पुणे रेल्वे स्थानकावर बॉम्बसदृश वस्तू आढळल्याने खळबळ, बॉम्बशोधक पथकाकडून तपासणी सुरु

पुणे : पुणे रेल्वे स्थानकाच्या मुख्य प्रवेशद्वारापाशी शुक्रवारी सकाळी बॉम्बसदृश वस्तू सापडल्याने खळबळ उडाली आहे. ही स्फोटके नक्की कोणत्या स्वरुपाची आहेत, हे अद्याप स्पष्ट झालेले नाही. घटनेची माहिती मिळताच बॉम्बशोधक पथक घटनास्थळी दाखल झाले आहे. सध्या पुणे रेल्वे स्थानक रिकामे करण्यात आले आहे. तसेच पुण्याकडे येणाऱ्या सर्व रेल्वे गाड्या थांबवण्यात आल्या आहेत.

पुण्याचे पोलीस आयुक्त अमिताभ आयुक्त घटनास्थळी दाखल झाले आहेत. सध्या पुणे रेल्वे स्थानकाची कसून तपासणी केली जात आहे. बॉम्बशोधक आणि बॉम्बनाशक पथक याठिकाणी हजर आहे. यावेळी अमिताभ गुप्ता यांनी प्रसारमाध्यमांशी संवाद साधला. सकाळी साडेदहा वाजता रेल्वे स्थानकावर स्फोटकसदृश वस्तू आढळून आल्या. प्रथमदर्शनी तरी या वस्तू जिलेटीन असल्याचे वाटत नाही. पण बॉम्बशोधक पथकाकडून या वस्तूंची तपासणी सुरु आहे. या घटनेनंतर पुणे पोलीस स्थानकाच्या परिसरातील पोलीस बंदोबस्त वाढवण्यात आला आहे.