मुंबई : मुंबई उच्च न्यायालयाने आज घरोघरी लसीकरणाची मागणी करणाऱ्या जनहित याचिकेवर सुनावणी करताना राज्य सरकार व मुंबई महापालिकेला फटकारले आहे. घरोघरी लसीकरण मोहीम राबवण्यात काय अडचण आहे? असा प्रश्न न्यायालयाने विचारला. त्याचबरोबर ‘महाराष्ट्रातील त्या ज्येष्ठ नेत्याला घरी जाऊन लस कोणी दिली होती? राज्य सरकारनं की मुंबई महापालिकेनं?’ याबाबत न्यायालयाने स्पष्टीकरण मागितले.

अॅड. धृती कपाडिया व अॅड. कृणाल तिवारी या वकिलांनी घरोघरी लसीकरणाची मागणी करणारी जनहित याचिका दाखल केली आहे. त्यावर मुख्य न्यायमूर्ती दीपांकर दत्त व न्यायमूर्ती गिरीश कुलकर्णी यांच्या खंडपीठापुढे सुनावणी सुरू आहे. काल झालेल्या सुनावणीत सध्याच्या परिस्थितीत घरोघरी लसीकरण व्यवहार्य नाही, अशी भूमिका केंद्र सरकारने मांडली होती. केरळसह देशात विविध ठिकाणी सुरू असलेल्या घरोघरी लसीकरण मोहिमेची माहिती जनहित याचिकाकर्त्यांनी न्यायालयापुढं ठेवली. त्यामुळं न्यायालयानं केंद्र व राज्य सरकारसह महापालिकेलाही सुनावले.

‘घरोघरी लसीकरणाच्या प्रश्नावरील सुरुवातीच्या सुनावणीच्या वेळी महाराष्ट्रातील ज्येष्ठ राजकारण्याला घरात जाऊन लस दिली होती, ती कोणी दिली होती? राज्य सरकारनं की मुंबई महापालिकेनं? याचं उत्तर आम्हाला द्या. आम्हाला पहायचंच आहे की, हे सर्व काय सुरू आहे? एका व्यक्तीला घरात लस मिळते, मग इतरांना का नाही?, असा सवाल खंडपीठाने राज्य सरकारला केला. मुंबई महापालिकेतर्फे ज्येष्ठ वकील अनिल साखरे यांनी यासंदर्भात माहिती घेऊन उद्या देतो, असं सांगितलं.

न्यायमूर्तींनी सुनावणी दरम्यान संताप व्यक्त करत म्हटलं कि, “कोरोनाच्या प्रश्नावर मुंबई महापालिका ही देशभरात ‘रोल मॉडेल’ असल्याचं आम्ही म्हणालो होतो. मात्र, घरोघरी लसीकरणाच्या बाबतीत मुंबई महापालिकेनं घेतलेली भूमिका बोटचेपी आहे. आम्ही मुंबई महापालिकेला केंद्र सरकारच्या धोरणाविना लसीकरण सुरू करण्याची संधी दिली होती, मात्र महापालिकेनं केंद्र सरकारच्या धोरणाकडे बोट दाखवलं.” यावेळी धोरण नसताना एका राजकीय व्यक्तीला घरी जाऊन लस कशी व कोणी दिली? याचं उत्तर मुंबई महापालिकेनं शुक्रवारी द्यावं,’ असं खंडपीठानं सांगितलं.

The post महाराष्ट्रातील त्या ज्येष्ठ नेत्याला घरी जाऊन लस कोणी दिली? मुंबई उच्च न्यायालयाने व्यक्त केला संताप appeared first on थोडक्यात घडामोडी.

नवी दिल्ली : पंतप्रधान नरेंद्र मोदी यांनी देशातील कोरोना लसीकरण मोहीमेचा शुक्रवारी आढावा घेतला. यावेळी पंतप्रधान मोदींनी लसीच्या अपव्ययाबद्दल चिंता व्यक्त केली. यावेळी लस उत्पादनासाठी कंपन्यांना करण्यात येणाऱ्या मदतीच्या प्रयत्नांची माहिती पंतप्रधान मोदींना देण्यात आली. लस उत्पादन कंपन्यांना युनिट्स वाढवण्यासह आर्थिक पाठबळ आणि कच्च्या मालाच्या पुरवठ्यासाठी सरकार मदत करत आहे.

पंतप्रधान मोदींनी सर्व राज्यांमधील लसीच्या अपव्ययाचा आढावा घेतला. राज्यांमध्ये लस वाया जाण्याचे प्रमाण अजूनही खूप आहे अशी चिंता व्यक्त करत ते कमी करण्यासाठी पावलं उचलण्याची गरज असल्याचं असं पंतप्रधान मोदी यांनी सांगितलं. लसींची उपलब्धता आणि त्यांचे उत्पादन वाढवण्यासाठीच्या ‘रोडमॅप’ची माहिती अधिकाऱ्यांनी पंतप्रधानांना दिली. लसींच्या उत्पादनाचा वेग वाढवण्यासाठी वेगवगेळ्या लस उत्पादकांना मदत करण्यात येत असलेल्या प्रयत्नांची माहिती पंतप्रधान मोदींना देण्यात आली. भारत सरकार लस उत्पादनासाठी कंपन्यांना आणखी प्लांट उभारण्यासाठी मदत करत आहे, कच्च्या मालाचा पुरवठा तसेच आर्थिक पाठबळ देत आहे.

देशातील ४५ वर्षांवरील आणि १८ ते ४४ वर्षांदरम्यानचे नागरिक, आरोग्य कर्मचारी आणि फ्रंटलाइन वर्कर्सना देण्यात येत असलेल्या लसीकरणाचा आढावा पंतप्रधानांनी घेतला. लसीकरण प्रक्रिया अधिक सुलभ करण्यात येत असल्याची माहिती अधिकाऱ्यांनी पंतप्रधानांना दिली.

Reviewed India’s vaccination drive including the steps being taken to assist vaccine manufacturers and the need to further reduce vaccine wastage. https://t.co/qpHima3Cto

— Narendra Modi (@narendramodi) June 4, 2021

या बैठकीत संरक्षणमंत्री राजनाथ सिंह, गृहमंत्री अमित शहा, अर्थमंत्री निर्मला सीतारामन, वाणिज्य आणि उद्योगमंत्री पियुष गोयल, माहीत आणि प्रसारणमंत्री प्रकाश जावडेकर यांच्यासह इतर वरिष्ठ अधिकारी उपस्थित होते.

The post पंतप्रधान नरेंद्र मोदी यांनी घेतला कोरोना लसीकरण मोहीमेचा आढावा, लसीच्या अपव्ययाबाबत चिंता appeared first on थोडक्यात घडामोडी.

दोन लशींच्या आपत्कालीन वापरास भारताच्या औषध महानियंत्रकांनी मंजुरी दिली आहे. त्यापैकी ‘सीरम’ इन्स्टिट्यूटने उत्पादित केलेल्या ‘कोव्हिशिल्ड’ लशीने तिन्ही मानवी चाचण्या पूर्ण केल्या आहेत, परंतु भारत बायोटेकने विकसित केलेल्या ‘कोव्हॅक्सिन’च्या तिसऱ्या टप्प्यातील चाचण्या सुरू आहेत. राज्यात आज (शनिवारी) २८५ केंद्रांवर कोरोना लसीकरण मोहीम सुरू होणार असून पहिल्या दिवशी २८ हजार ५०० कर्मचाऱ्यांचे लसीकरण करण्यात येणार आहे.

लसीकरण मोहिमेचा प्रारंभ जालना जिल्हा रुग्णालय आणि मुंबईत कूपर रुग्णालयात शनिवारी सकाळी साडे दहा वाजता होईल. त्यानंतर राज्यातील २५८ केंद्रांवर लसीकरणास सुरुवात होईल. लसीकरण मोहिमेचे उद्घाटन मुख्यमंत्री उद्धव ठाकरे आज सकाळी ११.३० वाजता मुंबईतील वांद्रे-कुर्ला कोरोना आरोग्य केंद्रात करणार आहेत.

लसीकरणाच्या पहिल्या टप्प्यात देशभरातील तीन कोटी कोरोना योद्धय़ांचे लसीकरण करण्यात येईल. त्यानंतर पन्नाशीवरील व्यक्ती आणि सहव्याधी असलेल्या व्यक्तींना लस देण्यात येईल. सरकारने लस घेणे ऐच्छिक असल्याचे स्पष्ट केले आहे, पंरतु लस निवडण्याचे स्वातंत्र्य दिलेले नाही. देशभर पहिल्या दिवशी सुमारे तीन लाख कोरोना योद्धय़ांच्या लसीकरणाचे लक्ष्य आहे. पहिल्या टप्प्यातील कोरोनायोद्धांच्या लसीकरणाचा खर्च केंद्र सरकार उचलणार आहे.

कोरोना लसीकरणासाठी निवडणूक आयोग सरकारला लाभार्थीची ओळख पटवण्यासाठी सर्व मतदान केंद्रांवरची माहिती पुरवण्यास तयार आहे, पण आरोग्य अधिकाऱ्यांनी लसीकरण संपल्यानंतर ही माहिती नष्ट करावी, अट घालण्यात आल्याची माहिती सूत्रांनी दिली.

1. राज्यात २८५, तर देशभर ३००६ लसीकरण केंद्रे
2. राज्यात २८,५०० तर देशात तीन कोटी कोरोना योद्धय़ांना लस
3. प्रत्येक केंद्रावर दररोज १०० आरोग्य कर्मचाऱ्यांना लस

लस कुणाला द्यावी

कोरोना संसर्गातून बरे झालेले, मधुमेह, हृदयविकार, मेंदू विकार यासारखा कोणताही तीव्र आजार किंवा सहव्याधी असलेले. एचआयव्हीसारख्या कोणत्याही आजारामुळे शरीरातील रोगप्रतिकारक शक्ती कमी असलेले रुग्ण.

लस कुणाला देऊ नये?

1. लशींच्या चाचण्यांमध्ये स्तनदा माता आणि गर्भवतींना समाविष्ट केले नसल्याने त्यांना लस देऊ नये असे केंद्रीय आरोग्य विभागाने गुरुवारी जाहीर केलेल्या नियमावलीत स्पष्ट केले आहे. लस केवळ १८ वर्षे किंवा त्यावरील व्यक्तींसाठीच आहे.
2. इंजेक्शन, लस किंवा कोणत्याही औषधांमुळे किंवा खाद्यपदार्थाची अ‍ॅलर्जी असलेल्यांना लस देऊ नये. लशीची पहिली मात्रा घेतल्यानंतर प्रतिकूल प्रतिक्रिया किंवा अ‍ॅलर्जी प्रतिक्रिया आल्यास अशा व्यक्तींनाही लस देऊ नये.
3. ज्या लशीची पहिली मात्रा दिली असेल, त्याच लशीची दुसरी मात्रा द्यावी. लस घेतल्यानंतर अन्य लशी घ्यायच्या असल्यास १४ दिवसांच्या अंतराने घ्याव्यात.

संभाव्य सौम्य दुष्परिणाम

लस दिलेल्या ठिकाणी वेदना होणे, सूज येणे, डोकेदुखी, थकवा, ताप, अंगदुखी, पोटदुखी, मळमळ, उलटी, घाम येणे, सर्दी, खोकला, चक्कर येणे, अंग थरथरणे.

लसीकरण मोहिमेचे उद्घाटन पंतप्रधान नरेंद्र मोदी दूरचित्रसंवाद यंत्रणेद्वारे सकाळी १०.३० वाजता करतील. त्याचे प्रक्षेपण सर्व लसीकरण केंद्रांवर करण्यात येईल. लसीकरण मोहिमेच्या प्रारंभी लशींचा पुरवठा आणि वितरणासाठी तयार केलेल्या ‘को-विन’ अ‍ॅपचे उद्घाटनही पंतप्रधानांच्या हस्ते होईल.

The post आजपासून देशभर कोरोना लसीकरण मोहीम, जाणून घ्या लसीकरणाविषयी सर्व काही.. appeared first on थोडक्यात घडामोडी.