पुण्यात पुन्हा वीकेंड लॉकडाऊन, असे असतील नवे नियम.. जाणून घ्या

पुणे : पुणे महापालिका हद्दीत पुन्हा एकदा वीकेंड लॉकडाऊन लावण्यात आला आहे. याबाबत महापालिकेने आदेश जारी केले असून महापौर मुरलीधर मोहोळ यांनी ट्वीट करत याबाबत माहिती दिली आहे. शहरात कोरोना संसर्ग नियंत्रणात राहावा त्यासाठी हा निर्णय घेण्यात आला आहे. वीकेंड लॉकडाऊनमधून यावेळी अत्यावश्यक सेवा व जीवनावश्यक वस्तूंच्या दुकानांना सूट देण्यात आली आहे.

महापौर मुरलीधर मोहोळ यांनी सांगितले कि, “पुणे महापालिका हद्दीतील अत्यावश्यक सेवा वगळता इतर सर्व दुकाने, मॉल, सलून, ब्युटी पार्लर, स्पा आणि वेलनेस सेंटर शनिवार आणि रविवार पूर्णतः बंद राहणार आहेत तर रेस्टॉरंट, बार, फूड कोर्टमधून शनिवार-रविवार केवळ पार्सल सेवा देता येईल.”

विक्रम कुमार यांनी आज याबाबत प्रतिबंधात्मक आदेश जारी केला आहे. हा आदेश तत्काळ प्रभावाने लागू करण्यात येणार असून पुढील आदेशापर्यंत लागू असणार आहे. त्यानुसार रात्री १० वाजल्यानंतर वैध कारणाशिवाय पाच किंवा त्यापेक्षा अधिक लोकांना एकत्र येता येणार नाही किंवा फिरताही येणार नाही. पुणे महापालिका हद्द, पुणे कँटॉनमेंट बोर्ड आणि खडकी कँटॉनमेंट बोर्ड या संपूर्ण भागासाठी हे आदेश लागू असणार आहेत.

काय आहे आदेश?

1. जीवनावश्यक वस्तूंची दुकाने आठवड्याचे सर्व दिवस सायंकाळी सात वाजेपर्यंत खुली राहतील.
2. इतर सर्व दुकाने, मॉल, सलून, ब्युटी पार्लर, स्पा आणि वेलनेस सेंटर शनिवार व रविवार बंद राहणार.
3. रेस्टॉरंट, बार, फूड कोर्ट ग्राहकांसाठी शनिवार-रविवार बंद राहतील. केवळ पार्सल सेवेची मुभा. रात्री ११ वाजेपर्यंत पार्सल देता येईल.
4. रेस्टॉरंट, बार, फूड कोर्ट सोमवार ते शुक्रवार रात्री १० वाजेपर्यंत ५० टक्के क्षमतेने सुरू ठेवता येतील.
5. वीकेंड वगळता अन्य दिवशी मॉल ५० टक्के ग्राहक क्षमतेने सुरू ठेवता येतील.