नवी दिल्ली : केंद्र सरकारच्या कर्मचारी आणि पेन्शनधारकांसाठी आज एक मोठा निर्णय घेण्यात आला आहे. त्यांच्यासाठी दिवाळी भेट म्हणून महागाई भत्ता वाढवण्याचा निर्णय घेण्यात आला आहे. गुरुवारी झालेल्या मंत्रिमंडळाच्या बैठकीत केंद्र सरकारचे कर्मचारी आणि पेन्शनधारकांसाठी महागाई भत्ता 3 टक्क्यांनी वाढवण्यास मंजुरी देण्यात आली आहे.

DA मध्ये आणखी 3 टक्क्यांची वाढ म्हणजे आता महागाई भत्ता (DA) 31 टक्के होईल. 1 कोटीहून अधिक केंद्रीय कर्मचारी आणि पेन्शनधारकांना या वाढीचा थेट लाभ मिळेल. यापूर्वी यावर्षी जुलैमध्येच सरकारने महागाई भत्ता (डीए वाढ) 11 टक्क्यांनी वाढवून 28 टक्के केली होती. यापूर्वी 17 टक्के दराने डीए देण्यात येत होता.

कामगार मंत्रालयाने AICPI (अखिल भारतीय ग्राहक किंमत निर्देशांक) च्या गेल्या तीन महिन्यांची आकडेवारी जाहीर केली होती. यामध्ये जून, जुलै आणि ऑगस्टच्या आकड्यांचा समावेश होता. ऑगस्टमध्ये AICPI निर्देशांक 123 अंकांवर पोहोचला आहे. यावरूनच संकेत मिळाला की सरकार महागाई भत्त्यामध्ये आणखी वाढ करू शकते. याच आधारावर, केंद्रीय कर्मचाऱ्यांचा महागाई भत्ता ठरविला जातो.

महागाई भत्त्यात वाढ झाल्याने इतर भत्तेही वाढतील. यात प्रवास भत्ता आणि शहर भत्ता यांचा समावेश आहे. त्याचबरोबर सेवानिवृत्तीसाठी भविष्य निर्वाह निधी आणि ग्रॅच्युइटीमध्ये वाढ होईल.

The post केंदीय कर्मचाऱ्यांना मिळाले मोठे गिफ्ट, महागाई भत्त्यात पुन्हा वाढ appeared first on थोडक्यात घडामोडी.