग स्टेशन
• कॅन्टोन्मेंट वॉटर वर्क्स
• चिखली वॉटर वर्क्स
• वारजे वॉटर वर्क्स (फेज १ आणि २)
• चांदणी चौक टँक
• गांधी भवन टँक
• पॅनकार्ड क्लब जीएसआर टँक
• एसएनडीटी एमएलआर आणि एलएलआर टँक
• चतुश्रृंगी टँक
• होळकर वॉटर वर्क्स टँक
• खडकवासला जॅकवेल
• गणपती माथा
• जुने वारजे वॉटर वर्क्स
• नव्याने विलीन झालेल्या गावांमधील बूस्टर स्टेशन

रहिवाशांनी काय करावे?

• शटडाऊनच्या एक दिवस आधी पुरेसे पाणी साठवावे.
• उपलब्ध पाणी काळजीपूर्वक वापरावे.

पाणीपुरवठ्याचे हे नियोजित शटडाऊन शहराच्या पाण्याचे नेटवर्क अपग्रेड करण्यासाठी आणि दीर्घकालीन पुरवठा विश्वासार्हता सुधारण्यासाठी केलेल्या प्रयत्नांचा एक भाग आहे.

The post पुण्यात ‘या’ भागांत २० नोव्हेंबरला संपूर्ण दिवस पाणीपुरवठा राहणार बंद appeared first on थोडक्यात घडामोडी.

मुंबई : पुण्यातील कोरेगाव पार्क येथील जमीन खरेदी-विक्री व्यवहारामध्ये मोठ्या प्रमाणावर मुद्रांक शुल्क चुकविल्याप्रकरणी चौकशी करण्यासाठी नोंदणी महानिरीक्षक व मुद्रांक नियंत्रक सुहास दिवसे यांच्यामार्फत सह नोंदणी महानिरीक्षक तथा मुद्रांक अधीक्षक (मुख्यालय), पुणे राजेंद्र मुठे यांच्या अध्यक्षतेखाली समिती नेमण्यात आली आहे.

नोंदणी उपमहानिरीक्षक (मुख्यालय), पुणे उदयराज चव्हाण, नोंदणी उपमहानिरीक्षक व मुद्रांक उपनियंत्रक, पुणे विभाग, धर्मदेव माईनकर, सह जिल्हा निबंधक वर्ग-1, पुणे शहर संतोष हिंगाणे, सहाय्यक्र नोंदणी महानिरीक्षक तथा कार्यासन अधिकारी क्र.4. नोंदणी महानिरीक्षक कार्यालय, पुणे अनुजा कुलकर्णी, अति. कार्य. सहाय्यक नोंदणी महानिरीक्षक तथा कार्यासन अधिकारी क्र. 12, नोंदणी महानिरीक्षक कार्यालय, पुणे संजय पाटील हे या समितीचे सदस्य आहेत.

या समितीने या प्रकरणी सखोल चौकशी करुन सविस्तर अभिप्रायासह आपला अहवाल 7 दिवसांत सादर करावयाचा आहे.

The post पुण्यातील जमीन खरेदी-विक्री व्यवहारामध्ये मुद्रांक शुल्क चुकविल्याप्रकरणी चौकशीसाठी समिती appeared first on थोडक्यात घडामोडी.

मुंबई : राज्यातील नागरी भागातील तसेच प्रादेशिक योजनांमधील बिगर शेती वापर अनुज्ञेय क्षेत्रावरील जमिनींसाठी तुकडेबंदी कायदा रद्द करण्यात आला आहे. याबाबत राज्य शासनाने नुकताच एक अध्यादेश जारी केला असून या अध्यादेशामुळे १५ नोव्हेंबर १९६५ पासून तुकडेबंदी कायद्यामुळे अडकलेली घरे आणि प्लॉट कायदेशीर करण्याचा मार्ग मोकळा झाल्याची माहिती महसूल मंत्री चंद्रशेखर बावनकुळे यांनी मंत्रालयात पत्रकार परिषदेत दिली.

या निर्णयासंदर्भात अधिक माहिती देताना महसूल मंत्री चंद्रशेखर बावनकुळे म्हणाले, या अध्यादेशानुसार दि. १५ नोव्हेंबर १९६५ ते १५ ऑक्टोबर २०२४ या कालावधीत झालेल्या अशा तुकड्यांच्या खरेदी-विक्री व्यवहारांना आता कोणतेही शुल्क न आकारता नियमित करण्यात येणार आहे. राज्य शासनाने घेतलेला हा निर्णय ऐतिहासिक असून या निर्णयाचा राज्यातील ४९ लाख परिवारांना लाभ होणार आहे.

राज्यात सध्या अंमलात असलेला तुकडेबंदी कायदा हा कृषी क्षेत्रासाठी लागू आहे. या कायद्यानुसार बागायत किंवा जिरायत जमिनींसाठी ठराविक प्रमाणभूत क्षेत्र निश्चित करण्यात आले आहे. परंतु, वाढत्या नागरीकरणामुळे अनेकांनी शहर व गावांच्या सभोवतालच्या भागात आपल्या गरजेपोटी या प्रमाणभूत क्षेत्रापेक्षा कमी क्षेत्राचे व्यवहार केले आहेत. अशा व्यवहारांना आतापर्यंत कायदेशीर दर्जा मिळालेला नव्हता. यास्तव राज्य शासनाने ३ नोव्हेंबर २०२५ रोजी तुकडेबंदी कायद्यावरील सुधारित अध्यादेश जारी केला असून त्याची तत्काळ अंमलबजावणी केली जाणार आहे.

हा निर्णय महानगरपालिका, नगरपरिषदा, नगरपंचायतींच्या हद्दीतील क्षेत्र, मुंबई, पुणे, नागपूर महानगर प्रदेश विकास प्राधिकरणे (एमएमआरडीए, पीएमआरडीए, एनएमआरडीए) ग्रोथ सेंटर्स आणि विशेष नियोजन प्राधिकरणांतील क्षेत्र, तसेच युडीसीपीआरअंतर्गत शहर/गावांच्या परिघातील क्षेत्रांना लागू होणार आहे. ज्या जमिनींचे व्यवहार नोंदणीकृत आहेत पण ७/१२ उताऱ्यावर नावे नोंदलेली नाहीत, त्यांची नावे आता मालकी हक्क म्हणून नोंदवली जातील. तर नोंदणीकृत नसलेले (नोटरीद्वारे केलेले) व्यवहार असलेल्यांनी संबंधित सब-रजिस्ट्रार कार्यालयात नोंदणी करून आपले हक्क नोंदवता येतील,असेही महसूल मंत्री चंद्रशेखर बावनकुळे यांनी सांगितले.

महसूल मंत्री बावनकुळे यांनी सांगितले की, महसूल विभागामार्फत याबाबत लवकरच सविस्तर कार्यपद्धती तयार करून सर्व विभागीय आणि जिल्हा स्तरावरील कार्यालयांना मार्गदर्शक सूचना देणार आहेत. या निर्णयामुळे राज्यातील लाखो नागरिकांना दिलासा मिळून जमिनींच्या मालकी हक्कांचे प्रश्न सुटणार असल्याचा विश्वासही महसूल मंत्री बावनकुळे यांनी पत्रकार परिषदेत व्यक्त केला.

महसूल विभाग अधिक लोकाभिमुख करणार

महसूल मंत्री चंद्रशेखर बावनकुळे यांनी सांगितले, महसूल विभाग अधिक लोकाभिमुख करण्याबरोबरच तो अधिक सक्षम, गतिमान करण्यावर शासनाने भर दिला आहे. सर्वसामान्य जनतेला सेवा गतीने देण्यासाठी महसुली कायद्यांमध्ये सुधारणा करण्यात येत आहेत. महसूल विभागातील अधिकारी कर्मचाऱ्यांची पदोन्नतीची प्रकरणे जलद गतीने मार्गी लावली जात आहेत.

महसूलमंत्रीस्तरावर प्रलंबित असलेल्या केसेस/प्रकरणातील मागील आठ महिन्यात दोन हजार केसेस/ प्रकरणे मार्गी लावली आहेत. पुढील तीन वर्षांत एकही खटला प्रलंबित राहणार नाही असे सूक्ष्म नियोजन करण्यात आले आहे. राज्यात ‘व्हर्टिकल सातबारा’ देण्याचे नियोजन असून यात आधी मोजणी, मग खरेदीखत आणि त्यानंतर नोंदणी, अशी सुटसुटीत व्यवस्था असेल, असेही मंत्री बावनकुळे यांनी पत्रकार परिषदेत सांगितले.

The post राज्यात रहिवासी क्षेत्रासाठी तुकडेबंदी कायदा रद्द – महसूल मंत्री चंद्रशेखर बावनकुळे appeared first on थोडक्यात घडामोडी.

पुणे : पुणे जिल्ह्यात गेल्या महिनाभरात तीन जणांचा जीव घेणाऱ्या “नरभक्षक” बिबट्याला अखेर वन विभागाच्या शार्पशूटर्सनी ठार केले. मंगळवारी रात्री सुमारे १०.३० वाजता झालेल्या या कारवाईत बिबट्याला गोळी घालण्यात आली.

वन विभागाच्या माहितीनुसार, शिरूर तालुक्यातील मौजे पिंपरखेड परिसरात या बिबट्याने दोन अल्पवयीन मुले आणि एका वृद्ध व्यक्तीचा बळी घेतला होता. गेल्या काही दिवसांपासून जुन्नर, शिरूर, आंबेगाव आणि खेड या भागांमध्ये बिबट्यांचे वाढते दर्शन आणि हल्ल्यांच्या घटनांमुळे नागरिकांमध्ये तीव्र संताप होता.

रविवारी झालेल्या ताज्या घटनेत १३ वर्षीय मुलाचा बळी गेल्यानंतर संतप्त ग्रामस्थांनी वन विभागाचे वाहन जाळले. त्यानंतर जिल्हा प्रशासन आणि वन विभागाने तत्काळ विशेष पथक तयार करून बिबट्याला पकडण्याचे अथवा संपवण्याचे आदेश दिले.

जुन्नर वन विभागाच्या अधिकाऱ्यांनी सांगितले, “मंगळवारी रात्री बिबट्या हल्ल्याच्या ठिकाणापासून सुमारे ४०० ते ५०० मीटर अंतरावर दिसला. आम्ही प्रथम त्याला शांत करण्याचा प्रयत्न केला, मात्र तो निष्फळ ठरला. उलट तो पथकावर झेपावला आणि आत्मसंरक्षणासाठी शार्पशूटर्सनी गोळीबार केला.” सुमारे पाच ते सहा वर्षांचा हा नर बिबट्या घटनास्थळीच ठार झाला. त्यानंतर त्याचा मृतदेह ग्रामस्थांना दाखवून पुढील तपासासाठी आणि शवविच्छेदनासाठी माणिकडोह रेस्क्यू सेंटरमध्ये पाठवण्यात आला.

अधिकाऱ्यांनी सांगितले की, त्याच दिवशी जवळच लावलेल्या सापळ्यात आणखी एक नर बिबट्या अडकला असून त्याचीही तपासणी केली जात आहे.

या घटनेनंतर परिसरात भीतीचं सावट असलं तरी नागरिकांना काहीसा दिलासा मिळाला आहे. वन विभागाने नागरिकांना सावध राहण्याचे आणि जंगल परिसरात अनावश्यक वावर टाळण्याचे आवाहन केले आहे.

The post पुणे : ‘नरभक्षक’ बिबट्याला अखेर शार्पशूटर्सनी गोळ्या घालून संपवले appeared first on थोडक्यात घडामोडी.

पुणे : पुण्याच्या मध्यवर्ती भागात मंगळवारी संध्याकाळी १७ वर्षीय तरुणाची चाकूने वार करून हत्या करण्यात आली. ही धक्कादायक घटना बाजीराव रोडवरील महाराणा प्रताप गार्डनजवळ घडली असून, या प्रकरणी पोलिसांनी तात्काळ कारवाई करत तीन अल्पवयीन आरोपींना ताब्यात घेतले आहे. जुन्या वादातून ही हत्या झाल्याचं समोर आलं आहे.

खडक पोलिस ठाण्याच्या माहितीनुसार, मृत तरुण हा आपल्या मित्रासोबत मोटारसायकलवरून जात असताना अचानक तीन किशोरवयीन मुलांनी त्याच्यावर हल्ला चढवला. आरोपींनी धारदार चाकूंसह हल्ला करून तरुणाला गंभीर दुखापत केली. त्यातच त्याचा मृत्यू झाला. प्राथमिक चौकशीतून असे समोर आले आहे की, मृत तरुण आणि आरोपी हे सर्वजण पर्वती परिसरातील रहिवासी असून, त्यांच्यात काही दिवसांपूर्वी किरकोळ कारणावरून वाद झाला होता. त्याच वादाचा राग मनात धरून आरोपींनी सूडाच्या भावनेतून ही हत्या केल्याची शक्यता पोलिसांनी व्यक्त केली आहे.

“या घटनेत सहभागी असलेल्या तिन्ही अल्पवयीन मुलांची ओळख पटली असून त्यांना ताब्यात घेतले आहे. हत्येसाठी वापरलेले धारदार शस्त्र देखील जप्त करण्यात आले आहे. पुढील तपास सुरू आहे,” अशी माहिती खडक पोलिस ठाण्याच्या अधिकाऱ्याने दिली.

या घटनेमुळे परिसरात तणावाचे वातावरण निर्माण झाले असून, पोलिसांनी खबरदारीचा उपाय म्हणून परिसरात अतिरिक्त बंदोबस्त तैनात केला आहे. तसेच, अल्पवयीन आरोपींच्या पालकांना चौकशीसाठी पोलिस ठाण्यात बोलावण्यात आले आहे.

The post पुण्यात १७ वर्षीय मुलाची चाकूने वार करून हत्या, तीन अल्पवयीन आरोपी पोलिसांच्या ताब्यात appeared first on थोडक्यात घडामोडी.

मुंबई : पुणे जिल्हा परिषदेच्या आरोग्य विभागामार्फत राबविण्यात येणाऱ्या ‘सर्वाइकल कॅन्सर फ्री पुणे’ अभियानाचा शुभारंभ उपमुख्यमंत्री अजित पवार यांच्या हस्ते आज सह्याद्री राज्य अतिथीगृह येथे करण्यात आला.

यावेळी उपमुख्यमंत्र्यांचे सचिव डॉ. राजेश देशमुख, पुणे जिल्हा परिषदेचे मुख्य कार्यकारी अधिकारी गजानन पाटील, पुणे जिल्हा आरोग्य अधिकारी डॉ. रामचंद्र हंकारे, उपमुख्यमंत्र्यांचे सहसचिव डॉ.संतोष भोसले, सिरम इन्स्टिट्यूट ऑफ इंडिया, जीविका फाउंडेशन, युनियन बँक, अमेरिका – इंडिया फाउंडेशन या संस्थांचे प्रतिनिधी उपस्थित होते.

स्त्रियांमध्ये होणारा सर्वाइकल कॅन्सर हा देशातील दुसऱ्या क्रमांकाचा मोठ्या प्रमाणात आढळून येणारा आजार आहे. एचपीव्ही लस आणि वेळेवर केलेल्या स्क्रीनिंगमुळे या आजाराला प्रभावीपणे प्रतिबंध करता येऊ शकतो. त्यामुळे या आजाराच्या बाबतीत महिलांमध्ये जनजागृती करणे आणि लसीकरणाचे प्रमाण वाढविण्याची गरज आहे, असे उपमुख्यमंत्री अजित पवार यांनी सांगितले.

पुणे जिल्हा परिषदेचे मुख्य कार्यकारी अधिकारी गजानन पाटील यांनी यावेळी अभियानासंदर्भात सादरीकरण केले.

या प्रकल्पाचा उद्देश सर्वाइकल कॅन्सरच्या संदर्भात प्रतिबंध,जनजागृती, लसीकरण आणि समायोजित स्क्रीनिंगच्या माध्यमातून कॅन्सरचं संपूर्णपणे निर्मूलन करणे हा आहे. या उपक्रमांतर्गत शाळांमध्ये लसीकरणाच्या माध्यमातून जनजागृती करण्यात येणार आहे. त्याचबरोबर आशा सेविकांकडून घराघरात जाऊन महिला वर्गासाठी सर्वाइकल कॅन्सर स्क्रीनिंगची माहिती दिली जाणार आहे, अशी माहिती यावेळी देण्यात आली.

The post ‘सर्वाइकल कॅन्सर फ्री पुणे’ अभियानाचा उपमुख्यमंत्री अजित पवार यांच्या हस्ते शुभारंभ appeared first on थोडक्यात घडामोडी.