एअर होस्टेस हत्या प्रकरण : पोलीस ठाण्याच्या शौचालयात आढळला आरोपीचा मृतदेह

मुंबई : एअर होस्टेस रुपल ओगरेच्या हत्येप्रकरणी अटक करण्यात आलेल्या आरोपीने लॉकअपमध्ये आत्महत्या केल्याची माहिती मिळाली आहे. विक्रम अठवाल असे या आरोपीचे नाव आहे. पोलीस ठाण्याच्या शौचालयात ४० वर्षीय आरोपीचा मृतदेह त्याच्याच पॅन्टच्या साहाय्याने लटकलेल्या अवस्थेत आढळून आला. मुंबई पोलीस हे प्रकरण संशयास्पद मानून तपास करत आहेत.

मिळालेल्या माहितीनुसार, रविवारी रायपूर येथील रहिवासी असलेली एअर होस्टेस रुपल ओगरे हिचा मृतदेह मुंबईतील मरोळ भागात भाड्याच्या फ्लॅटमध्ये संशयास्पद स्थितीत आढळून आला. याप्रकरणी मुंबई पोलिसांनी तपासानंतर खुनाचा गुन्हा दाखल केला होता. याच प्रकरणात पोलिसांनी सोसायटीचा सफाई कर्मचारी विक्रम अठवाल याला ताब्यात घेतले होते. त्याची चौकशी सुरु होती. मात्र दरम्यान शुक्रवारी सकाळी पोलिसांना त्याचा मृतदेह सापडला.

काय आहे प्रकरण?
रुपल ओगरे सहा महिन्यांपूर्वी एका खासगी विमान कंपनीत फ्लाइट क्रू ट्रेनिंग कोर्ससाठी मुंबईत आली होती. तेथे ती मरोळ परिसरात एका फ्लॅटमध्ये भाड्याने राहत होती. तिच्यासोबत तिची चुलत बहीणही राहत होती. मात्र काही दिवसांपूर्वी ती तेथून रायपूरला परतली होती. त्यानंतर रुपल तिथे एकटीच राहत होती. पोलिसांनी ताब्यात घेतलेला आरोपी हा सोसायटीत सफाई कामगार म्हणून काम करत असे. अठवाल विवाहित असून त्याला दोन मुली आहेत. अठवाल आणि रुपल यांच्यात छोट्या-छोट्या गोष्टींवरून वारंवार वाद व्हायचे. पोलिसांच्या प्राथमिक तपासानुसार, रविवारी कचऱ्याच्या पिशव्या घेण्याच्या आणि कमोड साफ करण्याच्या बहाण्याने आरोपी रुपलच्या फ्लॅटमध्ये घुसला आणि तिची हत्या केली.