कर्णधार म्हणून विराट कोहली टी-२० वर्ल्ड कपमध्ये अपयशी ठरला आहे. भारताला सलग दोन सामन्यांत पराभव पत्करावा लागला. वर्ल्ड कपपूर्वीच कोहलीने टी-२० संघाचे नेतृत्व सोडणार असल्याचे सांगितले आहे. आता विराट कोहलीकडून वन-डे संघाचे नेतृत्व काढून घेण्यात येण्याची शक्यता निर्माण झाली आहे. यासाठी बीसीसीआय अध्यक्ष सौरभ गांगुली आणि सरचिटणीस जय शहा यांनी पुढील दोन-तीन दिवसांत निवड समिती सदस्यांसोबत ऑनलाइन बैठक बोलावली आहे.

पुढील वर्षी ऑस्ट्रेलियात टी-२० वर्ल्ड कप होत असून, २०२३चा वन-डे वर्ल्ड कप भारतात होणार आहे. या वर्षी तरी भारतीय संघाला वन-डे सामने खेळायचे नाहीत. पुढील वर्षीही भारतीय संघाचे फारसे वन-डे सामने नाहीत. पुढील वर्षी जूनपर्यंत भारतीय संघ केवळ तीन वन-डे, तर एकूण १७ टी-२० सामने खेळणार आहे. त्यामुळे कोहलीच्या वन-डेबाबतचा निर्णय आता घ्यावा की नाही, यावरही चर्चा होण्याची शक्यता आहे.

पुढील वर्ल्ड कपसाठी अकरा महिन्यांचा कालावधी शिल्लक आहे. अशा परिस्थितीत सध्याच्या संघातील खेळाडूंचा फॉर्म आणि तंदुरुस्ती यावरही चर्चा केली जाणार आहे. आयपीएलमध्ये चमकदार कामगिरी करणाऱ्या काही युवा खेळाडूंना न्यूझीलंडविरुद्धच्या टी-२० मालिकेत स्थान मिळण्याची दाट शक्यता आहे. यात सर्वाधिक धावा करून ऑरेंज कॅप मिळविलेला ऋतुराज गायकवाड याचे नाव आघाडीवर आहे. सर्वाधिक विकेट घेणारा आवेश खान, फिरकी गोलंदाज युझवेंद्र चहल यांना संधी मिळू शकते. जम्मू-काश्मीरच्या उमरान मलिकचेही नाव चर्चेत आहे. अष्टपैलू वेंकटेश अय्यरला पंड्याच्या जागी स्थान मिळू शकते. अक्षर पटेल, श्रेयस अय्यर, दीपक चहर, शुभमन गिल, मयंक अग्रवाल, उमेश यादव यांना पुन्हा संधी मिळू शकते.

The post विराट कोहलीबाबत BCCI घेणार मोठा निर्णय? दोन-तीन दिवसांत होणार बैठक appeared first on थोडक्यात घडामोडी.

नवी दिल्ली : कोरोना विषाणूचा संसर्ग रोखण्यासाठी केंद्र सरकार सर्वतोपरी प्रयत्न करत आहे. त्यातच आता विमान प्रवाश्यांना यापुढे उड्डाणादरम्यान जेवण मिळणार नसल्याचा निर्णय घेण्यात आला आहे. नागरी उड्डाण मंत्रालयाने जारी केलेल्या अधिसूचनेनुसार, प्रवाश्यांना घरगुती उड्डाणादरम्यान २ तासापेक्षा कमी वेळेच्या उड्डाणांमध्ये खायला मिळणार नाही. विमान कंपन्या प्रवाशांना २ तास किंवा त्याहून अधिक प्रवासासाठी केटरिंग सुविधा देऊ शकतात.

गेल्या वर्षी कोरोना विषाणूच्या पहिल्या लाटेच्या वेळी देखील नागरी उड्डाण मंत्रालयाने असा निर्णय घेतला होता. तथापि, कोरोनाचा संसर्ग कमी झाल्यानंतर हा निर्णय मागे घेण्यात आला होता. गेल्या दोन आठवड्यांत कोरोनाच्या वाढत्या संसर्गामुळे हवाई प्रवाश्यांची संख्या मोठ्या प्रमाणात कमी झाली आहे. यानंतरही मंत्रालयाने कोरोना विषाणूंपासून बचावासाठी हवाई प्रवासादरम्यान अन्न न देण्याचा निर्णय घेतला आहे.

मंत्रालयाने स्पष्ट केले आहे की ज्या विमानांचा कालावधी 2 तासांपेक्षा जास्त असेल तेथेदेखील टप्प्याटप्प्याने जेवण दिले जाईल. जर फ्लाइटमध्ये अन्न दिले गेले तर ते प्री-पॅक केले जाईल आणि डिस्पोजेबल प्लेट्स आणि कटलरीसह दिले जाईल. वापरल्यानंतर प्लेट, कटलरी आणि पॅकिंग सामग्रीची नियमांनुसार सुरक्षितपणे विल्हेवाट लावावी लागेल. कोणत्याही परिस्थितीत त्यांचा पुन्हा वापर केला जाऊ नये. चहा, कॉफी आणि इतर पेय पदार्थ देखील डिस्पोजेबल बाटल्या, कंटेनर किंवा डब्यात द्यावे. क्रू मेम्बर्सला प्रत्येक वेळी जेवण सर्व केल्यानंतर त्यांचे हातमोजे बदलण्याचे आदेशही देण्यात आले आहेत.

नवीन नियमांची अंमलबजावणी 15 एप्रिलपासून होईल. मंत्रालयाने सर्व एअरलाइन्सना सांगितले आहे की सर्व हवाई प्रवाशांना प्रवासात लागू करण्यात आलेल्या या नवीन नियमांविषयी संपूर्ण माहिती देण्यात यावी.

The post केंद्र सरकारचा मोठा निर्णय, विमान प्रवाश्यांना आता 2 तासांपेक्षा कमी वेळेच्या उड्डाणांमध्ये मिळणार नाही ‘ही’ सुविधा appeared first on थोडक्यात घडामोडी.