महाड इमारत दुर्घटनेत १६ जणांचा मृत्यू, तब्बल ४० तासांनी बचावकार्य पूर्ण

महाड शहरात तारीक पॅलेस ही पाच मजली निवासी इमारत कोसळल्याची घटना २४ ऑगस्टला संध्याकाळी घडली. या दुर्घटनेतील मदत व बचावकार्य पूर्ण झाले असून दुर्घटनेत एकूण १६ जणांचा मृत्यू झाला. यात ७ पुरुष आणि ९ महिलांचा समावेश आहे. तर इमारतीच्या ढिगाऱ्यातून नऊ जणांना सुखरूप बाहेर काढण्यात यश आले आहे, ज्यात पाच पुरुष, तीन महिला आणि एक बालकाचा समावेश आहे.

ही निवासी इमारत कोसळल्यानंतर स्थानिक बचाव पथके आणि राष्ट्रीय आपत्ती प्रतिसाद दल यांनी मदत व बचावकार्य सुरु केले होते. सर्व प्रशासकीय यंत्रणा घटनास्थळावर तळ ठोकून होत्या.

महाड तारीक पॅलेस इमारत दुर्घटना, दोघांचा मृत्यू; १८ ते १९ जण बेपत्ता

२४ ऑगस्टला आठ जणांना ढिगाऱ्याखालून बाहेर काढण्यात आलं. यात एकाचा मृत्यू झाला होता. २५ तारखेला मध्यरात्री एक वाजेपासून राष्ट्रीय आपत्ती प्रतिसाद दलाच्या जवानांनी मदत व बचाव कार्याचा ताबा घेतला. दुपारी बारा वाजल्यानंतर टप्प्या-टप्प्याने १५ मृतदेह हाती लागत गेले. चार वर्षाचा मोहम्मद बांगी याला दुर्घटनेच्या १९ तासांनंतर तर ६० वर्षाच्या मेहरुनीसा अब्दूल हमीद काझी यांना २६ तासांनंतर सुखरूप बाहेर काढण्यात आले. त्यानंतर आज सकाळी दहा वाजेपर्यंत उर्वरीत दोन बेपत्ता व्यक्तींचे मृतदेह एनडीआरएफच्या जवानांनी ढिगाऱ्याखालून बाहेर काढले. यानंतर हे मदत व बचावकार्य थांबविण्यात आले. सलग ४० तास हे मदत व बचावकार्य सुरु होते.