एमपीएससी परीक्षा वारंवार पुढे ढकलल्याने तरुणाने केली आत्महत्या

रत्नागिरी : कोरोनाच्या काळात आणि आरक्षणाच्या मुद्द्यावरून एमपीएससी परीक्षा वारंवार पुढे ढकलल्याने महेश झोरे या तरुणाने आत्महत्या केली आहे. लांजा तालुक्यातील कोर्ले गावात ही घटना घडली आहे. महेशला स्पर्धा परीक्षा पास होऊन मोठा अधिकारी बनायचे होते.

महेशचे आई-वडील आणि दोन भाऊ कामानिमित्त मुंबईला राहत होते. अभ्यास करण्यासाठी तो कोर्ले इथल्या गावाकडच्या घरी आला होता. एकटा राहणाऱ्या महेशला भेटण्यासाठी त्याचे आजोबा गुरुवारी कोर्ले इथल्या घरी आले त्यावेळी महेशने गळफास लावून आत्महत्या केली असल्याचे त्यांच्या लक्षात आले. त्यांना मोठा धक्का बसला, पण महेशने आत्महत्या करण्यापूर्वी सुसाईड नोट लिहिली होती. एमपीएससी परीक्षा वारंवार पुढे ढकलल्याने नैराश्यातून मी आत्महत्या करत असल्याचं त्याने नमूद केलं होतं. लांजा पोलीस स्टेशनमध्ये याप्रकरणी अकस्मात मृत्यूची नोंद करण्यात आली आहे.