पुणे : पीएमपीएमएलच्या धडकेत पादचाऱ्याचा मृत्यू, चालकावर गुन्हा दाखल

पुणे : पुणे शहरातील भोसरी परिसरात मंगळवारी पीएमपीएमएल बसने दिलेल्या धडकेत एका 26 वर्षीय पादचाऱ्याला आपला जीव गमवावा लागला आहे. मृताच्या नातेवाईकाच्या तक्रारीनंतर याप्रकरणी पीएमपीएमएल चालकावर गुन्हा दाखल करण्यात आला आहे.

पोलिसांनी दिलेल्या माहितीनुसार, अंगद अच्छेलाल तुर्हा (२६, रा. गोपाळगंज, बिहार) असे मृत व्यक्तीचे नाव असून तो भोसरी येथील पुणे-नाशिक महामार्गावरून चालला असताना त्याला भरधाव वेगाने येणाऱ्या पीएमपीएमएल बसने धडक दिली. या अपघातात तो गंभीर जखमी झाला. त्याला उपचारासाठी रुग्णालयात नेण्यात आले मात्र डॉक्टरांनी त्याला मृत घोषित केले.

याप्रकरणी मृत तरुणाच्या काकांनी पुणे महानगर परिवहन महामंडळ लिमिटेड (पीएमपीएमएल) चालकाविरुद्ध भोसरी पोलीस ठाण्यात फिर्याद दिली आहे. त्यानुसार, पोलिसांनी चालकावर भारतीय दंड संहिता (आयपीसी) च्या कलम 304 (अ) आणि मोटार वाहन कायद्याच्या कलम 119/117 नुसार गुन्हा दाखल केला आहे. याप्रकरणी पुढील पोलीस तपास सुरू आहे.