पावसाळी अधिवेशन : विरोधकांचा सभात्याग, विधानसभेचे कामकाज दिवसभरासाठी तहकूब

मुंबई : मुंबईत विधिमंडळाचे पावसाळी अधिवेशन आजपासून (17 जुलै) सुरू झाले. मात्र, विरोधकांनी कामकाज सुरू होताच थोड्या वेळाने सभात्याग केला. नंतर विरोधक कामकाज संपेपर्यंत सभागृहात परतले नाही. त्यानंतर पहिल्या दिवसाचे कामकाज अवघ्या काही तासांतच संपले.

दरम्यान, अधिवेशन सुरू होण्याअगोदर विरोधकांनी विधिमंडळाच्या पायऱ्यांवर सत्ताधाऱ्यांविरोधात जोरदार घोषणाबाजी केली. ‘सासूमुळे वाटणी झाली आणि सासू वाट्याला आली’, ’50 खोके, एकदम ओके…’, ‘घटनाबाह्य कलंकित सरकारचा धिक्कार’ अशा शब्दात सत्ताधाऱ्यांवर विरोधकांनी टीका केली. विधिमंडळाच्या पायऱ्यांवर सरकारविरोधी घोषणाबाजी करण्यासाठी काँग्रेस आणि उद्धव ठाकरे गट आले होते. पण शरद पवार यांना समर्थन देणाऱ्या आमदारांपैकी एकहीजण तिथे उपस्थित नव्हता.

विरोधकांनी सभात्याग केला
कामकाज सुरू झाल्यानंतर अधिवेशनात शेतकऱ्यांचा मुद्दा मांडण्यात आला. पुरेसा पाऊस पडलेला नाही, पेरण्या अपुऱ्या आहेत पण सरकारने शेतकऱ्यांकडे लक्षच दिलेले नाही, अशा स्वरुपाचा आरोप काँग्रेसच्या बाळासाहेब थोरातांनी केला. या आरोपाला राज्याचे उपमुख्यमंत्री देवेंद्र फडणवीस यांनी आकडेवारीसह उत्तर दिले. शेतकऱ्यांवर दुबार पेरणीचं संकट आल्यास सरकार शेतकऱ्यांच्या पाठिशी राहील. बोगस बियाणा संदर्भात कडक कारवाई करू. सकारकडून शेतकऱ्यांना 10 हजार कोटीचीं मदत देण्यात आली आहे, असे उपमुख्यमंत्री देवेंद्र फडणवीस यांनी सांगितले. या उत्तरानंतरही विरोधकांनी सरकारवर शेतकऱ्यांकडे दुर्लक्ष केल्याचा आरोप कायम ठेवला. यानंतर शेतकऱ्यांच्या प्रश्नांकडे दुर्लक्ष करणाऱ्या सरकारचा निषेध करत असल्याचे सांगत विरोधकांनी सभात्याग केला.

विधानसभेचे कामकाज दिवसभरासाठी तहकूब
संसद आणि विधिमंडळातील दिवंगत सदस्यांना श्रद्धांजली वाहून विधानसभेचे कामकाज दिवसभरासाठी तहकूब करण्यात आले.