केरळ : केरळमध्ये अमिबिक मेनिंगोएन्सेफलायटीस (Amoebic Meningoencephalitis) या दुर्मिळ परंतु जीवघेण्या मेंदूच्या संसर्गाचा एक नवीन रुग्ण आढळला आहे. हा आजार प्रामुख्याने Naegleria fowleri नावाच्या सूक्ष्म अमिबामुळे होतो. ह्यालाच मेंदू खाणारा अमिबा (Brain-eating amoeba) म्हणतात. तिरुवनंतपुरममधील १७ वर्षीय मुलाला या आजाराची लागण झाल्याची पुष्टी झाली आहे.

आरोग्य विभागाने तातडीने कारवाई करत अक्कुलम टुरिस्ट व्हिलेज येथील स्विमिंग पूल बंद केला असून चाचणीसाठी पाण्याचे नमुने घेतले आहेत. संबंधित मुलगा आपल्या मित्रांसोबत या तलावात गेल्याचे आणि तेथे आंघोळ केल्याचे निष्पन्न झाले आहे.

वाढती आकडेवारी चिंताजनक
१४ सप्टेंबर रोजी एकात्मिक रोग देखरेख कार्यक्रमांतर्गत (IDSP) जारी केलेल्या अद्ययावत आकडेवारीनुसार, केरळमध्ये यंदा तब्बल ६७ रुग्ण आढळले असून त्यापैकी १८ जणांचा मृत्यू झाला आहे. गेल्या महिन्यातच या आजारामुळे पाच मृत्यू नोंदवले गेले आहेत.

आरोग्यमंत्र्यांचा इशारा आणि सूचना
केरळच्या आरोग्यमंत्री वीणा जॉर्ज यांनी या आजाराविरुद्ध कठोर प्रतिबंधात्मक उपाययोजना करण्याची गरज अधोरेखित केली आहे. त्या म्हणाल्या, “आपल्याला अमिबिक मेनिंगोएन्सेफलायटीसविरुद्ध मजबूत संरक्षण उभारणे आवश्यक आहे. नागरिकांनी पाण्याची सुरक्षितता आणि स्वच्छतेबाबत अधिक जागरूक राहावे. साचलेल्या किंवा प्रदूषित पाण्यात, विशेषतः ज्या ठिकाणी गुरेढोरे आंघोळ करतात अशा जलाशयांमध्ये चेहरा धुणे अथवा पोहणे टाळावे.”

• विहिरी शास्त्रोक्त पद्धतीने क्लोरीनयुक्त ठेवाव्यात.
• वॉटर थीम पार्क व स्विमिंग पूल योग्यरित्या क्लोरीनयुक्त करून त्यांच्या देखभालसंबंधी नोंदी सुरक्षित ठेवाव्यात.
• घरांमध्ये पाणी साठवण्याची सोय स्वच्छ ठेवावी.
• अमिबा नाकावाटे मेंदूत प्रवेश करतो, त्यामुळे पाणी नाकात जाणार नाही याची खबरदारी घ्यावी.

काय आहे अमिबिक मेनिंगोएन्सेफलायटीस?

हा संसर्ग नॅग्लेरिया फाउलेरी (Naegleria fowleri) या सूक्ष्म अमिबामुळे होतो. तो सहसा दूषित किंवा साचलेल्या पाण्यात आढळतो. संसर्ग झाल्यानंतर रुग्णाच्या मेंदूत तीव्र दाह होतो, ज्यामुळे डोकेदुखी, उलट्या, ताप, मान आखडणे, गोंधळ, झटके अशी लक्षणे दिसतात. ह्यालाच सामान्य भाषेत “मेंदू खाणारा अमिबा” म्हणतात. बहुतेक वेळा हा आजार जीवघेणा ठरतो.

राज्यात या आजाराच्या वाढत्या प्रकरणांनी आरोग्य यंत्रणेची चिंता वाढवली आहे. तज्ज्ञांच्या मते, पाणी वापरण्यात दक्षता, स्वच्छता व नियमित क्लोरीनची मात्रा राखणे हेच सध्या सर्वात मोठे प्रतिबंधात्मक पाऊल आहे.

The post भयावह! केरळमध्ये मेंदू खाणाऱ्या अमीबाचा नवीन रुग्ण आढळला, यंदा ६७ रुग्णांची नोंद appeared first on थोडक्यात घडामोडी.

केरळ : केरळच्या अलाप्पुझा जिल्ह्यातून एक धक्कादायक घटना उघडकीस आली आहे. दूषित पाण्यात राहणाऱ्या अमीबाने एका मुलाचा बळी घेतल्याची घटना घडली आहे. या अमिबामुळे मेंदूमध्ये संसर्ग होतो, म्हणजेच तो मेंदू खातो. एक 15 वर्षाचा मुलगा नदीत आंघोळीसाठी गेला होता. अंघोळ करताना अमिबा त्याच्या नाकातून मेंदूपर्यंत पोहोचला. नंतर मुलाच्या शरीरात संसर्ग पसरला आणि या संसर्गामुळे त्याचा रुग्णालयात मृत्यू झाला.

राज्याच्या आरोग्य मंत्री वीणा जॉर्ज यांच्या म्हणण्यानुसार, अलाप्पुझा जिल्ह्यातील पानवल्ली येथील एका 15 वर्षीय मुलाला प्राइमरी अमीबिक मेनिंगोएन्सेफलायटीस नावाच्या आजाराची लागण झाली होती. डॉक्टरांच्या मते, ‘मेंदू खाणारा जंत’ अनेकदा साचलेल्या पाण्यात वाढतो.

मुलाच्या मृत्यूची पुष्टी करताना मंत्री म्हणाले की यापूर्वी देखील राज्यात या दुर्मिळ संसर्गाची पाच प्रकरणे नोंदवली गेली होती. अलाप्पुझा येथील तिरुमला वॉर्डमध्ये 2016 मध्ये असे पहिले प्रकरण समोर आले होते. त्यानंतर 2019 आणि 2020 मध्ये मलप्पुरममध्ये दोन प्रकरणांची पुष्टी झाली आणि 2020 आणि 22 मध्ये कोझिकोड आणि त्रिशूरमध्ये प्रत्येकी एक प्रकरण आढळून आले. जॉर्ज यांनी सांगितले की, सर्व संक्रमित रुग्णांचा मृत्यू झाला. दुर्मिळ मेंदूच्या संसर्गामुळे मृत्यूचे प्रमाण 100 टक्के असल्याचे त्यांनी सांगितले.

साचलेल्या पाण्यात मुक्त जिवंत अमिबा आढळल्याने हा संसर्ग होतो, अशी माहितीही मंत्र्यांनी दिली. डॉक्टरांच्या म्हणण्यानुसार, जेव्हा मुक्त-जीवित, परजीवी नसलेले अमिबा जीवाणू नाकातून शरीरात प्रवेश करतात तेव्हा मानवी मेंदूला संसर्ग होतो.

हा अमिबा इतका धोकादायक आहे की तो मेंदूच्या पेशी खातो आणि मेंदूमध्ये संसर्ग पसरतो. परिणामी, एखाद्या व्यक्तीचा मृत्यू देखील होतो. Naegleria Fowleri नावाचा हा अमिबा इतका लहान आहे की तो सूक्ष्मदर्शकाशिवाय दिसत नाही. या आजाराचे गंभीर स्वरूप लक्षात घेऊन जिल्हा आरोग्य अधिकाऱ्यांनी लोकांना दूषित पाण्यात अंघोळ न करण्याचा सल्ला दिला आहे. या आजाराच्या मुख्य लक्षणांमध्ये ताप, डोकेदुखी, उलट्या आणि चक्कर येतात.

The post धक्कादायक! नदीत अंघोळ करून आलेल्या मुलाचा मृत्यू, अमिबा नाकातून मेंदूपर्यंत पोहोचला आणि… appeared first on थोडक्यात घडामोडी.