सार्वजनिक ठिकाणी थुंकणे पडणार महागात, अजित पवार यांनी दिले कडक कारवाईचे आदेश

जिल्ह्याचे पालकमंत्री आणि राज्याचे उपमुख्यमंत्री अजित पवार यांनी बेफीकीरपणे वागणाऱ्या नागरिकांविरूद्ध कडक कारवाई करण्याचे धोरण स्वीकारले आहे. पुणे आणि पिंपरी चिंचवडमधील करोनाच्या सद्यस्थितीचा आढावा घेण्यासाठी विभागीय आयुक्त कार्यालयात बैठक घेण्यात आली.

‘करोनाचा संसर्ग रोखण्यासाठी प्रत्येक नागरिकाने नियमांचे पालन केले पाहिजे. अनेक नागरिक हे मास्क न घालता सार्वजनिक ठिकाणी वावरताना दिसतात. तसेच रस्त्यांवर थुंकण्याचेही प्रकार केले जातात. त्यांच्याविरूद्ध कारवाईसाठी महापालिका आणि पोलिस विभागांनी मोहीम सुरू करावी. मास्क न घातल्यास पाचशे रुपये आणि सार्वजनिक ठिकाणी थुंकल्यास एक हजार रुपये दंड वसूल करा’, असे आदेश अजित पवार यांनी दिले.

’नागरिकांनी नियमांचे पालन करणे हे सर्वांच्या हिताचे आहे. सार्वजनिक हिताला बाधा आणणाऱ्या नागरिकांविरूद्ध कारवाई करण्यात यावी. करोनाविरूद्धची लढाई ही सर्वांचीच आहे. त्यासाठी नागरिकांनी साथ देणे आवश्यक आहे,’ असे पवार म्हणाले. ‘करोनाबाधित रुग्णांवर उपचार करणाऱ्या डॉक्टरांना उपचारांबाबत तज्ज्ञ डॉक्टर आणि टास्क फोर्समार्फत प्रशिक्षण देण्यात यावे. करोनाचा संसर्ग रोखण्यासाठी पोलिस यंत्रणा अहोरात्र कार्यरत आहे. पोलिसांना उपचाराबाबतच्या सुविधा देण्याची दक्षता घ्यावी,’ असेही अजित पवार म्हणाले.