पुणे : कोथरूडमध्ये झाड रिक्षावर कोसळून भीषण अपघात, एक जण गंभीर जखमी

पुणे : पुण्यात कोथरूडमध्ये आज सकाळी एक मोठं झाड रिक्षावर कोसळून भीषण अपघात झाला. यात पाच जण जखमी झाले. त्यापैकी एकाला उपचारासाठी रुग्णालयात दाखल करण्यात आले. कोथरूड येथील दशभुजा गणपती मंदिराजवळ आज सकाळी हा अपघात घडला. घटनेची माहिती मिळताच अग्निशमन दलाचे पथक तातडीने मदतीसाठी घटनास्थळी दाखल झाले.

पुणे महापालिकेच्या अग्निशमन दलाच्या अधिकाऱ्यांनी दिलेल्या माहितीनुसार, ही घटना सकाळी 9.15 च्या सुमारास घडली. रिक्षावर एक मोठं झाड कोसळलं, त्यात चालकासह इतर तीन जण जखमी झाले. जखमींपैकी एकाच्या डोक्याला आणि पायाला दुखापत झाली असून त्याला उपचारासाठी ससून जनरल हॉस्पिटलमध्ये दाखल करण्यात आले आहे, तर इतरांची प्रकृती स्थिर असून त्यांच्यावर घटनास्थळीच प्राथमिक उपचार करण्यात आले.

एरंडवणे अग्निशमन केंद्राचे अग्निशमन वाहन मदतीसाठी घटनास्थळी दाखल झाले. एका अधिकाऱ्याने सांगितले की, झाडाच्या फांद्या तोडून वाहनांच्या वाहतुकीसाठी त्या रस्त्यावरून हटवण्यात आल्या आहेत आणि परिस्थिती नियंत्रणात आहे.