पुणे : वानवडी परिसरात पोलीसांनी गांजा विक्री करणाऱ्या तरुणाला अटक करून मोठा मुद्देमाल जप्त केला आहे. वानवडी भागातील गंगा सॅटेलाईट सोसायटी ते नेताजीनगर रस्ता ह्या भागात वानवडी पोलीस ठाण्याचे कर्मचारी विठ्ठल चोरमोले आणि अमोल गायकवाड गस्त घालत होते. या दरम्यान, त्यांना माहिती मिळाली की तौफिक रझाक शेख (वय २६, रा. नवाजीश चौकाजवळ, मीठानगर, कोंढवा खुर्द) दुचाकीवरून गांजा विक्रीसाठी येत आहे.

माहिती मिळताच पोलिसांनी तत्काळ सापळा रचून आरोपीला पकडले. झडती घेतली असता त्याच्याकडे ८१० ग्रॅम गांजा आढळला. त्याच्याकडून गांजा, दुचाकी आणि मोबाइल असा अंदाजे ८० हजार रुपयांचा मुद्देमाल जप्त करण्यात आला. पोलीसांनी सांगितले की, शेखने गांजा कोणाकडून आणला आणि तो कोणाला विक्री करणार होता, ह्या बाबत तपास सुरू आहे.

पोलीस उपायुक्त डॉ. राजकुमार शिंदे व सहायक आयुक्त धन्यकुमार गोडसे यांच्या मार्गदर्शनाखाली ह्या कारवाईत वरिष्ठ पोलीस निरीक्षक विजयकुमार डोके, सहायक निरीक्षक उमाकांत महाडिक, तसेच पोलीस कर्मचारी दया शेगर, महेश गाढवे, अमोल पिलाणे, अतुल गायकवाड, विठ्ठल चोरमोले, विष्णू सुतार आणि अमोल गायकवाड यांनी महत्त्वाची भूमिका बजावली.

पोलीस पुढील तपास करत आहेत. पोलीसांनी सांगितले की, या प्रकरणात आणखी व्यक्तींचा सहभाग असल्याची शक्यता आहे आणि त्यांनी तपास सुरू ठेवला आहे. ह्या प्रकारामुळे वानवडी परिसरात पोलीस सुरक्षा व प्रतिबंधात्मक उपाययोजनांवर लक्ष केंद्रित करण्यात येत आहे. याशिवाय, गांजा आणि इतर प्रतिबंधित पदार्थांच्या विक्रीवर नियंत्रण ठेवण्यासाठी पोलीस विभाग सतत गस्त घालत असून कारवाई करत आहे.

The post पुणे : गांजा विक्री करणाऱ्या तरुणाला अटक, ८० हजाराचा मुद्देमाल जप्त appeared first on थोडक्यात घडामोडी.

पुणे : ८५ वर्षीय ज्येष्ठ नागरिकाचा जलतरण तलावात बुडून मृत्यू झाल्याची घटना समोर आली आहे. सूचित घास असे मृत व्यक्तीचे नाव आहे. ही घटना वानवडीमध्ये बुधवारी (५ मार्च) सकाळी आठच्या सुमारास सेक्रेड हार्ट टाऊन सोसायटीमधील जलतरण तलावात घडली.

मिळालेल्या माहितीनुसार, सूचित घास हे सेक्रेड हार्ट टाऊन सोसायटीमध्ये राहत होते. बुधवारी सकाळी ८ वाजता एका तरुणीने तलावात कोणीतरी बुडालेलं असल्याचं पाहिलं. तिने तात्काळ सोसायटीच्या सुरक्षारक्षकांना आणि इतर रहिवाशांना त्याबाबत सूचित केले. रहिवाशांनी तत्काळ सूचित घास यांना तलावातून बाहेर काढले आणि नजिकच्या खासगी रुग्णालयात दाखल केले. मात्र, रुग्णालयात दाखल केल्यानंतर डॉक्टरांनी त्यांना मृत घोषित केले. या घटनेवेळी तलावाच्या आसपास कोणीही जीवरक्षक उपस्थित नव्हता, आणि तलाव परिसरात सीसीटीव्ही कॅमेरे देखील नव्हते. त्यामुळे बुडूनच त्यांचा मृत्यू झाला की इतर कारणांमुळे ते बेशुद्ध पडले होते, याबाबत स्पष्टता नाही. शवविच्छेदनाची प्रक्रिया पूर्ण झाल्यानंतरच त्यांचा मृत्यू होण्याचे कारण समजेल, असे पोलिसांनी सांगितले.

पोलिसांनी या प्रकरणी पुढील तपास सुरू केला आहे. मात्र, ही घटना दर्शवते की जलतरण तलावासारख्या सार्वजनिक ठिकाणी जीवरक्षकाची आणि देखरेखीची तसेच सीसीटीव्ही कॅमेरे असण्याची आवश्यकता आहे. जेणेकरून असुरक्षिततेच्या परिस्थितीमध्ये तात्काळ मदत मिळू शकेल. सुरक्षा आणि उपाययोजना अधिक कडक करण्याची गरज आहे, जेणेकरून अशा घटनांना प्रतिबंध केला जाऊ शकेल.

The post पुणे : जलतरण तलावात बुडून ८५ वर्षीय ज्येष्ठ नागरिकाचा दुर्दैवी मृत्यू appeared first on थोडक्यात घडामोडी.

पुणे : पुणे शहरातील वानवडी परिसरात ज्येष्ठ दाम्पत्याकडे काम करणाऱ्या महिलेने २४ लाख ८८ हजार रुपयांचा ऐवज तिजोरीसकट चोरून नेल्याची घटना घडली आहे. याप्रकरणी वानवडी पोलीस ठाण्यात गुन्हा दाखल करण्यात आला आहे. याबाबत ७६ वर्षीय ज्येष्ठ नागरिकाने तक्रार दिली आहे. त्यानुसार या महिलेच्या विरोधात चोरीचा गुन्हा दाखल करण्यात आला आहे.

पोलिसांनी दिलेल्या माहितीनुसार, तक्रारदार व त्यांची पत्नी हे ज्येष्ठ दाम्पत्य वानवडीतील बोराडेनगर परिसरातील गुलमोहर सोसायटीत राहतात. तक्रारदार परदेशात नोकरी करत होते. सेवानिवृत्तीनंतर ते पुण्यात राहायला आले आहेत. त्यांचा मुलगा दुबई येथे नोकरी करतो. दोन मुली अमेरिकेत आहेत, तर तिसरी मुलगी कोंढव्यात राहते. घरात पती-पत्नी दोघेच राहतात. या दाम्पत्याला घरकाम करण्यासाठी मोलकरीण हवी होती. दरम्यान, त्यांच्या परिचयातील व्यक्तीने त्यांना या महिलेचे नाव सूचवले.

ही महिला २७ जुलै रोजी त्यांच्याकडे काम मागण्यासाठी आली होती. दोन दिवस काम पाहिल्यानंतर त्यांनी तिला कामावर ठेऊन घेतले. त्यानंतर त्यांनी ओळखीचा पुरावा म्हणून तिच्याकडे आधारकार्ड मागितले होते. पण कामाच्या गडबडीत घरी विसरले, असे सांगून तिने वेळ मारून नेली. त्यानंतर दोन दिवस तिने व्यवस्थित काम केले. पण तिसऱ्या दिवशी ती कामावर आलीच नाही. ज्या व्यक्तीने या महिलेचे नाव सुचवले होते, त्यांनी देखील तिचा पत्ता किंवा फोन नंबर नसल्याचे सांगितले. या महिलेने घरात काम करताना संपूर्ण वेळ मास्क वापरल्याने तिचा चेहरा या दाम्पत्याने पाहिलाच नव्हता.

तक्रारदार दाम्पत्याला संशय आल्यामुळे त्यांनी कपाटात ठेवलेली तिजोरी पाहिली. तर तिथे तिजोरी आढळली नाही. चोरीला गेलेल्या तिजोरीला बायोमेट्रिक लॉक आहे. तिजोरीत ५३२ ग्रॅम वजनाचे सोन्याचे दागिने, ५५ हजार रुपये रोख, ५०० अमेरिकन डॉलर, चार हजार दुबई दिनार व १० हजार रुपयांची तिजोरी असा २४ लाख ८८ हजार ५०० रुपयांचा ऐवज चोरीला गेला आहे. याप्रकरणी पोलिसांनी गुन्हा दाखल केला असून वरिष्ठ पोलीस निरीक्षक दीपक लगड यांच्या मार्गदर्शनाखाली सहायक पोलीस निरीक्षक जयवंत जाधव हे अधिक तपास करीत आहेत.

The post घरकाम करायला आली आणि तिजोरीच चोरून घेऊन गेली, मास्क वापरल्याने तिचा चेहरा पाहिलाच नाही.. appeared first on थोडक्यात घडामोडी.

पुणे : पुण्यातील एका डॉक्टर दाम्पत्याने आत्महत्या केल्यामुळे खळबळ उडाली आहे. पुण्यातल्या वानवडी येथील आझादनगरमध्ये ही धक्कादायक घटना घडली आहे. डॉ. अंकिता शेंडकर (वय 26) आणि डॉ. निखिल शेंडकर (वय 28) अशी मृत डॉक्टरांची नावे आहेत.

मिळालेल्या माहितीनुसार, अंकिता आणि निखिल हे दोघेही आझाद नगरमध्ये राहत होते. दोघेही वेगवेगळ्या ठिकाणी प्रॅक्टिस करत होते. अंकिताचे क्लिनिक गल्ली क्रमांक 2, आझाद नगर येथे होते तर निखिल दुसरीकडे प्रॅक्टिस करत होता. काल रात्री घरी परतत असताना या दोघांचे फोनवर भांडण झाले होते. त्यानंतर रात्री आठच्या सुमारास जेव्हा निखिल घरी पोहोचला, तेव्हा अंकिताने गळफास लावून आत्महत्या केली होती. तिने बेडरूममध्ये गळफास घेऊन जीवन संपवलं होतं.

अंकिताला तातडीने रुग्णालयात नेले असता डॉक्टरांनी तिला मृत घोषित केले. त्यानंतर पोलिसांनी मृतदेह शवविच्छेदनासाठी पाठविला. शवविच्छेदनानंतर अंकिताचा मृतदेह तिच्या भावाच्या ताब्यात देण्यात आला. मात्र, पत्नीच्या आत्महत्येचा धक्का सहन न झाल्यामुळे निखिलने गुरुवारी सकाळी सातच्या सुमारास गळफास घेऊन आत्महत्या केली, अशी माहिती वानवडी पोलिसांनी दिली. पोलीस या प्रकरणी अधिक तपास करत आहेत.

The post पुण्यात डॉक्टर दाम्पत्याच्या आत्महत्येने खळबळ appeared first on थोडक्यात घडामोडी.