पुणे : कोंढवा येथील खडी मशीन चौकाजवळ भीषण अपघात झाला. अनेक वाहनांची धडक होऊन झालेल्या या अपघातात एका व्यक्तीला आपला जीव गमवावा लागला, तर पाच जण जखमी झाले आहेत. प्रशांत कृष्णा चौरे (४३, रा. धनकवडी) असे मृत व्यक्तीचे नाव आहे.

पोलिसांनी दिलेल्या माहितीनुसार, गुरुवारी सकाळी साडेनऊच्या सुमारास कात्रज-कोंढवा बायपास रोडवर ही घटना घडली. एका वाहनाच्या चालकाने अचानक गाडी थांबवल्यामुळे मागून येणाऱ्या वाहनांना गाडीवर नियंत्रण मिळवण्यास वेळ मिळाला नाही. त्यामुळे मागून येणाऱ्या सिमेंटचे पाईप वाहून नेणाऱ्या ट्रकने अनेक वाहनांना धडक दिली. या अपघातात जखमी झालेल्यांना तात्काळ रुग्णालयात दाखल करण्यात आलं. या अपघातात सहा जण जखमी झाले असून त्यापैकी एका व्यक्तीला डॉक्टरांनी मृत घोषित केलं.

या घटनेमुळे पुन्हा एकदा रस्ता रुंदीकरणाचा प्रश्न चव्हाट्यावर आला आहे. या भागात मोठ्या प्रमाणात वाहतूक कोंडी होत असल्याने या रस्त्याचे रुंदीकरण करण्याची मागणी स्थानिक नागरिकांकडून केली जात आहे.

The post पुणे : कोंढव्यात अनेक वाहनांचा विचित्र अपघात, एकाचा मृत्यू appeared first on थोडक्यात घडामोडी.