पुणे : पुण्यात शनिवारी सकाळी, जागतिक महिला दिनाच्या दिवशीच एका तरुणाने दारू पिऊन भररस्त्यात अश्लील वर्तन केले. शास्त्रीनगर चौकात रस्त्यावर एक तरुण लघुशंका करत असल्याचे दिसून आले. त्याला अडवल्यानंतर, त्याने अडवणाऱ्या व्यक्तीसमोर अश्लील हावभाव केले. तर, दुसरा तरूण बीएमडब्ल्यू कारमध्ये दारूची बाटली घेऊन बसला आहे. काही वेळाने, वेगाने गाडी चालवत दोघे पसार झाले. शहरातील गजबजलेल्या शास्त्रीनगर चौकात ही धक्कादायक घटना घडल्याने संतापाची लाट उसळली आहे.

शास्त्रीनगर चौकात BMW कारमधून उतरून एक तरुण रस्त्यावरच लघुशंका करत होता. या तरुणाला तेथे उपस्थित नागरिकांनी हटकल्यानंतर त्याने अश्लील कृत्य करण्यास सुरुवात केली. नंतर कारमध्ये बसल्यानंतर देखील त्याने निर्लज्जपणे पॅन्ट खाली सरकवत किळसवाणे कृत्य केले. कारमध्ये त्याचा मित्र दारूची बाटली घेऊन बसलेला होता. गजबजलेल्या रस्त्यावर अशा प्रकारचे वर्तन करण्याची हिम्मत कशी होते, हा प्रश्न उपस्थित होत आहे. समाजात राहताना पाळावे लागणारे मूलभूत नियम देखील पायदळी तुडवले जात आहेत.

या घटनेवर स्थानिक नागरिकांनी तीव्र प्रतिक्रिया दिली आहे. एकच मागणी केली जात आहे की अशा प्रकारच्या गंभीर गुन्ह्यांविरुद्ध कडक कायदा केला जावा. नागरिकांनी या घटनेच्या संदर्भात पोलिसांकडे त्वरित कारवाई करण्याची मागणी केली आहे, तसेच दारू पिऊन गाडी चालवणाऱ्यांवर कडक उपाययोजना करणे आवश्यक आहे.

या घटनेचा व्हिडिओ स्थानिक नागरिकांनी रेकॉर्ड केला होता, जो पोलिसांकडे सादर करण्यात आला आहे. या व्हिडिओमुळे पोलिसांना आरोपींची ओळख पटविण्यासाठी आणि चौकशी करण्यासाठी मदत होईल. पुणे पोलिसांनी या घटनेची गंभीर दखल घेतली असून, संबंधित आरोपींविरुद्ध कठोर कारवाई करण्याचे आश्वासन दिले आहे.

तसेच, पुणे शहरातील रस्त्यांवर महिलांच्या सुरक्षेसाठी अधिक कडक उपाययोजना करणे आणि अशा गुन्ह्यांना आळा घालण्यासाठी पोलिसांनी अधिक प्रभावी पाऊले उचलावीत, अशी अपेक्षा स्थानिक नागरिक आणि महिलांच्या हक्कासाठी काम करणाऱ्या संघटनांकडून केली जात आहे.

The post पुण्यात मद्यधुंद तरुणाचे भररस्त्यात अश्लील चाळे, विरोध केल्यानंतर गाठला निर्लज्जपणाचा कळस… appeared first on थोडक्यात घडामोडी.

पुणे : आंतरराष्ट्रीय महिला दिनानिमित्त (८ मार्च) पुणे महानगर परिवहन महामंडळ लिमिटेड (पीएमपीएमएल) ने पुणे आणि पिंपरी-चिंचवडमधील तेजस्विनी बसेसमध्ये महिलांसाठी मोफत प्रवासाची घोषणा केली आहे. हा विशेष उपक्रम शहरांमधील १३ मार्गांवर उपलब्ध असेल.

पीएमपीएमएलच्या अध्यक्षा आणि व्यवस्थापकीय संचालक दीपा मुधोळ-मुंडे यांच्या निर्देशानुसार, तेजस्विनी बसेस स्वारगेट, निगडी, पुणे स्टेशन, कोथरूड, हडपसर, कात्रज, पिंपरी, भोसरी आणि इतर प्रमुख ठिकाणांवरील डेपोंमधून धावतील. या बसेस एकत्रितपणे दिवसभरात सुमारे ४२ फेऱ्या पूर्ण करतील, ज्यामुळे महिला प्रवाशांना अखंडित सेवा मिळेल. पीएमपीएमएलने सर्व डेपो व्यवस्थापकांना तेजस्विनी सेवा पूर्णपणे कार्यरत ठेवण्याचे आणि कोणत्याही मार्गावरील निलंबन टाळण्याचे निर्देश दिले आहेत.

महिला दिनाचा उत्सव अधिक चांगला करण्यासाठी, या बसेसमध्ये महिला कंडक्टर नियुक्त केल्या जातील. याशिवाय, आगार अधिकारी बस स्थानकांवर महिला प्रवाशांचे गुलाबपुष्प देऊन स्वागत करतील आणि शुभेच्छा देतील. पीएमपीएमएलने या खास दिवशी फक्त महिला प्रवाशांना तेजस्विनी बसमध्ये चढण्याची परवानगी देण्याचे सक्त आदेश दिले आहेत.

तेजस्विनी बस मार्ग आणि नियोजित फेऱ्या :

• स्वारगेट ते हडपसर: ५ फेऱ्या
• स्वारगेट ते धायरी मंदिर: २ फेऱ्या
• कोथरूड डेपो ते पुणे स्टेशन: २ फेऱ्या
• एनडीए गेट क्रमांक १० ते पीएमसी: २ फेऱ्या
• कात्रज ते महाराष्ट्र गृहनिर्माण मंडळ: ७ फेऱ्या
• कात्रज ते कोथरूड डेपो: ६ फेऱ्या
• हडपसर ते वारजे माळवाडी: २ फेऱ्या
• भेकराईनगर ते पीएमसी: २ फेऱ्या
• मार्केट यार्ड ते पिंपळे गुरव: २ फेऱ्या
• पुणे स्टेशन ते कोंढवा खुर्द: २ फेऱ्या
• निगडी ते मेगा पोलिस, हिंजवडी: ४ फेऱ्या
• भोसरी ते निगडी: ४ फेऱ्या
• चिखली ते डांगे चौक: २ फेऱ्या

The post पुणे : महिला दिनानिमित्त महिलांना तेजस्विनी बसमध्ये मोफत प्रवास, अशा असतील नियोजित फेऱ्या… appeared first on थोडक्यात घडामोडी.

मुंबई : समता हे आपल्या संविधानातील एक महत्त्वाचे मूल्य आहे. या दृष्टीने यंदाच्या जागतिक महिला दिनानिमित्त महाराष्ट्राच्या मुख्य निवडणूक अधिकारी कार्यालयाने अनुभव लेखन हा उपक्रम आयोजित केला असून, त्याचा विषय ‘कशासाठी?- लिंगभाव समतेसाठी’ हा असून यात जास्तीत जास्त नागरिकांनी सहभाग घ्यावा, असे आवाहन राज्याचे मुख्य निवडणूक अधिकारी आणि प्रधान सचिव श्रीकांत देशपांडे यांनी केले आहे.

स्त्री जन्माला येत नाही, तर ती घडवली जाते. या सीमॉन द बोव्हारच्या वाक्यातील मर्म आपण सारे जाणतो; आणि म्हणून पुरुषही जन्माला येत नाही, तर तोही घडवला जातो, याची जाणीवही सीमॉनचे हे वाक्य आपल्याला करून देते. स्त्रियांनी आणि पुरुषांनी कसे वागावे, याविषयी आपल्या पुरुषप्रधान समाजाच्या पारंपरिक चौकटी ठरलेल्या आहेत आणि त्यानुसार सर्वांना लहानपणापासून वाढवले जाते. ह्या चौकटी जाचक ठरायला लागल्यावर काही व्यक्तींनी स्त्री, पुरुष, तृतीय पंथी त्या नाकारायला सुरुवात करून सांविधानिक समतेची कास घरलेली दिसते आहे. या उपक्रमासाठी स्त्री पुरुष, तृतीय पंथी यांनी आपल्या जगण्यात लिंगभाव समता आणण्यासाठी केलेले प्रयत्न, संघर्ष, अनुभव लिहून ते 25 मार्चपर्यंत पाठवायचे आहेत. आपले हे अनुभव इतरांनाही लिंगभाव समता आणण्यासाठी प्रेरणादायी ठरतील.

आपल्या अनेक समाजसुधारकांच्या प्रयत्नामुळे आज स्त्रिया मोठ्या प्रमाणात शिक्षण घेऊ लागल्या असल्या, तरी आजही घराबाहेर पडून नोकरी-व्यवसाय करणाऱ्या स्त्रियांची संख्या तुलनेत अल्प आहे. त्यासाठीही अनेकींना त्यांच्या त्याच्या पातळीवर लहान मोठे संघर्ष करावे लागत आहेत. हे संघर्ष कधी कौटुंबिक पातळीवरील असतात, तर कधी नोकरी-व्यवसायातील प्रत्येकीने कधी ना कधी लिंगभाव असमानतेला तोंड दिलेले असते आणि सावकाश का होईना, काही प्रमाणात का असेना ती असमानता समानतेकडे झुकवण्यात ती यशस्वीही झालेली असते. असे संघर्ष कधी कौटुंबिक पातळीवर सातच्या आत घरात येण्याचे असतील किंवा घरकाम, शिक्षण, नोकरी, करिअर, लग्न, मुलाचे संगोपन इ. साठीचे असतील, तर कधी नोकरी-व्यवसायाच्या ठिकाणी मिळालेल्या भेदभावाचे असतील. पुरुषप्रधानता केवळ स्त्रियांच्या विकासालाच मारक आहे असे नव्हे, तर माणूस म्हणून जगण्यासाठी पुरुष आणि तृतीय पंथी यांचाही ही पुरुषप्रधानता तितकाच कोंडमारा करते.

अनुभव लेखन उपक्रम सर्वांसाठी खुले असून संबंधितांनी आपले अनुभव मराठीत लिहावेत. लिखानाची शब्दमर्यादा 700 ते 1200 शब्द असावी तसेच लेखन हे अनुभवाधारित असावे, काल्पनिक नसावे. या उपक्रमांतर्गत आलेल्या निवडक लेखाचे मुख्य निवडणूक अधिकारी कार्यालयाकडून पुस्तक प्रकाशित करण्यात येईल. तसेच ‘पुन्हा स्त्री उवाच’ या संकेतस्थळावर प्रसिद्धी देण्यात येईल. सदर उपक्रमाची अधिक माहिती https://ceo.maharashtra.gov.in/ या संकेतस्थळावर उपलब्ध आहे किंवा 8669058325 (प्रणव सलगरकर) या क्रमांकावर संपर्क साधावा.

The post जागतिक महिला दिनानिमित्त ‘कशासाठी?- लिंगभाव समतेसाठी’ विषयावर अनुभव लेखनाचे आयोजन, मुख्य निवडणूक अधिकारी कार्यालयाकडून ‘हे’ आवाहन appeared first on थोडक्यात घडामोडी.