भरदिवसा घरात घुसून महिला डॉक्टरवर चाकूने हल्ला, परभणीतील धक्कादायक प्रकार

परभणी : परभणीत दोन जणांनी भरदिवसा घरात घुसून एका महिला डॉक्टरवर चाकूने वार केल्याची घटना समोर आली आहे. परभणीच्या जिंतूर शहरातील गणेश नगर येथे ही धक्कादायक घटना घडली आहे. डॉ. ज्योती सांगळे असे जखमी झालेल्या महिला डॉक्टरचे नाव आहे. त्यांच्यावर सध्या जिंतूर शहरातील खाजगी रुग्णालयामध्ये उपचार करण्यात येत आहेत. पोलीस अज्ञात हल्लेखोरांचा शोध घेत आहेत.

जिंतूर शहरातील गणेश नगर येथे डॉ. गणेश सांगळे आणि त्यांची पत्नी डॉ. ज्योती सांगळे त्यांच्या मुलीसह राहतात. आज दुपारी (२५ जुलै) डॉ. ज्योती सांगळे आणि त्यांची मुलगी दोघीच घरात होत्या. यावेळी अचानक दोन अज्ञात व्यक्ती त्यांच्या घरात शिरल्या आणि त्यांनी लहान मुलीला चाकू दाखवला. त्यानंतर डॉ. ज्योती समोर आल्या असता त्यांनाही चाकू दाखवत धमकावण्याचा प्रयत्न केला. त्यामुळे घाबरून डॉ. ज्योती यांनी आरडाओरड करण्यास सुरुवात केली. त्यानंतर हल्लेखोरांनी त्यांच्यावर चाकूने वार केले आणि घरातून पळ काढला. यात डॉ. ज्योती यांच्या बोटाला गंभीर दुखापत झाली आहे.

दरम्यान, गोंधळ ऐकून शेजाऱ्यांनी तात्काळ डॉक्टर सांगळे यांच्या घराकडे धाव घेतली. त्यांना जखमी अवस्थेत पाहिल्यानंतर त्यांना तात्काळ उपचारासाठी जिंतूर शहरातील एका खाजगी रुग्णालयात दाखल करण्यात आलं. शेजाऱ्यांनी घटनेची माहिती पोलिसांना दिली. याप्रकरणी पोलिसांनी संशयितांना ताब्यात घेतलं असून अधिक तपास पोलीस करत आहेत. मात्र, हा हल्ला का करण्यात आला याबाबत अद्याप माहिती मिळू शकलेली नाही.