गार्डनमध्ये खेळताना पाईपलाईन दुरुस्तीसाठी खणलेल्या खड्ड्यात पडून 2 मुलांचा दुर्दैवी मृत्यू

मुंबई : मुंबईच्या ॲन्टॉप हिल परिसरात गार्डनमध्ये खेळताना खड्ड्यात पडून 2 लहान मुलांचा दुर्दैवी मृत्यू झाला आहे. 12 वर्षीय यशकुमार चंद्रवंशी आणि 9 वर्षीय शिवम जैस्वाल अशी मृत मुलांची नावे आहेत. ही मुले उद्यानात खेळत होती. मात्र, पाईपलाईन दुरुस्तीकरीता खणण्यात आलेल्या खड्ड्यात पडून त्यांचा मृत्यू झाला. अँटॉप हिलमधल्या सेक्टर 7 परिसरात ही घटना घडली आहे.

मिळालेल्या माहितीनुसार, मुंबईतल्या ॲन्टॉप हिल परिसरातल्या सेक्टर 7 मधल्या उद्यानात पाइपलाइन दुरुस्तीचं काम सुरु सुरु असून त्यासाठी खड्डा खोदण्यात आला होता. या खड्ड्यात मोठ्या प्रमाणात पाणी साचलं होतं. या मैदानात खेळणारी दोन मुलं पाण्याच्या डबक्यात पडली. त्यानंतर त्यांना तात्काळ पाण्यातून बाहेर काढून सायन रुग्णालय, मुंबई येथे नेण्यात आलं. मात्र, डॉक्टरांनी दोन्ही मुलांना मयत घोषित केलं. मृत्यूमुखी पडलेल्या मुलांच्या नातेवाईकांचा शोध घेतल्यानंतर या मुलांची ओळख पटली.

दरम्यान, याप्रकरणी ॲन्टॉप हिल पोलीस स्थानकात गुन्हा दाखल करण्यात आला आहे. घटनेची माहिती मिळताच पोलिसांनी तपास सुरु केला आहे. नातेवाईकांकडून सीपीडब्लूडीचे अधिकारी आणि कॉन्ट्रॅक्टरवर कारवाईची मागणी करण्यात येत आहे. घटनास्थळी पाईपलाईन दुरुस्तीचे काम करताना सुरक्षिततेच्या उपाययोजना केल्या नसल्यानं ही दुर्घटना घडल्याचं प्रथमदर्शनी दिसून येत आहे. याप्रकरणी पोलिसांनी कॉन्ट्रॅक्टरला ताब्यात घेतलं आहे.