पणन सहसंचालक शशिकांत घोरपडे यांचा मृतदेह सापडला, दोन दिवसांपासून होते बेपत्ता

सातारा : राज्याचे पणन सहसंचालक शशिकांत पतंगराव घोरपडे यांचा मृतदेह सापडला आहे. ते दोन दिवसांपासून बेपत्ता होते आणि त्यांचा शोध सुरु होता. दरम्यान, NDRF च्या पथकाला नीरा नदीपात्रात शशिकांत घोरपडे यांचा मृतदेह सापडला आहे. घोरपडेंची आत्महत्या की हत्या आता या प्रकरणाचं गुढ वाढलं आहे.

पणन विभागात कार्यरत सहसंचालक शशिकांत घोरपडे बुधवारी बेपत्ता झाल्यानंतर त्यांच्या कुटुंबियांनी बेपत्ता झाल्याची तक्रार शिरवळ पोलीस ठाण्यात दिली होती. त्यानंतर पोलिसांनी तपास सुरू केला. तपास करत असताना घोरपडे यांचे शेवटचे लोकेशन शिरवळ येथे दिसून आले होते. सातारा-पुणे महामार्गावर असलेल्या शिंदेवाडी या महामार्गालगत असलेल्या हॉटेलच्या सीसीटीव्हीमध्ये शशिकांत घोरपडे नीरा नदीवरील पुलाकडे जाताना दिसत होते. तसेच त्यांची गाडी पुलाजवळ आढळून आली. त्यानंतर शशिकांत घोरपडे यांनी आत्महत्या केली असावी, या अंदाजाने पोलिसांनी नदीपात्रात शोध सुरू केला. शशिकांत घोरपडे यांचा शोध घेण्यासाठी पोलिसांनी एनडीआरएफच्या जवानांची मदत घेतली. काही वेळापूर्वी सातारा-पुणे हद्दीवर नीरा नदीच्या पात्रात घोरपडे यांचा मृतदेह रेस्क्यू टीमला आढळून आला.