मुंबई : विस्तारित महात्मा ज्योतिराव फुले जन आरोग्य योजना व आयुष्मान भारत प्रधानमंत्री जन आरोग्य योजनेंतर्गत रुग्णांच्या दाव्यापोटी मिळणाऱ्या रक्कमेचा विनियोग राज्य आरोग्य हमी सोसायटीच्या राखीव निधीसाठी तसेच शासकीय रुग्णालयांच्या सक्षमीकरणासाठी केला जाणार आहे. तसेच गरजू रुग्णांसाठी ५ लाखांपेक्षा जास्त खर्च असणाऱ्या नऊ प्रकारच्या दुर्मिळ आजारांवरील खर्च राखीव निधीतून केला जाणार आहे. याबाबातच्या प्रस्तावाला मंत्रिमंडळ बैठकीत मान्यता देण्यात आली. बैठकीच्या अध्यक्षस्थानी मुख्यमंत्री देवेंद्र फडणवीस होते.

महात्मा ज्योतिराव फुले जन आरोग्य योजना व आयुष्मान भारत प्रधानमंत्री जन आरोग्य योजनेंतर्गत शासकीय रुग्णालयांना, आरोग्य संस्थांना राज्य आरोग्य हमी सोसायटीकडून निधी दिला जातो. या निधीच्या वापराबाबत ११ जानेवारी २०१९ मध्ये देण्यात आलेल्या मार्गदर्शक सूचनांमध्ये सुधारणा करण्यात आली असून, यात सोसायटीकडून मिळणाऱ्या निधीपैकी २० टक्के रक्कम राखीव निधीसाठी जाणार आहे. तर उर्वरित ८० टक्के रक्कम संबंधित रुग्णालयांना दिली जाणार आहे. या ८० टक्के निधीतून रुग्णालयांना पायाभूत सुविधा उभारण्यासाठी १९ टक्के, रुग्णालयातील किरकोळ सामग्री व औषधांसाठी ४०%, अधिकारी व कर्मचाऱ्यांना प्रोत्साहन भत्त्यांसाठी २० टक्के तर कार्यक्रम साहाय्य माहिती व प्रचार प्रसिद्धीसाठी १ टक्के असा वापर करता येणार आहे.

विस्तारीत योजनेमध्ये आरोग्य संरक्षणाची मर्यादा प्रति कुटुंब प्रति व्यक्ती पाच लाख रुपये इतकी आहे. मात्र या योजनेंतर्गत यकृत, अस्थिमज्जा, हृदय, फुफ्फुस इ. प्रत्यारोपणासारख्या ५ लाख रुपयांपेक्षा जास्त खर्च होणाऱ्या दुर्मिळ आजारांवरील उपचारांसाठी आरोग्य संरक्षण उपलब्ध नाही. त्यामुळे या आजारांसाठी उपचार घेणाऱ्या गरीब व गरजू रुग्णांना या योजनेचा लाभ घेता येत नव्हता. मात्र अशा नऊ आजारांसाठी राज्य आरोग्य हमी सोसायटीकडे निर्माण होणाऱ्या राखीव निधीतून खर्च केला जाणार आहे.

यामध्ये हृदय प्रत्यारोपणासाठी १५ लाख, फुफ्फुस प्रत्यारोपण २० लाख, हृदय व फुफ्फुस प्रत्यारोपण २० लाख, यकृत प्रत्यारोपण २२ लाख, अस्थिमज्जा प्रत्यारोपण (अलोजेनिक) ९.५ लाख, अस्थिमज्जा प्रत्यारोपण (अनरिलेटेड) १७ लाख, अस्थिमज्जा प्रत्यारोपण (हॅप्लो) १७ लाख, ट्रान्स कॅथेटर एऑर्टिक व्हॉल्व इम्प्लांटेशन (TAVI) १० लाख तर ट्रान्स कॅथेटर एऑर्टिक व्हॉल्व रिप्लेसमेंट (TMVR) १० लाख रुपये असा खर्च प्रती रुग्ण करता येणार आहे.

या योजनेतंर्गत उपचार प्रक्रियेत सहभागी सार्वजनिक आरोग्य विभाग, वैद्यकीय शिक्षण व औषधी द्रव्ये विभाग व नगर विकास विभागाच्या शासकीय आरोग्य संस्थांमधील डॉक्टर्स व कर्मचारी यांच्या प्रोत्साहन भत्त्यात सुधारणा करण्यात येणार आहे. त्यासाठी प्रोत्साहन भत्त्याबाबतच्या ११ जानेवारी, २०१९ रोजीच्या शासन निर्णयातील भत्त्याच्या मर्यादेची अट शिथील करण्यासही मंत्रिमंडळाने मंजुरी दिली आहे.

या योजनांतर्गत करण्यात येणाऱ्या शस्त्रक्रिया, उपचार व त्यांच्या दरांमध्ये बदल करणे, मिळणाऱ्या शासकीय निधीचा तसेच राखीव निधीच्या विनियोगाबाबत कार्यपद्धती निश्चित करण्यासाठी सार्वजनिक आरोग्य विभागाचे सचिव यांच्या अध्यक्षतेखाली विशेष उपचार सहायता व सक्षमीकरण समितीचे गठन करण्यासही मंत्रिमंडळ बैठकीमध्ये मान्यता देण्यात आली आहे.

The post पाच लाख रुपयांहून अधिक खर्चाच्या दुर्धर नऊ आजारांवरील उपचारांसाठी रुग्णांना निधी मिळणार appeared first on थोडक्यात घडामोडी.

बेंगळुरू : बेंगळुरूमध्ये रहदारी ही एक प्रमुख चिंता आहे, ज्यामुळे प्रत्येकाच्या दैनंदिन कामावर विपरित परिणाम होत आहे. याचा अनुभव मणिपाल हॉस्पिटल सर्जापूर येथील गॅस्ट्रोएन्टेरोलॉजी सर्जन डॉ. गोविंद नंदकुमार यांनी घेतला. 30 ऑगस्ट 2022 रोजी सकाळी 10 वाजता एका मध्यमवयीन महिलेवर पित्ताशयाची इमर्जन्सी लॅप्रोस्कोपिक शस्त्रक्रिया करायची होती. रुग्णासाठी जीवन-मरणाचा प्रश्न होता. पण सर्जापूर – मराठहळ्ळी भागात डॉ. गोविंद ट्रॅफिकमध्ये अडकले. त्यानंतर डॉक्टरांनी आपली कार ड्रायव्हरसोबत सोडली आणि 3 किमी अंतरावर असलेल्या हॉस्पिटलमध्ये धावत जाऊन महत्त्वपूर्ण शस्त्रक्रिया केली. शस्त्रक्रिया व्यवस्थित पार पडली आणि रुग्णाला वेळेवर घरी सोडण्यात आले.

डॉ. गोविंद नंदकुमार याबद्दल म्हणाले कि, “मी दररोज मध्य बंगळुरू ते बंगळुरूच्या आग्नेय भागात सर्जापूर येथे असलेले मणिपाल हॉस्पिटल असा प्रवास करतो. शस्त्रक्रियेसाठी मी घरून वेळेत निघालो होतो. माझी टीम तयार होती आणि सर्व तयारी झालेली होती. हॉस्पिटलमध्ये पोहोचताच शस्त्रक्रिया करायची होती. मात्र, रस्त्यामध्ये प्रचंड ट्राफिक होते. ती रहदारी बघून मी गाडी ड्रायव्हरसोबत सोडण्याचा निर्णय घेतला आणि पुन्हा विचार न करता हॉस्पिटलच्या दिशेने पळत सुटलो.

डॉ. गोविंद मंगळवार 30 ऑगस्ट रोजी दीर्घकाळापासून पित्ताशयाच्या आजाराने त्रस्त असलेल्या मध्यमवयीन महिलेवर लॅप्रोस्कोपिक पित्ताशय शस्त्रक्रिया करण्यास तयार होते. शस्त्रक्रियेला उशीर झाल्यामुळे रुग्णाच्या ओटीपोटात तीव्र वेदना होत होत्या. रुग्णाला भूल देण्याच्या तयारीत असलेली डॉ. गोविंद यांची टीम डॉक्टर ऑपरेशन थिएटरमध्ये पोहोचताच कामाला लागली. कोणताही विलंब न करता डॉक्टर शस्त्रक्रिया करण्यासाठी सर्जिकल पोशाखात उतरले आणि शस्त्रक्रिया यशस्वीरित्या पार पडली. रुग्णाला नियोजित वेळेत डिस्चार्ज देण्यात आला असून सध्या तिची प्रकृती ठीक आहे.

The post रुग्णावर शस्त्रक्रिया करण्यासाठी डॉक्टर 3 किमी धावत गेले, रुग्णासाठी होता जीवन-मरणाचा प्रश्न appeared first on थोडक्यात घडामोडी.

नागपूर : नागपूर येथेही आता ओमिक्रॉन व्हेरियंटचा संसर्ग झालेला रुग्ण आढळला आहे. नागपूर महानगर पालिका आयुक्त राधाकृष्ण गमे यांनी याबाबतची माहिती दिली आहे.

ओमिक्रॉनच्या पार्श्वभूमीवर राज्यात परदेशातून येणाऱ्या प्रवाशांसाठी नियम कठोर करण्यात आले आहेत. आरोग्य विभागाकडून व प्रशासनाकडून योग्य ती खबरदारी घेऊनसुद्धा ओमिक्रॉन व्हेरियंटचे रुग्ण राज्यात आढळत आहेत. त्यातच आता नागपूर येथेही ओमिक्रॉन व्हेरियंटचा रुग्ण आढळल्याने आरोग्य प्रशासनाची चिंता वाढली आहे.

नागपूर महानगरपालिकेचे आयुक्त राधाकृष्णन गमे यांनी पीटीआय या वृत्तसंस्थेशी बोलताना माहिती दिली की, नागपूरमधील रहिवासी असलेली ४० वर्षीय व्यक्ती पश्चिम आफ्रिकेतून आठ दिवसांपूर्वी परतली होती. चार डिसेंबर रोजी या व्यक्तीचे नागपूर विमानतळावर नमुने घेतले होते. त्याची कोविड-19 चाचणी पॉझिटिव्ह आली. नंतर त्याला शहरातील रुग्णालयात दाखल करण्यात आले होते आणि त्याचे नमुने जीनोम सिक्वेन्सिंगसाठी पाठवण्यात आले होते. आज आलेल्या अहवालाने त्याला ओमिक्रॉन प्रकाराची लागण झाल्याची पुष्टी केली आहे. या रुग्णाची प्रकृती स्थिर असून तो रुग्णालयात उपचार घेत आहे.

रुग्णाच्या कुटुंबातील इतर सदस्य निगेटिव्ह आले आहेत. त्यांनाही विलगीकरणात ठेवण्यात आलं आहे. चार डिसेंबर रोजी या व्यक्तीचे नागपूर विमानतळावर नमुने घेतले होते. यामध्ये तो कोरोनाबाधित असल्याचे स्पष्ट झाले होते. जनुकीय चाचणीत त्याला ओमिक्रॉन असल्याचे निदान झाले आहे. आता राज्यात ओमिक्रॉन व्हेरियंटमुळे चिंता वाढत आहे.

The post नागपुरातही आढळला ओमिक्रॉन व्हेरियंटचा रुग्ण, आरोग्य प्रशासनाची चिंता वाढली appeared first on थोडक्यात घडामोडी.