मुंबई : मुंबई-पुणे एक्सप्रेसवेवर पनवेलजवळ मंगळवारी एक मोठा अपघात घडला, ज्यात अनेक वाहनांची विचित्र टक्कर झाली. यात दोन जण जखमी झाले. हा अपघात खांदेश्वर पोलिस स्टेशनच्या हद्दीत मुंबईकडे जाणाऱ्या लेनमध्ये घडला.

मिळालेल्या माहितीनुसार, एक कंटेनर ट्रकमध्ये बिघाड झाल्याने तो रस्त्यावर उभा होता. ट्रकचे इंजिन बंद पडल्यामुळे, दोन मेकॅनिक त्याची दुरुस्ती करण्यासाठी त्या ट्रकच्या जवळ उभे राहिले होते. या दुरुस्तीच्या कामामुळे, ट्रकच्यापुढे मेकॅनिकची कार देखील थांबलेली होती. दरम्यान, दुरुस्तीचे काम सुरु असताना, मागून एक भरधाव ट्रक आला. ट्रक चालकाला थांबलेला कंटेनर ट्रक दिसला नाही आणि तो थेट त्यावर आदळला. त्याच क्षणी, एक पिकअप टेम्पो देखील मागून आला. चालकाला ट्रक थांबलेल्या स्थितीत दिसला नाही आणि त्यानेदेखील जोरात धडक दिली. पिकअप टेम्पो चालक वेळेत ब्रेक लावू शकला नाही आणि त्याचा अपघात झाला. या धडकांमुळे जड वाहन एक्सप्रेसवेवरील रोलिंग बॅरियरमध्ये ढकलले गेले, ज्यामुळे वाहतूक अधिक विस्कळित झाली.

जखमींना तातडीने जवळच्या रुग्णालयात हलवले
या धडकेत दोन जण जखमी झाले, ज्यात एक मेकॅनिक गंभीरपणे जखमी झाला. त्याच्या डोक्याला गंभीर दुखापत झाली आहे. दुसऱ्या व्यक्तीला देखील दुखापत झाली. अपघातानंतर जखमींना तात्काळ जवळच्या रुग्णालयात हलवले आणि त्यांच्यावर उपचार सुरु करण्यात आले.

या अपघातामुळे मुंबई-पुणे एक्सप्रेसवेवर वाहतूक गंभीरपणे विस्कळित झाली. स्थानिक पोलीस आणि प्रशासनाने त्वरित अपघातस्थळावर पोहोचून वाहतूक सुरळीत करण्यासाठी भूमिका घेतली. अधिकाऱ्यांनी खराब झालेली वाहनं काढण्यासाठी रिकव्हरी क्रेन तैनात केली, ज्यामुळे वाहतूक पुन्हा पूर्ववत होऊ शकली.

प्राथमिक तपासानुसार, या अपघाताचे मुख्य कारण कमी दृश्यमानता आणि अपुरे ब्रेकिंग अंतर असल्याचे सांगितले जात आहे. पोलिस सध्या सीसीटीव्ही फुटेज आणि साक्षीदारांच्या जबाबांचे विश्लेषण करत आहेत, ज्याद्वारे अपघाताचे नेमके कारण उघडकीस येईल.

यावेळी, पोलिसांनी आणि प्रशासनाने असे सूचित केले की, एक्सप्रेसवेवर वाहतुकीच्या सुरक्षेसाठी कठोर उपाययोजना केल्या जातील. यामध्ये, ट्रक आणि इतर वाहनांसाठी योग्य दुरुस्ती आणि थांबण्याचे नियम स्पष्ट करण्यात येतील, तसेच अपघात होण्याच्या शक्यता कमी करण्यासाठी पुढील काळात संबंधित उपाययोजना राबवली जातील. त्यानुसार, नागरिकांना अधिक जागरूकतेने वाहन चालविण्याचे आवाहन करण्यात आले आहे, जेणेकरून भविष्यात अशा घटना टाळता येतील.

The post मुंबई-पुणे एक्सप्रेसवेवर चार वाहनांचा विचित्र अपघात, दोन जण गंभीरपणे जखमी appeared first on थोडक्यात घडामोडी.

लोणावळा : मुंबई-पुणे एक्स्प्रेस वेवर चालकाचे कंटेनरवरील नियंत्रण सुटून तीन वाहनांचा भीषण अपघात झाला आहे. खंडाळा घाटातील खोपोली एक्झिट ते फुडमॉल दरम्यानच्या तीव्र उतारावर ही दुर्घटना घडली. या अपघातात कारमध्ये असलेल्या एकाच कुटुंबातील तीन जणांचा जागीच मृत्यू झाला आहे. या अपघातात कंटेनर चालक गंभीर जखमी झाला आहे. हा अपघात आज सायंकाळी पाच वाजण्याच्या सुमारास झाला.

महामार्ग पोलिसांनी दिलेल्या माहितीनुसार, पुण्याहून मुंबईच्या दिशेने भरधाव वेगाने जाणाऱ्या एका कंटेनर चालकाचे खोपोली एक्झिट ते फुडमॉल दरम्यानच्या तीव्र उतार व वळणावर गाडीवरील नियंत्रण सुटले. त्यामुळे कंटेनर एका ट्रकवर मागून जोरात धडकला, तर त्या ट्रकची पुढे जाणाऱ्या एका कारला जोरात धडक बसली. अपघातानंतर कारने पेट घेतला आणि कार जळून खाक झाली. अपघातात कारमधील एकाच कुटुंबातील तिघांचा जागीच मृत्यू झाला. यामध्ये आई, ‌वडील व मुलाचा समावेश आहे. या भीषण अपघातामुळे तिन्ही वाहने मार्गावर पलटली होती.

अपघाताची माहिती मिळताच बोरघाट (दस्तुरी) महामार्ग सहाय्यक पोलिस निरीक्षक जगदीश परदेशी यांचे सहकारी, खोपोली पोलिस, देवदूत आपत्कालीन पथक घटनास्थळी दाखल झाले. घटनेची पाहणी करुन पोलिसांनी आयआरबीआय कंपनीच्या कामगारांच्या मदतीने व क्रेनच्या सहाय्याने अपघातग्रस्त वाहने बाजूला काढली. आग लागलेल्या कारला अग्निशमन बंबाच्या सहाय्याने विझविण्यात आलं. अपघातामुळे मुंबईकडे जाणारी वाहतूक काही काळ विस्कळीत झाली होती. त्यानंतर कार बाजूला काढून मार्ग वाहतुकीसाठी खुला करण्यात आला आहे. या घटनेचा पुढील तपास खोपोली पोलिस करीत आहेत.

The post मुंबई-पुणे एक्स्प्रेस वेवर तीन वाहनांचा भीषण अपघात, तीन जणांचा जागीच मृत्यू appeared first on थोडक्यात घडामोडी.

मुंबई : मुंबई-पुणे एक्सप्रेस वेवर होत असलेल्या टोलवसुलीवर मुंबई उच्च न्यायालयाने आज प्रश्न उपस्थित केला. आणखी किती वर्षे टोल वसुल करणार आहात?, असा सवाल मुख्य न्यायमूर्ती दीपांकर दत्ता आणि न्यायमूर्ती गिरीश कुलकर्णी यांच्या खंडपीठानं आज (१७ फेब्रुवारी) उपस्थित केला.

या एक्सप्रेसवेसाठी झालेला खर्च अजून वसूल झाला नाही का?, जमा होणार्‍या टोलचा महसुल सरकारी तिजोरीत जमा होतो का?, असे सवाल उपस्थित करत मुंबई हायकोर्टानं MSRDC ला दोन आठवडयांत यावर सविस्तर प्रतिज्ञापत्र दाखल करण्याचे निर्देश दिले आहेत.

मुंबई-पुणे एक्स्प्रेस वेवर टोल वसूली करण्याचा करार म्हैसकर इंन्फ्रास्टक्‍चर प्रायव्हेट कंपनी बरोबर करण्यात आला आहे. या करारानुसार साल 2019 पर्यंत टोल वसुलीची मुदत देण्यात आली होती. त्यानंतर या एक्स्प्रेस वेवर आणखी पुढील दहा वर्ष टोल वसुल करण्याचा करार करण्यात आला. याला विरोध करत सामाजिक कार्यकर्ते प्रविण वाटेगावकर यांच्यासह इतरांनी मुंबई उच्च न्यायालयात जनहित याचिका दाखल केली आहे. झालेल्या खर्चापेक्षा कित्येक हजारो कोटी रुपये जास्त वसुल करण्यात आले आहेत. त्यामुळे साल 2019 पासुन नव्याने टोल वसुलीला देण्यात आलेली मुदतवाढ बेकायदेशीर असल्याचा याचिकेत आरोप केला गेला आहे. ही टोल वसुली तातडीने थांबवा, तसेच मुदतवाढीत जमा झालेली टोलवसूली बेकायदा ठरवून ती सरकारच्या तिजोरीत जमा करण्याचे आदेश द्या, अशी मागणी या याचिकेतून केलेली आहे.

साल 2004 ते साल 2019 पर्यंतचा टोलवसूलीचा तपशील वाटेगावकर यांनी आज न्यायालयात सादर केला. राज्य सरकारने 2004 मध्ये पुणे – मुंबई एक्सप्रेस वेसाठी म्हैसकर इंनफ्रास्टक्‍चर प्रायव्हेट लमिटेड कंपनीकडून 918 कोटी घेतले. त्याबदल्यात 15 वर्षात टोलच्या माध्यमातून 4330 कोटी रूपये वसुल करण्याचा अधिकार दिला. मात्र, या 15 वर्षात कंपनीनं 6773 कोटी रूपयांची टोलवसुली केली. म्हणजेच सुमारे 2043 कोटी जादा वसुल केले, असं असताना आता आणखी 11 वर्षे टोलवसुलीला मुदतवाढ देण्यात आली आहे. याकडेही याचिकाकर्त्यांनी न्यायालयाचे लक्ष वेधले. याची गंभीर दखल घेत ‘आणखी किती वर्षे टोल वसुल करणार आहात?’, अशी विचारणा हायकोर्टानं केली. तसेच ‘तुम्ही टोल वसूल करता तर चांगले रस्ते देण्याची जबाबदारीही तुमचीच आहे’. असंदेखील हायकोर्टानं राज्य सरकारला सुनावलं.

MSRDC च्या वतीने अ‍ॅड. राजेंद्र चव्हाण यांनी बाजू मांडली. या महामार्गाच्या खर्चाची आगाऊ रक्कम कंत्राटदाराकडून घेऊनच हे कंत्राट देण्यात आले आहे. मोटारवाहन कायद्यानुसार राज्य सरकारला टोलवसुलीचा अधिकार आहे, असा दावा केला गेला. तसेच या टोलवसुली संदर्भात एक जनहित याचिका प्रलंबित आहे. त्या याचिकेत सविस्तर प्रतीज्ञापत्र सादर केले आहे, याकडे न्यायालयाचे लक्ष वेधले. तसेच या याचिकेसंदर्भात सविस्तर प्रतीज्ञापत्र सादर करण्याची तयारी दर्शविली. याची दखल घेत न्यायालयाने दोन आठवड्यांत हे प्रतिज्ञापत्र सादर करण्याचे आदेश राज्य सरकारला दिले.

The post मुंबई-पुणे एक्सप्रेस वेवर आणखी किती वर्षे टोल वसुल करणार? हायकोर्टाने केला सवाल appeared first on थोडक्यात घडामोडी.