शिवसेनेतील घडामोडींशी भाजपाचा संबंध नाही, चंद्रकांत पाटील यांची स्पष्टोक्ती

मुंबई : शिवसेनेचे नेते व राज्याचे नगरविकास मंत्री एकनाथ शिंदे यांच्या भूमिकेमुळे शिवसेनेत व राज्यात चालू असलेल्या राजकीय घडामोडींशी भारतीय जनता पार्टीचा काहीही संबंध नाही असे प्रदेशाध्यक्ष चंद्रकांत पाटील यांनी शुक्रवारी कोल्हापूर येथे पत्रकार परिषदेत पत्रकारांना सांगितले.

ते म्हणाले की, भाजपाकडे सत्ता स्थापनेसाठी कोणताही प्रस्ताव सादर केलेला नाही. भाजपाच्या निर्णय प्रक्रियेनुसार महत्त्वाच्या विषयांवर राज्यांची कोअर कमिटी विचारविनिमय करून भूमिका निश्चित करते व केंद्रीय नेतृत्वाकडे शिफारस करते त्यानुसार पक्षाचे केंद्रीय पार्लमेंटरी बोर्ड अंतिम निर्णय घेते. शिवसेनेच्या दोनतृतीयांश पेक्षा अधिक आमदारांनी वेगळी भूमिका घेण्याच्या घडामोडी मागे भाजप असल्याचा आरोप राष्ट्रवादी काँग्रेसचे अध्यक्ष शरद पवार यांनी केला आहे. त्याविषयी आपली प्रतिक्रिया काय असे पत्रकारांनी विचारले असता ते म्हणाले की देशांमध्ये सर्वांना अभिव्यक्ती स्वातंत्र्य आहे, तसेच ते शरद पवार यांनाही आहे त्यानुसार ते मत व्यक्त करत असतात.

महाविकास आघाडी सरकार पाडण्याची भाजप सरकार प्रयत्न करणार नाही तथापि अंतर्गत कलहामुळे हे सरकार कोसळले असे आपण यापूर्वी सातत्याने सांगत होतो, याची त्यांनी पत्रकारांना आठवण करून दिली.