पुणे : SWaCH सहकारी संस्थेशी संलग्न कचरा वेचक शालन लक्ष्मण वायले यांनी प्रामाणिकपणाचे एक प्रेरणादायी उदाहरण समाजासमोर ठेवले आहे. कचरा वर्गीकरण करताना सापडलेली लग्नाची सोन्याची अंगठी त्यांनी कोणताही संकोच न करता मूळ मालकिणीला परत केली.

२२ डिसेंबर २०२५ रोजी कसबा विश्रामबाग वाडा परिसरात घरोघरी कचरा संकलनाचे काम पूर्ण केल्यानंतर, गोळा केलेल्या कचऱ्याचे वर्गीकरण करत असताना शालन वायले यांना एक तोळा वजनाची सोन्याची अंगठी आढळून आली. अंगठीचे मूल्य लक्षात येताच त्यांनी ती सुरक्षित ठेवली आणि संबंधित कुटुंबाशी संपर्क साधून ती परत केली.

गेल्या दहा वर्षांपासून शालन वायले जयश्री जगदाळे यांच्या घरातून नियमितपणे कचरा संकलन करतात. ही अंगठी जयश्री जगदाळे यांच्या सून प्रियांका जगदाळे यांची असून ती त्यांच्या लग्नाची अंगठी होती. स्वयंपाक करताना अंगठी काढून कागदात गुंडाळल्यानंतर ती चुकून घरातील कचऱ्यासह फेकली गेली. अंगठी हरवल्याचे लक्षात येताच कुटुंबीयांनी शोध सुरू केला आणि शालन वायले यांच्याशी संपर्क साधला. त्यांनी तत्काळ आणि पूर्ण प्रामाणिकपणे अंगठी परत केली.

या घटनेविषयी बोलताना, पुण्यातील गुरुदेव रवींद्रनाथ टागोर शाळेच्या माजी मुख्याध्यापिका जयश्री जगदाळे म्हणाल्या, “अंगठीचे आर्थिक मूल्य महत्त्वाचे नसून तिच्याशी जोडलेल्या भावना अधिक महत्त्वाच्या आहेत. ती माझ्या सुनेची लग्नाची अंगठी आहे. माझ्या संपूर्ण शिक्षण कारकिर्दीत मी विद्यार्थ्यांना प्रामाणिकपणाचे महत्त्व शिकवले आणि आज ते प्रत्यक्ष अनुभवायला मिळाले.”

शालन वायले यांच्या प्रामाणिकपणाने प्रभावित होऊन जयश्री जगदाळे यांनी त्यांचा साडी देऊन सन्मान केला. कचरा वेचकांची सचोटी ही SWaCH संस्थेच्या मूलभूत मूल्यांचे प्रतीक असल्याचे सांगत त्यांनी संस्थेबद्दल कृतज्ञता व्यक्त केली.

यापूर्वीही SWaCH कचरा वेचक अंजू माने यांनी रस्त्यावर सापडलेली सुमारे १० लाख रुपयांची रोख रक्कम असलेली बॅग मालकाला परत केली होती. अशा घटनांमुळे गेल्या २० वर्षांत SWaCH कचरा वेचक आणि पुणेकर नागरिकांमध्ये निर्माण झालेल्या विश्वासाचे नाते अधिक दृढ झाले आहे. घरोघरी जाऊन कचरा संकलन सेवा देणाऱ्या कचरा वेचकांची प्रामाणिकता ही दररोज समाजासमोर येत असल्याचे यानिमित्ताने पुन्हा एकदा अधोरेखित झाले आहे.

पुणे : कचरा गोळा करणाऱ्या महिलेने रस्त्यावर सापडलेली १० लाख रुपयांची बॅग केली परत

The post कचरा वेचक शालन वायले यांचा प्रामाणिकपणा; कचऱ्यात हरवलेली सोन्याची अंगठी केली परत appeared first on थोडक्यात घडामोडी.

पुणे : सदाशिव पेठेतील एका कचरा गोळा करणाऱ्या महिलेने १० लाख रुपये रोख असलेली बॅग सापडल्यानंतर प्रामाणिकपणाचे उदाहरण दिले आणि ती बॅग तिच्या मालकाला परत केली.

सुमारे २० वर्षांपासून स्वच्छतेसाठी काम करणाऱ्या अंजू माने या २० नोव्हेंबर रोजी सदाशिव पेठेतील त्यांच्या नियमित मार्गावर कचरा गोळा करत होत्या. सकाळी ८ ते ९ वाजेच्या दरम्यान, कचरा फीडर पॉइंटवर घेऊन जात असताना त्यांना रस्त्याच्या कडेला एक बॅग पडलेली दिसली. सुरुवातीला त्यांनी बॅग फीडर पॉइंटवर सुरक्षित ठेवली आणि उघडल्यानंतर त्यांना त्यात औषधे तसेच मोठ्या प्रमाणात रोख रक्कम (१० लाख रुपये) सापडली.

अंजू दोन दशकांपासून या परिसरात काम करत असल्यामुळे बहुतेक रहिवाशांना वैयक्तिकरित्या ओळखतात. स्थानिकांच्या मदतीने त्यांनी त्या बॅगच्या मालकाला शोधण्याचा प्रयत्न केला. या दरम्यान, त्यांना एक रहिवासी काहीतरी शोधत असल्याचे दिसले. त्याला पाणी देऊन शांत केल्यानंतर विचारपूस केली असता बॅग त्याचीच असल्याची पुष्टी झाली आणि संपूर्ण १० लाख रुपये तसेच परत करण्यात आले.रहिवाशाने आपले नाव गुप्त ठेवण्याची विनंती केली.

अंजूच्या प्रामाणिकपणाचे कौतुक करण्यासाठी रहिवाशांनी तिला साडी आणि थोडी रोख रक्कम देऊन सन्मानित केले. स्थानिकांच्या मते, तिचे हे कार्य नागरिक आणि कचरा गोळा करणाऱ्यांमध्ये वर्षानुवर्षे निर्माण झालेल्या मजबूत बंधाचे प्रतिबिंब आहे.

पुण्यात सुमारे ४००० ‘स्वच्छ’ कचरा गोळा करणारे दररोज शहरातील सुमारे ४० लाख रहिवाशांना सेवा पुरवतात. स्वच्छतेसाठी वर्षानुवर्षे मिळवलेल्या विश्वासामुळे नागरिकांचे आणि कचरा गोळा करणाऱ्यांमधील संबंध मजबूत झाले आहेत. अंजू यांच्या कृतीमुळे पुन्हा एकदा पुण्यात स्वच्छता आणि सामुदायिक विश्वास राखण्यात कचरा गोळा करणाऱ्यांचे महत्त्व अधोरेखित झाले आहे.

The post पुणे : कचरा गोळा करणाऱ्या महिलेने रस्त्यावर सापडलेली १० लाख रुपयांची बॅग केली परत appeared first on थोडक्यात घडामोडी.

मुंबई : शहरी क्षेत्राच्या पायाभूत सुविधा विकासासाठी एकत्रित थीम, दीर्घकालीन नियोजन आणि उपलब्ध निधीचा प्रभावी वापर या सूत्राचा वापरा करा. शहरांच्या भविष्यासाठी आज निर्णय घ्या, पुढील ५० वर्षांचा विचार करून प्रकल्प राबवा, असे निर्देश मुख्यमंत्री देवेंद्र फडणवीस यांनी दिले. महाराष्ट्रातील शहरी भागांच्या पायाभूत विकासासाठी राज्य शासनाच्या महाराष्ट्र अर्बन इन्फ्रास्ट्रक्चर फंड (MUINFRA) अंतर्गत तयार करण्यात आलेल्या नवीन आर्थिक आराखड्यावर चर्चा करताना मुख्यमंत्री फडणवीस बोलत होते.

राज्यातील शहरी भागातील पायाभूत सुविधा व नागरी सुविधा प्रकल्पांसाठी आर्थिक नियोजन करण्याविषयी महाराष्ट्र अर्बन इन्फ्रास्ट्रक्चर फंड (MUINFRA) अंतर्गत मंत्रालयात बैठकीचे आयोजन करण्यात आले.

शहरांमधील मलनिस्सारण, ड्रेनेज, घनकचरा व्यवस्थापन, पाणी पुरवठा यांसारख्या मूलभूत सुविधांसाठी फक्त आजचे नव्हे, तर पुढील पिढ्यांचा विचार करून नियोजन करा असे सांगून मुख्यमंत्री देवेंद्र फडणवीस म्हणाले की, पाणी, कचरा व्यवस्थापन, वाहतूक यासाठी स्वतंत्र आराखडे आणि यावर लक्ष केंद्रीत करा, निव्वळ निधी पुरवठा न करता, रिसोर्स प्लॅनिंगवर भर द्या. जेथे फंडीग गॅप आहे, तिथे पूरक व्यवस्था करून प्रकल्प साकारा, स्थानिक संस्थांना पायाभूत प्रकल्पांसाठी आर्थिक सहाय्य दिले पाहिजे आणि उभारलेल्या सुविधांचे मॉनिटरिंगही तितकेच महत्त्वाचे असल्याचे मुख्यमंत्री फडणवीस यांनी सांगितले.

मुख्यमंत्री फडणवीस म्हणाले की, शहरी विकास ही केवळ इमारती उभारण्याची बाब नाही, तर ती सामाजिक आणि आर्थिक समृद्धी घडवण्याची प्रक्रिया आहे. म्हणूनच प्रत्येक प्रकल्पामागे दूरगामी विचार आणि मजबूत आर्थिक रचना असली पाहिजे, असेही त्यांनी सांगितले.

यावेळी बैठकीस जागतिक बँक टास्क फोर्सचे अबेद खालील, मित्रा संस्थेचे मुख्य कार्यकारी अधिकारी प्रवीणसिंह परदेशी, वित्त विभागाचे अपर मुख्य सचिव ओ पी गुप्ता, नगर विकासाचे अपर मुख्य सचिव असीम गुप्ता उपस्थित होते.

MUINFRA अंतर्गत नवीन फंड रचना तयार करण्यात आली असून, तिच्या माध्यमातून शहरांना पायाभूत व नागरी सुविधा उभारण्यासाठी दीर्घकालीन भांडवल उपलब्ध करून देता येणार आहे. पूल बाँड्स, क्रेडिट एन्हासमेंट यांच्या माध्यमातून कमर्शियल मार्केटमधून निधी उभारता येणार आहे. यामुळे प्रकल्पांचे आर्थिक नियोजन अधिक ठोस आणि शाश्वत होणार असल्याची माहिती यावेळी देण्यात आली.

The post शहरी विकास आराखडा राबविताना पुढील ५० वर्षांचा विचार आवश्यक – मुख्यमंत्री देवेंद्र फडणवीस appeared first on थोडक्यात घडामोडी.

बीड : बीड शहरात सुरू असलेली विविध विकास कामे करताना आधुनिक तंत्रज्ञानाचा वापर करून दर्जेदार काम करावी. बीडकरांच्या स्मरणात राहील तसेच शहराच्या वैभवात भर घालणारी कामे करावीत, असे निर्देश उपमुख्यमंत्री तथा जिल्ह्याचे पालकमंत्री अजित पवार यांनी दिले.

उपमुख्यमंत्री पवार यांनी आज सकाळी बीड शहरातील चंपावती क्रीडा मंडळ, कनकालेश्वर मंदिर, जिल्हा रुग्णालय, येथे सुरू असलेल्या व नव्याने सुरू करण्यात येणाऱ्या विकास कामांची पाहणी केली. यावेळी आमदार विक्रम काळे, आमदार विजयसिंह पंडित, माजी आमदार अमरसिंह पंडित, उपमुख्यमंत्र्यांचे सचिव डॉ.राजेश देशमुख, आदिवासी विकास विभागाचे सचिव तथा जिल्ह्याचे पालक सचिव विजय वाघमारे, जिल्हाधिकारी विवेक जॉन्सन, जिल्हा परिषदेचे मुख्य कार्यकारी अधिकारी जितीन रहमान, पोलीस अधीक्षक नवनीत कॉवत, सार्वजनिक बांधकाम विभागाचे मुख्य अभियंता अतुल चव्हाण आदी उपस्थित होते.

कंकालेश्वर मंदिर येथे पाहणी करताना उपमुख्यमंत्री पवार यांनी संबंधित अधिकाऱ्यांकडून कामांची माहिती घेतली. कंकालेश्वर देवस्थान हे बीड शहरासह जिल्ह्यातील भाविकांचे श्रद्धास्थान आहे. कनकालेश्वर देवस्थान परिसरात नव्याने सुरू करण्यात येणाऱ्या विकास कामांमध्ये पारंपरिक व आधुनिकतेचा संगम साधत बीडकरांना कायम स्मरणात राहील असे दर्जेदार कामे करावीत. विकास कामे करताना ती गुणवत्तापूर्ण, दर्जेदार व टिकाऊ आणि वेळेत पूर्ण होईल याकडे लक्ष द्यावे. भाविकांना सर्व सोयी-सुविधा मिळतील अशा सर्व बाबींचा आराखड्यामध्ये समावेश करावा, अशा सूचना उपमुख्यमंत्री पवार यांनी दिल्या. यावेळी उपमुख्यमंत्री पवार यांनी यावेळी कनकालेश्वर मंदिरात दर्शन घेतले.

जिल्हा क्रीडा संकुलाची पाहणी करून उपस्थित नागरिकांशी उपमुख्यमंत्री पवार यांनी संवाद साधला. जिल्हा क्रीडा संकुलासाठी 2499.96 लक्ष किंमतीच्या अंदाजपत्रकात विशेष बाब म्हणून सुधारित प्रशासकीय मान्यता देण्यात आली आहे. याबाबतचा शासन निर्णयही निर्गमित करण्यात आला आहे. क्रीडा संकुलाच्या कामामुळे बीडकरांना सुसज्ज क्रीडा संकुल उपलब्ध होणार आहे. यासाठी नागरिकांनी सहकार्य करावे, क्रीडा संकुलालगतचा संपूर्ण परिसर स्वच्छ करावा, या परिसरात कुठेही कचरा दिसणार नाही याबाबत नगरपालिका प्रशासनाने दक्षता घ्यावी, असे निर्देश त्यांनी दिले.

जिल्हा रुग्णालय येथे सुरू असलेल्या कामाचीही उपमुख्यमंत्री पवार यांनी पाहणी केली. इमारतीची कामे करताना आगामी 50 वर्षांचा सर्वांगीण विचार केला पाहिजे, वीज, वाहनतळ, अग्निशामन यंत्रणा, सुरक्षिततेच्या दृष्टीने अत्याधुनिक यंत्रणेचा वापर केला पाहिजे, इमारत पूर्ण झाल्यानंतर नागरिकांना समाधान वाटले पाहिजे असे काम करा, असेही ते म्हणाले.

यावेळी संबंधित विभागाचे अधिकारी उपस्थित होते.

The post बीड शहरातील विविध विकास कामांची पाहणी, अजित पवारांनी अधिकाऱ्यांना दिले ‘हे’ निर्देश appeared first on थोडक्यात घडामोडी.