पुणे : पिंपरी-चिंचवड शहरात तळवडे-निगडी रस्त्यावर मंगळवारी दुपारी एक हृदय पिळवटून टाकणारा अपघात झाला. पुणे महानगर परिवहन महामंडळाच्या (PMPML) भरधाव ई-बसने दिलेल्या जोरदार धडकेत 9 वर्षीय मुलीचा जागीच मृत्यू झाला तर तिची गरोदर बहीण गंभीर जखमी झाली आहे. हा अपघात तळवडे चौकाजवळ दुपारी सुमारे 1.30 च्या सुमारास झाला.

मिळालेल्या माहितीनुर, मृत मुलीचे नाव सुधा बिहारीलाल वर्मा (वय 9) असे असून, गंभीर जखमी झालेल्या महिलेचे नाव राधा राममनोज वर्मा आहे. अपघातानंतर पोलिसांनी बसचालक किरण भटू पाटील याला ताब्यात घेतले आहे.

राधा आणि तिचा पती तळवडे येथील एका खासगी कंपनीत काम करतात. राधा गरोदर असल्याने मदतीसाठी तिने दोन महिन्यांपूर्वी तिच्या लहान बहिणीला सुधाला गावावरून बोलावून घेतले होते. त्यांचा भाऊसुद्धा त्यांच्यासोबत राहून एका कंपनीत नोकरी करतो.

कसा झाला अपघात?
मंगळवारी दुपारी राधा कामावरून घरी परतली. जेवण करून ती पुन्हा कामावर जाण्यासाठी तिची लहान बहीण सुधा हिच्यासोबत निघाली. दोघी रस्ता ओलांडत असताना भरधाव वेगात आलेल्या PMPML च्या ई-बसने त्यांना जोराची धडक दिली. धडक इतकी भीषण होती की सुधाचा जागीच मृत्यू झाला. तर राधा गंभीर जखमी झाली असून, तिला तातडीने रुग्णालयात दाखल करण्यात आले, तिच्यावर उपचार सुरू आहेत.

या भीषण अपघाताचा थरार CCTV फुटेजमधून समोर आला असून, पोलिसांनी बसचालकाविरुद्ध गुन्हा दाखल करून तपास सुरू केला आहे. स्थानिक नागरिकांनी या भागातील वाढत्या अपघातांबाबत गंभीर चिंता व्यक्त केली असून, रस्त्यावरील वेगमर्यादा आणि वाहतूक व्यवस्थेत कठोर उपाययोजना करण्याची मागणी होत आहे.

The post भरधाव PMPML ई-बसची धडक; 9 वर्षीय मुलीचा मृत्यू, गरोदर बहिण गंभीर जखमी appeared first on थोडक्यात घडामोडी.

पुणे : पुण्यातून एक अतिशय धक्कादायक बातमी समोर आली आहे. पेट्रोलिंग पोलिसांनी एका व्यक्तीला स्कूटरवरून पत्नीचा मृतदेह घेऊन जाताना रंगेहाथ पकडले. एका व्यक्तीने आपल्या पत्नीचा गळा दाबून खून केला. त्यानंतर तिच्या मृतदेहाची विल्हेवाट लावण्यासाठी तो चक्क दुचाकीवरून स्वामीनारायण मंदिराकडे रात्री १:३० च्या सुमारास निघाला होता. पोलिसांनी त्याला तात्काळ ताब्यात घेतले आहे. मृत महिलेची ओळख बबिता राकेश निसार अशी आहे आणि आरोपी तिचा पती राकेश रामनायक निसार आहे.

मिळालेल्या माहितीनुसार, पत्नीचा खून केल्यानंतर राकेशने तिचा मृतदेह दुचाकीवर ठेवला आणि भूमकर पुलाकडून स्वामीनारायण मंदिराच्या दिशेने निघाला होता. तथापि, स्वामीनारायण मंदिर परिसरातील त्याच्या संशयास्पद वागण्याने आंबेगाव आणि भारती विद्यापीठ पोलिस ठाण्याच्या रात्रीच्या गस्ती पथकांचे लक्ष वेधले. त्याला चौकशीसाठी थांबवल्यानंतर पोलिसांना त्याच्या पत्नीचा मृतदेह आढळला आणि त्यांनी त्याला ताबडतोब ताब्यात घेतले. नांदेड सिटी पोलिस ठाण्याच्या हद्दीत हा प्रकार घडला आहे. पोलीस घटनांचा संपूर्ण क्रम आणि हत्येमागील मूळ हेतू उघड करण्यासाठी सखोल चौकशी करत आहेत.

राकेशवर भारतीय न्याय संहिता (BNS) अंतर्गत हत्येचा गुन्हा दाखल करण्यात आला आहे. मृत्यूचे नेमके कारण आणि वेळ निश्चित करण्यासाठी मृत महिलेचा मृतदेह शवविच्छेदनासाठी ससून जनरल हॉस्पिटलमध्ये पाठवण्यात आला आहे. गुन्ह्याचे कारण अद्याप अस्पष्ट असले तरी, प्राथमिक तपासात असे दिसून आले आहे की या जोडप्यामध्ये घरगुती वाद सुरू होते. या घटनेमुळे परिसरामध्ये खळबळ उडाली आहे.

The post पुण्यात खळबळ! पत्नीची हत्या करून मृतदेह दुचाकीवर ठेऊन निघाला, पोलिसांनी थांबवलं आणि… appeared first on थोडक्यात घडामोडी.

पुणे : पुण्यातील नवले पुलावर पुन्हा एकदा भीषण अपघात झाला आहे. आज रात्री नवले पुलावर भीषण अपघात झाल्याची माहिती मिळाली आहे. कंटेनरने धडक दिल्यामुळे 48 गाड्यांचे नुकसान झाले असल्याची माहिती पीएमआरडीए अग्निशमन दलाने दिली आहे. अग्निशमन दलाच्या 2 रेस्क्यू व्हॅन घटनास्थळी दाखल झाल्या असून बचावकार्य सुरू आहे.

प्राथमिक माहितीनुसार नवले ब्रिजवर नर्हे नजीकच्या परिसरात हा भीषण अपघात झाला आहे. कंटेनरने धडक दिल्यामुळे या सर्व गाड्या एकमेकांवर आदळल्या असल्याची माहिती मिळाली आहे. या अपघातात एकूण 48 गाड्यांचे नुकसान झाल्याची माहिती आहे. दरम्यान या अपघातात अद्याप तरी कुठलीही जीवितहानी झालेली नाही, अशी माहिती आहे. या अपघाताच्या घटनेची माहिती मिळताच सिंहगड रोड पोलीस ठाण्यातील पोलीस अधिकारी आणि कर्मचाऱ्यांनी घटनास्थळी धाव घेतली. पोलिस काही नागरिकांच्या मदतीनं अपघातग्रस्त वाहने बाजूला करुन वाहतूक सुरळीत करण्याचा प्रयत्न करत आहेत.

नवले पुलावर अपघातांचे सत्र
नवले पुलावर गेल्या अनेक दिवसांपासून अपघातांचे सत्र सुरूच आहे. आजपर्यंत शेकडो लोकांना या अपघातांमध्ये आपला प्राण गमवावा लागला आहे. सतत होणाऱ्या या अपघातांकडे महामार्ग प्रशासनाचे लक्ष वेधण्यासाठी वेगवेगळ्या प्रकारची आंदोलने करण्यात आली आहेत. मात्र, त्याचा काहीच उपयोग झाल्याचे दिसत नसून अपघातांचे सत्र सुरूच आहे. या ठिकाणी अपघातांमधे सतत होणारी जिवितहानी चिंताजनक बाब आहे. यावर लवकरात लवकर उपाययोजना होतील अशी अपेक्षा आहे.

The post पुण्यातील नवले पुलावर पुन्हा एकदा भीषण अपघात, कंटेनरने धडक दिल्यामुळे 48 गाड्या एकमेकांवर आदळल्या appeared first on थोडक्यात घडामोडी.