मुंबई : श्रीवर्धनच्या धर्तीवर दिवेआगर समुद्र किनाऱ्याचा पर्यटनदृष्ट्या विकास करण्यात येणार असून, आधुनिक सुविधा, संग्रहालय तसेच स्थानिकांसाठी रोजगाराच्या संधी उपलब्ध करून देत हा किनारा लवकरच पर्यटकांसाठी खुला करण्यात येईल, अशी माहिती महिला व बालविकास मंत्री आदिती तटकरे यांनी दिली. दिवेआगर समुद्र किनाऱ्याच्या सौंदर्यीकरणासंदर्भात मंत्रालयात झालेल्या बैठकीत त्या बोलत होत्या.

मंत्री आदिती तटकरे म्हणाल्या की, दिवेआगर किनाऱ्याचा सौदर्यदृष्टीने विकास श्रीवर्धन किनाऱ्याच्या धर्तीवर करण्यासंदर्भात कार्यवाही जलदगतीने करावी. यासाठी उच्च दर्जाची व शाश्वत साधनसामग्री वापरून पर्यावरणपूरक सुविधा उभारण्यात याव्यात. पर्यटकांना स्वच्छ, सुरक्षित आणि आकर्षक वातावरण उपलब्ध करुन देण्याच्या दृष्टीने अत्याधुनिक सुविधा उपलब्ध करून देण्यात याव्यात.

वन विभागाला देण्यात येणारे प्रस्ताव सल्लागार संस्थांच्या माध्यमातून तातडीने पाठविण्यात यावेत. तसेच समुद्र किनाऱ्याच्या विकासादरम्यान पर्यावरणाचे संतुलन राखून वृक्षांचे पुनर्रोपण करण्यावर भर द्यावा. या विकास प्रकल्पामुळे दिवेआगर परिसरातील पर्यटन वाढून स्थानिकांना रोजगाराच्या नव्या संधी निर्माण होतील असा विश्वास मंत्री आदिती तटकरे यांनी यावेळी व्यक्त केला.

The post श्रीवर्धनच्या धर्तीवर दिवेआगर समुद्र किनारा विकसित करणार – महिला व बालविकास मंत्री आदिती तटकरे appeared first on थोडक्यात घडामोडी.

मुंबई : राज्यातील नागरिकांकडून विकसित महाराष्ट्र – २०४७ संदर्भात मते, अपेक्षा, अभिप्राय, आकांक्षा व प्राधान्यक्रम जाणून घेण्यासाठी माहिती व जनसंपर्क विभागाच्या मदतीने राज्यव्यापी सर्वेक्षण अभियान राबविण्यात आले होते. या आधारे तयार करण्यात आलेल्या विकसित महाराष्ट्र-२०४७ च्या व्हिजन डॉक्युमेंटला तसेच त्याच्या अंमलबजावणीसाठी व्हिजन मॅनेजमेंट युनिट स्थापन करण्यास मंत्रिमंडळ बैठकीत मान्यता देण्यात आली. बैठकीच्या अध्यक्षस्थानी मुख्यमंत्री देवेंद्र फडणवीस होते.

भारत सरकारने स्वातंत्र्याच्या अमृत महोत्सवानिमित्त भारताला सन २०४७ पर्यंत विकसित करण्याचा संकल्प केला आहे त्यासाठी “विकसित भारत-भारत @२०४७” योजना आखली आहे. यामध्ये सन २०२५-२६ पर्यंत भारताची अर्थव्यवस्था ५ ट्रिलियन डॉलरपर्यंत नेण्याचे उद्दिष्ट आहे. त्यानुसार महाराष्ट्राने २०४७ पर्यंत “विकसित महाराष्ट्र-विकसित भारतासाठी” हे ध्येय निश्चित केले आहे. भारताच्या स्वातंत्र्याच्या शताब्दी वर्षी महाराष्ट्राला पाच ट्रिलियन डॉलरची अर्थव्यवस्था घडवायची आहे. विकसित महाराष्ट्राची संकल्पना मूर्त स्वरुपात मांडण्यासाठी मुख्यमंत्री फडणवीस यांच्या अध्यक्षतेखाली सल्लागार समिती व मुख्य सचिव यांच्या अध्यक्षतेखाली समन्वय समिती गठीत करण्यात आली. मुख्यमंत्री फडणवीस यांनी १०० दिवसांच्या कार्यक्रमानंतर १५० दिवसांचा सुधारणा कार्यक्रम जाहीर केला होता. त्यामध्ये विकसित महाराष्ट्र-२०४७ व्हिजन डॉक्युमेंटचा समावेश करण्यात आला आहे. हे व्हिजन डॉक्युमेंट २ ऑक्टोबर २०२९ चे अल्पकालीन व्हिजन (वार्षिक लक्ष्यांसह), १ मे २०३५ चे मध्यमकालीन व्हिजन (महाराष्ट्र@७५), आणि १५ ऑगस्ट २०४७ चे दीर्घकालीन व्हिजन (भारत@१००) अशा तीन टप्प्यांत तयार करण्यात आले आहे.

व्हिजन डॉक्युमेंटचा मसुदा तयार करण्यासाठी कृषि, उद्योग, सेवा, पर्यटन, नगर विकास, ऊर्जा आणि शाश्वत विकास, पाणी, वाहतूक, शिक्षण आणि कौशल्य विकास, आरोग्य, समाज कल्याण, सॉफ्ट पॉवर, शासन, तंत्रज्ञान, सुरक्षा, वित्त असे १६ क्षेत्रीय गट स्थापन करण्यात आले. हे १६ गट प्रगतीशील, शाश्वत, सर्वसमावेशक आणि सुशासन या चार प्रकारांमध्ये विभागले आहेत. ज्यामध्ये सुमारे १०० उपक्रमांचा समावेश कऱण्यात आला आहे. या उपक्रमांसाठी निश्चित कऱण्यात आलेली उद्दिष्टे पुढीलप्रमाणे..

अ) प्रगतीशील कृषि : हवामान बदलाच्या लवचिकतेसह शेतकऱ्यांचे उत्पन्न वाढविणे आणि ग्रामीण-शहरी जीवनमानात समानता साध्य करणे.

सेवा : नव्या कालखंडात संपूर्ण जगात वित्त, आघाडीचे तंत्रज्ञान, माध्यमे आणि मनोरंजन यामध्ये आघाडीवर राहणे. उद्योग: सर्व जगासाठी महाराष्ट्रात निर्मिती आणि रचना करणे, ज्यायोगे राज्याच्या एकूण स्थूल उत्पन्नापैकी एक तृतीयांशपेक्षा जास्त उत्पन्न उद्योग क्षेत्रातून येईल. पर्यटन: जबाबदार, सुरक्षित आणि कचरामुक्त पर्यटनाद्वारे सरासरी पर्यटकांचा मुक्काम आणि उलाढाल वाढविणे.

ब) शाश्वत : नागरी/शहरी : शहरांत झोपडपट्टी-मुक्त, स्वच्छ, परवडणाऱ्या घरांसह आपत्ती-प्रतिरोधक, पूर्ण रोजगारयुक्त, सोप्या सार्वजनिक वाहतुकीची उपलब्धता आणि वाहतुकीचे जाळे असणारी रचना उभारणे. पाणी : संवर्धन आणि पुनर्वापराद्वारे सर्वांना सुरक्षित पाणी उपलब्ध करणे. ऊर्जा आणि शाश्वतता: राज्याच्या एक तृतीयांशपेक्षा जास्त भूभाग हरित आच्छादनाखाली आणून जागतिक स्तरावर स्पर्धात्मक किमंतीत विश्वासार्ह, हरित आणि स्वच्छ उर्जा उपलब्ध करून देणे. वाहतूक आणि लॉजिस्टिक्स: प्रवासी आणि मालवाहतुकीसाठी विश्वसनीय, सुरक्षित आणि अखंड मल्टीमोडल (बहु-पद्धती) कनेक्टिव्हिटी निर्माण करणे.

क) सर्वसमावेशक : शिक्षण आणि कौशल्य विकास : शिक्षण, नाविन्यपूर्णता आणि उद्योजकतेला प्रोत्साहन देणारे असे सर्वसमावेशक, उद्योगांशी संबंधित शिक्षण आणि कौशल्य देणारे जागतिक दर्जाचे प्रतिभा केंद्र तयार करणे. समाज कल्याण: सामाजिक-आर्थिक समता आणि वंचित सामाजिक गटांसाठी समान संधी उपलब्ध करणे. आरोग्य: परवडणाऱ्या आणि दर्जेदार आरोग्यसेवेची सार्वत्रिक उपलब्ध करणे आणि अकाली मृत्युदर एक तृतीयांशाने कमी करणे. सॉफ्ट पॉवर : वारसास्थळे, संस्कृती, चित्रपट, भाषा आणि क्रीडा यांना जागतिक मान्यता मिळवणे.

ड) सुशासन : प्रशासन : किमान शासन आणि कमाल प्रशासन पद्धती. सुरक्षा : राज्यातील प्रत्येक नागरिकासाठी सुरक्षा, सुरक्षितता आणि आपत्ती प्रतिरोधक परिस्थिती निर्माण करणे. तंत्रज्ञान : प्रभावी प्रशासनासाठी तंत्रज्ञानाचा वापर करणे. वित्त : विवेकी वित्तीय व्यवस्थापन आणि पर्यायी वित्तपुरवठा मॉडेलद्वारे शाश्वत वित्तीय मार्ग निश्चित करणे.

स्वातंत्र्याच्या १०० वर्षासाठी १०० उपक्रम

विकसित महाराष्ट्र- २०४७ अंतर्गत राज्याचे १०० उपक्रम, १५० पेक्षा जास्त मापदंड (Metrics) व ५०० पेक्षा जास्त टप्पे निश्चित केले आहेत. या व्हिजनच्या अंमलबजावणीसाठी गठीत करण्यात येणाऱ्या व्हिजन मॅनेजमेंट युनिट मधील अन्य सदस्यांची नियुक्ती मुख्यमंत्री करणार आहेत. या युनिटद्वारे, राज्यातील सर्व गुंतवणूक व विविध धोरणे, व्हिजनच्या ध्येयाशी सुसंगत असेल याची खात्री करण्यात येईल. तसेच दर तीन महिन्यांनी प्रगती आणि मेट्रिक्सचा आढावा घेण्यात येईल. विभागांशी समन्वय साधून त्यांच्या अडचणी दूर करण्यात येतील. यासाठी संबंधित विभागांना सामाजिक- आर्थिक परिणामांसह तपशीलवार कार्ययोजना तयार कराव्या लागणार आहेत. तसेच व्हिजनमध्ये समाविष्ट मेट्रिक्समध्ये डाटा ट्रॅकिंग करावे लागेल. त्याअनुषंगाने वित्तपुरवठा धोरण, चालू खर्चाची पुनर्रचना करावी लागणार आहे. यातून महसूल वाढीचे आणि पर्यायी भांडवलाचे स्त्रोत निश्चित करता येणार आहेत.

The post विकसित महाराष्ट्र – २०४७ व्हिजन डॉक्युमेंटला मान्यता, अंमलबजावणीसाठी मुख्यमंत्री यांच्या अध्यक्षतेखाली व्हिजन मॅनेंजमेंट युनिट appeared first on थोडक्यात घडामोडी.

मुंबई : कोरिया प्रजासत्ताकाचा वाणिज्य दूतावास आणि महाराष्ट्र पर्यटन विभागाच्या साहाय्याने मुंबईतील जिओ वर्ल्ड ड्राइव्ह, वांद्रे कुर्ला संकुल येथे रविवार, १२ ऑक्टोबर २०२५ रोजी ‘के-हार्मनी फेस्टा’चे आयोजन करण्यात आले होते. या महोत्सवात मुंबईकरांना भारत आणि दक्षिण कोरिया यांच्यातील वाढत्या सांस्कृतिक आणि पर्यटन संबंधांचा अनुभव घेता आला.

महोत्सवात ‘सोलस्ट्रीट’ या संकल्पनेत सोल शहरामधील प्रसिद्ध भागांची प्रतिकृती निर्माण करण्यात आली होती. यात म्यॉन्गडोंगचा बाजार, बुकचॉनमधील पारंपरिक हॅनोक घरे, हान नदीचा सुंदर किनारा, जाँगनो येथील खाद्य दालन आणि ग्याँगन्यूंगमधील BTS बॅण्डचा प्रसिद्ध अल्बम ‘यू नेव्हर वॉक अलोन’चा समावेश होता. आंतरराष्ट्रीय स्तरावर पर्यटन क्षेत्राचा विस्तार होण्याच्या दृष्टीने या महोत्सवाला पर्यटन विभागाने सहाय्य केले होते.

पर्यटन विभागाचे प्रधान सचिव डॉ. अतुल पाटणे म्हणाले, भारत आणि कोरिया यांच्यात प्राचीन बौद्ध धर्माशी संबंधित सांस्कृतिक आणि ऐतिहासिक नाते आहे. आगामी काळात भारत आणि दक्षिण कोरिया यांच्यातील सांस्कृतिक, पर्यटन आणि व्यावसायिक सहकार्य अधिक दृढ करण्याचा संकल्प करण्यात आला आहे. दोन्ही देश एकत्र येऊन बौद्ध सर्किटच्या पर्यटनाला प्रोत्साहन देतील. महाराष्ट्रातील अजिंठा-वेरूळ, कार्ला-भाजा लेणी तसेच ग्लोबल विपश्यना पॅगोडा आणि कोरियातील जोसा, गिलसंगसा, बोंगयुन्सा ही मंदिरे एकत्र जोडली जातील. संगीत, नृत्य, खाद्यसंस्कृती, हस्तकलेच्या माध्यमातून सांस्कृतिक देवाणघेवाण वाढवली जाईल. विद्यार्थ्यांसाठी व कलाकारांसाठी विनिमय कार्यक्रम सुरू करून दोन्ही देशांच्या तरुणाईला आणि संस्थांना जोडले जाईल. कोरियन कंपन्यांना मुंबई व महाराष्ट्र येथे परिषद व प्रदर्शने आयोजित करण्यासाठी प्रोत्साहन दिले जाईल. तसेच पर्यटन क्षेत्रातील डेटा शेअरिंगद्वारे दोन्ही देशांतील पर्यटकांच्या गरजा अधिक चांगल्या प्रकारे समजून घेण्याचा प्रयत्न केला जाईल.”

कोरियाच्या वाणिज्य दूतावासाचे डोंगवान यू म्हणाले, “मुंबई आणि सोल दोन्ही शहरांची ऊर्जा एकसारखी आहे. के-हार्मनी फेस्टा सांस्कृतिक देवाण-घेवाण, पर्यटन आणि भविष्यातील मैत्रीचा सेतू उभारण्यास मदत करील.” कोरियन सांस्कृतिक केंद्राचे संचालक ह्वांग योंग यांनी सांगितले, के-हार्मनी फेस्टा या महोत्सवाच्या माध्यमातून भारत आणि कोरिया यांच्यातील पर्यटन आणि सांस्कृतिक देवाण-घेवाण मजबूत करण्यासाठी पुढाकार घेण्यात येत आहे.”

महोत्सवाच्या उत्तरार्धात ‘कुक्किवॉन तायक्वोंडो डेमोन्स्ट्रेशन टीम’ची शक्ती दर्शवणारी कसरत, पारंपरिक कोरियन संगीतावर ‘एस-फ्लावा (S-Flava)’ द्वारे बी-बॉय डान्स, ऐतिहासिक पारंपरिक नृत्य ‘सोगो’ ज्यात भारतीय शास्त्रीय नृत्य कथ्थकच्या घटकांचा सुंदर समावेश होता. त्याचबरोबरीने लोकप्रिय के-पॉप बॉय बँड ‘यूनाईक’चे सादरीकरण यांचाही समावेश होता, या कार्यक्रमाला युवा प्रेक्षकांकडून उत्स्फूर्त प्रतिसाद मिळाला.

The post के-हार्मनी फेस्टा : भारत-कोरिया मैत्री आणि संस्कृतीचा महोत्सव appeared first on थोडक्यात घडामोडी.

मुंबई : कंकालेश्वर मंदिर, ता. जि. बीड या राज्य संरक्षित स्मारकाच्या जतन, दुरुस्ती कामासाठी येणाऱ्या ९,१४,५४,४०३/- (रु.नऊ कोटी चौदा लक्ष चौपन्न हजार चारशे तीन मात्र) इतक्या रकमेस प्रशासकीय मान्यता देण्यात आली आहे, अशी माहिती उपमुख्यमंत्री तथा बीड जिल्ह्याचे पालकमंत्री अजित पवार यांनी दिली.

या संदर्भातील शासन निर्णय 202509241733017823 सांस्कृतिक व पर्यटन पर्यटन विभागाने जारी केला आहे. संचालक, पुरातत्व व वस्तुसंग्रहालये संचालनालय यांना यासाठी नियंत्रण अधिकारी म्हणून घोषित करण्यात आले आहे.

कंकालेश्वर मंदिर हे बीड शहरातील एक प्राचीन आणि भव्य शिवमंदिर आहे. वास्तुशैलीवरून ते १० व्या ते १२व्या शतकादरम्यान (सुमारे १००० वर्षे जुने) बांधले गेले असावे असे मानले जाते. ते बीडच्या ऐतिहासिक वारशाचे एक प्रमुख प्रतीक मानले जाते आणि पर्यटकांसह भक्तांसाठी आकर्षणाचे केंद्र आहे. मंदिराची वास्तुकला, स्थान आणि धार्मिक महत्त्व यामुळे ते विशेष ओळखले जाते. मंदिराच्या बाह्यभागावरील शिल्पकला ही मराठवाड्यातील प्राचीन वास्तुकलेचे उत्तम उदाहरण आहे. महाशिवरात्री आणि श्रावण महिन्यात या मंदिरात हजारो भाविक दर्शनासाठी येत असतात. मंदिराचे हे महत्त्व लक्षात घेऊन त्याचे जतन आणि संवर्धन करण्याची मागणी अनेक दिवसांपासून लोकप्रतिनिधी आणि सामाजिक संघटनांकडून होत होती. त्याची दखल घेऊन उपमुख्यमंत्री तथा पालकमंत्री अजित पवार यांनी सातत्याने पाठपुरावा केला होता. त्यांच्या पुढाकाराने हा विषय अखेर मार्गी लागला असून त्या संदर्भातील शासन निर्णय जारी झाला आहे.

उपमुख्यमंत्री तथा पालकमंत्री अजित पवार यांनी आपल्या गेल्या महिन्यातील बीड जिल्ह्याच्या दौऱ्यादरम्यान पुरातत्व विभागाच्या अधिकाऱ्यांसह कंकालेश्वर मंदिराला भेट दिली होती आणि संबंधित अधिकाऱ्यांना आवश्यक सूचना दिल्या होत्या. कंकालेश्वर देवस्थान परिसरात नव्याने सुरू करण्यात येणाऱ्या विकासकामांमध्ये पारंपरिक व आधुनिकतेचा संगम साधत बीडकरांना कायम स्मरणात राहील. तसंच बीडच्या वैभवात भर घालणारी, दर्जेदार कामे करावी. विकासकामं करताना ती कामे गुणवत्तापूर्ण, टिकाऊ आणि वेळेत पूर्ण होतील, याकडे लक्ष द्यावे. भाविकांना सर्व सोयीसुविधा मिळतील अशा सर्व बाबींचा आराखड्यामध्ये समावेश करावा, असे निर्देश त्यावेळी उपमुख्यमंत्री अजित पवार यांनी दिले होते.

The post बीडच्या प्राचीन कंकालेश्वर मंदिराच्या जतन, दुरुस्तीसाठी ९ कोटी १४ लक्ष रकमेस प्रशासकीय मान्यता appeared first on थोडक्यात घडामोडी.

नागपूर : विदर्भातील पर्यटन आणि तिर्थक्षेत्रात रामटेकचे अनन्य साधारण महत्व असून याठिकाणी स्थानिकांना रोजगार निर्मितीची विविध संसाधणे उपलब्ध होण्यासाठी रामटेक तिर्थक्षेत्र विकास आराखडा आपण तयार केला आहे. या आराखड्यामध्ये रोपवेची सुविधा, सर्व सुविधायुक्त यात्री निवास, स्थानिक उत्पादनांना प्राधान्य देणारी गडमंदिर परिसरात नियोजनबद्ध दुकानांची गाळे, भव्य पार्कीग सुविधा आदी विविध उपक्रमांचा समावेश करण्यात आला आहे. याला महत् प्रयासाने काही निधी उपलब्ध करुन दिला असून वनविभाग, राष्ट्रीय महामार्ग विभाग, राज्य व केंद्र शासनाचे पुरातत्व विभाग, सार्वजनिक बांधकाम विभाग यांनी परस्पर समन्वयातून तात्काळ या कामांना प्राधान्याने गती देण्याचे निर्देश वित्त राज्यमंत्री ॲड. आशिष जयस्वाल यांनी केले.

रामटेक तिर्थक्षेत्र विकास आराखडा टप्पा-2 याला गती देण्यासाठी वित्त राज्यमंत्री ॲड. आशिष जयस्वाल यांच्या अध्यक्षतेखाली आज जिल्हाधिकारी कार्यालयात बैठक संपन्न झाली. या बैठकीस जिल्हाधिकारी डॉ. विपीन इटनकर व विविध विभागाचे प्रमुख उपस्थित होते.

पर्यटन विकासाच्यादृष्टीने रामटेक येथे पूर्ण क्षमता आहेत. येथील तलाव, श्री चक्रधर स्वामी मंदिर, श्रीराम मंदिर, अंबाडा तलाव, शांतीनाथ जैन मंदिर, जवळच असलेला खिंडसी तलाव आदी नैसर्गिक साधनसंपती विपुल प्रमाणात आहे. सर्व क्षेत्राच्या विकासासाठी नियोजनबद्ध एकत्रित विकास आराखडा हा दूरदृष्टी ठेवून आम्ही साकारत असून ज्या कामांना शासकीय निधी उपलब्ध आहे त्या कामात कोणत्याही परिस्थितीत दिरंगाई खपवून घेतली जाणार नाही, असे राज्यमंत्री जयस्वाल यांनी स्पष्ट केले.

The post रामटेक तिर्थक्षेत्र विकास आराखड्यातील कामांना वेळेत पूर्ण करा – वित्त राज्यमंत्री ॲड. आशिष जयस्वाल appeared first on थोडक्यात घडामोडी.

सिंधुदुर्ग: कोकणातील सिंधुदुर्ग जिल्ह्यात तारकर्ली समुद्र किनाऱ्यावर एक दुर्दैवी घटना घडली आहे. पाच पर्यटक समुद्रात पोहण्यासाठी गेले होते, त्यात पाण्याचा अंदाज न लागल्यामुळे ते बुडाले. या घटनेत दोन पर्यटकांचा मृत्यू झाला असून, तीन पर्यटकांचे प्राण वाचवण्यात वॉटर स्पोर्ट्सच्या तरुणांनी महत्त्वाची भूमिका निभावली.

पुणे येथील हे पर्यटक तारकर्ली समुद्रकिनारी सकाळी साडेअकराच्या सुमारास पोहण्यासाठी उतरले होते. पोहण्याच्या वेळी पाण्याचा अंदाज न लागल्यामुळे ते बुडू लागले. हे दृश्य वॉटर स्पोर्ट्सच्या तरुणांनी पाहिलं आणि तत्काळ मदतीसाठी धाव घेतली. त्यांचा बचाव कार्यामुळे तिघांचा जीव वाचवला, पण दुर्दैवाने दोघांना वाचवता आले नाही.

मृत्यू झालेल्या पर्यटकांची ओळख: शुभम सुशील सोनवणे (हडपसर, पुणे), रोहित बाळासाहेब कोळी (हडपसर, पुणे)

घटनेतील अन्य तीन पर्यटकांना वाचवण्यात वॉटर स्पोर्ट्सच्या कर्मचारी झिलू चव्हाण, निलेश राऊळ, नरेश टिकम, राजन तारी, भाई आजगावकर, कुमार राठोड, प्रतीक कुबल, कौशल कुबल, प्रथमेश कुबल, रोहित कुबल, हर्षल कुबल, महेश कुबल, सर्वेश धुरत, वैभव तळवडकर, दिलीप बांदेकर, नागेश देऊलकर आणि निहाल आडकर यांची मदत झाली.

प्रथमेश कुबल यांनी दाखवली साहसाची पराकाष्ठा:
प्रथमेश कुबल या तरुणाने आपल्या जीवाची पर्वा न करता पाण्याच्या तळाशी जाऊन एक पर्यटक वाचवला. त्याच्यासोबत जय गणेश स्कुबा, गजानन स्कुबा आणि विक्रांत स्कुबा यांनी देखील महत्त्वाची मदत केली, ज्यामुळे तिघांचा जीव वाचवला. मालवण तालुका प्रशासन आणि स्थानिक ग्रामस्थही घटनास्थळी दाखल झाले आणि मदत कार्य सुरू केलं. या घटनेमुळे पर्यटकांच्या सुरक्षेबाबत गंभीर प्रश्न उपस्थित झाले आहेत.

The post तारकर्ली समुद्र किनारी दुर्दैवी घटना, ५ पर्यटक बुडाले; वॉटर स्पोर्ट्सच्या तरुणांच्या मदतीने तिघांचा जीव वाचला appeared first on थोडक्यात घडामोडी.