नितीश कुमार यांच्या महाआघाडीने जिंकला विश्वासदर्शक ठराव

बिहार : बिहारचे मुख्यमंत्री नितीशकुमार यांच्या नेतृत्वाखालील महाआघाडी सरकारने बुधवारी राज्य विधानसभेत विश्वासदर्शक ठराव जिंकला. बिहार विधानसभेत आज कुमार यांच्या नेतृत्वाखालील सरकारचे बहुमत सिद्ध करण्यासाठी फ्लोअर टेस्ट घेण्यात आली.

उल्लेखनीय म्हणजे, मुख्यमंत्री नितीश कुमार यांच्या नेतृत्वाखालील ‘महागठबंधन’ आघाडी सरकारला बहुमत सिद्ध करण्यासाठी फ्लोअर टेस्टपूर्वी भारतीय जनता पक्षाचे विजय कुमार सिन्हा यांनी आज बिहार विधानसभेच्या अध्यक्षपदाचा राजीनामा दिला.

बिहारमध्ये नव्याने स्थापन झालेल्या महाआघाडी सरकारने विश्वासदर्शक ठराव जिंकला आहे. त्याचवेळी भारतीय जनता पक्षाच्या सदस्यांनी सभागृहातून सभात्याग केला. विश्वासदर्शक ठरावावरील चर्चेदरम्यान नितीशकुमार यांनी भाजपवर जोरदार हल्लाबोल केला. यावेळी आज स्वातंत्र्याचा उत्सव साजरा करणारे स्वातंत्र्य आंदोलनाच्या वेळी कुठे होते, असा सवाल नितीश यांनी केला. त्यानंतर भाजपने सभागृहातून सभात्याग केला.