उत्तरप्रदेश : एका अल्पवयीन दलित मुलीवर ५ जणांनी सामुहिक बलात्कार केल्याची धक्कादायक घटना समोर आली आहे. उत्तरप्रदेशच्या मोरादाबाद येथील शाळेत १२ वर्षीय मुलीवर मुख्याध्यापकांच्या कार्यालयातच सामुहिक बलात्कार करण्यात आला आहे. एवढेच नाही तर याचा व्हिडिओ बनवून तो सोशल मीडियावर व्हायरल देखील केला. मुलीच्या शेजारणीने हा व्हिडिओ पाहिल्यानंतर घटना उघडकीस आली आहे.

मिळालेल्या माहितीनुसार, ८ मे रोजी मोरादाबादमधील शाळेत ही घटना घडली होती. नराधमांनी पीडित मुलीला सॉफ्ट ड्रिंक मधून गुंगीचे औषध दिले आणि तिच्यावर बलात्कार केला. या घटनेचा व्हिडिओही बनवला. हा व्हिडिओ जेव्हा समाजमाध्यमांवर व्हायरल झाला, तेव्हा पीडित मुलीच्या शेजारणीने हा व्हिडिओ पाहिला, त्यानंतर सोमवारी १९ मे ला तिने पीडितेच्या आईला याबद्दल सांगितले. पीडितेच्या आईने ताबडतोब पोलिसांत धाव घेत तक्रार दाखल केली. पोलिसांनी तात्काळ तपास सुरु केला आणि मंगळवारी सायंकाळपर्यंत पाचही आरोपींना अटक करण्यात आली.

पोलिसांना पीडितेने सांगितले की, तिचे शेजारी आणि स्थानिक शाळेतील विद्यार्थी असलेल्या मुलांनी तिला काहीतरी विकत घेण्याचे आमिष दाखवले. त्यानंतर त्यांनी तिला जवळच्या ज्युनियर हायस्कूलमध्ये नेले. एकाने त्याच्या वडिलांकडून जे शाळेचे चौकीदार आहेत, त्यांच्याकडून चोरलेल्या चावीचा वापर करून शाळेच्या इमारतीत प्रवेश केला. त्यानंतर तिला आत नेऊन गेट बंद केले. त्यानंतर मुख्याध्यापकांच्या कार्यालयात नेले आणि तिला मादक पेय पाजले. मुलगी बेशुद्ध पडल्यावर त्यांनी तिच्यावर बलात्कार केला आणि ते सर्व रेकॉर्ड देखील केले. घटनेनंतर तिने पालकांना काही सांगितले तर तिला मारण्याचीही धमकी त्या नराधमांनी दिली होती.

पीडितेच्या आईने सांगितले की, ‘माझी मुलगी अनेक दिवसांपासून नैराश्यात होती, पण तिने मला काहीही सांगितले नाही. मी व्हिडिओ पाहिल्यानंतर मला सर्व समजले.’ या घटनेनंतर परिसरात खळबळ उडाली आहे. गुन्ह्यातील पाचही आरोपी अल्पवयीन असून त्यांना बालसुधारगृहात पाठवण्यात आल्याचे पोलिसांनी सांगितले आहे.

The post १२ वर्षीय मुलीवर मुख्याध्यापकांच्या कार्यालयातच सामुहिक बलात्कार, व्हिडिओ व्हायरल झाल्यानंतर… appeared first on थोडक्यात घडामोडी.

पुणे : रात्रपाळीसाठी कामावर निघालेल्या 27 वर्षीय महिलेवर अज्ञात व्यक्तीने बलात्कार केल्याची घटना समोर आली आहे. खेड तालुक्यातील मेदनकरवाडी परिसरात हा धक्कादायक प्रकार घडला. तसेच याबाबत कुणाला काही सांगितल्यास जीवे ठार मारण्याची धमकीही आरोपीने पीडितेला दिली. पोलिसांनी याप्रकरणी तात्काळ तपास करत अवघ्या काही तासात आरोपीच्या मुसक्या आवळल्या आहेत. प्रकाश तुकाराम भांगरे (रा. मेदनकरवाडी, मूळ रा. अकोले, जि. अहमदनगर) असे आरोपीचे नाव आहे.

मिळालेल्या माहितीनुसार, पीडित महिला मंगळवारी रात्री साडेअकरा वाजता नाइट शिफ्टसाठी कंपनीत निघाली होती. अज्ञात व्यक्तीने तिचा पाठलाग करून खंडोबा मंदिराजवळ तिचा रस्ता अडवला. त्यानंतर अंधाराचा फायदा घेत जबरदस्तीने ओढत निर्जनस्थळी नेऊन या महिलेवर बलात्कार केल्याची घटना चाकण येथील मेदनकरवाडी येथे घडली. त्यानंतर आरोपीने पळ काढला.

पोलिसांनी सांगितले की, चाकण पोलीस ठाण्याच्या हद्दीत 13 मे रोजी रात्री 11:15 ते 11:45 वाजताच्या सुमारास, खेड तालुक्यातील मेदनकरवाडी, मुटकेवाडी येथील भुरुक कॉम्प्लेक्सच्या मागे एक 27 वर्षीय महिला रात्रपाळीतील कामासाठी कंपनीत जात होती. यावेळी आरोपीने तिला जबरदस्तीने शाळेच्या मागील बाजूस ओढून नेले. घटनास्थळी कोणीही दिसत नसल्याने महिला घाबरली होती. तिने आरडाओरडा करण्याचा प्रयत्न केला, तसेच सुटका करून घेण्यासाठी तिने आरोपीचा चावाही घेतला. मात्र, आरोपीने तिच्यावर बलात्कार करून मारहाण केली आणि याबाबत कोणाला सांगितल्यास जीवे मारण्याची धमकी दिली. त्यानंतर आरोपीने पळ काढला. दरम्यान, या प्रकारानंतर एक कामगार महिला आणि पुरुष तेथून जात होते. त्यांच्या मदतीने शंभर नंबरवर फोन करून पीडित महिलेने पोलिसांना बोलावून घेतले. महिलेला तातडीने ‘वायसीएम रुग्णालयात दाखल करण्यात आले.

या घटनेची माहिती मिळताच चाकण पोलिसांनी तातडीने कारवाईला सुरुवात केली. पिंपरी-चिंचवड गुन्हे शाखेच्या सहकार्याने सहा विशेष पथके स्थापन करण्यात आली. पोलिसांनी परिसरातील सीसीटीव्ही फुटेज तपासले आणि तांत्रिक माहितीच्या आधारे तपास पुढे नेला. या तपासादरम्यान आरोपीची ओळख पटली. पोलिसांनी त्याला ताब्यात घेऊन चौकशी केली असता, त्याने गुन्ह्याची कबुली दिली. चाकण पोलिसांनी विविध कलमाच्या अन्वये गुन्हा दाखल करून आरोपीला अटक केली असून, पुढील तपास सुरू आहे. मात्र, अशा घटनांना आळा घालण्यासाठी कठोर उपाययोजनांची गरज आहे. या घटनेने महिलांच्या सुरक्षेचा प्रश्न पुन्हा एकदा ऐरणीवर आला आहे.

The post पुणे : 27 वर्षीय महिलेवर अज्ञात व्यक्तीकडून बलात्कार, आरोपी पोलिसांच्या ताब्यात appeared first on थोडक्यात घडामोडी.