नंदुरबार : आगामी गणेशोत्सव आणि ईद हे सण शांततेत व उत्साहात पार पाडण्यासाठी जिल्हा प्रशासनाने व्यापक तयारीची रूपरेषा आखली आहे. जिल्हाधिकारी कार्यालयाच्या सभागृहात भरलेल्या शांतता समितीच्या बैठकीत पालकमंत्री ॲड. माणिकराव कोकाटे यांनी सुरक्षितता आणि पायाभूत सुविधांबाबत स्पष्ट निर्देश दिले.

पालकमंत्र्यांनी सांगितले की, गणेशोत्सव विसर्जन मिरवणुकीच्या मार्गावर सीसीटीव्ही कॅमेरे बसविण्यासाठी स्वतंत्र 7 कोटी 50 लाखांची आर्थिक तरतूद केली आहे. याशिवाय, नागरिकांच्या जीवितास धोका ठरणाऱ्या लोंबकळणाऱ्या विद्युत तारांची तात्काळ दुरुस्ती करण्याचे आदेश वीज महावितरण कंपनीच्या अधिकाऱ्यांना देण्यात आले. “विसर्जन मार्ग सुरक्षित, प्रकाशमय आणि अडथळामुक्त ठेवणे ही प्रशासनाची प्राथमिक जबाबदारी आहे,” असे कोकाटे म्हणाले.

यावेळी पालकमंत्र्यांनी अंडरग्राउंड वीज तारा टाकण्यासाठी अंदाजपत्रक (Estimate) तयार करण्यासही सांगितले. पुढील काळात कार्यवाही जलद व्हावी यासाठी, गणेशोत्सवापूर्वी किमान दोन महिने आधी शांतता समितीची बैठक घेण्याची पद्धत राबवावी, अशीही सूचना त्यांनी केली. यामुळे समस्या ओळखणे, नियोजन आणि अंमलबजावणी यांना पर्याप्त वेळ मिळेल,असे त्यांनी स्पष्ट केले.

बैठकीस आमदार चंद्रकांत रघुवंशी, आमदार आमश्या पाडवी, आमदार राजेश पाडवी, जिल्हाधिकारी डॉ. मिताली सेठी, पोलीस अधीक्षक श्रवण दत्त एस, जिल्हा परिषदेचे मुख्य कार्यकारी अधिकारी नमन गोयल, सहाय्यक जिल्हाधिकारी अनय नावंदर, अंजली शर्मा, निवासी श्रीमती कल्पना ठुबे, उपजिल्हाधिकारी (प्रशासन) प्रमोद भामरे, डॉ. अभिजीत मोरे, शांतता समितीचे सदस्य व संबंधित विभागाचे प्रमुख, गणेश मंडळांचे पदाधिकारी य उपस्थित होते. शहरातील प्रमुख मुद्द्यांवर सदस्यांनी सूचना मांडल्या असून मांडलेल्या प्रत्येक सूचनेची अंमलबजावणी करण्याचे आश्वासन पालकमंत्र्यांनी दिले.

“गणेशोत्सव आणि ईद या दोन्ही सणांवर कोणतेही गालबोट लागू नये, हीच अपेक्षा. प्रशासन सर्वतोपरी मदत करेल; मात्र नागरिकांनीही सहकार्याची भूमिका ठेवणे तितकेच महत्त्वाचे आहे,” असे कोकाटे यांनी नमूद केले.

पालकमंत्री ॲड. कोकाटे म्हणाले की, गणेशोत्सव व ईद-ए-मिलाद हे दोन्ही सण एकत्र येत असून सर्व समाजबांधवांनी हे सण शांततेत पार पाडावेत. शांतता समितीच्या सर्व सदस्यांना ओळखपत्रांचे वाटप करण्यात येईल. गणेश विसर्जन मिरवणुकीदरम्यान कोणताही अनुचित प्रकार घडणार नाही याची दक्षता मंडळाच्या अध्यक्षांनी व पोलिस प्रशासनाने घ्यावी आणि नागरिकांनीही सहकार्य करावे. गणेश मंडळांनी सामान्य नागरिकांनी त्रास होणार नाही असेच देखावे सादर करावेत. अमली पदार्थ विरोधी तसेच समाजप्रबोधनपर देखावे सादर करण्यास प्राधान्य द्यावे, तर राजकीय देखावे सादर करू नयेत. राज्य शासन आपल्या पाठीशी खंबीरपणे उभे आहे, असेही त्यांनी स्पष्ट केले.

गणेश विसर्जन मिरवणुकीच्या मार्गावरील विद्युत प्रवाहाची दुरुस्ती करावी तसेच लोकप्रतिनिधी, प्रशासकीय अधिकारी आणि गणेश मंडळाचे अध्यक्ष यांनी समन्वयातून गणेश विसर्जन मिरवणूक शांततेत पार पाडावी, असेही त्यांनी सांगितले. तसेच, जिल्ह्यातील शहादा, नंदुरबार व गुजरातमधील काही गणेश मंडळांची मूर्ती विसर्जनासाठी सारंगखेडा व प्रकाशा नदीपात्रात आणली जाते. त्यामुळे तेथील दोन्ही पुलांच्या बाजूंची तात्पुरत्या स्वरूपात दुरुस्ती करावी, असेही निर्देश पालकमंत्री कोकाटे यांनी यावेळी दिले.

The post गणेशोत्सव विसर्जन मार्गावर सीसीटीव्ही बसविण्यासाठी ७ कोटींची तरतूद; लोंबकळणाऱ्या तारा दुरूस्तीसह तात्काळ भूमिगत करण्याच्या पालकमंत्र्यांच्या सूचना appeared first on थोडक्यात घडामोडी.

पुणे : प्रोग्रेसिव्ह एज्युकेशन सोसायटीच्या वतीने दिला जाणारा प्रतिष्ठित ‘गुरुवर्य शंकरराव कानिटकर पुरस्कार’ यंदा कीर्तनकार आणि समाजप्रबोधनकार ह.भ.प. श्री. निवृत्ती महाराज देशमुख (इंदोरीकर) यांना प्रदान करण्यात आला. छत्रपती शिवाजीनगर येथील मॉडर्न महाविद्यालयात आयोजित विशेष कार्यक्रमात विविध मान्यवरांच्या उपस्थितीत या पुरस्काराचे वितरण करण्यात आले.

निवृत्ती महाराज देशमुख यांनी आपल्या खास विनोदी आणि सडेतोड शैलीतून समाजप्रबोधन, लोकशिक्षण आणि वारकरी संप्रदायाचे महत्त्व जनमानसापर्यंत पोहोचवले आहे. शिक्षणशास्त्रातील पदवी मिळवल्यानंतर त्यांनी वडिलांकडून मिळालेली कीर्तन परंपरा समर्थपणे पुढे नेत, महाराष्ट्राच्या कानाकोपऱ्यात फिरून समाज जागवण्याचे महत्त्वपूर्ण कार्य केले आहे.

केवळ प्रबोधनापुरते न थांबता, त्यांनी सामाजिक कार्यातही आपला ठसा उमटवला आहे. गरजू, अनाथ व निराधार मुलांसाठी निवासी शाळा स्थापन करून त्यांचे शिक्षण व पालनपोषणाची जबाबदारी त्यांनी उचलली आहे. त्यांच्या या सामाजिक योगदानाची दखल घेत प्रोग्रेसिव्ह एज्युकेशन सोसायटीने त्यांचा सन्मान केला.

या कार्यक्रमाला सावित्रीबाई फुले पुणे विद्यापीठाचे प्रभारी कुलगुरू प्रा. डॉ. पराग काळकर, श्री विघ्नहरी देव महाराज, प्रा. गजानन एकबोटे (कार्याध्यक्ष, प्रोग्रेसिव्ह एज्युकेशन सोसायटी), डॉ. ज्योत्स्ना एकबोटे, निवेदिता एकबोटे, प्रा. शामकांत देशमुख, प्रा. सुरेश तोडकर यांच्यासह विविध क्षेत्रातील मान्यवर मोठ्या संख्येने उपस्थित होते.

कार्यक्रमात बोलताना मान्यवरांनी सांगितले की, “ह.भ.प. निवृत्ती महाराजांचे कार्य समाजासाठी दीपस्तंभासारखे आहे. त्यांच्या विचारांमुळे आणि कार्यामुळे नवीन पिढीला प्रेरणा मिळत आहे. समाजाच्या प्रत्येक थरात प्रबोधन पोहोचवण्याचा त्यांचा प्रयत्न हे आजच्या काळातील एक मार्गदर्शक उदाहरण आहे.”

या पुरस्काराने निवृत्ती महाराजांचे समाजासाठी दिलेले योगदान अधोरेखित झाले असून, त्यांच्या कार्याला मिळालेली ही मान्यता महाराष्ट्रातील सर्व प्रबोधनकारांसाठी प्रेरणादायी ठरेल, असा विश्वास यावेळी व्यक्त करण्यात आला.

The post ह.भ.प. निवृत्ती महाराज देशमुख (इंदोरीकर महाराज) यांना ‘गुरुवर्य शंकरराव कानिटकर पुरस्कार’ प्रदान appeared first on थोडक्यात घडामोडी.