पुणे : महाराष्ट्र राज्याचे राज्यपाल भगतसिंह कोश्यारी नुकतेच पुण्यात आले होते. यावेळी डॉ. सोमनाथ गिते यांनी त्यांची भेट घेतली आणि व्यसनमुक्ती या विषयावर चर्चा केली. राज्यपालांनी डॉ. सोमनाथ गिते यांच्या कार्याचे कौतुक केले व प्रशंसापत्र दिले. तसेच व्यसनमुक्तीचे कार्य आवश्यक असून हे कार्य असेच सुरु ठेवा, व्यसनमुक्त समाज घडवण्यासाठी तुमच्या कार्याचा नक्की फायदा होईल, असेही म्हणाले. काहीही गरज भासल्यास मदत करण्याचे आश्वासन देखील त्यांनी दिले.

डॉ. सोमनाथ गिते यांनी मागील काही काळापासून व्यसनमुक्तीवर सातत्याने लिखाण केले असून यामधून त्यांनी तंबाखू, सिगारेट, दारूसारख्या व्यसनाधीनतेतून समाजाचे झालेले नुकसान आणि सद्यस्थिती मांडण्याचा प्रयत्न केला. काही महिन्यांपूर्वी राज्यपाल कोश्यारी यांनी गिते यांना पत्र पाठवत त्यांच्या कार्याची दखल घेतली होती, त्यानंतर आज झालेल्या भेटीत यावर विस्तृत चर्चा झाली. राज्यपालांनी यावेळी कौतुकाची थाप देत समाजासाठी चांगले काम करत असल्याचे म्हटले.

डॉ. सोमनाथ गिते यांच्या याच कामाचे कौतुक करत राज्यपालांनी प्रशंसापत्रात म्हटले आहे कि, समाजामध्ये व्यसनाचे भीषण परिणाम दिसत आहेत. व्यसनाचे दुष्परिणाम एकट्या व्यक्तीला नाही तर, संपूर्ण कुटुंबाला भोगावे लागतात. व्यसनी व्यक्तीच्या समुपदेशनाबरोबरच शाळा, महाविद्यालयांत जाऊन व्यसनमुक्तीबदल जनजागृती करतात. मी त्याच्या या समर्पित कार्याबद्दल त्याचे अभिनंदन करतो आणि त्यांना त्यांच्या भविष्यातील प्रयत्नांमध्ये यश मिळावे अशा शुभेच्छा देतो.

डॉ. सोमनाथ गिते म्हणाले कि, माननीय राज्यपाल भगतसिंह कोश्यारी यांनी माझ्या कामाचे कौतुक करून मला प्रशंसापत्र दिले, हे माझ्यासाठी तसेच माझ्यासारख्या अनेक व्यसनमुक्ती कार्यकर्त्यांसाठी अभिमानाचे आहे. आज माननीय राज्यपाल भगतसिंह कोश्यारी यांच्याबरोबर व्यसनमुक्ती या विषयावर विस्तृत चर्चा झाली, तसेच त्यांना कामाचा अहवाल सादर केला. मला पुरस्कार मिळाल्याबद्ल त्यांनी माझे अभिनंदन केले. पुढील कार्यास शुभेच्छा दिल्या व गरज भासल्यास मदत करण्याचे आश्वासन दिले. यामुळे व्यसनमुक्तीचे कार्य करण्यास प्रोत्साहन मिळाले.

सामाजिक क्षेत्रातील भरीव योगदानाची आणि या क्षेत्रातील केलेल्या अभ्यासाची दखल घेत विश्वकर्मा युनिव्हर्सिटी फॉर सेल्फ एम्प्लॉयमेंटकडून मला डॉक्टरेट पदवी देऊन गौरिवण्यात आले आहे. तसेच राज्यपाल भगतसिंग कोश्यारी आणि जेष्ठ समाजसेवक डॉ. प्रकाश बाबा आमटे, राष्ट्रवादी काँग्रेस पार्टीचे अध्यक्ष शरद पवार, डॉ. मुक्ता पुणतांबेकर, महसूलमंत्री बाळासाहेब थोरात, खासदार सुप्रिया सुळे, आमदार मुक्ता टिळक, आमदार भीमराव तापकीर, राष्ट्रवादीचे नगरसेवक युवराज बेलदरे, वर्षा विद्या विलास यांच्यासह अनेक राजकीय, सामाजिक, शैक्षणिक, वैद्यकीय अशा विविध क्षेत्रातील मान्यवरांनी त्यांच्या कार्याचे कौतुक केले आहे.

गिते यांना मिळालेले पुरस्कार : 

1. व्यसनमुक्ती गौरव पुरस्कार २०२२ (सामाजिक न्याय व विशेष सहाय्य विभाग व यश मेडिकल फाऊंडेशन)
2. राष्ट्रपिता महात्मा गांधी व्यसनमुक्ती सेवा पुरस्कार २०२२ (व्यसनमुक्ती परिषद)
3. राज्यस्तरीय आदर्श कार्य गौरव समाजरत्न पुरस्कार २०२२
4. राज्यस्तरीय व्यसनमुक्ती सेवादूत पुरस्कार २०२2
5. डॉक्टरेट पदवी (DOCTORATE IN DE-ADDICTION STUDY AND INNOVATION)

The post व्यसनमुक्तीवरील तुमच्या कार्याचा व्यसनमुक्त समाज घडवण्यासाठी नक्की फायदा होईल, डॉ. सोमनाथ गिते यांचे राज्यपालांकडून कौतुक appeared first on थोडक्यात घडामोडी.

मुंबई : महाविकास आघाडीच्या आमदारांनी विधानसभेच्या बाहेर गुरुवारी राज्यपाल भगतसिंग कोश्यारी यांच्याविरोधात जोरदार निदर्शने केली. राज्यपालांनी छत्रपती शिवाजी महाराजांविरोधात वादग्रस्त वक्तव्य केल्याचा आरोप आमदारांनी केला आहे. एएनआय या वृत्तसंस्थेनेही निदर्शनाचा व्हिडिओ शेअर केला आहे. यामध्ये आमदार राज्यपालांच्या विरोधात घोषणाबाजी करताना दिसले.

राज्य विधिमंडळाच्या अर्थसंकल्पीय अधिवेशनाचा पहिला दिवस वादळी ठरला. अधिवेशनाची सुरुवात प्रथेप्रमाणे राज्यपाल किंवा राष्ट्रपतींच्या अभिभाषणाने होते. त्यानुसार राज्यपाल भगतसिंह कोश्यारी गुरुवारी अभिभाषणासाठी विधिमंडळात आले होते. मात्र, भाषण वाचायला सुरुवात केल्यानंतर अवघ्या २२ सेकंदात राज्यपाल भाषण अर्धवट टाकून आल्या पावली माघारी परतले. राज्यपालांच्या अभिभाषणात छत्रपती शिवाजी महाराजांचा उल्लेख आल्यानंतर महाविकासआघाडीच्या आमदारांनी घोषणाबाजी करायला सुरुवात केली. त्यामुळेच राज्यपाल भाषण पूर्ण न करताच निघून गेले, अशी चर्चा सुरु आहे.

राष्ट्रवादीच्या आमदारांनी आंदोलनात ठिय्या मांडला
निदर्शनादरम्यान राष्ट्रवादीचे आमदार संजय दौंड डोक्यावर उभे राहिले. घोषणाबाजीच्या गडबडीत दौंड पायऱ्यांवरून उतरून शीर्षासन करू लागले. दुसरीकडे शिवसेना नेते मनीष कायंदे यांनी राज्यपालांवर निशाणा साधत ते काय संदर्भ देत आहेत? त्यांना हे सांगायची गरज नव्हती. मला वाटते की ते भाजपसोबत आहेत आणि त्यांनी अधिवेशनाच्या मध्यावर हा वाद उभा केला आहे.

#WATCH | Maha Vikas Aghadi (MVA) MLAs shout slogans and protest against Governor Bhagat Singh Koshyari over his alleged controversial remarks over Chhatrapati Shivaji Maharaj.

NCP MLA Sanjay Daund did a ‘sheershasan’ in protest. pic.twitter.com/txeSgZCNgC

— ANI (@ANI) March 3, 2022

सभागृहात नेमकं काय घडलं?

राज्यपाल कोश्यारी यांनी आपल्या भाषणाला सुरुवात केली. २०२२ वर्षातील राज्य विधानमंडळाच्या पहिल्या अधिवेशात मी तुमचं स्वागत करतो, असे राज्यपालांनी म्हटले. त्यानंतर राज्यपालांनी माझे शासन छत्रपती शिवाजी महाराज, महात्मा फुले यांच्या आशीर्वादाने, असे शब्द उच्चारताच महाविकासआघाडीच्या आमदारांनी घोषणा देत गोंधळ घालायला सुरुवात केली. त्यानंतर राज्यपाल भगतसिंह कोश्यारी यांनी अनपेक्षितपणे आपले भाषण आवरते घेतले आणि त्यानंतर सभागृहातून काढता पाय घेतला.

The post अधिवेशनाचा पहिलाच दिवस वादळी, राज्यपाल भगतसिंह कोश्यारी यांच्या विरोधात घोषणाबाजी आणि… appeared first on थोडक्यात घडामोडी.

मुबई : केवळ शारीरिक आरोग्य उत्तम असणे पुरेसे नाही. मानसिक आरोग्य तितकेच, किंबहुना अधिक महत्त्वाचे आहे. कोरोना काळात अनेक लोकांना शारिरीक व्याधींसोबतच मानसिक समस्यांचा देखील सामना करावा लागला. कोरोना आला आणि जाईल देखील, परंतु मानसिक आरोग्य जपणे आवश्यक असून डॉक्टरांनी रुग्णांना आत्मविश्वास व नवी उमेद देण्यासाठी विशेषत्वाने प्रयत्न करावे, असे आवाहन राज्यपाल भगतसिंह कोश्यारी यांनी आज येथे केले.

जागतिक मानसिक आरोग्य दिनाचे औचित्य साधून आज रविवारी (दि. 10) राज्यपालांच्या हस्ते विविध क्षेत्रातील नामवंत वैद्यकीय तज्‍ज्ञ व डॉक्टरांचा राजभवन येथे सत्कार करण्यात आला, त्यावेळी ते बोलत होते. लोढा फाऊंडेशन व लोढा लग्झरीतर्फे कार्यक्रमाचे आयोजन करण्यात आले होते.

मानसिक आरोग्याचे महत्त्व सांगताना राज्यपालांनी महाभारत व गीतेचा दाखला दिला. भगवदगीता ही अर्जुन विषादयोगापासून सुरु होते. विषाद म्हणजे डिप्रेशन. भगवान कृष्णांनी अर्जुनाला विषादातून बाहेर काढून युद्ध करण्यास सज्ज होईल इतके समुपदेशन केले असे सांगून डॉक्टरांनी शास्त्रांमधील मानसिक स्वास्थ्याची उदाहरणे देखील तपासावी; त्यातून त्यांना नवनवे दृष्टीकोन मिळतील, असे राज्यपालांनी सांगितले. कार्यक्रमाच्या सुरुवातीला आयरा लोढा या मुलीने मानसिक आरोग्य या विषयावर तयार केलेले ‘व्हाट आर यू वेटिंग फॉर’ हे गीत सादर केले.

राज्यपालांच्या हस्ते मानसोपचार तज्‍ज्ञ डॉ. झिराक मार्कर, डॉ. झरीर उदवाडीया, डॉ. शशांक जोशी, डॉ. मुझफ्फल लकडावाला, डॉ. चेतन भट, डॉ. अब्दुल अन्सारी, डॉ. गौतम भन्साळी, डॉ. पंकज पारेख, डॉ. मनोज मश्रू, डॉ. अंजली छाब्रिया, डॉ. मिलिंद कीर्तने यांसह 40 डॉक्टर्स व तज्‍ज्ञांचा सत्कार या वेळी करण्यात आला. कार्यक्रमाला आमदार मंगल प्रभात लोढा व लोढा रिअलिटीचे मुख्याधिकारी अभिषेक लोढा उपस्थित होते.

The post शारीरिक आरोग्याइतकेच मानसिक आरोग्य महत्त्वाचे – राज्यपाल भगतसिंह कोश्यारी appeared first on थोडक्यात घडामोडी.

रिपब्लिक वाहिनीचे मुख्य संपादक अर्णब गोस्वामी यांना अन्वय नाईक यांच्या आत्महत्येप्रकरणी अटक करण्यात आली आहे. यामुळे पुन्हा एकदा अन्वय नाईक प्रकरण चर्चेत आलं आहे. दरम्यान, सोशल मीडियावर अन्वय नाईक यांच्या कुटुंबीयांचा राष्ट्रवादी काँग्रेसचे अध्यक्ष शरद पवार यांच्यासोबतचा एक फोटो व्हायरल होत आहे. आता यावर स्वत: शरद पवार यांनी खुलासा केला आहे. त्यांनी पुण्यात पत्रकारांशी संवाद साधला.

सोशल मीडियावर फिरत असलेला तो फोटो पाच वर्ष जुना असल्याचं शरद पवार यांनी सांगितलं आहे. तसेच राज्यपाल भगतसिंह कोश्यारी यांनी राज्याचे गृहमंत्री अनिल देशमुख यांच्याशी दूरध्वनीवरून चर्चा करून रिपब्लिक मीडिया नेटवर्कचे मुख्य संपादक अर्णब गोस्वामी यांच्या सुरक्षा व आरोग्याबाबत चिंता व्यक्त केली. त्याबद्दल बोलताना ते म्हणाले कि, “राज्यपालांनी अर्णब गोस्वामी यांच्याबद्दल चिंता व्यक्त केली. हे चांगले आहे. पण मला वाटतं की, ज्यांच्या घरात दोन आत्महत्या झाल्या आहेत. त्यांच्याबद्दल देखील राज्यपालांनी चिंता व्यक्त केली असती तर चांगलं वाटलं असतं”.

The post अन्वय नाईक यांच्या कुटुंबीयांसमवेत असलेल्या फोटोविषयी शरद पवार यांनी केला खुलासा appeared first on थोडक्यात घडामोडी.