पुणे : अवैधरित्या गॅस रिफिलिंग करताना मोठे स्फोट होऊन भीषण आग, चार स्कूल बस जळून खाक

पुणे : पिंपरी-चिंचवडमधील ताथवडे येथील जेएसपीएम महाविद्यालयाजवळ एका गॅस टँकरला भीषण आग लागल्याची घटना घडली आहे. आगीनंतर मोठे स्फोट होऊन हवेत आगीचे लोट पसरू लागल्याने लोकांची पळापळ सुरू झाली. आगीत तीन ते चार स्कूल बस जळून खाक झाल्या आहेत. पिंपरी चिंचवड महानगरपालिकेच्या अग्निशमन दलाच्या विभागाने पुष्टी केली आहे की ताथवडेमध्ये अनधिकृतपणे प्रोपीलीन गॅसचे रिफिलिंग हे रविवारी रात्री लागलेल्या आगीचे मुख्य कारण होते. ही घटना घडली तेव्हा व्यावसायिक आणि घरगुती सिलिंडरमध्ये गॅस रिफिल करण्यात येत होता.

अधिकार्‍यांनी दिलेल्या माहितीनुसार, तिरुपती कॅरियरचा एकूण 21 टन गॅस रिफिल केला जात होता आणि हे काम करत असलेले कर्मचारी स्फोट झाल्यानंतर घाबरून घटनास्थळावरून पळून गेल्याचा संशय आहे. एकूण 27 सिलिंडर घटनास्थळी सापडले त्यापैकी 9 चा स्फोट झाला होता आणि 8 स्फोटानंतर गळू लागले होते तर उर्वरित सिलेंडर फुटले नाहीत.

अग्निशमन दलाला रात्री ११ : 04 वाजता आपत्कालीन कॉल आला आणि पिंपरी चिंचवड महानगरपालिकेच्या अग्निशमन दल विभाग, पीएमआरडीए आणि एमआयडीसी क्षेत्रातील विविध स्थानकांतील अग्निशमन गाड्या तातडीने घटनास्थळी दाखल झाल्या. पिंपरी, थेरगाव, प्राधिकरण, राहटणी, चिखली, भोसरी, तळवडे, हिंजवडी, एमआयडीसी आणि पीएमआरडीए येथील बंब घटनास्थळी दाखल झाले होते. अग्निशमन दलाने आग आटोक्यात आणली. रात्री उशीरा कुलिंग ऑपरेशन सुरू झाले. गॅस टँकरमधून सिलिंडरमध्ये गॅस अवैधरित्या भरताना स्फोट झाला, अशी प्राथमिक माहिती आहे.

या आगीत तीन ते चार स्कूल बस जळून खाक झाल्या आहेत. अधिकाऱ्यांनी दिलेल्या माहितीनुसार, स्कूल बस जेएसपीएम कॉलेजच्या आवारात उभ्या होत्या. या सर्व बसेस गॅस इंधनावर चालत असून, रविवारी रात्री साडेअकराच्या सुमारास त्यातील तीन ते चार बसेस एकापाठोपाठ एक भडकल्या. स्फोटाचे आवाज अनेक किलोमीटरपर्यंत ऐकू येत होते, तर धुर आणि ज्वाळांचे लोट दूरवरून दिसत होते. या भयंकर घटनेने स्थानिक नागरिक आणि विद्यार्थ्यांना रस्त्यावर येण्यास भाग पाडले.

सुदैवाने या घटनेत कोणतीही जीवितहानी झाली नाही. आग आटोक्यात आणल्याने पुढील अनर्थ टळला. रविवारी रात्री एकापाठोपाठ एक सिलिंडरचा स्फोट झाल्यानंतर नागरिकांनी भीतीने घराबाहेर धाव घेतली. तसेच भीतीचे वातावरण पसरले होते.