मुंबई : महाराष्ट्र शासनाने दोन वेळा उत्कृष्ट अभियंता या पुरस्काराने सन्मानित केलेले महाराष्ट्र शासनाचे सार्वजनिक बांधकाम विभागाचे माजी सचिव अनिलकुमार बळीराम गायकवाड यांची महाराष्ट्र राज्य रस्ते विकास महामंडळ, मुंबई येथे सह व्यवस्थापकीय संचालक (अभियांत्रिकी) या पदावर त्यांची नियुक्ती करण्यात आल्याचा शासन निर्णय महाराष्ट्र शासनाने आज जाहीर केला आहे.

अनिलकुमार गायकवाड हे नुकतेच सार्वजनिक बांधकाम विभाग (रस्ते/ बांधकामे) सचिव पदावरून सेवा निवृत्त झाले. त्यांचे महाराष्ट्राच्या सार्वजनिक बांधकाम विभागात खूप मोठे योगदान आहे. हिंदू हृदय सम्राट बाळासाहेब ठाकरे समृध्दी महामार्गाच्या कार्यात अनिलकुमार गायकवाड यांचा मोठा सहभाग आहे. जमीन अधिग्रहण पासून ते रस्ते तयार होई पर्यंत ची सर्व तांत्रिक बाजू भक्कम पणे त्यांनी सांभाळली आहे. समृद्धी महामार्गाचे ८५% काम पूर्ण झाले असुन उर्वरित काम पूर्ण होण्यासाठी साधारण आणखी दोन वर्षाचा कालावधी लागेल. त्यासाठी गायकवाड यांना सेवानिवृत्ती नंतर त्यांच्या कार्याची दखल घेवून राज्य शासनाने त्यांना एम एस आर डी सी च्या सह- व्यवस्थापकीय संचालक पदी नियुक्ती दिली आहे. महाराष्ट्र शासनाने त्यांची नियुक्ती केल्याने समृद्धी महामार्ग लवकरच पूर्णत्वास जाईल, अशी अपेक्षा आहे.

अनिलकुमार गायकवाड यांनी अनेक महत्त्वाच्या कामातुन आपली ओळख निर्माण केली आहे. त्यापैकी पुणे -मुंबई एक्स्प्रेस वे, मुंबईतील सी-लिंक पुल, मुंबई आणि ठाणे शहरातील जवळपास सर्व उड्डाण पुले, समृद्धी एक्स्प्रेस वे, मुंबई मधील विलासराव देशमुख फ्री वे, महाराष्ट्राच्या मंत्रालयाचे आधुनिकीकरण केलेली ईमारत, मुंबई हायकोर्ट इमारत दुरुस्ती, हाई माऊंट बिल्डिंग,  सह्याद्री इमारत, विशेष म्हणजे देशाच्या राजधानी दिल्ली येथील नविन “महाराष्ट्र सदन”, नुकतेच लातुर जिल्ह्यातील केंद्रीय मंत्री नितीन गडकरी यांनी उद्धाटन केलेले देशातील पहिले नवीन टेक्नॉलॉजीचे हायब्रीड पुल, देशातील नदीवर तयार केलेले सर्वांत उंच लोखंडी पुल, देशातील सर्वाधिक लांब असा आठ किलोमीटर चा बोगदा, अशी अनेक महत्त्वाकांक्षी कामे गायकवाड यांच्या कार्यकाळात त्यांनी अत्यंत उत्कृष्टपणे हाताळली आहेत. त्यांच्या अनुभवाचा आणि बुद्धिमत्तेचा फायदा राज्याला निश्चितच होईल.

The post अनिलकुमार गायकवाड यांची एम एस आर डी सी च्या सह- व्यवस्थापकीय संचालक पदी नियुक्ती appeared first on थोडक्यात घडामोडी.

मुंबई : दोष नसतानादेखील सलग २२ महिने मला सेवेतून बाजूला रहावे लागले, प्रशासनात माझी बाजू ऐकून घेतली गेली नाही, तरीही मी लढत राहिलो आणि निर्दोष बाहेर पडलो. परंतु, निर्दोष असतानाही ज्या यातना असतात या सबंधित व्यक्तीलाच माहित असतात, असे सांगतानाच माझ्यासारखी वेळ कुणावरही येवू देवू नका अशी खंत सार्वजनिक रस्ते व बांधकाम सचिव अनिलकुमार गायकवाड यांनी व्यक्त केली.

अनिलकुमार गायकवाड आपल्या ३२ वर्षांच्या शासकीय सेवेतून सेवानिवृत्त झाले. सार्वजनिक बांधकाम विभागाच्या वतीने मंत्रालयातील परिषद सभागृहात शुक्रवारी सायंकाळी त्यांचा निरोप समारंभ आयोजित करण्यात आला होता. यावेळी बोलताना गायकवाड यांनी आपल्या कार्यकाळातील आठवणींना उजाळा दिला. ते म्हणाले, “बांधकाम खात्याविषयी पूर्वीपासूनच आवड होती नोकरी करायची तर बांधकाम खात्यातच या जिद्दीने प्रयत्न करीत राहिलो. एका कॉलेजमध्ये नाईलाजाने दोन वर्ष प्राध्यापक म्हणून काढले. जल संपदा विभागातदेखील नाईलाजाने पहिली नोकरी केली. परंतु मन रमले नाही. प्रयत्न करीत राहिलो. १९८६ ला एमपीएससी परीक्षा दिली, त्याचा निकाल १९८७ ला आला; चांगल्या मार्कांनी पास झालो आणि एप्रिल १९८९ रोजी सार्वजनिक बांधकाम विभागात रुजू झालो.”

ते पुढे म्हणाले, सेवाकाळात ५ ठिकाणी काम केले. मंत्रालयात १ नोव्हेंबर २०२० पासून अवघे एक वर्ष मिळाले त्यातील सहा महिने कोरोनामध्ये गेले. केवळ सहा महिनेच काम करता आले. मंत्रालयातील कामकाजाविषयी लोकांमध्ये नकारात्मकरित्या बोलले जात होते, परंतु या कार्यकालात मंत्रालयीन कामाचा अनुभव नसतानाही विभागातील सर्वांच्या कार्यपद्धती समजून घेतल्या व सर्वांचे चांगले सहकार्य मिळाले.

गायकवाड यांनी खंत व्यक्त करत म्हटले कि, आयुष्यातील ३२ वर्षाच्या सेवाकाळातील जून २०१५ ते एप्रिल २०१७ अशी दोन वर्ष विनाकारण वाया गेली. कालिना विद्यापीठ तसेच महाराष्ट्र सदन प्रकरणात दोष नसतानाही आपल्याला गोवण्यात आले. सलग २२ महिने बाहेर रहावे लागले. आपल्यावर शिस्तभंगाची कारवाई करण्याचे योजिले आहे, त्यामुळे आपणास निलंबित करण्यात येत आहे, अशी आगळीवेगळी नोटीस देवून आपल्यावर कारवाई करण्यात आली. यावर प्रशासनाकडे आपले म्हणणे १० पानांचा कागद लिहून मांडले, परंतु तो कागद उघडून देखील पहिला गेला नाही. निलंबनाचा काल हा केवळ ३ महिनेच असावा, असे न्यायालयाचे निर्देश आहेत. मात्र त्यावर काम केले जात नाही मंत्रालयात आपले कर्मचारी किवा अधिकारी यांच्यावर शिस्तभंग किंवा निलंबनाची कारवाई करीत असताना माझासारखी वेळ कुणावरही येवू देवू नका; संबंधितांचे म्हणणे गांभीर्याने घ्यावे, अशी विनंती त्यांनी उपस्थित अधिका-यांना केली.

विभागाच्या वतीने स्मृतीचिन्ह शाल पुष्पगुच्छ देवून गायकवाड यांचा सत्कार करण्यात आला. सार्वजनिक बांधकाम विभागातील अधिकारी व कर्मचा-यांनी यावेळी आपले मनोगत व्यक्त केले. त्यांनी गायकवाड यांच्या कामाचे कौतुक करत त्यांना समृद्धी महामार्ग या महत्वाकांक्षी प्रकल्पासाठी शासनाने पुन्हा संधी द्यावी, अशी भावना व्यक्त केली.

The post दोष नसतानाही माझ्यावर आलेली ‘ती’ वेळ कोणावरही येऊ नये – अनिलकुमार गायकवाड appeared first on थोडक्यात घडामोडी.