पुणे : पीएमपीएमएल बसमधून पडून विद्यार्थिनी गंभीर जखमी, चालकावर गुन्हा दाखल

पुणे : राष्ट्रीय रासायनिक प्रयोगशाळा (एनसीएल) बस स्टॉपजवळ शनिवारी सकाळी एक धक्कादायक घटना घडली. पाषाण परिसरात शनिवारी सकाळी ७:१५ वाजता पीएमपीएमएल बसमधून पडल्याने १६ वर्षीय विद्यार्थिनी गंभीर जखमी झाली आहे. ही विद्यार्थीनी बारावीमध्ये शिक्षण घेत असून, ती तिच्या कॉलेजजवळील थांब्यावर उतरण्याच्या तयारीत असताना हा अपघात झाला.

पोलिसांच्या माहितीनुसार, बस चालकाने अचानक वेग वाढवल्यानंतर लगेचच ब्रेक लावल्याने ही घटना घडली. या घाईघाईच्या हालचालीत विद्यार्थिनी बसमधून खाली पडली आणि तिच्या डोक्याला गंभीर इजा झाली. तिला तत्काळ रुग्णालयात दाखल करण्यात आले असून तिची प्रकृती सध्या स्थिर आहे, मात्र डॉक्टरांच्या देखरेखीखाली ठेवण्यात आले आहे.

चतुश्रृंगी पोलिस ठाण्याचे उपनिरीक्षक शामल पाटील यांनी दिलेल्या माहितीनुसार, “घटनेच्या वेळी बसमध्ये फारशी गर्दी नव्हती. मुलगी दरवाज्याजवळ होती पण पायऱ्यांवर नव्हती. चालकाने आधी वेग वाढवला आणि नंतर अचानक ब्रेक दाबल्यामुळे ती खाली पडली.” ही विद्यार्थीनी मूळची पारनेर (अहिल्यानगर) येथील असून उच्च शिक्षणासाठी पुण्यात आली आहे. ती सध्या सुस परिसरात आपल्या मावशीकडे राहत असून अपघाताच्या दिवशी तिने कात्रज-देहू रोड बायपासवरील एका थांब्यावरून बसमध्ये प्रवेश केला होता.

निष्काळजीपणाने वाहन चालवल्याबद्दल पोलिसांनी बस चालकाविरोधात गुन्हा दाखल केला असून तपास पूर्ण होईपर्यंत त्याला निलंबित करण्यात आले आहे. विशेष बाब म्हणजे अपघातानंतर जखमी विद्यार्थिनीला रुग्णालयात पोहोचवणारा देखील हाच बस चालक होता.

पीएमपीएमएलने याप्रकरणी स्वतंत्र तपास सुरू केला आहे. संस्थेचे एक वरिष्ठ अधिकारी म्हणाले, “आमची टीम घटनास्थळी पोहोचली असून, मुलीच्या कुटुंबीयांची रुग्णालयात भेट घेतली आहे. आम्ही त्यांच्या वैद्यकीय खर्चासाठी ५०,००० रुपयांची मदत देण्याच्या प्रक्रियेत आहोत.” तसेच, काही कारणास्तव विद्यार्थिनीने उडी मारली असावी, अशी शक्यताही संस्थेच्या वतीने व्यक्त करण्यात आली आहे, मात्र याबाबत अद्याप पुष्टी झालेली नाही. घटनेच्या विविध पैलूंचा तपास सुरु असून, अधिकृत निष्कर्ष येणे बाकी आहे.