मुंबई : राज्यात आरोग्य क्षेत्रातील पायाभूत सुविधा अधिक सक्षम करण्याच्या दृष्टीने मुख्यमंत्री देवेंद्र फडणवीस यांच्या दूरदृष्टीतून विषाणू निदान प्रयोगशाळांचे जाळे उभारण्याचा महत्त्वपूर्ण उपक्रम राबविण्यात आला आहे.

या संदर्भात १३ जुलै २०१७ रोजी तत्कालीन केंद्रीय आरोग्यमंत्र्यांना पत्र लिहून केंद्र शासनाच्या आरोग्य संशोधन विभागामार्फत देशभर उभारण्यात येणाऱ्या १५० अत्याधुनिक विषाणू प्रयोगशाळांच्या उपक्रमाचे स्वागत करत महाराष्ट्राला योग्य वाटा देण्याची मागणी करण्यात आली होती. या पत्रात देशाच्या मध्यवर्ती ठिकाण असलेल्या नागपूर आणि राज्याची राजधानी मुंबई येथे राज्यस्तरीय प्रयोगशाळा तसेच राज्यातील विविध विभागांतील दहा वैद्यकीय महाविद्यालयांमध्ये प्रयोगशाळा मंजूर करण्याची विनंती करण्यात आली होती.

केंद्र शासनाने या मागणीला सकारात्मक प्रतिसाद देत शासकीय वैद्यकीय महाविद्यालय, नागपूर येथे राज्यस्तरीय विषाणू प्रयोगशाळा मंजूर केली. याशिवाय इंदिरा गांधी शासकीय वैद्यकीय महाविद्यालय, नागपूर तसेच अकोला, छत्रपती संभाजीनगर, सोलापूर, धुळे आणि मिरज येथील वैद्यकीय महाविद्यालयांमध्ये प्रयोगशाळा उभारण्यास मान्यता देण्यात आली.

या योजनेसाठी केंद्र शासनाकडून एकूण २९ कोटी २१ लाख रुपयांचा निधी उपलब्ध करून देण्यात आला. या निधीतून अत्याधुनिक यंत्रसामग्री खरेदी करून प्रयोगशाळा कार्यान्वित करण्यात आल्या. कोविड-१९ महामारीच्या काळात या प्रयोगशाळांनी आरटी-पीसीआर चाचण्यांद्वारे मोठी भूमिका बजावली.

याशिवाय, या प्रयोगशाळांमुळे विविध विषाणूजन्य आजारांचे निदान करणे शक्य झाले आहे. आतापर्यंत कोविड-१९ (३७,२१,१५४), डेंग्यू (८८,३२७), चिकनगुनिया (३९,८१७), झीका (३,९२३), स्क्रब टायफस (७,०९१), इन्फ्लुएंझा (२७,५३६), एचबीव्ही (१,५३,१८०), रोटाव्हायरस (६५१) अशा एकूण ४०,४१,६८९ रुग्णांची तपासणी करण्यात आली आहे.

या उपक्रमामुळे महाराष्ट्रातील आरोग्य व्यवस्थेला बळकटी मिळाली असून भविष्यात उद्भवणाऱ्या संसर्गजन्य आजारांशी लढण्यासाठी राज्य अधिक सक्षम झाले आहे.

The post महाराष्ट्रात आधुनिक विषाणू निदान प्रयोगशाळांचे जाळे उभारण्याचा महत्वपूर्ण निर्णय – मुख्यमंत्री देवेंद्र फडणवीस appeared first on थोडक्यात घडामोडी.

मुंबई : नाशिक, नागपूर आणि धाराशिव जिल्हा मध्यवर्ती बँकांना भागभांडवल म्हणून ८२७ कोटी रुपये देण्यास मंत्रिमंडळ बैठकीत मान्यता देण्यात आली. बैठकीच्या अध्यक्षस्थानी मुख्यमंत्री देवेंद्र फडणवीस होते. यात नाशिक जिल्हा बँकेला ६७२ कोटी, नागपूर जिल्हा बँकेला ८१ आणि धाराशिव जिल्हा बँकेला ७४ कोटी रुपये देण्यात येणार आहेत.

भारतीय रिझर्व्ह बँकेने नाशिक, नागपूर आणि धाराशिव जिल्हा मध्यवर्ती बँकांचे पुनर्भांडवलीकरण व पुनरूज्जीवन करण्याबाबत शासनास कळवले आहे. त्यानुसार आज या तीनही बँकांना भागभांडवल म्हणून अर्थसहाय्य मंजूर करण्यात आले.

शेतकऱ्यांना पीककर्ज उपलब्ध करून देण्यासाठी जिल्हा मध्यवर्ती बँकेची भूमिका महत्त्वाची असते. जिल्हा बँकेच्या आर्थिक स्थितीवरच सेवाविकास संस्थांचेही अस्तित्व असते. त्यामुळे नाशिक, नागपूर आणि धाराशिव जिल्हा बँक यांना एकूण ८२७ कोटी रुपये भागभांडवल स्वरूपात शासकीय अर्थसहाय्य मंजूर करण्यात आले आहे. नाशिक जिल्हा बँकेस यंदाच्या आर्थिक वर्षात ३३६ कोटी आणि पुढील आर्थिक वर्षात ३३६ कोटी वितरित करण्यासही मान्यता देण्यात आली.

नाशिक आणि नागपूर जिल्हा बँकांवर सध्या प्रशासक कार्यरत आहेत. धाराशिव जिल्हा बँकेवर संचालक मंडळ आहे. मात्र धाराशिव जिल्हा बँकेची स्थिती सातत्याने खालावत असल्याने या बँकेचे संचालक मंडळ बरखास्त करून प्रशासक नियुक्त करण्यासाठी सहकार आयुक्तांना निर्देश देण्यासही मान्यता देण्यात आली.

The post नाशिक, नागपूर, धाराशिव जिल्हा बँकांना ८२७ कोटींचे भागभांडवल, ग्रामीण वित्त पुरवठ्याच्या दृष्टीने बँकांच्या सक्षमीकरणाला प्राधान्य appeared first on थोडक्यात घडामोडी.

नागपूर : तिरोडा तालुक्यात आज सकाळी एक हृदयद्रावक घटना घडली. सकाळी आपल्या मुलाला शाळेत सोडण्यासाठी दुचाकीवर निघालेले वडील विजेच्या तडाख्यामुळे पडलेल्या झाडाखाली दबून जागीच ठार झाले, तर त्यांच्या पाठीमागे बसलेला मुलगा गंभीर जखमी झाला.

ही घटना सातोना–बोपेसर मार्गावर घडली. मृत व्यक्तीचे नाव जीवचंद यादोराव बिसेन (वय 46) असे असून, गंभीर जखमी मुलाचे नाव चिराग जीवचंद बिसेन (वय 16) आहे.

सकाळपासूनच तिरोडा परिसरात पावसाने हजेरी लावली होती. जीवचंद बिसेन हे आपल्या मुलाला शाळेत सोडण्यासाठी दुचाकी (क्र. MH 35 AP 9370)वरून तिरोडाकडे निघाले होते. दरम्यान, रस्त्याच्या कडेला असलेल्या करंजीच्या झाडावर अचानक वीज पडली. विजेचा तडाखा बसल्याने झाड मोडून थेट रस्त्यावर कोसळले आणि दुर्दैवाने त्या क्षणी दुचाकी झाडाखाली आली.

काही कळण्याच्या आत झाडाच्या वजनाखाली दबून जीवचंद बिसेन यांचा जागीच मृत्यू झाला, तर चिराग गंभीर जखमी झाला. घटनेची माहिती मिळताच परिसरातील नागरिकांनी घटनास्थळी धाव घेतली व मोठ्या प्रयत्नाने चिरागला झाडाखालून बाहेर काढले.

कोणतीही वेळ वाया न घालवता चिरागला तातडीने गोंदियातील एका खासगी रुग्णालयात उपचारासाठी दाखल करण्यात आले असून सध्या त्याची प्रकृती स्थिर असल्याचे समजते.

या दुर्घटनेमुळे परिसरात शोककळा पसरली असून बिसेन कुटुंबावर दु:खाचा डोंगर कोसळला आहे.

The post हृदयद्रावक! मुलाला शाळेत सोडण्यासाठी जाताना घडला अनर्थ… वडिलांचा मृत्यू, मुलगा गंभीर जखमी appeared first on थोडक्यात घडामोडी.

नागपूर:  महिला डॉक्टरकडे  हॉस्पिटलमध्येच शारीरिक सुखाची मागणी करून तिच्यावर अत्याचाराचा प्रयत्न केल्याची धक्कादायक घटना समोर आली आहे. नागपूर मधील कोराडी मार्गावरील एका हॉस्पिटलमध्ये ही घटना घडली. या प्रकरणी मानकापूर पोलिसांनी विनयभंगासह विविध कलमांन्वये गुन्हा दाखल करून सहकारी डॉक्टरला अटक केली आहे.

मिळालेल्या माहिती नुसार, डॉ. नंदु रहांगडाले (वय ३९) असे अटकेतील डॉक्टरचे नाव आहे. पीडित २४ वर्षीय महिला डॉक्टर काही दिवसांपूर्वी हॉस्पिटलमध्ये रूजू झाली. तेव्हापासून त्याची वाईट नजर पीडित महिला डॉक्टरवर होती. सोमवारी रात्री महिला डॉक्टर खोलीत होती. तो सुद्धा खोलीत गेला. महिला डॉक्टरकडे शारीरिक सुखाची मागणी केली. महिला डॉक्टरने नकार दिला. त्यानंतर आरोपीने अश्लील चाळे करून महिला डॉक्टरवर अत्याचाराचा प्रयत्न केला. महिला डॉक्टरने त्याला धक्का दिला. ती बाहेर आली. मानकापूर पोलीस ठाणे गाठून तक्रार दिली. मानकापूर पोलिसांनी गुन्हा दाखल केला. वरिष्ठ पोलिस निरीक्षक वैजयंती मंडवधरे यांच्या मार्गदर्शनाखाली मानकापूर पोलिसांनी आरोपीला अटक केली.

The post महिला डॉक्टरकडे शरीरसुखाची मागणी; हॉस्पिटलमध्ये अत्याचाराचा प्रयत्न appeared first on थोडक्यात घडामोडी.