पुणे : पुण्यातील कोंढवा परिसरातील इस्कॉन चौक येथे आज सकाळी साडेसातच्या सुमारास भीषण रस्ते अपघात घडला. या अपघातात जेएसपीएम संस्थेत शिक्षिका म्हणून कार्यरत असलेल्या ५३ वर्षीय रमा कापडी यांचा दुर्दैवी मृत्यू झाला आहे.

मिळालेल्या प्राथमिक माहितीनुसार, रमा कापडे या कात्रज–कोंढवा रोडवरून दुचाकीवरून जात असताना त्या चुकून विरुद्ध दिशेने गेल्या. याचवेळी समोरून येणाऱ्या भरधाव ट्रकने त्यांना जोरदार धडक दिली. धडकेनंतर त्या गंभीर जखमी झाल्या.

अपघातानंतर घटनास्थळी मोठी वाहतूक कोंडी झाली. त्यामुळे रुग्णवाहिकेला घटनास्थळी पोहोचण्यास सुमारे ३० मिनिटांचा विलंब झाला. जखमी अवस्थेत रमा कापडे यांना तातडीने जवळील भारतीय विद्यापीठ रुग्णालयात दाखल करण्यात आले. मात्र उपचार सुरू होण्यापूर्वीच डॉक्टरांनी त्यांचा मृत्यू झाल्याचे घोषित केले. त्यामुळे काही काळ परिसरात तणावाचे वातावरण निर्माण झाले होते.

या प्रकरणी कोंढवा पोलीस ठाण्यात अपघाताची नोंद करण्यात आली असून, ट्रक चालकाची भूमिका, वाहतुकीचे नियोजन आणि अपघाताचे नेमके कारण याबाबत पोलीस अधिक तपास करत आहेत.

विशेष म्हणजे, या साडेतीन किलोमीटर लांबीच्या कात्रज–कोंढवा रोडवर गेल्या साडेचार वर्षांत ५५ हून अधिक अपघात झाले आहेत, ज्यामुळे २५ जणांचा मृत्यू झाला आहे. यामुळे या मार्गावर रस्ते सुरक्षा उपायांची तातडीने गरज असल्याचे स्थानिक लोकांचे म्हणणे आहे.

The post कात्रज–कोंढवा रोडवर भीषण अपघात, वाहतूक कोंडीमुळे मदत मिळण्यास विलंब झाल्याने जेएसपीएमच्या शिक्षिकेचा दुर्दैवी मृत्यू appeared first on थोडक्यात घडामोडी.

पुणे : पुणे-सातारा महामार्गावर बुधवारी (३० जुलै) सकाळी खेड शिवापूरजवळ झालेल्या भीषण अपघातात दोन दुचाकीस्वारांचा मृत्यू झाला असून एका जीप चालकास गंभीर दुखापत झाली आहे. चालकाचे ट्रकवरील नियंत्रण सुटल्याने एकूण पाच वाहनांना धडक दिल्याची माहिती पुणे ग्रामीण पोलिसांनी दिली.

हा अपघात सकाळी ९ वाजण्याच्या सुमारास घडला. साताऱ्याकडे वेगात निघालेला मालवाहू ट्रक अचानक अनियंत्रित झाला आणि विरुद्ध दिशेच्या (पुणे लेन) मार्गावर घुसून पाच वाहनांना जोरदार धडक दिली. यामध्ये दोन मोटारसायकली, एक जीप आणि इतर दोन वाहनांचा समावेश होता.

पोलिसांनी दिलेल्या माहितीनुसार, प्रथमेश महादेव रेडेकर (वय ३२, रा. पुणे) आणि दिव्यम सुनील निकम (वय ३१, रा. पुणे) हे दोघे एका मोटारसायकलवर प्रवास करत होते. ट्रकने त्यांच्या दुचाकीला जोरदार धडक दिल्याने गंभीर जखमी झाले. त्यांना तातडीने जवळच्या रुग्णालयात हलवण्यात आले, मात्र डॉक्टरांनी त्यांना मृत घोषित केले. त्याच अपघातात संजय खटपे या जीप चालकास गंभीर दुखापत झाली असून त्यांच्यावर स्थानिक रुग्णालयात उपचार सुरू आहेत.

अपघातानंतर महामार्गावर काही काळ वाहतूक कोंडी निर्माण झाली होती. पोलिसांनी घटनास्थळी तातडीने पोहोचून वाहतूक सुरळीत करण्याचे प्रयत्न केले. पोलिसांनी सांगितले की, “ट्रक चालकाचे वाहनावरील नियंत्रण सुटल्याने त्याने आधी एका कंटेनर वाहनाला, नंतर जीपला आणि नंतर दुचाकींना धडक दिली.” याप्रकरणी ट्रक चालकाविरोधात भारतीय दंड संहितेच्या (BNS) संबंधित कलमांखाली गुन्हा दाखल करण्यात आला आहे. पोलिसांकडून अधिक तपास सुरू असून अपघाताचे नेमके कारण शोधले जात आहे.

The post पुणे : भरधाव ट्रकची पाच वाहनांना धडक; भीषण अपघातात दोघांचा मृत्यू, एक जखमी appeared first on थोडक्यात घडामोडी.

पुणे : हडपसर-सासवड रस्त्यावरील सातववाडी पीएमपी बस थांब्यासमोर सोमवारी सकाळी घडलेल्या भीषण अपघातात एका डॉक्टरचा जागीच मृत्यू झाला. डॉ. ईश्वर साहू (वय २६, रा. भेकराईनगर, फुरसुंगी, मूळ रा. छत्तीसगड) असे अपघातात मृत्यूमुखी पडलेल्या डॉक्टरचे नाव आहे.

मिळालेल्या माहितीनुसार, सकाळी साडेसात वाजण्याच्या सुमारास, डॉ. साहू हे त्यांच्या दुचाकीवरून हडपसरच्या दिशेने जात असताना, एका थांबलेल्या पीएमपी बसच्या मागे थांबले होते. त्याच वेळी पाठीमागून भरधाव वेगात आलेल्या टँकरने त्यांच्या दुचाकीला जोरदार धडक दिली. डॉ. साहूंनी हेल्मेट परिधान केलेले होते, मात्र अपघाताची तीव्रता इतकी होती की टँकरचे चाक थेट त्यांच्या डोक्यावरून गेल्याने गंभीर रक्तस्राव झाला आणि त्यांचा जागीच मृत्यू झाला. अपघातानंतर आजूबाजूच्या नागरिकांनी तात्काळ पोलिस व रुग्णवाहिकेला पाचारण केले. डॉ. साहूंना तातडीने रुग्णालयात नेण्यात आले, मात्र उपचारापूर्वीच त्यांना मृत घोषित करण्यात आले.

या प्रकरणी हडपसर पोलिस ठाण्यात टँकर चालक राजेंद्र एकनाथ तळेकर (वय ५१, रा. वीर, ता. खंडाळा, जि. सातारा) याच्याविरुद्ध गुन्हा दाखल करण्यात आला आहे व त्याला अटकही करण्यात आली आहे. अप्पासो भीमराव सबळकर (वय ४०, रा. वेताळबाबा, गाडीतळ, हडपसर) यांनी पोलिसांत फिर्याद दिली आहे.

डॉ. ईश्वर साहू हे मूळचे छत्तीसगड येथील रहिवासी होते. त्यांनी आयुर्वेदाचार्य (BAMS) शिक्षण पूर्ण केले होते आणि पुढील शिक्षण व व्यावसायिक अनुभवासाठी ते सध्या पुण्यात वास्तव्यास होते.

The post पुण्यात भीषण अपघात! टँकरखाली चिरडून 26 वर्षीय डॉक्टरचा मृत्यू appeared first on थोडक्यात घडामोडी.