माटुंगा रेल्वे स्थानकावर दोन एक्स्प्रेसची धडक, तीन डबे रुळावरून घसरले…

मुंबई : माटुंगा रेल्वे स्टेशनजवळ एक्स्प्रेसचा मोठा अपघात झाला आहे. एक्स्प्रेसचे शेवटचे तीन डबे रुळावरुन घसरले आहेत. दोन ट्रेन समोरासमोर आल्याने अपघात झाल्याची शक्यता वर्तविण्यात येत आहे. गाडी क्रमांक ११००५ मुंबई दादर–पुडुचेरी चालुक्य एक्स्प्रेस या एक्स्प्रेसचा अपघात झाला आहे. आज रात्री १०.15 वाजताच्या सुमारास ही घटना घडली आहे. सुदैवाने अपघातात कुणीही जखमी झालेलं नाही.

दादर-पुडुचेरी एक्स्प्रेस (11005) आणि गदग एक्स्प्रेस मुंबईतील माटुंगा रेल्वे स्थानकावर एकाच रुळावर आल्यावर एकमेकांना धडकल्या. या अपघातात पुद्दुचेरी एक्स्प्रेसचे तीन डबे रुळावरून घसरले. गाड्यांचे डबे आदळल्याने ओव्हरहेड वायर तुटली आणि त्यामुळे मोठा आवाजही ऐकू आला.

मध्य रेल्वेच्या सीपीआरओनुसार, आतापर्यंत कोणतीही जीवितहानी झालेली नाही. दादरहून पुद्दुचेरी एक्सप्रेस निघाली, तर गदग एक्सप्रेस सीएसटी येथून निघाली होती. ट्रॅक न बदलल्यामुळे गदग एक्स्प्रेसही पुद्दुचेरी एक्स्प्रेसच्या रुळांवर आली, त्यामुळे दोन्ही गाड्यांचे अनेक डबे एकमेकांवर आदळले. मात्र, दोन्ही गाड्यांचा वेग कमी असल्याने मोठी दुर्घटना टळली. अपघातामुळे सध्या लोकल गाड्यांच्या वाहतुकीवर परिणाम झाला आहे. ही घटना रात्री उशिरा सव्वा दहाच्या सुमारास घडली.

माटुंगा रेल्वे स्टेशनजवळील अपघाताने मध्य रेल्वेची वाहतूक विस्कळीत झाली आहे. अनेक प्रवासी अडकून पडले आहेत.  घटनेनंतर तातडीने रेल्वे प्रशासनाचे अधिकारी आणि कर्मचारी घटनास्थळावर पोहोचले आहेत. माटुंगा रेल्वे स्टेशनजवळील अपघातान मुंबईबाहेर जाणाऱ्या सहा ते सात एक्सप्रेस गाड्यांवर याचा परिणाम होणार असून लोकल सेवेवरही परिणाम होणार आहे. तसंच अपघातामुळे जलद अप आणि डाऊन रेल्वे सेवा देखील बंद आहे. फास्ट ट्रॅकवरील सर्व लोकल स्लो ट्रॅकवर वळविण्यात आल्या आहेत. त्यामुळे स्लो ट्रॅकवर मोठा भार आला आहे.