फरार शिक्षणाधिकारी वैशाली झनकर दोन दिवसांनंतर लाचलुचपत कार्यालयात हजर

नाशिक : आठ लाख रुपयांची लाच घेतल्याप्रकरणी एसीबीच्या चौकशीनंतर फरार झालेल्या नाशिक जिल्हा परिषदेच्या (माध्यमिक) शिक्षणाधिकारी वैशाली झनकर लाचलुचपत कार्यालयात स्वतः हजर झाल्या आहेत. अटक पूर्व जामिनावर सुनावणी होण्यापूर्वी त्या एसीबी कार्यालयात दाखल झाल्या. आता त्यांना कोर्टात हजर करण्यात येईल.

एका शिक्षण संस्थेच्या चार शाळांना शासनाकडून २० टक्के अनुदान मंजूर झाले आहे. या मंजूर अनुदानाप्रमाणे शाळेतील ३२ शिक्षक आणि शिक्षकेतर कर्मचारी यांची पदनिश्चिती करून त्यांचे नोव्हेंबर २०२० पासून थकीत वेतन काढून देण्यासाठी तसेच मंजूर झालेल्या अनुदानाप्रमाणे वेतन पुढे नियमित पुढे सुरू ठेवण्यासाठी शिक्षणाधिकारी वैशाली झनकर यांच्या वतीने प्राथमिक शिक्षक पंकज दशपुते यांनी तक्रारदाराकडे ९ लाखांची लाच मागितली. वैशाली झनकर यांनी तडजोडीअंती ८ लाख रुपये स्वीकारण्याचे मान्य केल्याचे एसीबीच्या पडताळणीत आढळून आले. तसेच पुढील व्यवहार त्यांचे शासकीय वाहन चालक ज्ञानेश्वर येवले यांच्याशी करण्याविषयी सांगितले होते.

मंगळवारी एसीबीने कारवाई करत शिक्षणाधिकारी वैशाली झनकर यांच्या वतीने तक्रारदाराकडून ८ लाखांची लाच स्वीकारताना येवले याला रंगेहाथ पकडले. तसेच वीर आणि दशपुते यांनाही एसीबीने ताब्यात घेत तिघाविरुद्ध नाशिकच्या भद्रकाली पोलिस ठाण्यात गुन्हा दाखल करण्यात आला. या कारवाईनंतर एसीबीने तिन्ही आरोपींच्या घरी छापे मारत घराची झडती घेतली. मात्र, त्यानंतर शिक्षणाधिकारी वीर या अचानक फरार झाल्या होत्या. तर येवले आणि दशपुते यांना न्यायालयाने १३ ऑगस्टपर्यंत पोलिस कोठडी सुनावली होती.