मिठी नदीत दोन तरुण बुडाले, एका तरुणाचा मृतदेह सापडला

मुंबई : गुरुवारी रात्री माहीम परिसरात मिठी नदीत दोन तरुण बुडाल्याची घटना घडली आहे. यापैकी एका तरुणाचा मृतदेह सापडला असून दुसऱ्याचा शोध अद्याप सुरु आहे. या तरुणांची ओळख पटली असून त्यांची नावे जावेद आणि आसिफ अशी आहेत.अग्निशमन दलाकडून बचावकार्य सुरु आहे.

मिळालेल्या माहितीनुसार, जावेद आणि आसिफ गुरुवारी माहीमच्या दर्ग्यात दर्शनासाठी आले होते. तेथून परतताना दोघेही खाडीपाशी गेले. त्यावेळी दोघांपैकी एकाचा पाय घसरला आणि तो खाडीत पडला. दुसरा तरुण त्याला वाचवायला गेला. मात्र, मिठी नदीच्या पाण्याची पातळी जास्त असल्याने तोदेखील पाण्यात पडला आणि दोघेही वाहून गेले. मध्यरात्री भरती असल्याने अग्निशमन दलाला बचावकार्य karta आले नाही. भरती ओसरल्यानंतर अग्निशम दलाने पहाटेपासून बचावकार्याला सुरुवात केली. यावेळी मिठी नदीच्या किनाऱ्यालगत एका तरुणाचा मृतदेह आढळून आला. तर दुसऱ्या तरुणाचा शोध सुरु आहे.