हरियाणा : हरियाणातील रोहतक शहरात एक धक्कादायक घटना घडली आहे, ज्यामुळे राज्यात आणि देशभरात खळबळ उडाली आहे. काँग्रेस पक्षाच्या महिला कार्यकर्त्या, हिमानी नरवाल यांचा मृतदेह शनिवारी सकाळी एका निळ्या रंगाच्या सूटकेसमध्ये बस स्थानकाजवळ आढळला. ही घटना तात्काळ पोलिसांच्या निदर्शनास आली आणि तपास सुरू करण्यात आला आहे.

शनिवारी, १ मार्च २०२५ रोजी सकाळी ११ वाजेच्या सुमारास रोहतकच्या बस स्थानकावर लोकांची गर्दी होती. अचानक, एका व्यक्तीचे रस्त्याच्या कडेला ठेवलेल्या निळ्या रंगाच्या सूटकेसकडे लक्ष गेले. त्याला पाहून अजून काही लोक तिथे गेले आणि त्यांना सूटकेसमध्ये काहीतरी संशयास्पद असल्याचं वाटलं. त्यामुळे त्यांनी पोलिसांना तात्काळ माहिती दिली. पोलिसांनी घटनास्थळी पोहोचून सूटकेस उघडली असता त्यात एक तरुणीचा मृतदेह आढळला, तो पाहून सर्वांना धक्का बसला. हातावर मेहंदी, गळ्यात काळ्या रंगाची ओढणी, पांढरा टॉप आणि लाल रंगाची पँट, नाकातून रक्त आलेले होते आणि चेहरा निळा होता. या युवतीचा मृतदेह पाहून असं वाटत होतं की गळा दाबून तिला ठार करण्यात आलं आहे त्यानंतर मृतदेह सूटकेसमध्ये ठेवून फेकला आहे.

दरम्यान, पोलिसांनी फॉरेन्सिक पथकाला बोलावलं. तथापि, शनिवारी दुपारपर्यंत मृतकाची ओळख पटली नव्हती. काही स्थानिक नागरिकांनी मृतदेहाचा फोटो सोशल मीडियावर पोस्ट केला, जो लगेच व्हायरल झाला. यावरून रोहतकच्या काँग्रेस आमदार बीबी बात्रा यांनी या तरुणीची ओळख पटवली. त्यानंतर, हा मृतदेह हिमानी नरवाल यांचा असल्याची माहिती समोर आली. हिमानी नरवाल काँग्रेस पक्षाच्या महिला शाखेतील एक सक्रीय कार्यकर्त्या होत्या. त्यांनी पक्षाच्या विविध आंदोलनांमध्ये सहभाग घेतला होता आणि राहुल गांधींच्या भारत जोडो यात्रेतही हिरीरीने सहभागी झाल्या होत्या. हिमानी यांचे राहुल गांधींसोबतचे फोटो सोशल मीडियावर व्हायरल झाले होते, ज्यामुळे तिची ओळख अधिक स्पष्ट झाली. हिमानी नरवाल सोशल मीडियावर डिजिटल क्रिएटर म्हणूनही सक्रिय होत्या आणि काँग्रेसच्या अनेक उपक्रमांमध्ये सक्रियपणे सहभागी होत असत.

काँग्रेस पक्षाकडून चौकशीची मागणी
काँग्रेस पक्षाने या घटनेबाबत तीव्र निषेध व्यक्त केला आहे आणि उच्चस्तरीय चौकशीची मागणी केली आहे. पक्षाच्या नेत्यांनी या प्रकरणाची सखोल तपासणी होण्याची आवश्यकता व्यक्त केली आहे, जेणेकरून या भयाण घटनेचे नेमके कारण समोर येईल. काँग्रेसने या प्रकरणात न्याय मिळवण्यासाठी राज्य सरकारकडे ठोस पावले उचलण्याची मागणी केली आहे.

हरियाणाचे माजी मुख्यमंत्री भुपेंद्र सिंह हुड्डा यांनीही या घटनेबाबत दुःख व्यक्त केलं आहे. तसंच त्यांनी हिमानी नरवाल यांच्या कुटुंबाला न्याय मिळवून देण्यासाठी सरकारकडून आवश्यक त्या सर्व उपाययोजना लवकरात लवकर करण्याची मागणी केली आहे.

The post धक्कादायक! काँग्रेस कार्यकर्त्या हिमानी नरवाल यांचा मृतदेह सूटकेसमध्ये आढळला, पक्षाकडून उच्चस्तरीय चौकशीची मागणी appeared first on थोडक्यात घडामोडी.

पुणे : हरियाणा येथे होत असलेल्या चौथ्या ‘खेलो इंडिया’ युवा स्पर्धांसाठी बालेवाडीच्या शिवछत्रपती क्रीडापीठ येथील सराव शिबिरानंतर महाराष्ट्राचा कबड्डी संघ रवाना झाला. बालेवाडीतील छत्रपती शिवाजी महाराज यांच्या पुतळ्याला अभिवादन करून संघाने पदक मिळवण्याचा निर्धार केला. क्रीडामंत्री सुनील केदार आणि क्रीडा राज्यमंत्री कु. आदिती तटकरे यांनी खेळाडूंना शुभेच्छा दिल्या आहेत.

क्रीडा विभागाचे सहसंचालक चंद्रकांत कांबळे हे स्पर्धेचे समन्वय अधिकारी आहेत. क्रीडा अधिकारी अरूण पाटील हे मुख्य व्यवस्थापक आहेत. त्याच बरोबर इतर पदाधिकारीदेखील महाराष्ट्राच्या संघासोबत आहेत. गीता साखरे (पुणे) या मुलींच्या कबड्डी संघाच्या प्रशिक्षक, राजेश पाडावे (मुंबई) मुलांच्या संघाचे प्रशिक्षक आणि क्रीडा अधिकारी ज्ञानेश्वर खुरांगे हे संघ व्यवस्थापक आहेत.

चौथ्या खेलो इंडिया स्पर्धेचे ४ जून रोजी उद्घाटन होईल आणि १३ जून रोजी स्पर्धेची सांगता होणार आहे. आजपासून हे संघ हरियाणाकडे रवाना होत आहेत. ८ जूनपर्यंत सर्व संघ तिकडे रवाना होतील. क्रीडामंत्री सुनील केदार- यावर्षी यशस्वी खेळाडूंसाठी बक्षिसाची रक्कम वाढविण्याचा सरकारने निर्णय घेतला आहे. तो नक्कीच खेळाडूंचा उत्साह वाढविणारा ठरेल. बालेवाडी येथे सुरू असलेला खेळाडूंचा सराव पाहता नक्कीच महाराष्ट्र क्रमांक एक मिळवेल असा विश्वास वाटतो. देशात कोणत्याही राज्यापेक्षा महाराष्ट्राला सर्वाधिक क्रीडासुविधा दिल्या जातील.

क्रीडा राज्यमंत्री आदिती तटकरे- महाराष्ट्राचे खेळाडू प्रत्येक क्रीडा प्रकारात उत्तम कामगिरी करीत आहेत. यावर्षीदेखील महाराष्ट्र हॅटट्रीक करेल. गेल्या दोन-तीन वर्षांपासून शासन खेळाडूंना विशेष सुविधा देत आहे. यापूर्वी खेळाडूंना आपापल्या जिल्ह्यातून प्रवास करून स्पर्धेच्या ठिकाणी पोचावे लागत असे. त्यामुळे त्याचा कामगिरीवर परिणाम होत असे. परंतु, आता महाराष्ट्र सरकार आणि क्रीडा विभागाने खेळाडूंना प्रवासाचा त्रास होऊ नये म्हणून जाण्या-येण्यासाठी थेट विमान प्रवासाची सुविधा उपलब्ध करून दिली आहे.

मुलांचा संघ :

भरत भवर, प्रशांत नगरे, अमरसिंग कश्यप, पृथ्वीराज चव्हाण, वैभव रबडे, युवराज शिंदे, दादासाहेब पुजारी, पृथ्वीराज शिंदे, जयेश महाजन, श्रीपाद पाटील, सचिन म्हसरूफ, रोहन तुपारे.

मुलींचा संघ :

हरजीत कौर संधू, शिवरंजनी पाटील, आरती ससाणे, कोमल ससाणे, रिद्धी हडकर, हर्षदा पाटील, किरण तोडकर, मनिषा राठोड, निकिता लंगोटे, याशिका पुजारी, मुस्कान लोखंडे, ऋतुजा अवघडी.

The post छत्रपती शिवाजी महाराजांना अभिवादन करून महाराष्ट्राचा कबड्डी संघ हरियाणाकडे रवाना appeared first on थोडक्यात घडामोडी.

हरियाणा : काही दिवसांपूर्वी एक शिक्षिका अकरावीच्या एका विद्यार्थ्याबरोबर पळून गेली होती. त्यानंतर देशभर या प्रकरणावर बरीच चर्चा झाली होती. या प्रकरणानंतर विद्यार्थ्याच्या पालकांनी महिला शिक्षिकेविरूद्ध अपहरणाचा गुन्हा दाखल केला होता. त्यानुसार, पानिपत पोलिसांनी महिला शिक्षिकेला सायबर सेलच्या मदतीने अटक केली आहे.

मिळालेल्या माहितीनुसार, हरियाणामधील पानिपत येथील एक महिला शिक्षिका घरी एकटीच राहत होती. तिच्या घरी तिचा एक अल्पवयीन विद्यार्थी शिकवणीसाठी जात होता. यादरम्यान, ही शिक्षिका विद्यार्थ्याच्या प्रेमात पडली आणि मग ती या विद्यार्थ्याबरोबर पळून गेली होती. ही महिला त्या विद्यार्थ्याची वर्गशिक्षिका देखील आहे आणि ती एका खासगी शाळेत शिकवते. 29 मे रोजी दुपारी अडीच वाजण्याच्या सुमारास हा विद्यार्थी नेहमीप्रमाणे शिक्षकांच्या घरी गेला होता, अशी माहिती विद्यार्थ्यांच्या कुटुंबियांनी पोलिसांना दिली तेव्हा ही बाब उघडकीस आली.

पानीपतच्या देशराज कॉलनीतील एका खासगी शाळेत शिकवणारी ही शिक्षिका घटस्फोटित असून ती आपल्या माहेरीच राहत होती. हा अल्पवयीन विद्यार्थी गेली दोन वर्षे या शिक्षिकेच्या घरी शिकवणीसाठी जात होता. लॉकडाऊनमध्ये शाळा बंद होती, तेव्हा हा विद्यार्थी दररोज चार-चार तास शिकवणीसाठी शिक्षिकेच्या घरी जात होता. विद्यार्थ्याच्या वडिलांनी जिल्हा पोलिस ठाण्यात गुन्हा दाखल करताना सांगितले होते की त्यांचा मुलगा नेहमीप्रमाणे शिकवणीला गेला होता, पण परत घरी आला नाही. त्यानंतर ही शिक्षिका आणि विद्यार्थी दोघांचा मोबाईल देखील बंद होता.

विद्यार्थ्याच्या कुटुंबियांना मुलाबद्दल चिंता वाटत होती, त्यामुळे त्यांनी महिला शिक्षिकेच्या कुटुंबियांशी संपर्क साधला. तेव्हा या शिक्षिकेच्या वडिलांनी आपली मुलगी देखील बेपत्ता असल्याचे सांगितले. मग या विद्यार्थ्याच्या पालकांनी शिक्षिकेविरूद्ध अपहरणाचा गुन्हा दाखल केला. यानंतर पोलिस दल सक्रिय झाले. पोलिसांनी दोघांचा शोध सुरू केला होता, पानिपत पोलिसांनी शिक्षिकेला सायबर सेलच्या मदतीने अल्पवयीन मुलासह पकडले. पोलिसांनी दोघांची चौकशी सुरू केली आहे, तसेच या शिक्षिकेचे समुपदेशनही केले जाणार आहे.

The post अकरावीच्या अल्पवयीन विद्यार्थ्याबरोबर पळून गेलेल्या ‘त्या’ शिक्षिकेला अटक appeared first on थोडक्यात घडामोडी.

हरियाणा मधील गुरुग्राम येथे सेक्टर-56 मधील अलकनंदा अपार्टमेंटमध्ये एका महिलेला आपल्या १३ महिन्यांच्या बाळाला केअरटेकर कडे ठेवणं खूपच महागात पडलं आहे. 15 वर्षांच्या या अल्पवयीन केअरटेकरने बाळाला इतकं जोरात आपटलं की बाळाच्या चार बरगड्यांची हाडे मोडली. याव्यतिरिक्त बाळाला किडनी, यकृत आणि इतर अवयवांवर देखील दुखापत झाली आहे. हे बाळ सध्या व्हेंटिलेटरवर आहे.

मिळालेल्या माहितीनुसार, बाळाचे वडील निखिल भाटिया यांनी तक्रार दिली आहे. हे पती-पत्नी दोघेही कामावर जातात. त्यांना 13 महिन्यांची मुलगी जाएना भाटिया आहे. या जोडप्याने त्यांची कुक सबीना हिच्या माहितीतल्या एका 15 वर्षाच्या मुलीला बाळाच्या देखरेखीसाठी कामावर ठेवलं होतं. तिला 3 महिन्यांपूर्वी नोकरीवर घेण्यात आले होते आणि दरमहा 9 हजार रुपये दिले जात होते.

सोमवारी निखिल आणि त्याची पत्नी जसमीत खरेदी करण्यासाठी बाजारात गेले होते. त्यांनी आपल्या 13 महिन्यांच्या मुलीला झोपवलं आणि घरी केअरटेकर कडे सोडलं होतं. सुमारे एक तासानंतर जेव्हा ते परत आले तेव्हा त्यांचं बाळ जोरजोरात रडत होतं. त्यामुळे घाबरून त्यांनी तातडीने बाळाला जवळच्या हॉस्पिटलमध्ये नेले. तिथे बाळाची तपासणी केल्यानंतर डॉक्टरांनी बाळाची तब्येत खूप खराब असल्याचे सांगून बाळाला त्वरित आर्टिमिस हॉस्पिटलमध्ये घेऊन जाण्यास सांगितले. जेव्हा या जोडप्याने बाळाला आर्टिमिस रुग्णालयात नेले तेव्हा डॉक्टरांनी उपचार सुरू केले. डॉक्टरांनी सांगितले की मुलीच्या चार बरगड्यांची हाडे मोडली आहेत. तसेच, बाळाच्या किडनी, यकृत आणि इतर अवयवांना दुखापत झाली आहे. बाळ सध्या व्हेंटिलेटरवर आहे.

याप्रकरणी बुधवारी या केअरटेकर मुलीविरुद्ध खुनाचा प्रयत्न आणि प्राणघातक हल्ला केल्याच्या आरोपाखाली एफआयआर दाखल करण्यात आली आहे. या प्रकरणी बाळाच्या वडिलांविरूद्ध देखील अल्पवयीन मुलीला कामासाठी ठेवल्याचा गुन्हा दाखल करण्यात आला आहे. या अल्पवयीन केअरटेकरने बाल कल्याण समितीला सांगितले की ते बाळ रडत होतं, शांत होत नव्हतं म्हणून तिने बाळाला रागाच्या भरात आपटलं होतं. दरम्यान, तक्रारीनंतर पोलिसांनी अल्पवयीन मुलीला ताब्यात घेतलं. त्यासोबतच तिचे समुपदेशनही केले जात आहे.

The post केअरटेकरने बाळाला इतकं जोरात आपटलं की… बाळ सध्या व्हेंटिलेटरवर appeared first on थोडक्यात घडामोडी.

हरियाणाच्या नारनौल येथे एक मोठा रेल्वे अपघात झाला आहे. आज (१९ फेब्रुवारी) दुपारी रेल्वे अपघातात भिलवाराजवळ मालगाडी पलटली. या अपघातात सुमारे 39 डब्यांचे नुकसान झाले आहे. प्राथमिक माहितीनुसार, येथील रेल्वे ट्रॅकही तुटलेला आहे, परंतु अपघाताचे नक्की कारण अजून समजू शकलेले नाही. ही मालगाडी रेवाडी येथून फुलेराकडे जात होती,परंतु ती भिलवारा जवळील ट्रॅकवरून उतरून उलटली आहे.

रेल्वे अपघातामुळे सध्या या मार्गावरील गाड्यांची ये-जा थांबविण्यात आली आहे. मदतकार्य सुरू करण्यात आलं असून रेल्वे वाहतूक पथक व अन्य पथके घटनास्थळी दाखल झाली आहेत.

मिळालेल्या माहितीनुसार, मालगाडीमध्ये एकूण ९० कंटेनर होते. अपघातानंतर हे कंटेनर सुमारे 50 मीटर खाली पडले. त्याचवेळी रेल्वे ट्रॅकही उखडला आहे. माहिती मिळताच रेल्वेचे अधिकारी घटनास्थळी पोहोचले आणि तपास सुरू केला. मदतकार्य जलद गतीने सुरू आहे. सध्यातरी कोणत्याही जीवितहानीची नोंद झालेली नाही. जुन्या रेल्वे रुळावरून मालगाडी येत होती. या ट्रॅकवर प्रवासी गाड्याही प्रवास करतात. अशा परिस्थितीत रेल्वे प्रशासन रेल्वे लाइन दुरुस्त करून सेवा पूर्ववत करण्यात व्यस्त आहे.

The post ब्रेकिंग : नारनौल येथे मोठा रेल्वे अपघात, मालगाडी उलटून 39 डब्यांचे नुकसान appeared first on थोडक्यात घडामोडी.