मुंबई : महिलांवरील अत्याचार, छळ आणि कौटुंबिक हिंसाचाराच्या घटनांना आळा घालण्यासाठी अस्तित्वात असलेले कायदे अधिक प्रभावी आणि काटेकोरपणे अंमलात आणणे आवश्यक आहे, असे विधानपरिषदेच्या उपसभापती डॉ. नीलम गोऱ्हे यांनी नमूद केले. कौटुंबिक हिंसाचार प्रतिबंधक कायद्याची प्रभावी अंमलबजावणी करण्यासाठी महिला व बाल विकास विभागाचे संरक्षण अधिकारी आणि पोलीस विभागाच्या भरोसा सेलच्या अधिकाऱ्यांची एकत्रित जिल्हा व तालुका तर शहरात झोन निहाय समन्वय बैठका घेण्यात याव्यात अशी स्पष्ट सूचना त्यांनी दिली.

विधानभवनात आयोजित उच्चस्तरीय बैठकीत कौटुंबिक हिंसाचार प्रतिबंधक कायदा, २००५ अधिक परिणामकारक करण्याबाबत, शक्ती विधेयकाच्या अंमलबजावणीच्या अनुषंगाने पुढील दिशा ठरविण्याबाबत तसेच अर्नेश कुमार विरुद्ध बिहार राज्य या प्रकरणातील सर्वोच्च न्यायालयातील सुधारणा याचिकेवर सविस्तर चर्चा करण्यात आली.

बीएनएसप्रमाणे कार्यप्रणालीत ३५ अ ते आय या नियमांची काटेकोरपणे अंमलबजावणी पोलिसांनी केल्यास पिडीतांना दिलासा मिळेल म्हणुन पोलिसांनी योग्य ती कार्यप्रणाली तयार करावी अशाही सूचना उपसभापती डॉ. नीलम गोऱ्हे यांनी दिल्या . पुढील एका महिन्यात या सर्व बाबतीत पाठपुरावा करून संबंधित विभागांनी तपशील ठरवावा असेही सुचवण्यात आले. या बैठकीचा अहवाल मुख्यमंत्री देवेंद्र फडणवीस व उपमुख्यमंत्री एकनाथजी शिंदे, उपमुख्यमंत्री सुनेत्राताई पवार यांचेकडे पाठविण्यात येणार असल्याचे नीलम गोऱ्हे यांनी नमूद केले.

या बैठकीस पोलीस महासंचालक सदानंद दाते, अपर पोलीस अधीक्षक अश्वती दोरजे, माजी न्यायमूर्ती साधना जाधव, महिला व बाल विकास विभागाच्या आयुक्त नयना गुंडे, उपसचिव डॉ. जयंत सरोदे, विधि व न्याय विभागाचे उपसचिव सागर बोन्द्रे, गृह विभागाचे अवर सचिव जयसेन इंगोले उपस्थित होते.

डॉ. गोऱ्हे यांनी बैठकीदरम्यान नमूद केले की, महिलांचा आत्मसन्मान, सन्मान आणि सुरक्षितता यासाठी राज्य यंत्रणांनी समन्वयाने आणि संवेदनशीलतेने काम करण्याची गरज आहे. कौटुंबिक हिंसाचाराच्या घटनांमध्ये महिलांचा बळी जाणार नाही, यासाठी प्रतिबंधात्मक उपाययोजना अधिक प्रभावी आणि काटेकोरपणे राबविणे आवश्यक आहे.

त्यांनी पुढे सांगितले की, महिलांना तातडीने न्याय मिळण्यासाठी प्रशासकीय यंत्रणा अधिक सजग आणि संवेदनशील बनविणे अत्यावश्यक आहे. पोलीस विभाग आणि महिला व बाल विकास विभागाने संयुक्तरित्या कृती आराखडा तयार करून त्याची अंमलबजावणी जिल्हास्तरावर करावी. जिल्हास्तरीय महिला दक्षता समित्यांच्या कार्याचा नियमित आढावा घेऊन त्यांच्या कार्यक्षमता वाढविण्यासाठी ठोस उपाययोजना कराव्यात.

पीडित महिलांना तातडीने संरक्षण आदेश मिळवून देणे, पोटगी मिळविण्याच्या प्रक्रियेत होणारा विलंब टाळणे, तसेच महिलांना कायदेशीर सल्ला मिळण्यासाठी जिल्हा विधि सेवा प्राधिकरणाशी समन्वय वाढवणे या बाबींकडे विशेष लक्ष देणे गरजेचे असल्याचे त्यांनी अधोरेखित केले.

तसेच ज्येष्ठ सेवा तक्रार प्राधिकरणाबाबत अभ्यास करून अहवाल सादर करावा, अशी सूचनाही डॉ. गोऱ्हे यांनी यावेळी दिली. त्याचबरोबर, अर्नेश कुमार विरुद्ध बिहार राज्य प्रकरणामध्ये सर्वोच्च न्यायालयात सुधारणा याचिका दाखल करण्याबाबत कायदेशीर चाचपणी सुरू असून त्यावर चर्चा बैठकीत झाली.

उपसभापती डॉ. नीलम गोऱ्हे यांनी शेवटी सांगितले की, महिलांवरील अत्याचार हा समाजाच्या मनोवृत्तीशी निगडित गंभीर प्रश्न आहे. त्यामुळे फक्त कायदे कठोर करणे पुरेसे नाही, तर त्यांची अंमलबजावणी ही पारदर्शक, संवेदनशील आणि परिणामकारक असावी. महिलांचे सक्षमीकरण, न्यायप्राप्ती आणि सुरक्षिततेसाठी शासनाने एकत्रित प्रयत्न करणे ही काळाची गरज आहे.

The post महिलांच्या सुरक्षिततेसाठी कायदे अधिक कडक व प्रभावी करावेत – उपसभापती डॉ. नीलम गोऱ्हे appeared first on थोडक्यात घडामोडी.

मुंबई : राज्यात गुटखा बंदी असतानाही शाळा परिसर, महाविद्यालय परिसरांसह अनेक ठिकाणी गुटखा आढळून येतो. त्यामुळे गुटखा बंदी कायद्याची कडक अंमलबजावणी करण्यासाठी मकोका लागू करण्याचा निर्णय शासनाने घेतला आहे. या मकोका लावण्यासाठीच्या प्रस्तावात आवश्यक त्या दुरुस्त्या कायद्यात करण्यात येणार आहेत. त्यानंतर येत्या नवीन वर्षात गुटखा उत्पादकांवर मकोका लागणार असल्याची माहिती अन्न व औषध प्रशासन व विशेष सहाय्य मंत्री नरहरी झिरवाळ यांनी दिली.

यापूर्वी गुटखा उत्पादक व विक्रेत्यांवर मकोका लावण्यासाठीचा प्रस्ताव विधि व न्याय विभागाकडे पाठवण्यात आला होता. मात्र कायद्यातील तरतुदींनुसार “हार्म आणि हर्ट” या दोन्ही घटकांअभावी तो लागू होत नाही. त्यामुळे या कायद्यात बदल करण्यात येऊन गुटखा व्यवसाय करणाऱ्यांवरही मकोका लागू करता येईल, अशा आवश्यक दुरुस्त्या कायद्यात करण्यात येऊन हा कायदा अधिक कठोर करण्यात येईल, अशी माहिती मुख्यमंत्री देवेंद्र फडणवीस यांनी विधानसभेत दिली होती.

त्यानुसार नागपूरचे हिवाळी अधिवेशन संपताच अन्न व औषध प्रशासन विभाग कामाला लागले आहे. गुटखा उत्पादकांपर्यंत पोहोचण्यासाठी विशेष धोरण आणणार, कायद्यातील त्रुटी दूर करण्यासाठी दुरुस्ती प्रस्ताव आणण्यात येणार असल्याचेही मंत्री नरहरी झिरवाळ म्हणाले.

गुटखा बंदी कायदा कठोर करण्यासाठी व मकोका लावण्यासाठी त्यात आवश्यक ते बदल करून सुधारित प्रस्ताव विधि व न्याय विभागाकडे लवकरात लवकर पाठविण्याचे निर्देश मंत्री नरहरी झिरवाळ यांनी अधिकाऱ्यांना दिले.

The post गुटखा उत्पादकांवर नवीन वर्षात मकोका लागणार – अन्न व औषध प्रशासन मंत्री नरहरी झिरवाळ appeared first on थोडक्यात घडामोडी.

नागपूर : काही समाज विघातक लोकांनी समाजमाध्यमांवरून जातीय द्वेषमूलक चिथावणी दिल्यामुळे दंगली उसळलेल्या आपण पहिल्या आहेत. अशा गुन्हेगारीला आला घालण्यासाठी आता जगातील सर्वोत्तम यंत्रणा व तंत्रज्ञान महाराष्ट्राकडे आहे. अशा लोकांना हुडकून त्यांच्यावर तात्काळ कारवाईसाठी ‘गरुड दृष्टी’ हे टूल्स महत्त्वाची भूमिका बजावत असल्याचे प्रतिपादन मुख्यमंत्री देवेंद्र फडणवीस यांनी केले.

नागपूर पोलीस विभागाच्या वतीने पोलीस भवन येथे ‘गरुड दृष्टी’ सोशल मीडिया मॉनिटरिंग व सायबर इंटेलिजन्स प्रकल्पाबाबत सादरीकरण आणि विविध सायबर आर्थिक गुन्ह्यांच्या तपासातून प्राप्त झालेल्या तब्बल 10 कोटी रुपये रकमेच्या वितरण समारंभात ते बोलत होते. त्यांच्या हस्ते या रकमा फसवणूक झालेल्या संबंधित व्यक्तींना वितरित करण्यात आल्या. यावेळी पोलीस आयुक्त रवींद्र कुमार सिंगल, सहपोलीस आयुक्त नवीनचंद्र रेड्डी, अतिरिक्त पोलीस आयुक्त सर्वश्री वसंत परदेशी, राजेंद्र दाभाडे, शिवाजी राठोड व वरिष्ठ पोलीस अधिकारी उपस्थित होते.

स्वतःचे विचार मांडण्यासाठी एक व्यासपीठ म्हणून सोशल मीडियाचा होणारा वापर उत्तम असला तरी काही समाज विघातक प्रवृत्ती द्वेष पसरवणे, धमक्या देणे, हेट स्पीच, फेक न्यूज, अंमली पदार्थांची तस्करीसाठी या प्लॅटफॉर्मचा वापर करताना आपण पाहतो. यातील आर्थिक फसवणुकीचे प्लॅटफॉर्म बहुतांश परदेशी ऑपरेटर चालवतात. त्यामुळे सर्वांनी सावध असले पाहिजे. आपल्या मोबाईलवर कोणत्याही प्रकारच्या येणाऱ्या ऑफर्स आर्थिक फसवणुकीसाठी टाकलेले जाळे आहे हे लोकांनी लक्षात घेतले पाहिजे. जर आपली आर्थिक फसवणूक झाली आहे हे लक्षात आल्यास शक्य तेवढ्या लवकर 1930 व 1945 या क्रमांकावर नागरिकांनी संपर्क साधावा असे आवाहन मुख्यमंत्री देवेंद्र फडणवीस यांनी केले.

सोशल मीडिया माध्यमाद्वारे फसवणुकीच्या घटना रोखण्यासाठी ‘गरुड दृष्टी’ प्रणाली विकसित करण्यात आली आहे. या प्रणालीच्या माध्यमातून या प्लॅटफॉर्मवरील गुन्हेगारी हालचाली शोधून काढणे व त्यांचा मागोवा घेणे शक्य होईल. भविष्यात या टूल्सचा विस्तार आणि क्षमता वाढविण्यात येणार असल्याचे त्यांनी सांगितले.

आज ज्या लोकांना त्यांचे पैसे मिळाले त्या व्यक्तींचे मुख्यमंत्री देवेंद्र फडणवीस यांनी अभिनंदन केले. पोलीस आयुक्त रविंद्र कुमार सिंगल यांनी प्रस्ताविक केले. उपायुक्त लोहित मतानी यांनी कार्यक्रमापूर्वी गरुड दृष्टी बाबत सादरीकरण केले. सहपोलीस आयुक्त नवीनचंद्र रेड्डी यांनी उपस्थित मान्यवरांचे आभार मानले.

फसवणूक झालेल्या लोकांना तपासानंतर परत मिळाल्या अशा रकमा

रोहित अग्रवाल 73 लाख रुपये, शशिकांत नारायण परांडे 34 लाख 77 हजार 724, देविदास पारखी 35 लाख 15 हजार 842, विजय प्रकाश पाठक 19 लाख 90 हजार 354, विजय मेनघाणी 19 लाख रुपये, देवेंद्र खराटे 12 लाख 81 हजार, श्रीमती राजमनी अजय जोशी 29 लाख 95 हजार, राहुल चावडा 15 लाख, बुद्धपाल बागडे 10 लाख, आदित्य गोयंका 26 लाख 20 हजार 556, संगीता आष्टणकर 8 लाख 24 हजार रुपये या प्रमाणे रक्कम परत करण्यात आली. ही प्रातिनिधिक नावे आहेत.

‘गरुड दृष्टी’ची वैशिष्ट्ये व यश

• सोशल मीडिया मॉनिटरिंग: गरुड दृष्टी सुरू झाल्यापासून आतापर्यंत सोशल मीडियावरील 30,000 पोस्ट्स तपासण्यात आल्या आहेत.
• आक्षेपार्ह सामग्रीवर कारवाई: यापैकी 650 आक्षेपार्ह पोस्ट्सची नोंद घेऊन त्या संबंधित प्लॅटफॉर्मवरून हटविण्यात आल्या आहेत.
• कायदा व सुव्यवस्था नियंत्रण: सोशल मीडियामधून उद्भवणाऱ्या अफवा, द्वेषपूर्ण मजकूर, वादग्रस्त पोस्ट्स यामुळे होणारे तणाव व कायदा-सुव्यवस्थेचे प्रश्न टाळण्यासाठी या साधनाचा प्रभावी वापर करण्यात आला आहे.
• कमी खर्चातील स्थानिक नवकल्पना: सायबर हॅक 2025 स्पर्धेतून उदयास आलेले हे साधन अत्यल्प खर्चात विकसित करण्यात आले असून, याचे बौद्धिक संपदा हक्क (Intellectual Property Rights) नागपूर पोलिसांकडे आहेत.
• बहुपयोगी क्षमता: गरुड दृष्टि केवळ गुन्हे प्रतिबंधासाठीच नव्हे, तर समाज माध्यमांवरील ट्रेंड्सचे विश्लेषण, संशयास्पद खाते शोधणे, व तत्काळ कारवाई करण्यासाठी उपयुक्त आहे.

The post सायबर गुन्हेगारीला आळा घालण्यासाठी जगातील सर्वोत्तम यंत्रणा व तंत्रज्ञान महाराष्ट्राकडे – मुख्यमंत्री देवेंद्र फडणवीस appeared first on थोडक्यात घडामोडी.

पुणे : सिंहगड रोड पोलिसांनी मुंबई-बेंगळुरू बायपासवरील नवले ब्रिज परिसरात वेश्याव्यवसायात सहभागी असलेल्या तीन महिलांविरुद्ध अनैतिक मानवी व्यापारास प्रतिबंध कायद्याअंतर्गत गुन्हा दाखल केला आहे. पोलिस कॉन्स्टेबल ज्योती हुलावले यांनी तक्रार दाखल केली, ज्याच्या आधारे तिन्ही महिलांवर गुन्हा दाखल करून त्यांना ताब्यात घेण्यात आले.

पोलिसांच्या म्हणण्यानुसार, या महिला नवले ब्रिजजवळ थांबायच्या आणि पादचाऱ्यांना आणि वाहनचालकांकडे बघून अश्लील हावभाव करायच्या. परिसरात अशा प्रकारच्या कारवाया होत असल्याबद्दल अनेक नागरिकांनी पोलिसांकडे तक्रार केली होती. त्यानंतर पोलिसांनी कारवाई केली आणि त्या ठिकाणी आढळलेल्या महिलांविरुद्ध गुन्हा दाखल केला.

दरम्यान, अशा तक्रारी येण्याची ही पहिलीच वेळ नाही. रहिवाशांनी, विशेषतः महिलांनी, यापूर्वीही नवले ब्रिजजवळील सर्व्हिस रोडवर अशाच प्रकारच्या कारवाया होत असल्याची तक्रार केली होती. नागरिकांनी सिंहगड रोड पोलिस ठाण्यात लेखी तक्रारही केली होती आणि कडक कारवाईची मागणी केली होती. पोलिसांनी यापूर्वी अशाच प्रकारच्या कारवाईदरम्यान काही महिलांना ताब्यात घेतले असले तरी, काही काळाने अशा कारवाया पुन्हा सुरू असल्याचे निदर्शनास आले आहे.

The post नवले ब्रिजजवळ वेश्याव्यवसाय करणाऱ्या तीन महिलांना ताब्यात घेतले, गुन्हा दाखल appeared first on थोडक्यात घडामोडी.

मुंबई : सायबर गुन्हेगारीवर पूर्णपणे नियंत्रण मिळवण्यासाठी सायबर गुन्ह्यांमधील तपासात सायबर प्रयोगशाळा महत्वाची भूमिका बजावणार आहे. त्यासाठी शासन प्रयोगशाळा निर्माण करीत असल्याचे सांगत मुख्यमंत्री देवेंद्र फडणवीस यांनी सायबर प्रयोगशाळांचे जाळे अधिकाधिक सक्षम करण्याच्या सूचनाही उपस्थित अधिकाऱ्यांना दिल्या.

डी. बी नगर पोलीस स्टेशन येथे मुख्यमंत्री देवेंद्र फडणवीस यांच्या हस्ते दक्षिण मुंबई विभागाच्या निर्भया सायबर प्रयोग शाळेचे डी. बी. नगर पोलीस स्टेशन येथे उद्घाटन करण्यात आले. यासोबतच मुंबई (मध्य) भागासाठी वरळी पोलीस स्टेशन येथील व मुंबई (पूर्व) भागासाठी गोवंडी पोलीस स्टेशन येथील सायबर प्रयोगशाळांचे ऑनलाईन पद्धतीने उद्घाटनही करण्यात आले. कार्यक्रमास गृह राज्यमंत्री (शहरे) योगेश कदम, अप्पर मुख्य सचिव (गृह) इक्बाल सिंह चहल, मुंबई पोलीस आयुक्त विवेक फणसळकर, विशेष पोलीस आयुक्त देवेन भारती आदींसह पोलीस विभागातील वरिष्ठ अधिकारी उपस्थित होते.

मुंबई शहरात पाच सायबर प्रयोगशाळा प्रस्तावित आहेत. यापैकी तीन प्रयोगशाळा कार्यान्वित करण्यात आल्या आहेत. या प्रयोगशाळांच्या माध्यमातून विशेषत्वाने सायबरच्या माध्यमातून महिलांवर होणाऱ्या अत्याचाराचे गुन्हे कमी कालावधीत सिद्ध करता येणार आहे. तसेच गुन्हा लपवण्यासाठी किंवा पुरावा नष्ट करण्यासाठी कुठल्याही इलेक्ट्रॉनिक उपकरणातील डाटा डिलीट केल्यास, मोबाईलची तोडफोड केल्यास किंवा मोबाईल टेम्पर केल्यास अशा सर्व इलेक्ट्रॉनिक उपकरणांमधील सर्व डाटा आधुनिक संगणक प्रणालीच्या सहाय्याने ‘ रिकव्हर ‘ केल्या जाणार आहे. प्रयोगशाळा आधुनिक तंत्रज्ञानाने सुसज्ज असून अद्ययावत संगणक प्रणालीने (सॉफ्टवेअर) सक्षम आहेत.कार्यक्रमास गृह राज्यमंत्री (शहरे) योगेश कदम, अप्पर मुख्य सचिव (गृह) इक्बाल सिंह चहल, मुंबई पोलीस आयुक्त विवेक फणसळकर, विशेष पोलीस आयुक्त देवेन भारती आदींसह पोलीस विभागातील वरिष्ठ अधिकारी उपस्थित होते.

जगातील या क्षेत्रातील अद्ययावत तंत्रज्ञान या प्रयोगशाळांमध्ये उपयोगात आणले जाणार आहे. आर्थिक गुन्हेगारी संदर्भात ऑनलाइन पद्धतीने परस्पर पैशांची हेराफेरी करणे, बँक खाते हॅक करणे अशा पद्धतीच्या गुन्ह्यांवरही प्रयोगशाळेच्या माध्यमातून नियंत्रण मिळविण्यात येणार आहे.

The post सायबर गुन्हेगारीवर नियंत्रण मिळविण्यासाठी प्रयोगशाळांचे जाळे सक्षम करा – मुख्यमंत्री देवेंद्र फडणवीस appeared first on थोडक्यात घडामोडी.

पुणे : न्यायालयाच्या आदेशानुसार, पुणे पोलिस आज रांजणगाव एमआयडीसी परिसरातील एका खाजगी कंपनीत जप्त केलेले ७.७६ कोटी रुपयांचे ७८८ किलो ड्रग्ज नष्ट करतील. गेल्या वर्षी विविध नऊ पोलिस ठाण्यांमधील अंमली पदार्थ विरोधी पथक आणि तपास पथकांनी केलेल्या अनेक कारवाईत मेफेड्रोन, ब्राऊन शुगर, अफू, एलएसडी आणि गांजा यासारखे ड्रग्ज जप्त करण्यात आले होते. पोलिस आयुक्त अमितेश कुमार यांनी सांगितले की, जप्त केलेल्या ड्रग्जमध्ये मध्य प्रदेश, तेलंगणा आणि आंध्र प्रदेशातून पुण्यात तस्करी करून आणलेला ७५८ किलो गांजा मोठ्या प्रमाणात होता.

पोलिस आयुक्त अमितेश कुमार, जॉइंट सीपी रंजन कुमार शर्मा, अतिरिक्त सीपी (गुन्हे) शैलेश बलकवडे, डीसीपी (गुन्हे) निखिल पिंगळे, डीसीपी (मुख्यालय) डॉ. संदीप भाजीभाकरे तसेच उत्पादन शुल्क विभाग आणि फॉरेन्सिक सायन्स लॅबोरेटरीचे अधिकारी यांच्या उपस्थितीत शिवाजीनगर येथील पोलिस मुख्यालयात ड्रग्जची तपासणी करण्यात आली.

शहरातील अनेक महाविद्यालयीन विद्यार्थी गांजाच्या व्यसनाला बळी पडल्याचे वृत्त आहे, त्यामुळे आयुक्तांनी त्याच्या गुप्त विक्रीवर कारवाई करण्याचे निर्देश दिले आहेत. तपासात असेही उघड झाले आहे की सुरुवातीला गांजाचे व्यसन असलेले अनेक तरुण अधिक महागड्या आणि धोकादायक मेफेड्रोनकडे वळले आहेत. चिंताजनक बाब म्हणजे, निवासी भागातील अल्पवयीन मुलेही गांजाचे सेवन करू लागली आहेत. या पार्श्वभूमीवर, पुणे पोलिस शहरात कार्यरत असलेल्या ड्रग्ज तस्कर आणि तस्करांविरुद्ध कारवाई अधिक तीव्र करत आहेत.

मोठ्या प्रमाणात ड्रग्जचा पर्दाफाश करताना, पुणे पोलिसांनी यापूर्वी कुरकुंभ एमआयडीसी परिसरातील अर्थकेम लॅबोरेटरीजवर छापा टाकला होता, ज्यामध्ये ₹3,674 कोटी किमतीचे मेफेड्रोन जप्त केले होते. त्यानंतर विभागाने नार्कोटिक्स कंट्रोल ब्युरो (एनसीबी) ला पत्र लिहून पुण्यात जप्त केलेले मेफेड्रोन नष्ट करण्याची परवानगी मागितली आहे. ही प्रक्रिया एप्रिलमध्ये होण्याची अपेक्षा आहे. रांजणगावमध्ये आज जप्त केलेल्या ड्रग्जचा नाश करणे हे शहरातील ड्रग्जच्या धोक्याला आळा घालण्यासाठी पुणे पोलिसांच्या सुरू असलेल्या प्रयत्नांमध्ये एक महत्त्वाचे पाऊल आहे.

The post पुणे पोलिस ७.७६ कोटी रुपयांचे जप्त केलेले ड्रग्ज करणार नष्ट appeared first on थोडक्यात घडामोडी.

मुंबई : राज्यात सर्व जिल्ह्यांमध्ये वाळू उपशाच्या ठिकाणी पाहणी मोहीम राबविण्यात येईल. परवानगीपेक्षा जास्त प्रमाणात किंवा ठरवलेल्या हद्दीबाहेर वाळू उपसा केल्यास संबंधितांवर दंडात्मक कारवाई केली जाणार असल्याचे महसूल मंत्री चंद्रशेखर बावनकुळे यांनी विधानसभेत प्रश्नोत्तराच्या तासात सांगितले. याबाबत सदस्य प्रशांत ठाकूर यांनी प्रश्न उपस्थित केला होता. यावेळी सदस्य जयंत पाटील, अमित देशमुख, रणधीर सावरकर, प्रशांत बंब, अस्लम शेख, विश्वजीत कदम, आशिष देशमुख, हेमंत ओगले यांनीही उपप्रश्न उपस्थित केले.

मंत्री बावनकुळे म्हणाले, लवकरच नवीन वाळू धोरण आणले जाणार असून हे वाळू धोरण विविध राज्यातील वाळू धोरणांचा अभ्यास करून तयार करण्यात आले आहे. प्रतिक्रियांसाठी हे धोरण सार्वजनिक करण्यात आल्यानंतर त्यावर २८५ पेक्षा जास्त सूचना आल्या आहेत. राज्यामध्ये मागणीवर आधारित वाळूचा पुरवठा करण्यात येणार आहे. पुढच्या दोन वर्षामध्ये नदीतून नाही तर दगड खाणीवरून एम सँण्ड तयार करण्यात येईल. त्यामध्ये दगड खाणींमधून येणाऱ्या वाळूसाठी प्रत्येक जिल्ह्यामध्ये स्टोन क्रशरसाठी प्रोत्साहन देत आहोत. त्या माध्यमातून दगडापासून मोठ्या प्रमाणात वाळू तयार होणार असून, त्यामुळे नदीतील वाळूची मागणी कमी होईल. तसेच येत्या दोन वर्षांत वाळूची मागणी आणि पुरवठा यामध्ये जी काही तफावत आहे ती दूर होईल, असेही मंत्री बावनकुळे यांनी सांगितले.

मंत्री बावनकुळे म्हणाले, घरकुल बांधणाऱ्यांसाठी आता मोफत वाळू देण्याचा निर्णय घेण्यात आला आहे.

कोकणात सक्शन पंपाद्वारे प्रचंड प्रमाणात सुरू असलेल्या अवैध वाळू उत्खनन होणाऱ्या सर्व सक्शन पंपावर कारवाई करण्याचे आदेश कोकण आयुक्तांना दिले आहेत. यानंतरही वाळू उत्खनन सुरू राहिल्याचे निदर्शनास आले तर संबंधित तहसीलदारांवर निलंबनाची कारवाई करण्यात येईल, असे मंत्री बावनकुळे यांनी सांगितले.

The post परवानगीच्या हद्दीबाहेर वाळू उपसा केल्यास दंडात्मक कारवाई appeared first on थोडक्यात घडामोडी.

पुणे : पुण्यात एक अतिशय धक्कादायक घटना घडली आहे. १४ वर्षीय अल्पवयीन मुलीवर तिच्या जन्मदात्या वडिलांनीच बलात्कार केल्याची संतापजनक घटना समोर आली आहे. या प्रकरणात पोलिसांनी आरोपी वडिलांना अटक केली आहे. मात्र, या घटनेमुळे पुणे शहर पुन्हा एकदा हादरले आहे.

मिळालेल्या माहितीनुसार, पुण्यात लैंगिक अत्याचाराची आणखी एक घटना समोर आली आहे. वडिलांनी स्वतःच्या १४ वर्षीय मुलीवर बलात्कार केला. वडील-मुलीच्या नात्याला काळिमा फासणारी ही घटना पुण्यातील नांदेड शहर परिसरात घडली. बलात्कारी वडील ८ महिन्यांपासून स्वतःच्या १४ वर्षीय मुलीवर बलात्कार करत होते. आई घराबाहेर पडली की बलात्कारी वडील मुलीवर जबरदस्तीने लैंगिक अत्याचार करत होते. पुण्यातील नांदेड शहर पोलीस ठाण्यात गुन्हा दाखल करण्यात आला आहे. बलात्कारी वडिलांविरुद्ध पॉक्सो कायद्याअंतर्गत गुन्हा दाखल करण्यात आला आहे. ४५ वर्षीय बलात्कारी वडिलांना पोलिसांनी अटक केली आहे. बाल हक्क समितीने या घटनेचा पर्दाफाश केला आहे. त्यानुसार शनिवारी गुन्हा दाखल करण्यात आला आणि बलात्कारी वडिलांना बेड्या ठोकण्यात आल्या. पोलिस सध्या या प्रकरणाचा तपास करत आहेत.

दरम्यान, २५ फेब्रुवारी रोजी पुण्यातील स्वारगेट एसटी डेपोमध्ये एका तरुणीवर बलात्कार झाला. ही तरुणी पुण्याहून फलटणला जात होती. आरोपी दत्ता गाडे याने शिवशाही बसमध्ये तरुणीवर बलात्कार केला. या प्रकरणात पुणे पोलिसांनी ७० तासांनंतर शिरूर येथून आरोपीला अटक केली. आरोपी सध्या पोलिस कोठडीत आहे. आरोपीची डीएनए चाचणी आज केली जाईल.

The post पुणे हादरले! १४ वर्षांच्या मुलीवर जन्मदात्या वडिलांकडून वारंवार बलात्कार appeared first on थोडक्यात घडामोडी.

पुणे : पुण्यातील स्वारगेट बसस्थानकामध्ये २६ वर्षीय महिलेवर झालेल्या लैंगिक अत्याचाराच्या घटनेने खळबळ उडाली आहे. बारामतीच्या खासदार आणि राष्ट्रवादी काँग्रेस (शरद पवार) पक्षाच्या नेत्या सुप्रिया सुळे यांनी सोशल मीडियावर या घटनेवर टीका केली आहे आणि म्हटले आहे की, ही घटना गुन्हेगारांना कायद्याची भीती नसल्याचे दर्शवणारी आहे.

सुप्रिया सुळे यांनी एक्स वर एक पोस्ट टाकली आहे. यामध्ये त्या म्हणाल्या की, स्वारगेटसारख्या वर्दळीच्या बसस्थानकाच्या परिसरात एका तरुणीवरील लैंगिक अत्याचाराची घटना उघडकीस आली आहे. विशेष म्हणजे, स्वारगेट बसस्थानकाजवळ एक पोलिस चौकी आहे. शिवाय, पोलिस कर्मचारी वेळोवेळी बसस्थानकावर गस्त घालतात. तरीही, आरोपींना इतका जघन्य गुन्हा करण्याचे धाडस होते हे दर्शवते की गुन्हेगारांना कायद्याची भीती नाही. या राज्यात महिलांसाठी सुरक्षित जागा नाही का असा प्रश्नही यावेळी उपस्थित झाला आहे. पुण्यात दररोज कुठे ना कुठे गंभीर गुन्हे घडत आहेत. गृह विभाग ते थांबवू शकलेला नाही. ही घटना कायदा आणि सुव्यवस्था कशी बिघडली आहे याचे प्रतिबिंब आहे. या प्रकरणातील आरोपींना कठोर शिक्षा झाली पाहिजे. यासाठी हा खटला फास्टट्रॅक कोर्टात चालवावा अशी आमची मागणी आहे.

अतिशय संतापजनक!
स्वारगेटसारख्या गजबजलेल्या बस स्थानक परिसरात एका तरुणीवर लैंगिक अत्याचार झाल्याची घटना समोर आली आहे. विशेष म्हणजे स्वारगेट बस स्थानकाच्या जवळच पोलीस चौकी आहे. शिवाय पोलीस कर्मचारी बस स्थानकावर वेळोवेळी गस्त घालत असतात. तरीही अशा पद्धतीचा घृणास्पद गुन्हा करण्याची…

— Supriya Sule (@supriya_sule) February 26, 2025

पोलिसांनी दिलेल्या माहितीनुसार, २६ वर्षीय तरुणी पुण्याहून तिच्या मूळ गावी फलटणला जाण्यासाठी निघाली होती. ती सकाळी साडेपाच वाजता स्वारगेट बस स्टँडवर पोहोचली. त्यावेळी कोणीतरी तिला सांगितले की फलटणला जाणारी बस इथे थांबत नाही, तर पलीकडे थांबते. यावर मुलीने नकार दिला आणि म्हणाली की बस इथेच थांबते. यावर आरोपीने तरुणीला सांगितले की मी गेल्या दहा वर्षांपासून येथे काम करत आहे आणि फलटणला जाणारी बस तिथेच थांबते. आरोपीने मुलीला बाजूला उभ्या असलेल्या बसमध्ये नेले. आरोपीने मुलीला दरवाजा उघडून आत जाण्यास सांगितले. बसमध्ये अंधार होता. मुलगी बसमध्ये चढली. तिच्या मागे आरोपीही बसमध्ये चढला. त्याने बसचा दरवाजा बंद केला आणि मुलीवर लैंगिक अत्याचार केला.

या घटनेनंतर, मुलगी फलटणला निघाली, मात्र ती अर्ध्या रस्त्यातून परत आली. तिने स्वारगेट पोलिस ठाण्यात घटनेची माहिती दिली. घटनेची माहिती मिळताच पोलिसांनी सीसीटीव्ही फुटेज तपासले. आरोपी गाडे असल्याचे आढळून आले. गाडेवर यापूर्वी चोरीचे गुन्हे दाखल असल्याचेही समोर आले आहे. पुणे पोलिस आरोपीचा शोध घेत आहेत.

The post खासदार सुप्रिया सुळे यांच्याकडून स्वारगेट लैंगिक अत्याचार प्रकरणी संताप व्यक्त, केली ‘ही’ मागणी appeared first on थोडक्यात घडामोडी.

पुणे : पुण्यात स्वारगेट बस स्थानकामध्ये आज पहाटे बलात्काराची घटना घडली आहे. आरोपीकडून एका तरुणीची दिशाभूल करून तिला चुकीच्या बसमध्ये बसवत तिच्यावर अत्याचार करण्यात आला. या घटनेची माहिती मिळताच पुण्यात खळबळ उडाली आहे. पीडित तरुणी २६ वर्षांची असून दत्तात्रय रामदास गाडे असं आरोपीचं नाव आहे. या प्रकरणी पोलिसांनी आठ पथकं तयार केली असून ती आरोपीच्या मागावर आहेत.

दरम्यान, स्वारगेट पोलिस ठाण्याच्या एसीपी स्मार्तना पाटील यांनी याविषयीचा संपूर्ण घटनाक्रम माध्यमांना सांगितला. त्या म्हणाल्या, ही घटना शिवशाही बसमध्ये घटना घडली आहे. स्वारगेट पोलिस ठाण्यामध्ये यासंदर्भात गुन्हा दाखल करण्यात आला असून पोलिस आरोपीच्या मागावर आहेत. पीडित मुलगी पुण्यात जॉबला आहे. ती आज पहाटे पुण्यातून फलटणला निघाली होती. सकाळी साडेपाच-सहा वाजण्याच्या दरम्यान ही घटना घडली आहे. तरुणी बसची वाट बघत असताना आरोपी तिच्याजवळ गेला आणि तिच्याशी बोलू लागला. आरोपीने पीडित तरुणीला ‘कुठे जाताय ताई’, असं विचारलं. ती म्हणाली मला फलटणला जायचं आहे. तेव्हा तो म्हणाला, सातारची बस इथं लागत नाही तिकडे लागलेली आहे. ती म्हणाली बस इथेच लागते म्हणून मी बसलेली आहे. त्यावर आरोपी म्हणाला, नाही तिकडे लागलेली आहे चल तुला घेऊन जातो. त्यानंतर मुलगी त्याच्यासोबत गेली.

एसीपी स्मार्तना पाटील यांनी पुढे सांगितले कि, सीसीटीव्ही फुटेजमध्ये तरुणी आरोपीसोबत जाताना दिसून येत आहे. तिथं गेल्यानंतर बसमध्ये अंधार असल्याबाबत तिने विचारणा केली. तर त्यावर आरोपी म्हणाला, ही रात्रीची बस आहे म्हणून प्रवाशी झोपलेले आहेत, तू टॉर्चने चेक करु शकते. त्यानंतर आरोपीने गोड बोलून तरुणीला बसमध्ये चढायला सांगितलं. ती बसमध्ये चढल्यानंतर आरोपीने बसचा दरवाजा लावला आणि तिच्यावर अतिप्रसंग केला. त्यानंतर आरोपी उतरुन निघून गेला. तरुणी बसमधून उतरली, तिथे दुसऱ्या बसचा ड्रायव्हर दिसत होता. या घटनेनंतर तरुणी पुढे फलटणला जाण्यास निघाली. तिने आपल्या मित्राला फोन करुन घडलेला सर्व प्रकार त्याला सांगितला. त्यानंतर मित्राच्या सांगण्यावरुन ती अर्ध्या वाटेवरून परत आली आणि तिने पोलिस ठाण्यात येऊन तक्रार दाखल केली.

कोण आहे आरोपी दत्तात्रय गाडे ?
शिवशाही बसमध्ये तरुणीवर बलात्कार करणाऱ्या नराधमाचे नाव दत्तात्रय गाडे आहे. हा सराईत गुन्हेगार आहे. याच्यावर अनेक गंभीर गुन्ह्याची नोंद आहे. धमकी देणं, चेन स्नॅचींग यासारखे गुन्हे दत्ता गाडे याच्यावर आहेत. दत्तात्रय गाडे हा रेकॉर्ड वरील सराईत गुन्हेगार आहे. गाडे याच्यावर चोरीचे अनेक गुन्हे दाखल आहेत. गाडे हा मूळचा शिरूरचा आहे. शिक्रापूर आणि शिरुर पोलीस ठाण्यात गाडेवर गुन्ह्याची नोंद आहे. पोलिसांकडून दत्ता गाडे याचा शोध सुरु आहे. तरूणीवर शिवशाही बसमध्ये बलात्कार केल्यानंतर दत्ता गाडे फरार झाला आहे.

The post कुठे जाताय ताई? आरोपीने तरुणीला विचारलं, एसीपी स्मार्तना पाटील यांनी सांगितला स्वारगेट बस स्थानकातील संपूर्ण घटनाक्रम appeared first on थोडक्यात घडामोडी.