मुंबई : अटकेत असलेल्या अमरावतीच्या खासदार नवनीत राणा आणि त्यांचे पती आमदार रवी राणा यांना न्यायालयात पुन्हा एकदा झटका बसला आहे. राणा दाम्पत्याला मुंबई सेशन्स कोर्टातही तातडीचा दिलासा मिळालेला नाही.

मुख्यमंत्री उद्धव ठाकरे यांच्या ‘मातोश्री’ या खासगी निवासस्थानात हनुमान चालीसा पठण करण्याच्या घोषणेनंतर नवनीत राणा आणि रवी राणा यांना मुंबई पोलिसांनी अटक केली. त्यानंतर जामीन मिळावा यासाठी राणा दाम्पत्याने शिवडी येथील विशेष कोर्टात जामीन अर्ज केला. हा अर्ज प्रलंबित असताना आणि त्यावर २९ एप्रिलला सुनावणी असतानाही त्यांनी सेशन्स कोर्टात जामीन अर्ज केला होता. मात्र, त्यांना दिलासा मिळालेला नाही. या प्रकरणात राज्य सरकारला उत्तर देण्यासाठी तीन दिवसांचा कालावधी दिला आहे, त्यामुळे जामीन अर्जावर आता २९ एप्रिल रोजी सुनावणी होईल.

राणा दाम्पत्याविरोधात पोलिसांनी भारतीय दंड संहितेच्या कलम १५३-अ खाली दोन समुदायांत तेढ निर्माण केल्याच्या आरोपाखाली एफआयआर नोंदवला होता. तसंच कायदा-सुव्यवस्थेचा प्रश्न निर्माण केल्याच्या आरोप आहे. त्यानंतर राजद्रोहाचे १२४-अ कलमही लावल्यामुळे राणा दाम्पत्याच्या अडचणी वाढल्या आहेत.

The post राणा दाम्पत्याला दिलासा नाहीच! जामीन अर्जावर आता २९ एप्रिल रोजी सुनावणी appeared first on थोडक्यात घडामोडी.

मुंबई : अमरावतीच्या अपक्ष खासदार नवनीत राणा आणि त्यांचे पती आमदार रवी राणा यांना मुंबई उच्च न्यायालयाकडून दणका बसला आहे. न्यायालयाने राणा दाम्पत्याची याचिका फेटाळून लावली आहे. नवनीत राणा आणि रवी राणा यांच्याविरुद्ध नोंदवण्यात आलेला दुसरा एफआयआर रद्द करण्यासाठी याचिका दाखल करण्यात आली होती. या दोघांविरुद्ध दुसरी एफआयआर आयपीसीच्या कलम 353 अंतर्गत नोंदवण्यात आली, म्हणजे सरकारी कामकाजात अडथळा आणणे. या याचिकेवर मुंबई उच्च न्यायालयात सुनावणी झाली.

दोन्ही एफआयआर एकत्र करण्यासही न्यायालयाने नकार दिला आहे. दोन्ही वेगळ्या घटना आहेत, त्यामुळे दोन स्वतंत्र गुन्हे दाखल करण्यात आल्याचे न्यायालयाचे म्हणणे आहे. मात्र, दुसऱ्या एफआयआरमध्ये त्यांना अटक करण्यापूर्वी ७२ तासांची नोटीस देण्याचे आदेश मुंबई पोलिसांना देण्यात आले आहेत.

The post राणा दाम्पत्याला मोठा झटका, दुसरी FIR रद्द करण्याची याचिका फेटाळली appeared first on थोडक्यात घडामोडी.

मुंबई : मुख्यमंत्री उद्धव ठाकरे यांच्या ‘मातोश्री’ या निवासस्थानाच्या बाहेर हनुमान चालीसाचं पठण करण्याची घोषणा करणाऱ्या खासदार नवनीत राणा आणि आमदार रवी राणा यांनी आपली भूमिका बदलली आहे. राणा दाम्पत्याविरोधात शिवसैनिकांनी आक्रमक भूमिका घेतल्याने मुंबईत काही ठिकाणी तणावाची स्थितीही निर्माण झाली होती. मात्र पंतप्रधान नरेंद्र मोदी यांच्या मुंबई दौऱ्यामुळे नवनीत राणा आणि रवी राणा यांनी ‘मातोश्री’ परिसरात जाण्याचं टाळलं.

रवी राणा यांनी पत्रकार परिषदेत याविषयी माहिती दिली. पंतप्रधान नरेंद्र मोदी रविवारी मुंबई दौऱ्यावर येत आहेत. देशासाठी काम केलेल्या व्यक्तीला लता दीनानाथ मंगेशकर पुरस्कार देण्यात येणार आहे. यंदाचा हा पहिला पुरस्कार पंतप्रधान मोदी यांना जाहीर झाला असून पुरस्कार स्वीकारण्यासाठी नरेंद्र मोदी उद्या (रविवार) मुंबईत दाखल होणार आहेत. मोदींच्या या दौऱ्याच्या पार्श्वभूमीवर आम्ही आमची भूमिका मागे घेत आहोत, असं रवी राणा यांनी सांगितलं आहे.

The post नरेंद्र मोदींमुळे राणा दाम्पत्याने ‘मातोश्री’वर जाण्याची भूमिका बदलली, रवी राणा यांनी दिली माहिती… appeared first on थोडक्यात घडामोडी.