शरद पवार यांच्यावर आणखी एक शस्त्रक्रिया, प्रकृती स्थिर

मुंबई : राष्ट्रवादी काँग्रेसचे अध्यक्ष शरद पवार रुग्णालयात असून त्यांच्यावर आणखी एक शस्त्रक्रिया करण्यात आली आहे. राष्ट्रवादीचे प्रवक्ते नवाब मलिक यांनी यांसदर्भात माहिती दिली आहे. शरद पवार यांना बुधवारी पुन्हा ब्रीच कँडी रुग्णालयात दाखल करण्यात आलं होतं. तिथं त्यांची नियमित तपासणी झाली होती. त्यानंतर आज त्यांच्यावर आणखी एक शस्त्रक्रिया करण्यात आली. रुग्णालयात तपासणीसाठी गेले असता त्यांच्या तोंडात एक अल्सर आढळून आला होता. आज तो अल्सर काढण्यात आला आहे. राष्ट्रवादीचे प्रवक्ते नवाब मलिक यांनी ट्वीट करत ही माहिती दिली आहे.

दरम्यान, शरद पवारांची तब्येत चांगली असून ते रुग्णालयात विश्रांती घेत आहेत. शिवाय देशातील कोरोनाच्या परिस्थितीचा आढावाही ते घेत आहेत, असं नवाब मलिक यांनी म्हटलं आहे. तसंच, ते लवकरच आपले कामकाज पुन्हा सुरु करतील, असा विश्वासही त्यांनी व्यक्त केला आहे.