फ्रीजने पेट घेतल्याने वाड्याला आग लागली, अरुंद रस्त्यामुळे बचावकार्यात अडथळे…

आळंदी : खेड तालुक्यातील आळंदी देवाची येथे घरातील फ्रीजने पेट घेतल्याने संपूर्ण वाड्याला आग लागली. ही दुर्घटना मंगळवारी (१२ एप्रिल) सायंकाळी चारच्या सुमारास घडली. यात वाड्याचे मोठे नुकसान झाले. या दुर्घटनेत जवळपास तीन सिलिंडरचा स्फोट झाला.

मिळालेल्या माहितीनुसार, माउलींच्या मंदिरापासून जवळच जुन्या जोग महाराज वारकरी शिक्षण संस्था इमारतीजवळ असलेल्या विठ्ठल रुक्मिणी मंदिर धर्मशाळाजवळ राहणाऱ्या मुकुंद क्षीरसागर यांच्या घरात ही दुर्घटना घडली. फ्रीजला मागच्या बाजूला आग लागली होती, ती नियंत्रणात आणत असताना लाकडी घराच्या वाशांनी पेट घेतला आणि आगीने रौद्र रूप धारण केले. यात घरातील साहित्य आणि त्याबरोबरच रोख रक्कम देखील आगीच्या भक्ष्यस्थानी पडली.

दरम्यान, घटनेची माहिती मिळताच अग्निशमन दल तेथे दाखल झाले. आगीचे रौद्र रूप पाहता पालिकेने चाकण नगरपरिषद, पीएमआरडीए यांच्या अग्रिशामक गाड्या बोलावल्या होत्या. परंतु, आग लागलेला वाडा अरुंद बोळीत असल्याने अग्निशामक बंब तिथे पोहोचू शकला नाही. शेवटी बाह्य रस्त्यावर गाड्या उभ्या करून पाइपद्वारे पाणी मारण्यात आले आणि अथक परिश्रम घेत आग विझवण्यात आली.