पुणे : जलतरण तलावात क्लोरीन गॅस लीक, २० ते २२ जणांना श्वास घेण्यास त्रास

पुणे : पिंपरी चिंचवडमधील कासारवाडी परिसरातील डॉ. बाबासाहेब आंबेडकर जलतरण तलावात क्लोरीन गॅस लिकेज झाल्याने पोहण्यासाठी आलेल्या २० ते २२ जणांना श्वास घेण्यास त्रास होऊ लागला. त्यामुळे परिसरात एकच खळबळ उडाली. ही घटना सकाळी आठच्या सुमारास घडली. मंगळवारी सकाळी या घटनेची माहिती मिळताच पिंपरी चिंचवड महापालिकेच्या अग्निशमन दलाचे पथक तातडीने घटनास्थळी दाखल झाले.

मिळालेल्या माहितीनुसार, आसपासच्या भागातील नागरिकांना खोकला आणि घशाच्या समस्यांसह श्वसनाचा त्रास होऊ लागला होता. बचाव पथकाने नागरिकांना तातडीने यशवंतराव चव्हाण स्मृती रुग्णालयात उपचारासाठी दाखल केले. या घटनेत अनेक नागरिक बेशुद्ध देखील झाले आणि जलतरण तलावाच्या आजूबाजूच्या 500 मीटर परिसरात वायू पसरला, त्यामुळे जवळचा रस्ता आणि जलतरण तलाव नागरिकांसाठी बंद करण्यात आला.

एका सिलिंडरमध्ये गळती झाल्याचे निदर्शनास आले. क्लोरीन गॅस असलेल्या सिलिंडरमधून गळती सुरू झाली होती. त्यानंतर आवश्यक उपकरणे वापरून अधिकाऱ्यांनी परिस्थिती नियंत्रणात आणली.